Month: February 2022

काठमाडौँ । नेपालीहरूको दोस्रो ठुलो चाड तिहार नजिकिँदै गर्दा खाद्य तथा गुण नियन्त्रण विभागले अनुगमन तीव्र पारेका छन् ।

बुधवार मात्रै विभागले उपत्यकास्थित विभिन्न फुड तथा स्वीट्स बिक्री तथा उत्पादन स्थलहरूको अनुगमन गरेको छ । विभागको खाद्य तथा दाना स्वच्छता एवं गुणस्तर नियमन महाशाखाबाट खाद्य निरीक्षक सन्तोष ढकाल र पदम राज भुसालको टोलीले न्यूरोडस्थित स्वस्तिक स्वीट्स, गौतम स्वीट्स र शालिमार हस्पिटालिटीद्वारा सञ्चालित गुलाब स्वीट्समा अनुगमन गर्न पुगेको थियो ।

अनुगमन तथा निरीक्षणको क्रममा शालिमार हस्पिटालिटीको न्यूरोडस्थित शाखालाई उत्पादन स्थलको सफाइमा ध्यान दिँदै पीटीएम अफ फ्राइङ वइल ३१ पाइएको तेल नष्ट गरेको छ भने त्रिपुरेश्वरस्थित शाखाको चौथो तल्लामा रहेको किचन २४ घण्टाका लागि बन्द गर्दै सफाई पछि पुनः निरीक्षण गराएर प्रयोग गर्न निर्देशन दिएको छ । खाद्य निरीक्षक ढकालका अनुसार किचनमा रहेका भाँडावर्तनहरु फोहोर रहेकोले सफाई गरेर मात्र सञ्चालन गर्न भनिएको हो ।

यसैगरी स्वस्तिक स्वीट्स र शालिमार हस्पिटालिटीलाई पनि मेशिनरी तथा उत्पादन स्थलको सरसफाइमा ध्यान दिँदै फ्राईङ वइलको गुणस्तरमा विशेष ध्यान दिँदै फ्राइङ पश्चात् विसर्जन गरिने तेलको अभिलेख राख्न भनिएको छ ।

विशेषगरी चाँडबाँडका बेला मिठाईजन्य तथा खाद्य पदार्थहरूको प्रयोग अरू समय भन्दा बढी हुने भएकोले उपभोक्ताको स्वास्थ्यलाई ख्यालमा राख्दै चल्तीका र ठुला स्टोरहरूमा अनुगमन तीव्र पारिएको विभागकी महानिर्देशक वैद्यले बताइन् ।

‘नियमित अनुगमन त वर्ष भरी नै भई रहन्छ तर चाँडबाँडमा मिसावट हुन सक्ने सम्भावनालाई मध्यनजर गर्दै उपलब्ध जनशक्तिलाई अधिकतम खटाएका छौँ’ उनले भनिन् ‘खाद्य पदार्थ उत्पादन तथा विक्रिवितरणलगायत गुणस्तरमा कुनै पनि कैफियत भेटिए अन दि स्पोर्ट कारबाही गर्ने देखि सुधार गरेर मात्रै सञ्चालनमा ल्याउन निर्देशन दिने गरेका छौँ’

काठमाडौँ । काठमाडौँ महानगरपालिकाका मेयर बालेन्द्र शाहलाई टुकुचा उत्खननको विवाद सल्ट्याउनको लागी चुनौती थपिएको छ ।

टुकुचा वरपर चार मिटर कायम गर्ने गरी खुला रूपमा बग्न दिने महानगरको योजनामा अदालतले अल्पकालीन अन्तरिम आदेश जारी गर्दा उत्खनन कार्य रोकिएको छ ।

पहिले उत्खनन गरिएको ठाउँ दुर्गन्धित बनेको छ भने जमिन भासिँदै गएको छ ।

महानगरको अभियानअन्तर्गत उत्खननका क्रममा १२ देखि १५ फिट गहिरो खाल्डो खनिएको थियो । उत्खनन गरिएको क्षेत्र आसपास दुर्गन्ध फैलिएको स्थानीयको गुनासो छ । त्यस्तै फुटपाथमा हिँड्ने पैदल यात्रुका लागि दुर्घटनाको जोखिम समेत बढेको छ ।

अदालतले टुकुचालाई जस्ताको तस्तै छोड्न आदेश जारी गरेकाले तत्काल केही पनि काम गर्न नसकिने महानगरका प्रवक्ता नवीन मानन्धरले बताए ।

हात्तीसारस्थित जय नेपाल हलको कम्पाउन्डमा करिब १२ फिट गहिरो खाल्डो खनेर टुकुचा उत्खनन गरिएको थियो । सो क्षेत्रको जमिन पनि भासिँदै गएको छ ।

टुकुचामाथि बनेका घरहरूलाई भत्काएर निकास दिने भन्दै महानगरले उत्खनन थाले पनि अदालतको आदेशपछि अभियान स्थगित भएको छ ।

महानगरले विभिन्न क्षेत्रमा टुकुचा उत्खननका लागि डोजर चलाएपछि घरधनीहरूले अदालतमा रिट दायर गरेका थिए । असोज २ गते सो रिटमा अदालतले तत्काल टुकुचामाथि बनेका संरचना नभत्काउन अल्पकालीन अन्तरिम आदेश दिएको थियो ।

टुकुचामाथि पर्ने २१ घरधनीले महानगरलाई विपक्षी बनाएर अदालत पुगेका थिए । रिट निवेदकहरूले वैध रूपमा नै जग्गाजमिन खरिद गरी संरचना खडा गरेको हुँदा ती संरचनाहरू नभत्काउन माग गरेका थिए ।

प्रारम्भिक सुनुवाइपछि अदालतबाट टुकुचा खोलामाथि रहेका संरचना तत्काल नहटाउन न्यायाधीश किरणकुमार पोखरेलको एकल इजलासले अल्पकालीन अन्तरिम आदेश जारी गरेको थियो ।

गत बुधवार सुनुवाइ हुने भनिएको रिटमा पेसी स्थगित भएको थियो । मंगलबार पुनः सुनुवाइको लागि पेसी तोकिएतापनि सार्वजनिक बिदा भएको कारणले सुनुवाइ भएन । अर्को पेसी तोकिएपछि मात्र टुकुचाको विवादमाथि अन्तरिम आदेशलाई निरन्तरता दिने वा नदिने टुङ्गो लाग्नेछ ।

टुकुचा नक्सामा नदेखिएको र घरधनीले कानुनी प्रक्रिया पुर्‍याएर संरचना निर्माण गरेकाले बालेनलाई विवाद सल्ट्याउन थप चुनौती हो ।

महानगरका पूर्वाधार सल्लाहकार सुनिल लम्सालले उत्खनन क्षेत्र अझै भासिन नदिन बुधवारदेखि नै पर्खाल लगाउन सुरु गरिने जानकारी दिए । उनले घरमुनि टुकुचा प्रकट भइसकेको अवस्थामा आफूहरूलाई काम गर्न कुनै चुनौती नथपिएको पनि बताए ।

खोलामाथि घर बनाउने कानुन कुनै पनि ठाउँमा नभएको पनि उनले दाबी गरे ।

महानगरका नगरप्रहरी प्रमुख राजुनाथ पाण्डे अदालतले जे भन्छ सोहीबमोजिम काम अगाडि बढाउने बताउँछन् ।

महानगरले निरीक्षण अनुगमनसमेत गरेको छैन । सुनुवाइ अघि बढाउन भूमि व्यवस्था, सहकारी तथा गरिबी निवारण मन्त्रालयको एउटा प्रतिवेदनको अध्ययन आवश्यक परेको थियो ।

महानगरले उत्खनन थालेपछि १२५ वर्षअघि नै व्यवस्थित सुरुङ बनाएर टुकुचा जमिनमुनि बग्ने बनाइएको तथ्य खुलेको थियो ।

टुकुचामाथि कसरी घरहरू बने भन्ने विषयमा पनि भूमि व्यवस्था मन्त्रालयले अध्ययनसमेत गरेको थियो ।

त्यस्तै, पुरातत्त्व विभागले पनि अध्ययन गर्दा टुकुचालाई मौलिक शैलीमै राख्नुपर्ने निष्कर्ष निकालेको थियो ।

सहरी विकास मन्त्रालयको टुकुचा खोला करिडोर व्यवस्थापनसम्बन्धी प्रतिवेदनका आधारमा महानगरले टुकुचामाथि ५८१ कित्ता जग्गामा घर तथा भवनहरू निर्माण भएको खुलाएको थियो ।

साउन १२ गते महानगरले ३५ दिने सूचना जारी गर्दै टुकुचा अतिक्रमण गरेर बनाइएका संरचनाहरू हटाउन अल्टिमेटम जारी गरेको थियो ।

टुकुचा खोला नारायणहिटी राजदरबार, जय नेपाल हल, न्यू प्लाजा, पुतलीसडक, कमलादी क्षेत्रस्थित काठमाडौँ प्लाजा, प्रदर्शनीमार्ग हुँदै थापाथलीस्थित वाग्मतीमा मिसिन्छ ।

टुकुचा कतै देखिन्छ त कतै जमिनमुनि हुँदै बग्छ । महानगरको टोलीले टुकुचा व्यवस्थापन गर्न थप अनुसन्धान पनि अघि बढाएको जनाएको छ ।

काठमाडौँ । अख्तियार दुरुपयोग अनुसन्धान आयोगले २८ लाख रुपैयाँ घुससहित इन्जिनियर नवराज सत्याल र प्लम्बर बखतबहादुर थापालाई पक्राउ गरेको छ ।

रामेछापस्थित खानेपानी तथा सरसफाइ डिभिजन कार्यालय नं ३ का सत्याल र प्लम्बर थापालाई घुससहित अख्तियारले पक्राउ गरेको हो ।

उनीहरूबाट १६ लाख रुपैयाँ नगद र १२ लाख रुपैयाँको चेक गरी २८ लाख रुपैयाँ बरामद गरिएको अख्तियार स्रोतले जानकारी दिएको छ । रामेछापको इन्छिनगाउँ खानेपानी तथा सरसफाइ उपभोक्ता समितिको कामको भुक्तानीवापत उनीहरूले रकम लिएको खुलेको अख्तियारको भनाइ छ ।

अख्तियारका प्रवक्ता श्यामप्रसाद भण्डारीले अख्तियारको केन्द्रीय कार्यालयको टोली रामेछापमा रहेको पुष्टि गरे ।

अख्तियारको टोलीले इन्जिनियर सत्याल र प्लम्बर थापालाई मन्थली नगरपालिका-१ स्थित खानेपानी कार्यालयको क्वार्टरबाट पक्राउ गरेको हो ।

पोखरा रङ्गशालामा आज बिहान सम्पन्न खेलमा पाँच हजार मिटर महिला दौडतर्फ बागमती प्रदेशकी सन्तोषी श्रेष्ठले स्वर्ण पदक जितेकी छिन । सन्तोषीले नेपाल पुलिस क्लबकी राजपुरा पछाईलाई पछाडि पार्दै स्वर्णपदक जितेकी हुन् । सन्तोषीले निर्धारित दूरी १७ मिनेट ०५।२९ सेकेन्डमा पूरा गरिन् ।

स्वर्ण पदक जितेकी सन्तोषीले राष्ट्रिय कीर्तिमानको लक्ष्य राखेको भए पनि चोटको कारण पूरा गर्न नसकेको बताइन । महिला पाँच हजार मिटरमा कान्छीमाया कोजुको नाममा रहेको १६ मिनेट ४९।५९ सेकेन्डको कीर्तिमानी छ ।

त्यसैगरी यसअघि भएको दश हजार मिटर दौडमा पनि सन्तोषीले स्वर्ण पदक जितेकी थिइन् । सोही स्पर्धामा रजत पदकमा चित्त बुझाएकी पुलिसकी खेलाडी राजपुराले १७ मिनेट १२।०५ सेकेन्डमा निर्धारित दूरी पूरा गरिन् । त्रिभुवन आर्मी क्लबकी पूर्णलक्ष्मी न्यौपानेले कास्य जितिन । उनले निर्धारित दूरी १८ मिनेट ०३।०० सेकेन्डको समयमा पूरा गरिन ।

यसैगरी आजै भएको एथलेटिक्सको पुरुष चार सय मिटर हर्डल्समा त्रिभुवन आर्मी क्लबका रामप्रसाद थारुले स्वर्ण पदक हात पारेका छन् । उनले निर्धारित दूरी ५३।५३ सेकेन्ड समय खर्चदै पूरा गरे ।

सोही स्पर्धामा आर्मीकै जीवन चौधरीले ५३।८९ सेकेन्ड समय लगाउँदै रजत पदक जिते । सशस्त्र प्रहरी बल ९एपीएफ० का निरप्रताप महतोले कास्य जिते । उनले ५३।९२ सेकेन्डमा निर्धारित दूरी पूरा गर्दै कास्य जितेका हुन् ।

त्यस्तै एथ्लेटिक्सको महिला आठ सय मिटर दौडमा एपीएफ क्लबकी फुलमती रानाले स्वर्ण पदक जितिन । उनले निर्धारित दूरी दुई मिनेट २७।३६ सेकेन्ड समय खर्चदै स्वर्ण जितेकी हुन् । सोही स्पर्धामा आर्मीकी सरस्वती भट्टराईले दुई मिनेट २७।५० सेकेन्डको समय लगाउँदै रजत पदक जितेकी हुन् । आर्मीकी रेखा लिम्बूले कास्य जितिन् । उनले निर्धारित दूरी दुई मिनेट ३०।४८ सेकेन्डको समय लगाउँदै कास्य जितेकी हुन् ।

आजै भएको पुरुष आठ सय मिटर दौडमा आर्मीका सोमबहादुर कुमालले स्वर्ण जिते । सोमले निर्धारित दूरी एक मिनेट ५४।०८ सेकेन्डमा पूरा गर्दै स्वर्ण जितेका हुन् । सो स्पर्धामा पुलिसका तेजबहादुर कार्कीले रजत जिते । उनले एक मिनेट ५५।२१ सेकेन्डसहित रजत जितेका हुन् । त्यस्तै आर्मीका सुनिल सुनारले एक मिनेट ५५।५२ सेकेन्डसहित कास्य जिते ।

ज्याभलिन थ्रोको पुरुषतर्फ आर्मीका रोहित चौधरीले स्वर्ण जिते

नवौँ राष्ट्रिय खेलकुदअन्तर्गत एथ्लेटिक्सको ज्याभलिन थ्रोको पुरुषतर्फ त्रिभुवन आर्मी क्लबका रोहित चौधरीले स्वर्ण पदक जितेका छन् । पोखरा रङ्गशालामा आज भएको खेलमा रोहितले ६४।२५ मिटर थ्रो गर्दै स्वर्ण पदक जितेका हुन् ।

सोही स्पर्धामा एपीएफका रमेश पोखरेलले ५५।४३ मिटर थ्रो गर्दै रजत पदक हात पारे । एपिएफकै मनोज डगौँराले ५३।३९ मिटर थ्रो गर्दै कास्य पदक हात पारे ।

एथ्लेटिक्सको चार गुणा १०० मिटर रिलेमा त्रिभुवन आर्मी र एपीएफलाई स्वर्ण

यसैगरी एथ्लेटिक्सको ४ गुणा १०० मिटर रिलेमा त्रिभुवन आर्मी र एपीएफ क्लबले स्वर्ण पदक जितेका छन् । महिला रिलेमा आर्मीकी रमिता थारू, सरस्वती चौधरी, जयरानी थारु र निर्मला थापा सम्मलित टोलीले ४९।६० सेकेन्डको समय निकाल्दै स्वर्ण जितेको हो ।

मनिषा अधिकारी, अनिशा भण्डारी, सविना खातुन मियाँ र निशा घर्ती सम्मिलित गण्डकी प्रदेशले ५२।७५ सेकेन्डको समय निकाल्दै रजत जितेका छन् । रजिना दुलाल, स्वगता खाइजु, प्रकृति सुवाल र लुजला अमात्य सम्मलित बागमती प्रदेशले ५२।७६ सेकेन्डसहित कास्य जितेका छन् ।

सोही स्पर्धाको पुरुषतर्फ निरप्रताप महतो, आशिष चौधरी, शिवराज पार्की, चन्द्रबहादुर पुलामी सम्मिलित एपीएफ टोलीले ४२।४४ सेकेन्डको समय निकाल्दै स्वर्ण जितेको हो । जीवन चौधरी, विवेक थारु, युवराज विक, डिल्ली महतो सम्मिलित आर्मीले ४२।६० सेकेन्डसहित रजत जित्यो भने सिमान पाण्डे, सुजल डाँगी, रोशन थारु र तुलसीराम थारु सम्मिलित लुम्बिनी प्रदेशले ४४।३८ सेकेन्डको समय निकाल्दै कास्य जितेका छन् ।