Month: February 2022

काठमाडौँ । आइसिसी यू-१९ महिला टी-ट्वान्टी विश्वकप एसिया छनोट अन्तर्गतको अन्तिम खेलमा नेपालले मलेसियालाई २५ रनले पराजित गरेको छ ।

मलेसियामा टस जितेर पहिले ब्याटिङ गरेको नेपालले २० ओभरमा ७ विकेट गुमाएर ८६ रन बनाएको थियो । नेपालका लागि अञ्जलि विश्वकर्माले सर्वाधिक ३३ रन जोडिन् । यस्तै आश्मा पुलामी मगरले २६ रन बनाइन् । अन्य चार खेलाडीले दोहोरो अङ्क बनाउन सकेनन् ।

८७ रनको विजयी लक्ष्यसहित मैदानमा उत्रिएको मलेसियाले निर्धारित ओभरमा चार विकेट गुमाएर ६१ रन मात्र बनाउन सक्यो। मलेसियाका लागि एलिसा हन्टरले २८ रन बनाउनु बाहेक अन्य कुनै खेलाडीले दोहोरो अङ्क छुन सकेनन् ।

बलिङमा नेपालकी कृतिका मरासिनीले २ तथा मनीषा कुमारी उपाध्यायले एक विकेट लिए । नेपालको विश्वकप सपना भने समाप्त भइसकेको छ । तर, नेपालले आज मलेसियालाई हराएर छनोटमा सुखद अन्त्य गरेको छ ।

नेपालले पहिलो खेलमा कतारलाई ७९ रनले हराएको थियो । दोस्रो खेलमा ८ रनमा अलआउट भएको नेपाल युएईसँग १० विकेटले पराजित भएको थियो । तेस्रो खेलमा नेपालले भुटानलाई ४ विकेटले हराएको थियो । चौथो खेलमा नेपाल थाइल्याण्डसँग ४९ रनले पराजित भएको थियो ।

काठमाडौं । काठमाडौं उपत्यकाको फोहोर नुवाकोटको बञ्चरेडाँडामा फ्याँक्ने क्रममा आज स्थानीयले अवरोध गरेपछि तनावको स्थिति सिर्जना भएको हाे ।

मंगलबारदेखि प्रहरीको सहयोगमा फोहोर व्यवस्थापन सुरु गरिएको थियो । तर बुधबार पनि स्थानीयले अवरोध गरेपछि प्रहरीले केही राउण्ड अश्रुग्यास हानेको उपत्यका प्रहरी कार्यालय, रानीपोखरीका डीआईजी उत्तमराज सुवेदीले जानकारी दिएका छन् ।

स्थानीयले ढुंगामुढा गरेपछि स्थितिलाई नियन्त्रणमा लिन अश्रुग्यास हान्नु परेको उनको भनाइ छ ।

काठमाडौं । सरकारले सरकारी, निजि तथा गैरसरकारी संघ संस्थामा कार्यरत महिला कर्मचारीलाई सुत्केरी बिदा उपलब्ध गराउन निर्देशन दिएको छ ।

स्वास्थ्य तथा जनसङ्ख्या मन्त्रालयले सूचना निकाल्दै सुत्केरी हुनु अघि र पछि कम्तीमा ९८ दिनसम्म तलबसहितको प्रसूति बिदा उपलब्ध गराउन उक्त संघरसंस्थालाई निर्देशन दिएको हो ।

सरकारी निजी तथा गैरसरकारी संघरसंस्थामा कार्यरत महिलाहरुलाई नियमनुसार पाउनुपर्ने प्रसूति बिदा नदिएको गुनासो आउन थालेपछि यस्तो निर्णय गरेको मन्त्रालयद्वारा जारी सूचनामा उल्लेख छ ।

सुरक्षित मातृत्व तथा प्रजनन् स्वास्थय अधिकार ऐन, २०७५ को दफा १३ ले विभिन्न निजी, सरकारी गैरसकारी संघसंस्थामा कार्यरत महिला कर्मचारीलाई सुत्केरी हुनु अघि र पछि कम्तीमा ९८ दिनसम्म तलबसहितको प्रसूति बिदा पाउने व्यवस्था रहेको छ ।

काठमाडौं । अर्थ मन्त्रालयले सेयर बजारका समस्याबारे अध्ययन गर्न एक समिति गठन गरेको छ । समितिले आगामी आर्थिक वर्ष २०७९/८० को मौद्रिक नीति आउनु अगाडि नै समाधानका उपायसमेत समेटेर प्रतिवेदन दिने अर्थ मन्त्रालय स्रोतले जनाएको छ ।

मन्त्रालयका अनुसार धितोपत्र बोर्डका कार्यकारी निर्देशकलाई संयोजक तोकिएको छ । बोर्डकै एक प्रतिनिधिलाई सदस्य सचिव बनाउँदै अर्थ मन्त्रालय र नेपाल राष्ट्र बैंकबाट एकरएक जना प्रतिनिधि रहने गरी समिति गठन भएको स्रोतले जनाएको छ ।
अब अर्थ मन्त्रालय र नेपाल राष्ट्र बैंकले आफ्ना प्रतिनिधि तोकेसँगै समितिले काम थाल्ने भएको छ ।

बुधबार धितोपत्र बोर्डको वार्षिकोत्सव समारोहमा उपस्थित हुनु अगाडि अर्थमन्त्री जनार्दन शर्माले यस्तो समिति गठन गरेका हुन् ।

पछिल्लो समय निरन्तर सेयर बजार ओरालो लागिरहेको बेला मन्त्रालयले समिति गठन गरेको हो । ३२ सय अङ्कसम्म पुगेको सेयर बजार करिब २ हजार अङ्कमा झरिसकेको छ । सेयर बजार निरन्तर घटेसँगै लगानीकर्ताको मनोबल कमजोर बनेको छ ।

काठमाडौं । दार्चुलाको शैल्यशिखर नगरपालिका वडा नम्बर १ बारिलमा आगो लगाएर एकजना एकल महिलाको हत्या गरिएको छ । जिल्ला प्रहरी कार्यालय दार्चुलाका प्रहरी निरीक्षक लोकेन्द्र कार्कीले बारिलका ४५ वर्षीया अनिभा खडायतको हत्या गरिएको जानकारी दिनुभयो ।

प्रहरी निरीक्षक कार्कीका अनुसार घर नजिकैको खरको लुटो (कुन्यू) मा आगो लगाएर खडायतको हत्या गरिएको हो । घटनाबारे अनुसन्धानका लागि दार्चुलाका डीएसपी प्रतिक विष्ट नेतृत्वको टोली घटनास्थल जाँदै गरेको उहाँले बताउनुभयो ।

घटनाको अनुसन्धानको लागि प्रहरी चौकी बलाँच, इलाका प्रहरी कार्यालय गोकुलेश्वरबाट पनि टोली परिचालन गरिएको प्रहरी निरीक्षक कार्कीले बताउनुभयो ।

एकल महिला खडायतलाई राति हत्या गरिएको अवस्थामा फेला पारेको शैल्यशिखरको वडा नम्बर १ का वडाअध्यक्ष भरतबहादुर खडायतले बताउनुभयो ।

खडायतका श्रीमान् सात वर्ष पहिले बित्नुभएको थियो भने उहाँका दुई छोरी र एक छोरा हुनुहुन्छ । घटनामा संग्लन रहेको आङ्शकामा प्रहरीले स्थानीय वीरेन्द्र खडायत र तुला खडायतलाई नियन्त्रणमा लिएको छ । प्रहरी निरीक्षक कार्कीले शङ्कास्पद दुई जनालाई सोधपुछका लागि नियन्त्रणमा लिइएको बताउनुभयो ।

काठमाडाै‌ – स्थानीय बजारमा बुधवार सुनको मूल्य स्थिर रहेको छ । नेपाल सुन चाँदी व्यवसायी महासंघका अनुसार यो दिन सुनको मूल्य मंगलवार जस्तै प्रतितोला ९७ हजार ५०० रुपैयाँमा स्थिर छ ।

यसैगरी यो दिन चाँदीको मूल्य भने बढेको छ । यो दिन चाँदीको मूल्य तोलामा ५ रुपैयाँले बढेर प्रतितोला १ हजार २८० रुपैयाँ पुगेको छ । अघिल्लो कारोबार दिन मंगलवार १ हजार २७५ रुपैयाँ प्रतितोला चाँदीको खरीदविक्री भएको थियो ।