लुम्बिनीमा एमालेका चार मन्त्रीद्वारा सामूहिक राजीनामा

काठमाडौँ । लुम्बिनी प्रदेश सरकार मन्त्रिपरिषद्बाट नेपाल कम्युनिस्ट पार्टी (एमाले)का मन्त्रीले राजीनामा दिएका छन् ।

आफूहरुले आज मुख्यमन्त्री चेतनारायण आचार्यसमक्ष सामूहिक रुपमा राजिनामा बुझाएको भौतिक पूर्वाधार विकासमन्त्री भूमिश्वर ढकालले बताए। मुख्यमन्त्रीसहित एमालेका पाँच मन्त्री थिए ।

राजीनामा दिने मन्त्रीहरूमा भौतिक पूर्वाधार विकासमन्त्री भूमिश्वर ढकाल, वन तथा वातावरणमन्त्री दिनेश पन्थी, आन्तरिक मामिला तथा कानुनमन्त्री खेम सारु मगर तथा कृषि, भूमि व्यवस्था तथा सहकारीमन्त्री सीता शर्मा चौधरी रहेका छन्। एमाले मन्त्रीहरूको सामूहिक राजीनामासँगै लुम्बिनी प्रदेश सरकारको सत्ता समीकरणमा नयाँ राजनीतिक तरंग उत्पन्न भएको छ।

राजीनामाको कारणबारे औपचारिक जानकारी सार्वजनिक भइसकेको छैन। यद्यपि पछिल्लो समय प्रदेश सरकारभित्र देखिएको राजनीतिक असन्तुष्टि र केन्द्रको बदलिँदो सत्ता समीकरणसँग यस घटनालाई जोडेर हेरिएको छ। राजीनामा पत्र मुख्यमन्त्री कार्यालयमा दर्ता भइसकेको स्रोतले जनाएको छ।

मन्त्रीहरूको राजीनामापछि प्रदेश सरकारको आगामी रणनीति, मन्त्रिपरिषद् पुनर्गठन तथा नयाँ सत्ता समीकरणबारे चासो बढेको छ। यस विषयमा मुख्यमन्त्री कार्यालय तथा एमाले प्रदेश नेतृत्वबाट औपचारिक प्रतिक्रिया आउन बाँकी छ। राजनीतिक वृत्तमा भने एमाले सरकारबाट बाहिरिने निर्णयले लुम्बिनी प्रदेशको सत्ता समीकरणमा महत्वपूर्ण परिवर्तन ल्याउने चर्चा सुरु भएको छ।