Month: February 2022

काठमाडौं-बैंक तथा बिमा क्षेत्रमा विज्ञ रमेशकुमार भट्टराई सम्मानित भएका छन् ।

विरगञ्जको रेडियो नारायणीले विशेष कार्यक्रमको आयोजना गरी भट्टराईलाई सम्मान गरेको हो ।

तीन दशक भन्दा लामो समयदेखि बैंक तथा बिमा क्षेत्रमा सक्रिय रहेका भट्टराई नारायणी एफएफका संस्थापक अध्यक्ष समेत हुन् । संस्थापक अध्यक्षका हिसाबले उनलाई सम्मान गरिएको हो ।

शनिबार बिरगञ्जमा आयोजित विशेष समारोहकाबीच शिक्षा तथा विज्ञान प्रविधि मन्त्री देवेन्द्र पौडेलले कदर पत्रसहित सम्मान गरे ।

राष्ट्रिय वाणिज्य बैंकले सातै प्रदेशका लागि ८३६ जना कर्मचारी भर्नाका लागी दरखास्त आह्वान गरेको छ ।

बैंकको पदपुर्ती समितीले आइतबार एक सूचना जारी गर्दै चौथो तहको साहयकदेखि नवौं तहको बरिष्ठ प्रबन्धक पद सम्मको कर्मचारी माग गरेको हो ।

बैंकले केन्द्रीय कार्यलयको लागि प्रशासन अन्तर्गत २ जना वरिष्ठ प्रबन्धक, ८ जना प्रबन्धक र १८ जना उप प्रबन्धक पदमा कर्मचारी माग गरेको छ ।

यस्तै सातवटै प्रदेश अन्तर्गतको कार्यलयहरुका लागि प्रशासन,कानुन,सूचना प्रविधि र नगदमा सहायक प्रबन्धक, बरिष्ठ सहायक र सहायक पदमा कर्मचारी मागेको हो ।

बैंकले खुला गरेको रोजगारीमा आवेदन दिन चाहने इच्छुक र योग्य आवेदकले बैंकको वेवसाइटमा गएर अनलाइन मार्फत मंसिर ५ भित्र आवेदन दिन सकिने छन् ।

यस्तै दोब्बर दस्तुर तिरेर मंसिर १२ सम्म आवेदन दिन सकिने पनि बैंकले जनाएको छ ।

काठमाडौं-छायांकनका क्रममा नेपाल आएको बलिउड फिल्म ‘उचाइ’ युनिट भारत फर्किएको छ ।

उचाइको कलाकार तथा प्राविधिक टोली नेपालमा छायांकन सकेर शनिबार स्वदेश फर्किएको हो।

फिल्म ‘उचाइ’ सुरज बडजात्याको निर्देशनमा बन्दै गरेको छ ।

फिल्म छायांकनका लागि अनुपम खेर, बोमन इरानी, परिणीति चोपडा लगायतका चर्चित बलिउड कलाकार नेपाल आएका थिए ।

फिल्मको लुक्ला, मनाङ, मुस्ताङ काठमाडौं लगायतका ठाउँमा छायांकन गरिएको छ।

मित्रताको कथामा रहेको भनिएको फिल्ममा अमिताभ बच्चन र डेनी डेनजोङ्पाको मुख्य भूमिका रहनेछ ।

छायांकनका लागि अमिताभ र डेनी पनि नेपालमा आउने भनिए पनि विविध कारण आउन सकेनन्।

फिल्ममा परमिता आरएल राणा, सरोज लामिछाने, डम्बर बोहरा, उरुषा जोशी, रमेश बज्राचार्य, तेन्जिङ ग्याचो शेर्पा, निरज मुक्तान, नारायण विश्वकर्मा लगायतका नेपाली कलाकारकाे पनि अभिनय रहेकाे छ।

‘मैंने प्यार किया’, ‘हम आपके हैं कौन’, ‘हम साथ साथ हैँ’ लगायत सफल र चर्चित फिल्म लेखन तथा निर्देशन गरेका सुरजको यो आठौं फिल्म हो।

‘उचाइ’ २०२२ मा प्रदर्शन गर्ने तयारीमा निर्माण टोली रहेको छ।

जनकपुरधाम – जनकपुरधाम उपमहानगरपालिकाका नगर प्रमुखको घर अगाडी जनप्रतिनिधिले फोहोर थुपारेका छन् ।

नगर प्रमुखको घर अगाडि सोही पालिकाका जनप्रतिनिधिहरुले फोहोर थुपारेका हुन्।

वडाध्यक्षसहितका जनप्रतिनिधिहरुले नगर प्रमुख लालकिशोर साहले फोहोर व्यवस्थापनमा ध्यान नदिएको भन्दै उनको घर अगाडि फोहोर थुपारेका हुन्।

उपमहानगरले नगरभित्रको फोहोर व्यवस्थापन नगर्दा जनकपुरधाम उपमहानगरकै केही वडाध्यक्षहरु नगर प्रमुख साहको घर अगाडि फोहर थुपार्ने पुगेका छन्।

तिहार तथा छठ पर्व नजिकिए पनि डम्पिङ साइटको अभावमा उपमहानगरभित्रको फोहोर उठ्न सकेको छैन ।

जसले गर्दा जनप्रतिनिधिहरुले विरोधस्वरुप नगर प्रमुखकै घर अगाडि फोहोर थुपारेका छन् ।

जनकपुरधाम उपमहानगरपालिका – १ का वडाध्यक्ष शत्रुघन साह, वडा नं. ४ का अध्यक्ष सुदर्शन सिंह र वडा नं. ७ का अध्यक्ष जानकीराम साहको नेतृत्वमा युवाहरुको टोलीले फोहोर थुपारेका हुन्।

नगरका विभिन्न स्थानबाट ट्याक्टरमा फोहोर संकलन गरेर वडाध्यक्ष जानकीराम साह आफै ट्याक्टर चलाएर नगर प्रमुखको घरसम्म पुगेका थिए।

फोहोर व्यवस्थापनका लागि नगर प्रमुख साहले चासो नदेखाएको, फोहोर व्यवस्थापनका लागि उपमहानगरले ट्याक्टरसम्म उपलब्ध नगराएकोले विरोधस्वरुप नगर प्रमुखको घर अगाडि फोहोर थुपार्नुपरेको वडाध्यक्ष सुदर्शन सिंहले बताए।

जनकपुरधामकी उपप्रमुख रीताकुमारी झाले सरसफाइको जिम्मा आफूले माग्दा पनि मेयरले नदिएको गुनासो गरिन्।

काठमाडौँ–साताको पहिलो दिन आइतबार सुनको मूल्य ओराला लागेको छ।

नेपाल सुनचाँदी व्यवसायी महासंघका अनुसार छापावाला सुनको मूल्य तीन सय रुपैयाँले घटेर ९१ हजार सात सय रुपैयाँमा कारोबार भइरहेको छ।

तेजाबी सुनको मूल्य पनि तोलामा तीन सय रुपैयाँले घटेर ९१ हजार दुई सय रुपैयाँमा कारोबार भइरहेको छ।

यस्तै चाँदीको मूल्य तोलामा पाँच रुपैयाँले घटेर १२ सय ४० रुपैयाँमा कारोबार भइरहेको छ।

कर्णाली-सधैँझैँ खेतमा पुगेर मार्सी धान भण्डारण गर्ने जुम्ला तिला गाउँपालिका–४ का स्थानीय किसान मुखको गाँस खोसिँदा निराशामा छन् ।

यही असोज ३१ देखि कात्तिक १ गतेसम्म परेको अविरल वर्षाका कारण कात्तिक २ गते राति आएको बाढीले धानखेत बगर बनेपछि उनीहरुको कमाइखाने आधार सकिएको छ ।

विगतका वर्षहभन्दा यस वर्ष किसानको धान निकै राम्रोसँग फलेको थियो । उनीहरु कात्तिक २ गते काट्ने तयारी गर्दै थिए ।

यद्यपि दसैँका कारण उनीहरुले धानबाली भण्डारण गर्न पाएका थिएनन् । दुर्भाग्यः एक दिनको पर्खाइले उनीहरुको जीउने आधार बगर बन्न पुग्यो ।

पसिना बगाएर फलाएको अन्नबाली बाढीले बगाउँदा अहिले त्यहाँका किसान भोकमरीको चिन्ताले पिरोलिन थालेका छन् ।

तिला–४ जुम्ला साँपुल्लीगाउँका पशुपति शाहीलाई दसैँको खुशी प्राकृतिक विपत्तिले राम्रैसँग लुटेको दुखेसो पोख्नुभयो ।

उहाँले भन्नुभयो, “दसैं मनाएलगत्तै धान भण्डारण गर्ने योजनामा थियौँ । तर विपत्तिले हाम्रो श्रम, मेहेनत र पसिना सबै बगायो ।

एक दिनको पर्खाइले पुर्पुरोमा हात लगाउनुपर्ला भन्ने कुनै कल्पना गरेका थिएनौँ । अहिले त हामी सुकुम्बासीजस्तै भएका छौँ ।”

बाढीले अन्न उत्पादन गर्ने धानखेत बगर बनेको दुःख पोख्दै उहाँले सरकारले दुई कट्टा चामल दिनुभन्दा धानखेत बनाउन सहयोग पुर्‍याए दीर्घकालीन समस्या समाधान हुने बताउनुभयो ।

सोही वडाका बाढीपीडित पद्मकौंरा शाहीले यति भयानक विपत्तिमा पनि सङ्घ र प्रदेश सरकार बेवास्ताग्रही रहेको दुखेसो पोख्नुभयो ।

“जनताको दुःखको बेला दुःख बुझ्न नआउने जनप्रतिनिधि र सरकार चुनावताका खेत–खेतमा धान रोप्न सहयोग गरेजस्तो गर्दै भोट माग्न आउँछन्”, शाहीले भन्नुभयो, “यो त उनीहरु सबैको झुठको खेती रहेछ । कहिले घर त कहिले खेतमा आउनेको अनुहार र व्यवहार राम्रैसँग चिनियो ।”

बाढीपीडित हाँसु सुनारले आफ्नो धानखेतको कुनै अवशेष नरहेको जनाउनुभयो । धानखेतमा बाढीले ल्याएको दाउरा सङ्कलन गर्नेबाहेक अरु सबै गुमेको सुनारले दुखेसो पोख्नुभयो ।

बाढीले दलित तथा गरिबहरुलाई ठूलो समस्या परेको छ । प्राकृतिक विपत्तिले रु एक अर्ब बराबरको क्षति भएको विषयमा गाउँपालिका, जिल्ला विपद् व्यवस्थापन समिति हुँदै प्रदेश तथा सङ्घ सरकारसँग तत्काल राहत र दीर्घकालीन जीविकोपार्जनका कार्यक्रमका लागि अनुरोध गरिएको वडाध्यक्ष सन्तबहादुर शाहीले जानकारी दिनुभयो ।

बाढीले झोलुङ्गे तथा काठे पुलहरु बगाइदिएपछि तिला गाउँपालिका–४ जुम्लास्थित नुवाकोट, रावतवाडा र साँपुल्ली गाउँका स्थानीयवासीलाई आवागमनमा ठूलो समस्या भएको छ ।

रावतवाडा गाउँका नागरिक पुल नहुँदा पाँच मिनेटमा पुग्न ठाउँ अहिले करिब दुई घण्टा पैदल हिँड्नुपरेको छ । बाढीपश्चात आजभोलि त्यहाँका बासिन्दा धमिलो नदीको पानी खान बाध्य छन् ।

विद्युत् नहुँदा तिला तथा तातोपानी गाउँपालिका–४ जुम्लाका स्थानीय समुदाय अन्धकारमा रात बिताउँदै आएका छन् ।

कात्तिक २ गते रातिको बाढीले यहाँ चारवटा विद्युत्गृह ध्वस्त बनाएको थियो । सिँचाइ कार्यालय जुम्लाका प्रमुख अनुप श्रेष्ठका अनुसार बाढीले तातोपानी गाउँपालिका–४ गिरीखोला जुम्लाको सिँचाइ क्षेत्रमा मात्र रु १५ करोड क्षति पुर्‍याएको छ ।

बाढीले यहाँका घर, विद्यालय, विद्युत्, स्याउ बगैँचा, दर्जनौँ काठका पुल, खानेपानी परियोजना, स्थानीय घट्ट र विशेषगरी चार हजार रोपनीभन्दा बढी धान खेतीयोग्य भूमि बगर बनाएको छ ।

धेरै किसान सुकुम्बासी हुनुपर्ने समस्या आइलागेको छ । तिला गाउँपालिकाका अध्यक्ष रतननाथ योगीले घरसहित करेसाबारी क्षति भएकालाई रु आठ लाख ५० हजार र घर क्षति मात्र भएकालाई रु पाँच लाख दिने सरकारले निर्णय गरेको जनाउनुभयो ।

धानखेती क्षतिको यकिन विवरणलाई आधार मानी बाढीले ढाकेको र बगर बनाएको अवस्थाअनुसार किसानलाई राहत वितरण तथा क्षतिपूर्ति न्यायायिक ढङ्गले गरिने उहाँले बताउनुभयो ।