Month: February 2022

काठमाडौँ ।सिंहदरबार भित्रैको क्यान्टिनमा म्याद सकिएका खाद्यवस्तुहरु पाईएको छ । देशको मुख्य प्रशासनिक केन्द्र सिंहदरवार भित्र नै म्याद सकिएका र अखाद्य वस्तु विक्रिवितरण भइरहनुको साथै यहाँ स्थित क्यान्टिन (चमेना गृह)हरूमा उपभोग्य म्याद समाप्त भएका खाद्य वस्तु बिक्री वितरण मात्रै होइन, उपभोक्ता संरक्षण ऐन, २०७५ विपरीतका कामहरू गरेको पाइएको छ ।

वाणिज्य, आपूर्ति तथा उपभोक्ता हित संरक्षण विभाग र खाद्य प्रविधि तथा गुण नियन्त्रण विभागको संयुक्त टोलीले शुक्रवार गरेको अनुगमनका क्रममा सिंहदरवारभित्रका शतप्रतिशत क्यान्टिनमा म्याद सकिएका खाद्य सामग्री बिक्री गरेको भेटिएको छ ।

सिंहदरवारभित्रका कर्मचारी र सेवाग्राही लक्षित तीन वटा केन्द्रीय क्यान्टिन (कन्चन चमेना गृह), अर्थ मन्त्रालय परिसरमा सञ्चालित म्यानेजमेन्ट सर्भिस र उद्योग, वाणिज्य तथा आपूर्ति मन्त्रालय परिसरस्थित गोसाईंकुण्ड भोजनालयमा अनुगमन गरिएकोमा तीन वटै मापदण्ड विपरीत सञ्चालन भइरहेको पाइएको हो । जसमध्ये केन्द्रीय क्यान्टिनलाई कारबाही स्वरूप जरिवाना गरिएको छ ।

कन्चन चमेना गृहका नाममा सञ्चालित उक्त क्यान्टिनले कागजात देखाउन नसकेपछि कारबाही स्वरूप १० हजार जरिवाना गरिएको छ । कागजपत्र मात्र होइन, क्यान्टिनको किचनमा फोहोर देखिएपछि सफाइ गर्न समेत निर्देशन दिइएको छ ।

यस्तै अर्थ मन्त्रालय परिसरमा रहेको म्यानेजमेन्ट सर्भिस र उद्योग मन्त्रालयमा सञ्चालित गोसाईंकुण्ड भोजनालयले म्याद सकिएका पानी, पेय पदार्थ र परोठाहरु विक्रिवितरण गरेको पाइएकोले नष्ट गरिएको छ । यति मात्रै होइन, क्यान्टिनमा प्रमाणीकरण नै नभएका तराजु राखिएको पनि पाइएको विभागले जनाएको छ । ती क्यान्टिनहरूबाट ३ हजार १ सय ४५ रुपैयाँ बराबरको पेय पदार्थ र अन्य खाद्य सामग्री बरामद गरी नष्ट गरिएको पनि विभागले जनाएको छ ।

तीन वटै क्यान्टिनलाई आवश्यक कागजपत्र सहित ७ दिनभित्र विभागमा उपस्थित हुन निर्देशनदिँदै मापदण्ड अनुसार मात्र सञ्चालन गर्न निर्देशनसमेत दिइएको छ ।

देशको प्रधानमन्त्रीको कार्यालयदेखि मुख्यसचिवसमेत बस्ने परिसरमै वर्षौँदेखि बिना मापदण्ड र गुणस्तरहीन खाद्य पदार्थहरूको विक्रिवितरण हुनु र स्वयं कर्मचारीहरूले नै सो उपभोग गर्न बाध्य हुनुले बत्ती मुनिको अँध्यारो उखान चरितार्थ भएको एक उपसचिवको भनाई छ । ‘जहाँ नीति निर्माण हुन्छ र जसले त्यसको कार्यान्वयन गर्छन् तिनीहरूकै हविगत यस्तो छ भने अन्यको के कुरा गर्नु’ ती उपसचिवले भने, ‘उच्च पदस्थहरूका लागि मन्त्रालय तथा तारेबाटै बाट खाजा जाने भएपछि बाँकी को त के मतलब र ?’

सिंहदरवारभित्र क्यान्टिन सञ्चालन गर्दा नमुना क्यान्टिन सञ्चालन हुनुपर्ने भए पनि त्यति नै गर्न नसके पनि कम्तीमा मापदण्ड त पुर्‍याउनु पर्ने उनको भनाई छ ।

यस अघि प्रधानमन्त्रीकै निर्देशनमा तत्कालीन प्रधानमन्त्री तथा मन्त्रिपरिषद् कार्यालयका प्रशासन महाशाखा प्रमुख एवं प्रवक्ता विनोद बहादुर कुँवरको संयोजकत्वमा गठित समितिले सिंहदरवार परिसर सरसफाइदेखि गुणस्तरहीन खाना खुवाउने दर्जनौँ क्यान्टिनहरू बन्द गराएका थिए ।

काठमाडौँ । बहुप्रतीक्षित मेलम्ची खानेपानीको साढे २६ किलोमिटर सुरुङमा आजदेखि पानी भर्न थालेर परीक्षण गरिने भएको छ । खानेपानी मन्त्रालय र मेलम्ची खानेपानी विकास समितिले आवश्यक सम्पूर्ण प्राविधिक काम पूरा गरेसँगै पानी हालेर परीक्षण गरिन लागिएको हो ।

आयोजनास्थल मेलम्चीमै औपचारिक कार्यक्रम राखेर पानी भर्न शुरु गरिने छ । खानेपानी मन्त्री मणि थापाको उपस्थितिमा सुरूङमा पानी हालेर परीक्षण गरिने मेलम्ची खानेपानी विकास समितिका प्रवक्ता राजेन्द्र पन्तले जानकारी दिए ।

गत असारमै सुरुङमा पानी भनेर परीक्षण गरिएको थियो तर हेलुम्बु गाउँपालिका–१ स्थित अम्बाथानको अडिटको मुख्य गेट (नं १७) फुटेर निस्केको पानीले आयोजनाका एक इन्जिनीयर र चालकलाई बगाएको थियो । त्यसपछि आयोजनाको मुख्य दातृ निकाय एशियाली विकास बैंक एडीबी) को अनुदान सहयोगअन्तर्गत चारजना विशेषज्ञको टोलीले सुरुङ, मुहानस्थल, गेटलगायतका संरचनाको पुनः जाँच गरेको थियो । “विशेषज्ञहरुले निरीक्षण गर्नुभयो, उहाँका महत्वपूर्ण सुझावलाई समावेश गरी पुनः परीक्षणका लागि तयार भयो”, आयोजनाका कार्यकारी निर्देश तिरेश खत्रीले भने।

विगतको जस्तो दुर्घटना नहोस् भन्नका लागि आयोजनाले यसपालि विशेष सतर्कता अपनाएको खत्रीले बताए । परीक्षणका क्रममा हेलिकप्टरलाई तयारी अवस्थामा राखिएको छ । उद्धार योजना बनाएर धुलिखेलदेखि काठमाडौँस्थित विभिन्न अस्पतालहरुसँग समन्वय गरिएको छ । खत्रीका अनुसार सिन्धुपाल्चोकको मेलम्ची खोलादेखि काठमाडौँको सुन्दरीजलसम्मको साढे २६ किलोमिटर सुरुङ भर्न १६ दिन लाग्नेछ । शुरुआती चरण भएकाले सुरुङको क्षमताअनुसार पानी नछाडिने उनले बताए ।

काठमाडौँ । केन्द्रीय सदस्यलाई नेपाल–प्रचण्डको निर्देशनः जुनसुकै बेला जस्तोसुकै निर्णय हुन सक्छ, तपाईहरु तयार रहनुस्
काठमाडौं । नेकपा प्रचण्ड–माधव समूहले आफ्ना केन्द्रीय सदस्यलाई जुनसुकै बेला जस्तोसुकै निर्णय लिनुपर्ने हुन सक्ने भएको बताउँदै तयारी अवस्थामा रहन समेत निर्देशन दिएका छन् ।

शुक्रबार पार्टी कार्यालय पेरिसडाडाँमा आकस्मीक बसेको केन्द्रीय कमिटीको अनौपचारिक बैठकमा अध्यक्षद्वय पुष्पकमल दाहाल प्रचण्ड र माधवकुमार नेपालले केन्द्रीय सदस्यहरुलाई तयारी अवस्थामा रहन निर्देशन दिएका हुन् ।

‘जुनसुकै बेला जस्तोसुकै निर्णय निर्णय लिनुपर्ने हुन्छ, तपाईंहरु तयारी अवस्थामा रहनुहोला । दुवै अध्यक्षको सार यही थियो’, एक केन्द्रीय सदस्यले अनलाइनखबरसँग भने । शुक्रबारको बैठक झण्डै दुई घण्टा चलेको छ ।

बैठकमा अध्यक्षद्वय पुष्पकमल दाहाल प्रचण्ड र माधवकुमार नेपालले समसामयिक राजनीतिक अवस्थाबारे जानकारी गराएका थिए । संसद् विघटन विरुद्ध उक्त पार्टीले गरिरहेको आन्दोलन र त्यसको परिणामबारे जनसंघर्ष समितिका संयोजक एवम् पार्टी प्रवक्ता नारायणकाजी श्रेष्ठले जानकारी गराएका थिए ।

बैठकमा प्रचण्ड, नेपाल र श्रेष्ठले संसद् विघटन विरुद्धको आन्दोलनलाई बलियो समर्थन मिल्दै गएको निष्कर्ष सुनाएका थिए । यो अवधिमा संसद् विघटनको निर्णय प्रतिगमन हो भन्ने सिद्ध भएको छ । नागरिक समाज, बौद्धिक, बुद्धिजिवी, पूर्वप्रधानन्यायाधीहरु, पेशाकर्मी, आमसञ्चार माध्यमहरु लगायतले यो सरकारको कदमलाई प्रतिगमन भनिसकेको छ’, श्रेष्ठले भनेका थिए ।

हिजो मात्रै केन्द्रीय सदस्यहरुलाई यो समूहले नागरिकता सहित पेरिसडाडाँमा बोलाएको थियो । बैठकमा उपस्थित केन्द्रीय सदस्यहरुले नागरिकताको प्रतिलिपी बुझाउँदै हस्ताक्षर गरेका छन् ।

काठमाडौँ । पहाडी जिल्ला लमजुङमा अनुदानमा यहाँका ९० जना किसानलाई हाते ट्र्याक्टर वितरण गरिएको छ । कृषिमा यान्त्रीकरण गरी लागत घटाउने र उत्पादन बढाउने उद्देश्यले जिल्लाको बेंसीशहर नगरपालिकाले नगरभित्रका ९० जना किसानलाई आज हाते ट्र्याक्टर वितरण गरेको हो ।

नगर प्रमुख गुमानसिंह अर्यालले किसानलाई ट्र्याक्टर वितरण गर्नुहुँदै कृषिमा यान्त्रीकरण गरी लागत घटाउन र कृषि क्षेत्रलाई प्रविधिमैत्री बनाउन नगरपालिकाले किसानलाई हाते ट्र्याक्टर वितरण गरेको बताए । उनले नगरपालिकाले अनुदानमा किसानलाई हाते ट्र्याक्टर उपलब्ध गराएपछि बाँझो जग्गा प्रयोगमा आउन थालेको बताए । वैदेशिक रोजगारको सिलसिलामा विदेश पलायन भएर गाउँ फर्किएका युवालाई गाउँमै स्वरोजगार बनाउने र जनशक्तिको अभावमा गाउँमा बाँझो रहेका जग्गालाई पुनःप्रयोगमा ल्याउन हाते ट्र्याक्टर प्रभावकारी भएको नगरप्रमुख अर्यालले बताए ।

यस नगरपालिकाले चालू आर्थिक वर्षमा विनियोजन गरेको रु २५ लाख २० हजार बजेटमा ट्र्याक्टर खरीद गरी किसानलाई वितरण गरेकोे नगरको कृषि शाखा प्रमुख सूर्यप्रसाद सेढाईंले बताए। नगरपालिकाले यस वर्ष तीन प्रकारको हाते ट्र्याक्टर वितरण गरेको छ । नगरपालिकाले यस वर्ष सात हर्सपावर डिजेल वाला, सात हर्स पावर पेट्रोल वाला र छ हर्सवापरको गरी तीन प्रकारको ट्र्याक्टर वितरण गरेको छ । रु ५० हजार मूल्यपर्नेमा ५० प्रतिशत अनुदानमा रु २५ हजार किसानको रु २५ हजार नगरपालिकाको, रु ६० हजार र रु ७० हजार पर्नेमा रु २८ हजार नगरपालिकाको र बाँकी किसानको गरी वितरण गरेको कृषि शाखा प्रमुख सूर्यप्रसाद सेढाईंले बताए ।

गत वर्ष माग भई आएका सबै १०६ किसानलाई ५० प्रतिशत अनुदानमा हाते ट्र्याक्टर विरतण गरेको थियो । यस वर्ष भने हाते ट्र्याक्टरका लागि ३०० जना किसानको आवेदन परेकामा ९० जनालाई मात्र विरतण गरिएको नगरपालिकाले जनाएको छ । नगरपालिकाले मिनिटिलर वितिरणसँगै भाडामा एकरुपता ल्याउन मिनिटिलरको भाडासमेत निर्धारण गरेको छ । पछिल्लो समय गोरु पाउन गाह्रो, युवा पुस्ता वैदेशिक रोजगारमा रहेकाले गाउँमा खेतालाको अभाव हुनेलगायतका समस्याले गर्दा गाउँमा खेतीयोग्य जमीन बाँझो रहन थालेको थियो । यस ट्र्याक्टरको प्रतिघण्टा ७०० रुपैयाँ तोकिएको छ ।

काठमाडौं । मधेश मामिलाका जानकारी तथा राजनीतिक विश्लेषक डा.राजेश अहिराज प्रदेश २ को प्रदेश प्रमुखमा नियुक्त भएका छन् ।

राष्ट्रपति विद्यादेवी भण्डारीले आज प्रदेश २ प्रमुख तिलक परियारलाई पदमुक्त गरी डा.अहिराजलाई नियुक्त गरेकी हुन् ।

राष्ट्रपति कार्यालयका प्रवक्ता जगन्नाथ पन्तद्वारा जारी प्रेस विज्ञप्तिमा प्रदेश प्रमुख परियारलाई नेपालको संविधानको धारा १६५ को उपधारा (१) को खण्ड (ख) बमोजिम प्रदेश प्रमुख परियारलाई पदमुक्त गरी डा।अहिराजलाई नियुक्त गरिएको जनाइएको छ ।

को हुन् डा.राजेश अहिराज ?

दुई दशकभन्दा बढी समयदेखि नेपाली पत्रकारितामा सक्रिय डा.राजेश अहिराज एउटा प्रखर वक्ता, मधेश मामिलाका जानकार तथा राजनीतिक विश्लेषक रुपमा परिचित छन् । उनले ‘मधेश आन्दोलन र मधेशवादको विकासक्रम’ विषयमा त्रिभुवन विश्वविद्यालयबाट राजनीति शास्त्रमा विद्यावारिधि गरेका छन् । नेपाली राजनीतिबारे सूक्ष्म अध्ययन गरेका डा.अहिराजले गर्दै आएका विश्लेषणात्मक विचार राष्ट्र र राष्ट्रियताप्रति ओतप्रोत भएको देखिन्छ ।

उनले विभिन्न पुरस्कार, सम्मानपत्र तथा नेपाल विद्याभूषण ‘क’ बाट विभूषित भइसकेका छन् । नेपाली राष्ट्रियता तथा राष्ट्रवादको वकालत गर्दै उनले नेपालमा समतामूलक समाज निर्माणको पक्षमा छलफल तथा बहस गर्दै आएका छन् ।

डा।अहिराजको जन्म रौतहट जिल्लाको तत्कालीन संग्रामपुर गाउँपालिका वडा नं. ४ (हाल गढीमाई नगरपालिका–४) मा वि.सं. २०३६ जेष्ठ ६ गते भएको थियो ।

अध्ययनः

डा.अहिराजले माध्यमिक तहको शिक्षा श्रीमती कृष्णादेवी माध्यमिक विद्यालय विष्णुपुर, रौतहटबाट सन् १९९५ मा पूरा गरेका छन् । यसैगरी बिहार इन्टरमिडिएट एजुकेशन काउन्सिल भारतको एसएलके कलेज सितामढीबाट सन् १९९७ मा एससी उत्तीर्ण गरेका हुन् ।

यस्तै, त्रिचन्द्र कलेज काठमाडौंबाट सन् २००५ मा बी.ए. (सोसियोलोजी एजण्ड कल्चर), युनिभर्सिटी क्याम्पस काठमाडौंबाट सन् २००६ मा बी।एड (पोलिटिकल साइन्स एण्ड हिस्ट्री), नेपाल ल क्याम्पसबाट सन् २००९ मा एल.एल.बी. पूरा गरेका छन् । त्यसैगरी, ‘मधेश आन्दोलन र मधेशवादको विकासक्रम’ विषयमा त्रिभुवन विश्वविद्यालयबाट सन् २०१५ मा विद्यावारिधि गर्नुभएको छ ।

पुरस्कार तथा सम्मानः

उनलाई नेपाल सरकारद्वारा संविधान दिवसको अवसरमा वि।सं। २०७७ असोज ३ गते ‘प्रवल जनसेवाश्री’ सम्मानित गरेको छ । यस्तै, प्रधानसेनापतिबाट ‘प्रधानसेनापति पदक–२०७६’ पुरस्कार, राष्ट्रपति विद्यादेवी भण्डारीद्वारा ‘राष्ट्रिय पत्रकारिता पुरस्कार–२०७४’ पुरस्कार, नेपाल विद्याभूषण–२०७४, प्रेस काउन्सिल पुरस्कार–२०७३ लगायत एक दर्जनभन्दा बढी पुरस्कार तथा सम्मानपत्र प्राप्त गरेका छन्।

यसैगरी पत्रकारिता क्षेत्रमा उनले एक दर्जनभन्दा बढी विषयगत विभिन्न तालिमहरु प्राप्त गर्नुभएको छ भने विभिन्न विषयहरुमा प्रशिक्षकको रुपमा समेत भूमिका निर्वाह गरिसकेका छन् ।

काठमाडौं । नेपाली कांग्रेस निटक विद्यार्थी समूह नेविसंघबीच झडप भएको छ । नेपाल ल क्याम्पसमा विएलएलबीको कक्षा सञ्चालनको विषयलाई लिएर नेपाल ल क्याम्पसमा नेविसंघ समूहबीच दोहोरो झडप भएको हो ।

नेपाल विद्यार्थी संघ नेपाल ल क्याम्पसका पूर्व अध्यक्ष रञ्जिता कार्कीले विएलएलबीको तयारी कक्षा सञ्चालन गरिरहेको अर्को समूह माथि सांघातिक आक्रमण गरेको नेविसंघ ल क्याम्पसले जनाएको छ । विद्यार्थीहरुलाई तयारी कक्षा सञ्चालन गरिरहेको अवस्थामा पूर्व अध्यक्ष कार्कीको समूहले कक्षाकोठामा प्रवेश गर्दै कक्षा सञ्चालन गर्ने शिक्षक र विद्यार्थी माथि आक्रमण गरेको नेपाल ल क्याम्पसका नेता शिद्ध राज जोशीले जानकारी दिएका छन् ।

कार्की समूहको आक्रमणमा परि नेपाल ल क्याम्पसका नेविसंघ नेतृ पविना जोशी, शिद्धराज जोशी विरेन्द्र मडाई लगाएतका आधा दर्जन विद्यार्थी घाइते भएका छन् । दल बल सहित हुलदंगामा उर्तिएकी कार्कीले विद्यार्थीहरुलाई तथानाम गाली गलौज र अपशब्द प्रयोेग गर्दै आक्रमण गरेको विद्यार्थी नेता मडाईले नेशनपाटी डटकमलाई जानकारी दिएका छन् । हामी विद्यार्थीहरुलाई तयारी कक्षा सञ्चालन गरिरहेका थियौं । त्यत्तिकै बिना कारण कार्कीले ल क्याम्पस भन्दा बाहिरका गुन्डाहरु ल्याएर कक्षामा आक्रमण गरि विद्यार्थीहरुलाई घाइते बनाएको मडाईले बताएका छन् ।

नेविसंघ ल क्याम्पसमा कार्की समूहले दादागिरी गर्दै विद्यार्थी माथि सन्त्रास र द्धन्द्ध सिर्जना गरेको उनीहरुको आरोप रहेको छ ।