Month: February 2022

काठमाडौँ । जिल्ला ट्राफिक कार्यालय जुम्लाले सवारी कारबाहीबाट आर्थिक वर्ष ०७६÷७७ मा रु. १० लाख १४ हजार राजस्व संकलन गरेको छ।

ट्राफिक नियम उल्लंघन गर्ने १ हजार १ सय १३ वटा सवारीसाधन कारबाहीमा पर्दा सोही रकम बराबरको राजस्व संकलन भएको हो।

ट्राफिक कार्यालय जुम्लाका प्रहरी जवान लालबहादुर विकका अनुसार ट्राफिक नियम उल्लंघन गर्ने एक सय १६ ट्रकबाट १ लाख १४ हजार राजस्व संकलन भएको हो । त्यस्तै, ९३ बसबाट ८५ हजार, १ सय ८३ जिप र कारबाट १ लाख ६२ हजार ५ सय, ९५ ट्याक्टरबाट ८६ हजार, ४ सय २४ मोटरसाइकलबाट ३ लाख ८४ हजार ५ सय रुपैयाँ राजस्व संकलन भएको हो।

त्यसैगरी २ सय अटोबाट १ लाख ८० हजार र २ वटा जेसिबीबाट २ हजार गरी १० लाख १४ हजार रुपैयाँ राजस्व संकलन गरेको हो।

कर्णाली राजमार्गको नाग्म–सदरमुकाम खलंगा– जुम्ला सडकखण्डमा गुड्ने सवारीसाधनमध्ये सबैभन्दा बढी मोटरसाइकल कारबाहीमा पर्ने गरेको जिल्ला ट्राफिक कार्यालय जुम्लाले जनाएको छ ।

ट्राफिक नियम उल्लंघन गर्ने सवारीसाधनका चालकलाई कारबाही गर्ने गरिएको प्रहरी हवल्दार कुशराज शाहीले बताए।
गत आर्थिक वर्ष ०७५÷७६ मा यो वर्षभन्दा बढी १७ लाख ९५ हजार रुपैयाँ राजस्व संकलन भएको थियो। उनले भने, यो वर्ष लकडाउनका कारण कम भएको हो ।’

काठमाडौँ। राष्ट्र बैंकमा कार्यरत कर्मचारीले कार्यालयमै टिकटक बनाउने, बैंकका नीति तथा कार्यक्रममाथि सामाजिक सञ्जालमा अनावश्यक र नकारात्मक टिप्पणी गर्ने र आफूखुसी बेवीनारमा भाग लिने क्रम बढेको भन्दै राष्ट्र बैंकले ध्यानाकर्षण पत्र नै जारी गरेको छ। कार्यालयमा अनुशासनहीनता बढेको भन्दै नेपाल राष्ट्र बैंकले यस्तो कडाई गरेको हो।

वेबीनारमा भाग लिनु परेमा, प्रस्तुतीकरण दिनु परेमा, विभिन्न सञ्चारमाध्यम र सामाजिक सञ्जालमा जानकारी दिनु परेमा अनुमति लिनुपर्ने राष्ट्र बैंकले जनाएको छ।
अब वेबीनारमा भाग लिने र प्रस्तुतीकरण दिने, लाञ्छनायुक्त भाषा प्रयोग गरेर सामाजिक सञ्जालमा लेख्ने, टिकटक बनाउने जस्ता क्रियाकलाप गरेमा राष्ट्र बैंक कर्मचारी सेवा विनियमावली २०६८ अनुसार विभागीय कारबाही हुने ध्यानाकर्षण पत्रमा उल्लेख छ।

सिन्धुपाल्चोक । सिन्धुपाल्चोकको भोेटेकोशी गाउँपालिका–४ फुल्पिङकट्टीमा गएको पहिरोमा पुरिएर मृत्यु हुनेको सङ्ख्या पाँच पुगेको छ।

साउन १ गतेराति पहिरोले घर पुरेर बेपत्ता भएका दुई जनामध्ये ८४ वर्षीया सोमबुटी शेर्पा र उनकी ४८ वर्षीया छोरी सेमसाङ शेर्पाको १४ दिनपछि आज शव फेला परेपछि मृतकको सङ्ख्या ५ पुगेको जिल्ला प्रहरी कार्यालयका प्रहरी नायब उपरीक्षक माधवप्रसाद काफ्लेले बताए।

माथिबाट आएको पहिरोले स्थानीय ग्याल्जेन शेर्पाको घर बगाएपछि उनकी आमा, श्रीमती, बहिनी र दुई छोरीसहित पाँच जना पुरेको थियो । घरमुली शेर्पा भने राजधानीमा बस्दै आएकाले पहिरोबाट जोगिएका थिए।

दैनिक पानी परिरहेकाले माथिबाट लगातार लेदो माटो झर्ने क्रम जारी रहेकाले शव निकाल्न लामो समय लागेको वडाध्यक्ष सानदोर्जे शेर्पाले बताए। पहिरोबाट एक विद्यालयसहित तीन घर पुर्नुका साथै २४ घर उच्च जोखिममा परेका छन्। विस्थापित १ सय ६२ जनालाई विभिन्न सुरक्षित स्थानमा राखिएको वडाध्यक्ष शेर्पाले बताए।

काठमाडौं। भक्तपुर नगरपालिका—१० कमलविनायकस्थित कमलपोखरीमा डुबेर १ जनाको मृत्यु भएको छ। भक्तपुर चाँगुनारायण नगरपालिका—९ सौडौल बस्ने ५१ वर्षीय राजेश खड्काको मंगलबार मृत्यु भएको हो।

पोखरीमा डुबी खड्का बेपत्ता भएको भन्ने जानकारी प्राप्त हुनासाथ महानगरीय प्रहरी वृत्त जगाती र महानगरीय प्रहरी परिसर भक्तपुरबाट खटिएको प्रहरीले उनलाई तत्कालै उद्धार गरेको थियो।

गम्भीर अवस्थामा उद्धार गरिएका उनलाई उपचारको लागि भक्तपुर अस्पतालतर्फ लैजाने क्रममा बाटोमै मृत्यु भएको हो।

काठमाडौँ। त्रिभुवन विश्वविद्यालयले रोकिएका परीक्षा यही भदौको तेस्रो हप्ताबाट शुरु गर्ने तयारी थालेको छ। बन्दाबन्दी खुलेसँगै विद्यार्थीले दुई हप्ताभित्र काठमाडौँ आउन सक्ने र त्यहि अनुसारको समय माग भएकाले भदौ तेस्रो हप्तादेखि परीक्षा गर्ने तयारी थालेको हो।

त्रिवि परीक्षा नियन्त्रण कार्यालय (पनिका)का परीक्षा नियन्त्रक पुष्पराज जोशीले स्नातकोत्तर तह र स्नातक तहका सेमेष्टर परीक्षा भदौको तेस्रो हप्ता र वार्षिक परीक्षा असोजको पहिलो हप्तादेखि शुरु गर्ने गरी तयारी थालिएको बताए। ‘भदौको पहिलो हप्ता विद्यार्थी आएपछि १४ दिनसम्म क्वारेन्टिनमा बस्नुपर्ने हुन्छ’, उनले भने, ‘अनि त्यसपछि हामी सेमेष्टरको परीक्षा सबैभन्दा कम विद्यार्थीबाट शुरु गर्ने तयारी गरेको छौँ।’

त्रिविले ती परीक्षाका लागि चाँडै नै कार्यतालिका प्रकाशन गर्ने तयारीमा समेत रहेको छ। यसपटक विद्यार्थीलाई पायक पर्ने नजिकका क्याम्पसमा परीक्षा केन्द्र राखिनेछ। त्रिविले गत चैत ७ गतेदेखि कोभिड–१९ को कारणले सेमेष्टर तथा वार्षिक सबै परीक्षा स्थगन गरेको थियो। स्नातकोत्तर तहको प्रथम, स्नातक तह दोस्रो र विभिन्न तहका सेमेष्टर प्रणालीका परीक्षा रोकिएका छन्। वार्षिक परीक्षाअन्तर्गत स्नातकोत्तर तह प्रथम र स्नातक तह चौथो वर्षको परीक्षा बाँकी रहेको छ।

यसअघि व्यवस्थापन सङ्कायको डीन कार्यालयले भदौ दोस्रो हप्तादेखि स्नातकोत्तर तह र स्नातक तह प्रथम, तेस्रो, पाँचौँ र सातौँ सेमेष्टरको परीक्षा भदौ तेस्रो हप्ताबाट गर्ने जानकारी कार्यालयका सहायक डिन प्राडा ध्रुवकुमार गौतमले सूचना प्रकाशित गरिसकेका छन्।

काठमाडौँ । मेलम्ची नगरपालिका–४ बस्ने थानकुनेका सोमबहादुर तामाङलाई प्रहरीले पक्राउ गरेको छ । सोही ठाउँका साइला तामाङ नामक व्यत्तिसँग सामान्य भनाभन हुँदा उनले खुकुरी प्रहार गरेको आरोपमा उनलाई पक्राउ गरिएको इलाका प्रहरी कार्यालय मेलम्चीका प्रहरी निरीक्षक फलबहादुर तामाङले जानकारी दिए।

खुकुरी हानेको सूचना पाउनासाथ इलाका प्रहरी कार्यालय मेलम्ची र भोटेचौरको टोलीले सोमबहादुरलाई घर नजिकै लुकिरहेको अवस्थामा पक्राउ गरेको प्रहरीले जनाएको छ।

घम्भीर घाइते साइलाको दीर्घायु अस्पातल काठमाडौँमा उपचार भइरहेको प्रहरी निरीक्षक तामाङले बताए। खुकुरी प्रहार गर्ने सोमबहादुरलाई नियन्त्रणमा लिएर मङ्गलबार जिल्ला अदालत सिन्धुपाल्चोकबाट म्याद थप आदेश लिई अनुसन्धान गर्न प्रहरीलाई अनुमति दिएको प्रहरी निरीक्षक तामाङले जानकारी दिए।