Author: Sampatti News

काठमाडौं । धनुसा प्रहरीको हिरासतमा रहेको ८ जना थुनुवा भागेका छन् ।

आइतबार राति जिल्ला प्रहरी कार्यालय धनुषाको भेन्टिलेसन फोडेर ८ जना थुनुवा फरार भएको प्रहरीले जनाएको छ ।

हिरासतबाट ९ जना फरार भएका थिए ती मध्य एक जनालाई नियन्त्रण लिएको प्रहरीले जनाएको छ ।

प्रहरीका अनुसार फरार हुनेमा लागु औषध मुद्दाका अमितकुमार झा, रंजित मण्डल, रोशनकुमार मण्डल, अभास्कर कुमार यादव, विशाल मुखिया रहेका छन्। त्यस्तै अभद्र व्यवहारमा पक्राउ परेका मनिष मण्डल र बिक्की कार्कीका साथै एक जना नाबालक रहेका छन् ।

फरार भएकाहरूको खोजीका लागि प्रहरी परिचालन गरिएको छ ।

काठमाडौं । हाल देशको पहाडी भू–भागमा आंशिक देखि साधारणतया बदली रही बाँकी भू–भागमा मौसम मुख्यतया सफा रहेको छ। कोशी, गण्डकी र सुदुरपश्चिम प्रदेशका पहाडी भूभागका एक्दुई स्थानमा मेघ गर्जन्चट्याङ्ग सहित हल्का वर्षा भइरहेको छ।

आज दिउँसो कोशी प्रदेश लगायत देशको पहाडी भू–भागमा आंशिक देखि साधारणतया बदली रही बाँकी भू–भागमा आंशिक बदली देखि मौसम मुख्यतया सफा रहने छ । देशको पहाडी भू–भागमा थोरै स्थानहरूमा तथा बाँकी भू–भागका एक्दुई स्थानमा मेघ गर्जन्चट्याङ्ग सहित हल्का देखि मध्यम वर्षाको सम्भावना रहेको छ ।

आज राती कोशी, मधेश र बागमती प्रदेश लगायत देशको पहाडी भू–भागमा आंशिक देखि साधारणतया बदली रही बाँकी भू–भागमा आंशिक बदली देखि मौसम मुख्यतया सफा रहने छ। कोशी, मधेश प्रदेशका केही स्थानहरू र बागमती प्रदेशका थोरै स्थानहरूमा तथा बाँकी पहाडी भू–भागका केहि स्थानमा मेघ गर्जन्चट्याङ्ग सहित हल्का देखि मध्यम वर्षाको सम्भावना रहेको छ । कोशी र मधेश प्रदेशका एक्दुई स्थानमा भारी वर्षाको पनि सम्भावना रहेको छ ।

काठमाडौं । गोरखा मिडिया नेटवर्कका सञ्चालक छविलाल जोशी पक्राउ परेका छन् ।

प्रहरीले आइतबार अपरान्ह जोशीलाई काठमाडौंबाट पक्राउ गरेको हो ।

सहकारी गठी प्रकरणको छानबिनका लागि गठित संसदीय समितिको सिफारिसका आधारमा प्रहरीले आकस्मिक पक्राउ पुर्जी लिएर पक्राउ गरेको हो ।

उनी नेपाल प्रहरीका पूर्व डीआईजी पनि हुन् । उनलाई पोखराको सूर्यदर्शन सहकारीको रकम हिनामिना गरेको आरोप रहेको छ ।

संसदीय छानबिन समितिले विभिन्न सहकारीबाट गोरखा मिडिया नेटवर्कमा रकम ल्याएर दुरुपयोग गरेको अभियोगमा छवीलालसहित विभिन्न व्यक्तिहरुमाथि छानबिन गर्न सिफारिस गरेको छ ।
जसमा गोरखा मिडियाका तत्कालीन अध्यक्ष जीबी राई, तत्कालीन प्रबन्ध निर्देशक रवि लामिछाने र सञ्चालक कुमार रम्तेल रहेका छन् ।

सहकारीसम्बन्धी संसदीय समितिले प्रतिवेदन बुझाएसँगै कारबाही प्रक्रिया अघि बढेको छ ।

काठमाडौं । संघीय मामिला तथा सामान्य प्रशासन मन्त्रालयले केही दिन अघि सरुवा गरेर मन्त्रालयको अतिरिक्तमा राखेका उपसचिवहरूको पदस्थापन गर्नुका साथै केही उपसचिवहरूको सरुवा गरेको छ ।

प्राप्त जानकारी अनुसार ४३ जना उपसचिवहरूको सरुवा तथा पदस्थापन गरिएको हो ।

मन्त्रालयले केही दिन अघि हजारौँ कर्मचारीहरूको सरुवा गर्दा तीन दर्जन हाराहारी उपसचिवहरूलाई जिम्मेवारी नदिई मन्त्रालयको अतिरिक्तमा सरुवा गरेको थियो ।

अवधि पुगेकालाई सरुवा गर्ने नाममा इन्स्टिच्यूसनल मेमोरी नै नामेट हुने गरी अन्धाधुन्ध सरुवा गरेर मन्त्रालयमा थन्क्याएसँगै चौतर्फी विरोधसमेत भएको थियो । र, अहिले पनि कतिपय निकायहरूमा द्विपक्षीय वार्तालगायत महत्त्वपूर्ण जिम्मेवारी सम्हाली रहँदा सम्बन्धित मन्त्रालयसँग समन्वय नै नगरी सामान्यले कर्मचारीको सरुवा गरेको भन्दै कर्मचारीहरूले विरोध गरिरहेका छन् ।

काठमाडौं । नेपाल स्टक एक्सचेन्ज (नेप्से) परिसूचकमा दोहोरो अंकको सुधार देखिएको छ । आज नेप्से परिसूचक ११ दशमलव ५८ अंकले बढेर दुई हजार पाँच सय ८८ दशमलव ३५ को अंकमा रोकिएको हो ।

आज तीन सय २५ कम्पनीको एक करोड २४ लाख ८५ हजार सात सय ३१ कित्ता शेयर ७२ हजार ९ सय ५७ पटक खरिदबिक्री हुँदा पाँच अर्ब ९ करोड २९ लाख ४८ हजार छ सय ९० बराबरको कारोबार भएको नेप्सेले जनाएको छ ।

वित्त समूह शून्य दशमलव ३१, होटल तथा पर्यटन शून्य दशमलव ६१, उत्पादन तथा प्रशोधन शून्य दशमलव १९, लघुवित्त शून्य दशमलव १८ र म्युचुअल फन्ड शून्य दशमलव १० प्रतिशतले घटेका छन् भने अरू सबै समूहको उपसूचक बढेको छ ।

सबैभन्दा बढी बैंकिङ समूह एक दशमलव ०१ प्रतिशतले बढेको छ । विकास बैंक शून्य दशमलव ६६, जलविद्युत शून्य दशमलव ३१, लगानी शून्य दशमलव ६२ र जीवन वीमा समूह शून्य दशमलव २४ प्रतिशतले बढेको छ । त्यस्तै, निर्जीवन वीमा समूह शून्य दशमलव ४७, व्यापार शून्य दशमलव ०७ र अन्य समूह शून्य दशमलव ४१ प्रतिशतले बढेको छ ।

इस्टर्न हाइड्रोपावर लिमिटेड, आत्मनिर्भर लघुवित्त वित्तीय संस्था लिमिटेड र अपर सांगी हाइड्रोपावर लिमिटेडको शेयर मूल्यमा आज सकारात्मक सर्किट लागेको छ । सबैभन्दा धेरै घट्नेमा भने रावा इनर्जी डेभलपमेन्ट लिमिटेडको शेयर मूल्य आठ दशमलव ६५ प्रतिशतले घटेको छ ।

कारोबार रकमका आधारमा आज सबैभन्दा धेरै सिइडिबी हाइड्रोपावर डेभलपमेन्ट लिमिटेडको कम्पनी लिमिटेडको २७ करोड ८० लाख २७ हजार सात सय १५ बराबरको शेयर खरिदबिक्री भएको छ । कारोबार भएका शेयर संख्याका आधारमा भने एनएमबी सुलभ इन्भेस्टमेन्ट फन्ड–२ को ६ लाख ४७ हजार दुई सय तीन कित्ता किनबेच भएको छ ।

काठमाडौं । साइवर व्युरोको टोलिले मेडिकल व्यावसायी दुर्गा प्रसाईलाई पक्राउ गरेको छ ।

प्रसाईँलाई भक्तपुरबाट पक्राउ गरिएको प्रहरीले जनाएको छ । असोज २ मा जिल्ला अदालत काठमाडौँले प्रसाईंलाई पक्राउ गर्न अनुमति दिएको थियो । उनीबिरुद्ध विद्युत्तीय कारोबार ऐन अन्तर्गत साइबर ब्युरोमा जाहेरी दर्ता भएको छ ।
प्रसाईंसँगै बाग्लुङका जीवन पाण्डे र धादिङका प्रकाशचन्द्र दाहाललाई पनि पक्राउ गर्न अदालतले अनुमति दिएको छ ।

काठमाडौं । केन्द्रीय अनुगमन तथा मूल्याङ्कन समितिको बैठकले उद्योग र गृह मन्त्रालयमा रिक्त दरबन्दी तीन दिनभित्र पूर्ति गर्ने निर्णय गर्दै संघीय मामिला तथा सामान्य प्रशासन मन्त्रालयलाई निर्देशन दिएको छ ।

नेपाल सरकारका मुख्यसचिव एकनारायण अर्यालको संयोजकत्वमा बसेको बैठकले डेङ्गीलगायत मौसमजन्य रोगहरूको पूर्व तयारी एवम् नियन्त्रण, खाद्यान्न तथा दैनिक उपभोग्य अत्यावश्यक वस्तुहरूको माग बमोजिम आपूर्ति व्यवस्था, आसन्न चाडपर्वमा शान्ति सुरक्षाको भरपर्दो व्यवस्था लगायतका विषयमा छलफल गरी आवश्यक १२ बुँदे निर्णयसमेत गरेको छ ।