Month: February 2022

काठमाडौँ । नेपाल राष्ट्र बैङ्कले विद्युतीय भुक्तानी प्रणालीसम्बन्धी एकीकृत निर्देशन जारी गर्दै मोबाइल एप्लिकेसन तथा क्युआर कोडबाट दैनिक ३ लाख रुपैयाँसम्म कारोबार गर्न सकिने सुविधा कायम गरेको छ । यसअघि दैनिक २ लाख रुपैयाँसम्मको मात्रै सीमा थियो ।

त्यस्तै वालेटबाट बैङ्क खातामा वा बैङ्क खाताबाट वालेटमा कारोबार गर्न पाइने रकमको सीमा पनि बढेको छ । अब वालेटबाट बैङ्क खातामा वा बैङ्क खाताबाट वालेटमा दैनिक २ लाख रुपैयाँसम्म कारोबार (ट्रान्सफर) गर्न सकिनेछ । यसअघि यस्तो सीमा जम्मा १ लाख रुपैयाँसम्म थियो । यस्तो कारोबार प्रतिमहिनाका लागि भने पुरानै सीमा १० लाख कायम गरिएको छ ।

एक वालेटबाट अर्को वालेटमा कारोबार गर्न सकिने रकमको सीमा भने घटाइएको छ । वालेट–वालेट कारोबार यसअघि दैनिक १ लाख रुपैयाँ रहेकोमा अब ५० हजार कायम गरिएको छ । वालेटमा अधिकतम ५० हजार रुपैयाँसम्म मात्रै रकम राख्न पाइने व्यवस्था छ । भुक्तानी सेवा प्रदायक संस्थाले रेमिट्यान्स कम्पनीसँग सम्झौता गरी विदेशबाट आउने रकम नेपालमा सञ्चालित विद्युतीय वालेटमा जम्मा हुने गरी रेमिट्यान्स भित्र्याउन सक्नेछन् ।

वालेटमार्फत गरिने राजस्व भुक्तानीको सेवा शुल्क पनि केही घटाइएको छ । 

बर्दिया । बर्दियाको बाँसगढी नगरपालिका ५ मा गएराति मोटरसाइकल अनियन्त्रित भएर पल्टिँदा चालकको मृत्यु भएको छ।

मृत्यु हुनेमा बाँकेको बैजनाथ गाउँपालिका २ का ५६ वर्षीय भागिराम थारु रहेका छन्। दुर्घटनामा गम्भीर घाइते भएका थारुको नेपालगंज मेडिकल कलेज कोहलपुरमा मृत्यु भएको हो।

भे ४ प ५१७६ नम्बरको मोटरसाइकल गएराति १० बजे अनियन्त्रित भएर पल्टिएको इलाका प्रहरी कार्यालय मोतिपुर बर्दियाले जानकारी दिएको छ।

मधेस प्रदेश । चालु आर्थिक वर्ष २०७९/८० को अर्धवार्षिक प्रतिवेदनअनुसार ६ महिनामा यो प्रदेशमा २८१ ले सडक दुर्घटनामा ज्यान गुमाएका छन्। 

प्रदेशको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैया (बारा) को आव २०७९/८० को अद्र्धवार्षिक घटना प्रतिवेदनले यो तथ्यांक देखाएको हो।

गत साउन १ गतेदेखि गत पुस मसान्तसम्मका छ महिनामा सडक दुर्घटनाका दुई हजार आठ सय ७६ घटना भएका छन्। 

यी घटनामा चार हजार तीन सय ७१  घाइते भएका र दुई सय ८१ जनाले ज्यान गुमाएका कार्यालयका सूचना अधिकारी तथा प्रहरी नायब उपरीक्षक लक्ष्मीप्रसाद भण्डारीले बताए। बारामा मात्रै सडक दुर्घटनाका घटनामा ६ महिनाभित्र ६४ जनाको मृत्यु भएको छ।

पर्सामा सो अवधिमा २२ जनाको सडक दुर्घटनामा ज्यान गएको छ। गत साउनदेखि पुस मसान्तभित्र धनुषामा ४१, महोत्तरीमा ३५, सप्तरी र सर्लाहीमा ३३/३३, रौतहटमा २७ र सिरहामा २६ को ज्यान गएको छ।

दिनहुँ बढ्दै गएका सवारी साधनको चाप  र चालकको लापर्बाही नै दुर्घटनाको मुख्य कारण देखिएको ट्राफिक प्रहरीको अनुभव छ। 

मानवीय क्षतिका घटना मोटरसाइकल दुर्घटनामा बढी भएका छन्। तीव्र गतिमा मोटरसाइकल हुइँक्याउने हुँदा यो साधनको दुर्घटनामा बढी मानवीय क्षति हुने गरेको ट्राफिक प्रहरीको भनाइ छ।

प्रदेशभित्र आव २०७६/७७ मा एक हजार तीन सय ४०, २०७७/७८ मा तीन हजार नौ सय ८३ र  २०७८/७९ मा पाँच हजार सात सय ११ सडक दुर्घटनाका घटना भए। ती घटनामा क्रमशः ४०९, ४९८ र ५७१ जनाको मृत्यु भएको तथ्यांक छ। 

काठमाडौं, १७ माघ । प्रधानमन्त्री पुष्पकमल दाहाल ‘प्रचण्ड’ ले रवि लामिछानेविरुद्वको सर्वोच्च अदालतको फैसलाको पूर्णपाठ नआएसम्म गृहमन्त्री नियुक्त नगर्ने निर्णय गरेका छन् ।

आज बसेको पदाधिकारी बैठकमा प्रचण्डले तत्काल गृहमन्त्री नियुक्त नगर्ने निर्णय सुनाएका हुन् । ‘अदालतको फैसलाको पूर्णपाठ नआउँदासम्म गृह मन्त्रालयबारे निर्णय हुँदैन । प्रधानमन्त्रीसँगै रहन्छ ’ बैठकपछि माओवादीका प्रवक्ता कृष्णबहादुर महराले सञ्चारकर्मीलाई भने ।

गत आइतबार नागरिकता पुन प्राप्ति गरेपछि रविले पुन: गृहमन्त्रालयमा फर्कन खोजिरहेका छन् । तर प्रधानमन्त्री प्रचण्ड भने रविलाई पुन गृहमन्त्री बनाउने पक्षमा छैनन् ।

काठमाडौँ । कैलालीमा मङ्गलवार दिउँसो धनगढी उपमहानगरपालिका-३ चटकपुरमा गौरीशङ्कर अल्लो कपडा उद्योगका सञ्चालक ३४ वर्षीय नरेन्द्र सिंह धामीसहितका चार जनालाई पक्राउ गरेको प्रहरीले जनाएको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक डिएसपी वेदप्रकाश जोशीले दार्चुलाको नौगाड गाउँपालिका-२ स्थायी घर भएका धामी, सोही ठाउँका २० वर्षीय रुकुम सिंह धामी, बझाङको केदारस्यु गाउँपालिका ७ बस्ने ४२ वर्षीय धनबहादुर धामी र बाजुराको स्वामीकार्तिक गाउँपालिका-२ का ३५ वर्षीय धनलाल कामीलाई पक्राउ गरिएको बताए ।

सुदूरपश्चिम प्रदेश अनुसन्धान समूह आरआईटीका प्रहरी वरिष्ठ नायब निरीक्षक केशव जोशी र जिल्ला प्रहरी कार्यालयको टोलीले विशेष सूचनाका आधारमा उनीहरूलाई लागुऔषधसहित पक्राउ गरेको जोशीले बताए ।

उनीहरूको साथबाट ११ किलो ९०० ग्राम चरेश, १ थान डिजिटल काँटा समेत बरामद गरिएको छ । चारै जनालाई जिल्ला प्रहरी कार्यालयको नियन्त्रणमा राखेर अनुसन्धान भइरहेको प्रहरीले जनाएको छ ।

काठमाडौं । एशियन हाइड्रोपावर कम्पनीले यही माघ २७ गतेदेखि प्रतिकित्ता एक सय अङ्कित दरमा ६ लाख ९७ हजार दुई सय कित्ता शेयर सर्वसाधारणका लागि निष्कासन तथा बिक्री खुला गर्ने भएको छ ।

कम्पनीले जारी पुँजी ३४ करोडको २४ दशमलव ७१ प्रतिशतले हुने आठ करोड ४० लाख मूल्य बराबरको कूल आठ लाख ४० कित्ता साधारण शेयर सर्वसाधारण, वैदेशिक रोजगारीमा रहेका नेपाली सामूहिक लगानी कोष तथा कर्मचारीमा छुट्याएको थियो । जसमा ८४ हजार कित्ता शेयर वैदेशिक रोजगारमा रहेका नेपाली र ४२ हजार कित्ता सामूहिक लगानी कोषलाई बाँडफाँट गरिएको छ ।

त्यस्तै १६ हजार आठ सय कित्ता कर्मचारीलाई सुरक्षित गरी बाँकी छ लाख ९७ हजार दुई सय कित्ता साधारण शेयर सर्वसाधारणमा सार्वजनिक निष्कासन गरिने कम्पनीले सार्वजनिक गरेको आह्वानपत्रमा उल्लेख छ ।

निष्कासन गरिने शेयरमा लगानीकर्ताले छिटोमा आगामी फागुन २ गतेसम्म र सो अवधिसम्म मागबमोजिम आवेदन नपरे फागुन १२ गतेसम्म न्यूनतम १० कित्तादेखि अधिकतम २० हजार कित्तासम्म खरिदका लागि आवेदन दिन सकिनेछ ।

लगानीकर्ताले नेपाल धितोपत्र बोर्डबाट स्वीकृति प्राप्त आस्वा सदस्य बैंक तथा वित्तीय संस्थाहरु र तिनका तोकिएका शाखा कार्यालयबाट ‘सी आस्वा’ प्रणालीमार्फत् तथा अनलाइनमा मेरो शेयर प्रयोग गरेर आइपीओका लागि आवेदन दिन व्यवस्था मिलाएको कम्पनीले जनाएको छ ।

कम्पनीलाई केयर रेटिङ्ग्स नेपालले ‘केयरएनपी बिबी आइएस’ प्रमाणपत्र प्रदान गरेको छ । कम्पनीको धितोपत्र निष्कासन तथा बिक्री प्रबन्धकमा एनएमबी क्यापिटल रहेको छ ।

काठमाडौं । नबिल बैंकले संस्थापक शेयर बिक्रि गर्ने भएको छ ।

बैंकले संस्थापक शेयरधनीको नाममा रहेको १ लाख ५० हजार कित्ता शेयर बिक्रि गर्न लागेको हो ।

शेयरको प्रति कित्ता मूल्य ४५० रुपैयाँ रहेको छ । बैंकले इच्छुक संस्थापकलाई आफूले खरिद गर्न चाहेको मूल्य सहित यो सूचना जारी भएको मितिले सात दिनभित्र बैंकको केन्द्रिय कार्यालयमा खामबन्दी निवेदन पेश गर्न अनुरोध गरेको छ ।

काठमाडौँ । बैङ्क तथा वित्तीय संस्थाले अन्तर एटिएम कारोबारमा अब एक पटकमा अधिकतम १५ रुपैयाँभन्दा बढी शुल्क लिन नपाउने भएका छन् ।

यसअघि यस्तो कारोबारमा बैङ्क तथा वित्तीय संस्थाले प्रति कारोबार बढीमा २० रुपैयाँसम्म शुल्क लिन पाउने व्यवस्था थियो ।

राष्ट्र बैङ्कले जारी गरेको भुक्तानी प्रणाली सम्बन्धी एकीकृत निर्देशनमार्फत अन्तर एटिएम कारोबार शुल्क घटाइएको हो ।

‘बैङ्क तथा वित्तीय संस्थाले जारी गरेका भुक्तानी कार्ड स्वदेश भित्रै अर्को बैङ्क तथा वित्तीय संस्थाको एटिएममा प्रयोग हुँदा प्रति कारोबार बढीमा १५ रुपैयाँसम्म शुल्क लिन सक्नेछन्,’एकीकृत निर्देशिकामा भनिएको छ ।

शुल्क घटाएसँगै राष्ट्र बैङ्कले हरेक अन्तर एटिएम कारोबारमा शुल्क लाग्ने व्यवस्था गरेको छ । यसअघि मासिक न्यूनतम २ वटा अन्तर एटिएम कारोबारमा शुल्क लिन नपाइने व्यवस्था थियो ।

यस्तै, बैङ्क तथा वित्तीय संस्थाका ग्राहकले मोबाइल एप्लिकेशन (एप) वा इन्टरनेट बैङ्किङ मार्फत विद्युतीय रकमान्तर (इन्टर बैङ्क फण्ड ट्रान्सफर) गर्दा सेवा प्रदायकहरूले प्रतिकारोबार अधिकतम १० सम्म सेवा शुल्क लिन सक्ने व्यवस्था पनि राष्ट्र बैङ्कले गरेको छ ।

यसअघि यस्ता कारोबार गर्दा लिने शुल्क राष्ट्र बैङ्कले तोकिदिएको थिएन ।