Month: February 2022

झापा । झापाको बुद्धशान्ति गाउँपालिकामा पहिरोले घर पुर्दा एक युवकको मृत्यु भएको छ। बुद्धशान्ति गाउँपालिका–७ मोतीडाँडामा गएको पहिरोले घर पुर्दा मेचीनगर–९ निवासी १५ वर्षीय विवेक दर्नालको मृत्यु भएको जिल्ला प्रहरी कार्यालय झापाले जनाएको छ।

मेचीनगरबाट बुद्धशान्ति–७ निवासी तेजकुमार बराइलीको घरमा पाहुना आएका दर्नालको मङ्गलबार राति गएको पहिरोले घर पुर्दा मृत्यु भएको प्रहरीले जनाएको छ। अविरल वर्षासँगै गएको पहिरोका कारण बराइलीको घर भत्किँदा ७७ वर्षीया तीलमाया बराइली, २१ वर्षीया कल्पना बराइली, १९ वर्षीया पृष्टिना बराइली घाइते भएका छन्। उनीहरुको स्थानीय मेडिकल लिभिङ होममा उपचार भइरहेको जिल्ला प्रहरी कार्यालय झापाले जनाएको छ।

मङ्गलबार राति गएको पहिरोले घर पुर्दा घाइते भएकाहरुलाई स्थानीयवासी, प्रहरी र जनप्रतिनिधिले उद्धार गरेको वुद्धशान्ति गाउँपालिकाका अध्यक्ष रमेशकुमार भुजेलले जानकारी दिनुभयो। पहिरोका कारण सोही ठाउँका थप दुई घर जोखिममा परेपछि उनीहरुलाई स्थानीय चर्चमा राति नै सारिएको छ। वुद्धशान्ति गाउँपालिका इलामसँग सिमाना जोडिएको गाउँपालिका हो।

काठमाडौँ । मन्त्रिपरिषद् बैठकले विद्यार्थी भर्ना, शैक्षिक तथा अन्य परीक्षासमेत भदौ १ बाट सञ्चालन गर्न सकिने निर्णय गरेको सरकारका प्रवक्ता डा. युवराज खतिवडाले जानकारी दिएका छन्। विद्यालय कलेज, ट्युशन सेन्टर तालिम केन्द्र सबै प्रकारका सभा, गोष्ठी, सेमिनार, सबै प्रकारका प्रदर्शनी, भेला तथा सम्मेलन, सिनेमाहल, पार्टी, प्यालेस डान्सबार मनोरञ्जल स्थलहरु भने अर्को सूचना नआए सम्मका लागि सञ्चालनमा रोक लगाइएको छ।

यद्यपि कोरोनाको प्रभाव र त्यसको संक्रमणको अवस्थाका आधारमा भदौ १ अघि नै सरकारले उक्त विषयमा निर्णय लिन सक्नेसमेत मन्त्री खतिवडाले जानकारी गराए। उनका अनुसार सैलुन, ब्युटीपार्लर, स्विमिङपुल, जिमखाना, धार्मिक तथा सामाजिकस्थल, समूहमा खेलिने खेल, पुस्तकालय सङ्ग्रहालय चिडियाखाना पनि अर्को सूचना जारी नभएसम्मका लागि सञ्चालन गर्न पाइने छैन।

सेवा सञ्चालन भएका क्षेत्रमा भने कम्तीमा दुई मिटरको भौतिक दूरी कायम गर्नुपर्नेछ। मास्क प्रयोग गर्नुपर्ने, पटकपटक साबुन पानीले हात धुनुपर्ने, सानिटाइजरको प्रयोग गर्नुपर्नेछ । सरकारले संकटका कालोबजारी र जम्माखोरी गर्ने व्यक्तिहरुलाई भने कानूनअनुसार कारवाही गर्ने जनाएको छ।

कोरोना भाइरसको संक्रमण रोक्न गत चैत ११ देखि लागू गरेको बन्दाबन्दी झण्डै चार महिनापछि विधिवत् रुपमा अन्त्य भएको छ। यससँगै सरकारले अधिकांश सेवा सञ्चालन गर्ने निर्णय गरेको हो।

आर्थिक गतिविधिलाई सहजीकरण गर्दै यसअघि केही सेवा सञ्चालन गरिए पनि सोमबारको मन्त्रिपरिषदको निर्णयसँगै थप सेवा सञ्चालन हुने भएको छ। जोखिम कायम रहेका केही सीमित गतिविधिमा रोक लगाउने यसअघिको निर्णय भने कायम राखेको छ।

मन्त्रिपरिषद् बैठकले राष्ट्रिय तथा अन्तर्राष्ट्रिय उडान र लामो दूरीको यातायात सेवासमेत भदौ १ देखि सञ्चालन गर्ने निर्णय गरेको छ। सरकारले संस्कृति पर्यटन तथा नागरिक उड्डयन मन्त्रालयले तोकेको मापदण्डबमोजिम हुने गरी आन्तरिक तथा अन्तर्राष्ट्रिय व्यावसायिक तथा अन्य उडान भदौ १ देखि सञ्चालन गर्ने निर्णय गरेको हो।

तनहुँ । मंगलबार बिहानैदेखि तनहुँअन्तर्गत पृथ्वी राजमार्ग अवरुद्ध भएको छ। अविरल वर्षाका कारण आएको पहिरोले मंगलबार बिहानैदेखि तनहुँअन्तर्गत पृथ्वी राजमार्ग अवरुद्ध भएको हो।
आँबुखैरेनी गाउँपालिका–२ ऐनापहारा, मार्कीचोक र बन्दीपुर गाउँपालिका–१ विमलनगर, डुम्रे, नाहालामा राजमार्ग भाँसिएको कारण सडक अवरुद्ध भएको जिल्ला प्रहरी कार्यालय तनहुँले जनाएको छ।

जिल्ला प्रहरी कार्यालय तनहुँका प्रहरी नायव उपरीक्षक एवं प्रवक्ता युवराज तिमिल्सिनाले अन्य स्थानका सडक मर्मत गरिएको भए पनि ऐनापहराको ढुङ्गा फाल्न भने गाह्रो भएको बताए। तिमिल्सिनाका अनुसार मंगलबार साँझसम्ममा ऐनापहराको सडकमा खसेको ढिस्को फालिएपछि भने राजमार्ग सुचारु हुनेछ।

त्यस्तै बन्दीपुर गाउँपालिका–१ डुम्रेस्थित रिमाल्नी, नाहाला, याम्पामा राजमार्ग भाँसिएको थियो। त्यस क्षेत्रमा राजमार्गमा भने मर्मत गरिसकिएको उनले बताए। व्यास नगरपालिकाको मादीपुल नजिक, म्याग्दे गाउँपालिका–१ गुणादीअन्तर्गतको सडक भने मंगलबार सफा गरिएपछि सवारी चलेका छन्। व्यास नगरपालिका–१ खकौलीस्थित दमौली–छाब्दीमार्गमा सडक भासिएको छ। त्यस क्षेत्रबाट आवात–जावातका लागि वैकल्पिक बाटोको व्यवस्थापनमा लागिरहेको व्यास नगरपालिकाका प्रमुख वैकुण्ठ न्यौपानेले जानकारी दिए।

‘दमौलीसँग छाब्दीका सर्वसाधारण आवागमनमा समस्या भएकाले वडा कार्यालयलाई वैकल्पिक बाटो व्यवस्थापन गर्न निर्देशन दिएको छु, छिट्टै सडकको व्यवस्थापन हुन्छ ।’ –उनले भने।

बन्दीपुर गाउँपालिका–६ खहरे थुमथुमेस्थित नाल्दीपुल नजिकै आएको पहिरोले ४ घरमा क्षति पुर्याएको छ। त्यस क्षेत्रमा सञ्चालित केही पसलमा क्षति पुगेको स्थानीय नवराज गुरुङले बताए। गुरुङका अनुसार त्यहाँको आठ घरमध्ये ३ घरमा पूर्णरूपमा क्षति पुगेको छ भने भौतिक सामग्रीहरू नदीले बगाएको छ । पहिरो खस्न रोकिएको र वडा कार्यालयले उद्धार गरेको सामाजिक अभियन्ता सिद्धान्त गर्जा मगरले जानकारी दिए।

त्यस्तै बन्दीपुर गाउँपालिका–१ नाहालाका सुरेश र अर्जुन अधिकारीको घरमा पहिरोले पूर्णरूपमा क्षति पुगेको वडाध्यक्ष भानुभक्त पोख्रेलले बताए। पशुचौपायको भने स्थानीय तथा जनप्रतिनिधिले उद्धार गरिएका छन्। उहाँका अनुसार डुम्रेलगायत ३५ जना विस्थापित भएका छन्।

पहिरोका कारण बन्दीपुरका १४ घर–परिवार विस्थापित भएका छन। बन्दीपुर–१ र २ नम्बर वडाका चार÷चार र ५ नम्बर वडाका दुई घर परिवार विस्थापित भएको गाउँपालिका अध्यक्ष पूर्णसिं थापाले जानकारी गराए।

काठमाडौँ । माथिबाट पहिरो खसेपछि अवरुद्ध नारायणगढ–मुग्लिन सडकखण्ड ३६ घण्टापछि एकतर्फी सञ्चालनमा आएको छ। सोमबार बिहान ५ बजे चारकिलोमा खसेको ठूलो पहिरो पन्छाएपछि आज साँझ ४ः५० बजेबाट एकतर्फी सञ्चालनमा आएको हो।

नारायणगढ मुग्लिन सडक आयोजनाका सूचना अधिकारी इन्जिनीयर शिव खनालका अनुसार सो सडकको चारकिलोमा पहिराले ६० मिटर सडक ढाकेको थियो। दुवैतर्फबाट लोडरलगायतका साधनले पहिरो पन्छाइएको उनले बताए। सोमबार दिनभर वर्षा र पहिरो खसिरहेपछि काम गर्न सकिएको थिएन। आज बिहानबाट पहिरो पन्छाउने काम थालिएको थियो। पहिरो खसेको ठाउँ नारायणगढबाट ३१ दशमलव ५ किलोमिटर मुग्लिनतर्फ पर्दछ।

सो ठाउँ इच्छाकामना गाउँपालिका–६ हो। सो सडकको पहिरो खस्ने अन्य ठाउँ मर्मतसम्भार गरिएको भए पनि त्यस ठाउँमा काम गर्न शुरु गर्दागर्दै पहिरो खस्न थालेको हो। यसअघि पनि त्यही पहिरो खसेर सडक अवरुद्ध भएको थियो। सो सडक अवरुद्ध हुँदा धेरै सवारीका साधन रोकिएका थिए। सडक एकतर्फी खुलेसँगै सवारीहरु गन्तव्यतर्फ लागेका छन्। राजधानी काठमाडौँतर्फ जाने सवारी भने अगाडि पृथ्वी राजमार्गमा पुगेर रोकिने भएका छन्। सवारीको चाप कम भएपछि सडक पूरै सफा गरिनेछ।

काठमाडौं । सरकारले विभिन्न मन्त्रालय र निकायमा कार्यरत ३ सचिवहरुको सरुवा गरेको छ, भने केहिलाई पदस्थापन गरेको छ। सोमबार बसेको मन्त्रिपरिषद् बैठकले सचिवको सरुवा र पदस्थापन गरेको हो।

हरिप्रसाद बस्याल सञ्चार तथा सूचना प्रविधि मन्त्रालयमा सरुवा भएका छन्। प्रशासन श्रोतलाई प्राप्त प्रारम्भिक सूची अनुसार बैठकले गण्डकी प्रदेशका प्रमुख सचिव हरिप्रसाद बस्याललाई सञ्चार तथा सूचना प्रविधि मन्त्रालय, बाग्मती प्रदेशका प्रमुख सचिव तोयम रायलाई श्रम रोजगार तथा सामाजिक सुरक्षा मन्त्रालयमा सरुवा गरेको छ ।

त्यसै गरी युवा तथा खेलकुद मन्त्रालयका सचिव रामप्रसाद थपलियालाई शिक्षा मन्त्रालयको सचिवमा सरुवा गरेको छ ।

त्यस्तै केही दिन अघि बढुवा गरेका विष्णु नेपाललाई गण्डकी प्रदेशको प्रमुख सचिव र मान बहादुर विकलाई बाग्मती प्रदेशको प्रमुख सचिवमा सरुवा गर्ने निर्णय गरेको छ।

काठमाडौं । काठमाडौं उपत्यकामा मंगलबार थप ९ जना कोरोना संक्रमण पुष्टि भएको छ।

स्वास्थ्य तथा जनसंख्या मन्त्रालयका अनुसार काठमाडौं जिल्लामा ८ जना र ललितपुरमा १ जनालाई कोरोना पुष्टि भएको हो।

काठमाडौँ । साउन ८ गतेदेखि सार्वजनिक यातायात पूर्णरुपमा सञ्चालन हुनेछन् । सार्वजनिक यातायात व्यवसायीहरूले साउन ८ गतेदेखि यातायात सञ्चालन गर्ने घोषणा गरेका हन्।

नेपाल यातायात व्यवसायी राष्ट्रिय महासंघ र यातायात मजदुरको ट्रेड युनियनले संयुक्त पत्रकार सम्मेलन गरी साउन ८ गतेदेखि सार्वजनिक यातायात सञ्चालन गर्ने घोषणा गरेका हुन्।

सरकारले असार २६ गतेदेखि नै काठमाडौं उपत्यकाभित्र र अन्य ठाउँमा सम्बन्धित जिल्लाभित्र सार्वजनिक यातायात सञ्चालन गर्ने निर्णय गरेको थियो। तर व्यवसायीले विभिन्‍न माग राख्दै यातायात सञ्चालन गर्न आनाकानी गरेका थिए।

तर मंगलबारको पत्रकार सम्मेलनमा महासंघले आफू आवद्ध सबै यातायात कम्पनी, प्रालि, व्यवसायी तथा स्वरोजगार मजदुरलाई यातायात सञ्चालन गर्न आह्वान गरेको बताएको छ।

सार्वजनिक यातायातमा पनि जोरबिजोर लागू हुने

यातायात व्यवसायीहरू आउँदो बिहीबारदेखि सबै सार्वजनिक यात्रुबाहक बस चलाउन तयार भएसँगै यातायातहरू जोरबिजोर रूपमा सञ्चालन हुने भएका हुन् ।

सोमबार यातायात व्यवस्था विभागका महानिर्देशक, नेपाल यातायात व्यवसायी राष्ट्रिय महासंघ, तीनवटा ट्रेड युनियनहरू नेपाल यातायात स्वतन्त्र मजदुर संगठन, अखिल नेपाल यातायात मजदुर संघ र नेपाल यातायात मजदुर संघ, महानगरीय ट्राफिक प्रहरी महाशाखाबीच छलफल भएको थियो ।

उक्त छलफलमा मुख्यगरी ४ वटा सहमति भएको हो। यातायात श्रमिकहरूको समूहिक कोरोना बिमाको प्रिमियम सरकार र यातायात व्यवसायीले आधा आधा भुक्तानी गर्ने, यातायात श्रमिक कोरोनाका कारण मृत्यु भएमा आश्रित परिवारलाई क्षतिपूर्तिका लागि सरकारको तर्फबाट कोष स्थापना गर्न विभागले सम्बन्धित मन्त्रालयमा सिफारिस गर्ने, यातायात श्रमिकहरूका लागि आवश्यक सम्पूर्ण स्वास्थ्य सामग्रीहरू (मास्क, स्यानिटाइजर, पन्जा, पिपिई) सम्बन्धित व्यवसायीले उपलब्ध गराउने, लामो, छोटो र मध्यम दूरीका सबै सवारी साधनहरू सञ्चालन गर्न विभागको मार्फत सम्बन्धित मन्त्रालयमा सिफारिस गर्नेलगायत सहमति भएको छ।

पुनर्कर्जालगायत बैंकिङका विषयमा राष्ट्र बैंकले मौद्रिक नीति मार्फत संबोधन गरेको र चालक सहचालकको कोरोना बिमाको प्रिमियम सरकार र व्यवसायीले आधा आधा व्यहोर्ने सहमति जुटेपछि व्यवसायीहरू बस चलाउन राजी भएका हुन्।

सरकारले साउन ७ गतेसम्म लकडाउन गरेकाले त्यसपछि सबै व्यवसायीलाई सवारी साधन चलाउन आग्रह गरेको नेपाल यातायात व्यवसायी राष्ट्रिय महासंघका अध्यक्ष योगेन्द्रनाथ कर्माचार्यले बताए। अन्तर जिल्लाभन्दा पनि छोटो, मध्यम तथा लामो दूरीका सवारीसाधन चलाउन दिनुपर्ने व्यवसायीहरूले बताएका छन् । कम्तिमा प्रदेशभित्र बस चल्न दिनुपर्ने उनीहरूको भनाइ छ।

काठमाडौँ । अद्यावधिक विवरणअनुसार मंगलबार थप १ सय ५० जनामा कोरोना संक्रमण देखिएको छ।

स्वास्थ्य तथा जनसंख्या मन्त्रालयका अनुसार मंगलबारसम्म कोरोना भाइरस संक्रमितको संख्या १७ हजार ९ सय ९४ पुगेको छ ।

त्यस्तै मंगलबार ६ सय ९ जना डिस्चार्ज भएका छन्। डिस्चार्ज हुनेको संख्या हालसम्म १२ हजार ४ सय ७७ पुगेको मन्त्रालयका प्रवक्ता डा. जागेश्वर गौतमले बताए ।