काठमाडौँ । आइतबार (भोलि) देखि निःशुल्क डिजिटल बैंकिङ कारोबार सञ्चालन हुने भएको छ ।
वाणिज्य बैंकहरुको छाता संगठन नेपाल बैंकर्स संघले बैंकको काउन्टरमा हुने भिड कम गरी कोरोना नियन्त्रणमा सरकारको पहलसँगै हातेमालो गर्नको लागि डिजिटल कारोबारलार्य निःशूल्क बनाउने योजना ल्याएको हो ।
अर्काे सूचना नआएसम्म एक महिनासम्म डिजिटल कारोबार निःशुल्क रहने छ ।
बैंकर्स संघका अध्यक्ष दाहालका अनसार डिजिटल कारोबार, अन्तर बैंक एटिएम कारोबार तथा ई–सेवाबाट कुनै पनि बैंकमा रकम पठाउँदासमेत शूल्क लाग्ने छैन ।
बैंकर्स संघले डिजिटल कारोबार र अन्तर बैंक एटिएम कारोबारलाई निःशूल्क गर्ने निर्णय गरेर त्यसको जानकारी राष्ट्र बैंकलाई गराएको थियो । यसैअनुसार राष्ट्र बैंकका कायममुकायम गभर्नर चिन्तामणि शिवाकोटीलगायतको टोलीसँग बैंकर्स संघका अध्यक्ष भुवन दाहाललगायतको टोलीले शुक्रबार बिहान १० बजेदेखि ११ बजेसम्म छलफल पश्चात निःशुल्क डिजिटल कारोबार गर्ने निर्णय गरेका थिए ।
छलफल कार्यक्रममा राष्ट्र बैंकका अधिकारीहरुले कर्मचारी र ग्राहकलाई स्यानिटाइजर र मास्कको व्यवस्था गर्न तथा ज्वरो नाप्ने व्यवस्था मिलाउन निर्देशन दिएका थिए ।
डेभलपमेन्ट बैंकर्स एशोसिएशनले पनि एक महिनाका लागि डिजिटल कारोबार निःशूल्क गराएको छ ।
नोटबाट पनि कोरोना भाइरस सर्न सक्ने जोखिम रहने भन्दै बैंकरहरुले सकेसम्म नोटको कारोबार कम गर्ने उपाय अबलम्बन गर्दै उच्च सतर्कतामा बैंकिङ सेवा प्रदान गर्ने निर्णय भएको छ । छलफलमा सरकारले सबै क्षेत्र बन्द गरेपछि मात्र बैंकहरु पनि बन्द गर्ने सहमति भएको छ ।
