काठमाडौँ । नेपाली सेनाका दुई उच्च अधिकृतको बढुवा भएको छ । पदोन्नती भएका उपरथी प्रेम शाहीलाई श्री युद्धकार्य महानिर्देशनालयको महानिर्देशकको जिम्मेवारी र सहायक रथी प्रेम बहादुर पुनलाई श्री प्रधानसेनापतिको कार्यालयको सैनिक सहायकको जिम्मेवारी दिईएको छ। उनीहरुलाई प्रधानसेनापति पूर्णचन्द्र थापाले दर्ज्यानी चिन्ह प्रदान गर्नुभएको छ ।
शुक्रबार जंगी अड्डामा आयोजित एक समारोहमा उपरथी दर्जामा पदोन्नती भएका प्रेम शाही र सहायक रथी दर्जामा पदोन्नती भएका प्रेम बहादुर पुनलाई प्रधानसेनापति थापाले दर्ज्यानी चिन्ह प्रदान गर्नुभएको हो । उक्त कार्यक्रममा नेपाली सेनाका रथीबृन्द तथा अधिकृतहरूको उपस्थिती रहेको थियो ।
उनीहरुको नेपाल सरकार, मन्त्रिपरिषद्को यही १५ असारको निर्णयबमोजिम बढुवा गरिएको सेनाले जनाएको छ ।
काठमाडौँ । गोरखामा कोरोना संक्रमित एक पुरूषको शव व्यवस्थापनमा स्थानीयबासीले अवरोध गरेपछि प्रहरीले लाठीचार्ज गरेर नियन्त्रणमा लिएको छ ।
पालुङटार नगरपालिका वडा नम्बर ७ का ४४ वर्षीय एक पुरूषको शनिबार बिहान गोरखा अस्पतालको आइसोलेसनमा मृत्यु भएपछि शव अबुवा नजिकै लुदी र दरौंदी नदी दोभान बगरमा खाल्डो खनेर व्यवस्थापन गर्ने निर्णय जिल्लास्थित सुरक्षा समितिले गरेपछि स्थानीय बासिन्दाले विरोध गरेका हुन्।
‘४०/५० जनाको संख्यामा मानिसहरू आएर अवरोध गर्न खोज्नुभएको हो। हामी उहाँहरूलाई सम्झाउँदैछौँ,’ जिल्ला प्रहरी कार्यालय गोरखाका एपसी सुरेन्द्र गुरूङले भने, ‘केहीबेरमा शव व्यवस्थापन गर्छौं।’
नेपाली सेनाको विशेष टोलीले शव व्यवस्थापनका लागि शनिबार दिउँसो सहिद लखन गाउँपालिका—१ को लुदीखोला घाटमा लगेपछि स्थानीयले अवरोध गरेका हुन्। पालुङटार नगरपालिका घर भएका मृतकको शव किन गोरखा नगरपालिका क्षेत्रमा गाड्ने भन्दै उनीहरूले विरोध गरेका हुन्।
शव व्यवस्थापनमा अवरोध गर्नेलाई लक्षित गरेर प्रहरीले सुरुमा चार सेल अश्रुग्यास प्रहार गरेको थियो। तनाव बढ्दै गएपछि अहिले लाठीचार्ज गरेको हो।
असार १७ गते कतारबाट नेपाल आएका उनको उपचारको क्रममा शनिबार बिहान ५ बजे गोरखा अस्पतालमा मृत्यु भएको थियो। स्वास्थ्य सुरक्षा मापदण्डअनुसार पिपिईलगायत सामग्री लगाएर नेपाली सेनाका चार जनाले शव व्यवस्थापन गर्नेछन्।
काठमाडौँ । नेपालमा विगत २४ घण्टायता थप ७ सय ४० जनामा कोरोना भाइरसको संक्रमण पुष्टि भएको छ। यो एकै दिनमा संक्रमण पुष्टि हुनेको संख्या आजसम्मकै धेरै हो ।
देशका विभिन्न प्रयोगशालामा गरिएको परीक्षणका क्रममा यी व्यक्तिमा कोरोना भाइरसको संक्रमण पोजेटिभ देखिएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले बताए।
योसँगै नेपालमा संक्रमितको संख्या १५ हजार २ सय २९ जना पुगेको छ।
त्यस्तै नेपालमा हालसम्म ३२ जना कोरोना संक्रमितको मृत्यु भएको जानकारी मन्त्रालयले दिएको छ ।
काठमाडौँ । अख्तियार दुरुपयोग अनुसन्धान आयोगले सडक विभागका इन्जिनियर भरतराज आचार्यविरुद्ध विशेष अदालत काठमाडौँमा शुक्रवार मुद्दा दायर गरेको छ ।
आचार्य जागिरमा प्रवेश गरेदेखि २०७६ जेठ मसान्तसम्मको जाँच अवधिमा पाँच करोड २९ लाख ४२ हजार चार सय ६६ रुपैयाँ आय आर्जन गरेको देखिएकोमा तीन करोड २१ लाख ६२ हजार चार सय ८० रुपैयाँ अवैध देखिएकोले उनी विरुद्ध मुद्दा दायर गरिएको हो ।
अर्यालले आफू र श्रीमतीका नाममा जग्गाहरू खरिद, घर निर्माण, सवारी साधन खरिद लगायतमा खर्च लगानीका साथै स्रोत नखुलेको रकमहरूसमेत अस्वाभाविक मात्रामा बुकिङ कारोबार तथा विभिन्न बैङ्क खाताहरूमा रकम जम्मा गरी शेयर लगानी लगायतका आफू अनुकूल लगानी खर्च गर्ने गरेको पाईएको छ ।
स्रोत नखुलेको सम्पत्ति इन्जिनियर अर्यालले श्रीमती रितादेवी खनाल आचार्यसमेतका नाममा राखेको पाइएकोले उनको श्रीमतीलाईसमेत प्रतिवादी कायम गरी आरोप पत्र दायर गरिएको आयोगका प्रवक्ता कोइरालाले बताए ।
उनी सडक विभाग अन्तर्गत गुणस्तर अनुसन्धान तथा विकास केन्द्र ललितपुरमा कार्यरत थिए ।
काठमाडौँ । अख्तियार दुरुपयोग अनुसन्धान आयोगले ठगी मुद्दामा जिल्ला अदालत कपिलवस्तुका दोभाषे विश्वनाथ कुर्मी( चौधरी) विरुद्ध विशेष अदालत काठमाडौँमा आरोप पत्र दायर गरेको छ ।
जिल्ला अदालतको शाखा अधिकृत पदबाट अवकाश प्राप्त भई सोही अदालतमा दोभाषेको रूपमा सूचिकृत कुर्मी (चौधरी)ले ठगी मुद्दाको कपिलवस्तु जिल्ला अदालतबाट हुने थुनछेक आदेशको क्रममा धरौटीमा छाड्ने प्रयोजनका लागि सहजीकरण गरिदिने भनी सेवाग्राहीसँग दुई लाख घूस लिएको पुष्टि भएपछि आयोगले उनीहरुविरुद्ध शुक्रवार विशेष अदालतमा आरोप पत्र दायर गरेको हो ।
आयोगका अनुसार कुर्मी विरुद्ध बिगो दुई लाख जरिवाना र कैद सजाय हुन माग दाबी लिई आरोप पत्र दायर गरिएको छ । उनलाई सेवाग्राहीसँग घुस लिँदालिँदै गर्दा अख्तियार दुरुपयोग अनुसन्धान आयोगको कार्यालय बुटवलबाट खटिई गएको टोलीले घुस रकमसहित नियन्त्रणमा लिएको थियो ।
काठमाडौं। स्वास्थ्य बिमा बोर्डका कार्यकारी निर्देशक रमेशकुमार पोखरेलले पदबाट राजीनामा दिनुभएको छ । बुधबार पोखरेलले प्रधानमन्त्री तथा मन्त्रिपरिषद्को कार्यालयलाई राजीनामा पत्र बुझाउनु भएको हो । राजीनामा पत्र स्वास्थ्य तथा जनसंख्या मन्त्री, राज्यमन्त्री लगायतलाई बोदार्थ दिइएको छ ।
खुल्ला प्रतिस्पर्धा मार्फत छनौट भएका पोखरेललाई लोक सेवा आयोगको सिफासिमा मन्त्रिपरिषद्ले १८ महिना अघि नियुक्त गरेको थियो । उनको कार्यअवधी चार वर्षको थियो । तर पछिल्लो समय स्वास्थ्य मन्त्रालयले उनी सहित बिमा बोर्डका सबै पदाधिकारीहरुलाई जिम्मेवारीपूर्वक काम गर्न नसकेको भन्दै स्पष्टीकरण सोधेको थियो ।
स्वास्थ्यका अधिकारीहरुले राजीनामा पत्र आएको र दर्ता भएको भन्दै आवश्यक कारबाही अघि बढाउने बताए ।
पोखरेल स्वास्थ्य बिमा बोर्डमा २०७५ मंसिर २३ मा नियुक्त भएका थिए । तर पुस लागेर मात्रै उनले जिम्मेवारी सम्हालेका थिए । सरकारको महत्वकांक्षी योजनामा स्वास्थ्यबिमा कार्यक्रम परेको छ । चालु आर्थिक वर्षका लागि यो कार्यक्रमका लागि करिब ७ अर्ब रकम विनियोजन गरेको छ ।
काठमाडौँ । आर्थिक बर्ष २०७७\०७८ का लागि काठमार्डौं महानगरको आर्थिक बिधेयक महानगरको आज पारित गरेको छ । बिधेयक ७ औं नगर सभाको तेश्रो बैठकबाट आज पारित भएको हो ।
असार १० गते बसेको नगर सभाको दोश्रो बैठकमा उपमेयर हरिप्रभा खड्गी श्रेष्ठले आर्थिक बिधेयक र मेयर बिद्यासुन्दर शाक्यले बिनियोजन बिधेयक प्रस्ताव गरेका थिए । यसरी प्रस्ताव गरिएका बिधेयकमध्ये बिहीवार नगर सभामा दफावार छलफल गर्दै पारित गरिएको हो ।
‘करको दर नबढाउनु भनेको करमा दिइएको छुट नै हो,’ बिधेयकका व्यवस्थाका बारेमा सभालाई जानकारी दिँदै सभाका अध्यक्ष एवं महानगरका मेयर शाक्यले भने, ’करदाताहरुबाट आ. व. २०७६\०७७ मा असुल हुनु पर्ने तर बाँकी सबै प्रकारका कर बक्यौता जरिवानामा छुट दिइएको छ । कोभिड – १९ काकारण व्यवसायीमा परेको प्रभावलाई सामान्य बनाउन यस्तो यस्तो छुट दिइएको हो भने पहिलेका बर्षहरुमा असोज मसान्तसम्म दिइने गरेको सम्पत्ति करको छुटलाई यस बर्ष पुष मसान्तसम्म दिइने भएको छ ।‘
पर्यटन क्षेत्रका व्यवसायीमा लकडाउनले पारेको असर कम गराउन महानगरले आफ्नै नाममा भएका र लिज वा भाडामा लिएका दुवै प्रकारका होटल, रिसोर्टको सम्पत्ति करमा ७५ प्रतिशत छुट दिने भएको छ । यसरी छुट पाउने करदाताले आर्थिक बर्ष २०७६\०७७ सम्मको घरजग्गा कर÷सम्पत्ति कर चुक्ता गरिसकेको हुनुपर्नेछ । २०७७ पुष मसान्तभित्र सम्पति कर बुझाएमा अरुलाई दिइने जस्तै १० प्रतिशत थप छुट हुँदा यस क्षेत्रका व्यवसायीले सम्पत्ति करमा ८५ प्रतिशत छुट पाउनेछन् । व्यवसायतर्फ होटल, पर्यटन र मनोरञ्जन क्षेत्रका लागि ५० प्रतिशत र अन्य व्यवसायमा २० प्रतिशत छुट हुनेछ ।
बन्दाबन्दीका समयमा आफ्नो घरमा बहालमा बस्नेहरुलाई कम्तीमा एक महिनाको घर बहाल छुट दिएको स्वघोषणा गर्ने घरधनीलाई घरको बहालमा १० प्रतिशत छुट हुने हुनेछ । बहाल छुट दिएको स्वघोषणा गरेर आर्थिक बर्ष २०७६\०७७ मा बुझाउनुपर्ने घर बहाल कर चुक्ता गर्ने करदातालाई १० प्रतिशत छुट हुनेछ । २०७६\०७७ मा घर, जग्गा तथा सम्पत्ति भाडामा लगाए बापतको बहालमा छुट दिएका तर कर छुट सेवा नपाएका घरधनीलाई आर्थिक बर्ष २०७७\०७८ को बहाल करमा १० प्रतिशत छुट दिएर कर समायोजन गरिनेछ ।
बिधेयकको दफावार छलफलमा नगर सभाका सदस्यहरुले, सबै करदाताले महसुस गर्ने कर छुटको व्यवस्था, करको दायरा बढाउन राजस्व प्रशासनको सवलीकरण, संघ संस्थाहरुले उठाउने गरेको तर महानगरको दायरामा नआएका क्षेत्रलाई समेट्नु पर्ने, पर्यटन क्षेत्रको पुनस्र्थापनाका कर छुटको व्यवस्था, रिक्सा ठेलामा कर लगाउनुको सट्टा सहरी सौन्दर्यता र यातायात आवागमनमा समस्या सृजना गर्ने यस्ता साधन हटाउनु पर्नेलगायतका सुझाव राखेका थिए ।
सभामा नगर सभा सदस्यहरु न्हुच्छेकाजी महर्जन, मचाराजा महर्जन, रमेश डंगोल, रामकुमार के। सी।, आशा श्रेष्ठ, आनन्द गौत्तम, निमा घ्याम्छो तामाङ्, तीर्थकाजी डगोल, जीवन मानन्धर र ध्रुबप्रसाद त्रिपाठीले बिधेयकका प्राबधानहरुमा सुधार तथा संशोधनका लागि सुझाव राखेका थिए ।
सभाको सोही बैठकमा काठमाडौँ महानगर पालिकाका प्रमुख प्रशासकिय अधिकृत एकनारायण अर्यालको विशेष उपस्थिती रहेको थियो । नितीगत रुपमा केही समस्या आएमा उहाँले सुझाउने गरि तयारी भएपनि त्यस्तो समस्या नआएपछि उहाँको विशेष उपस्थिती मात्र रहेको थियो ।
काठमाडौँ महानगर पालिकाका प्रमुख प्रशासकिय अधिकृत एकनारायण अर्याल
आ।व। २०७७\०७८ का लागि महानगरले १६ अर्ब ४२ करोड ७३ लाख २६ हजार रुपैयाँ आय व्यय प्रस्ताव गरेको छ ।
काठमाण्डौ । राष्ट्रिय ध्वजावाहक नेपाल वायुसेवा निगम (नेपाल एअरलाइन्स) ले शान्ति मिसनमा खटिने नेपाली सेनालाई लैजान अफ्रिकन देशमा चार्टर्ड उडान गर्ने भएको छ ।
नेपाली सैनिकलाई संयुक्त राष्ट्र सङ्घ (यूएन) को शान्ति मिसनमा लैजान नेपाल एअरलाइन्सको चार्टर्ड उडान सेन्ट्रल अफ्रिकन रिपब्लिक र मालीमा गर्ने भएको निगमको अपरेशन विभाग प्रमुख दीपु ज्जहार्चनले जानकारी दिनुभयो ।
निगमको बजार विविधीकरणको योजनाअनुरुप संयुक्त राष्ट्र सङ्घको सेन्ट्रल अफ्रिकन रिपब्लिकन र मलिकोमिनुसामा नेपाली सेनालाई लैजाने सम्बन्धमा आज निगम र नेपाली सेनाका उच्च अधिकारीबीच सम्झौता भएको हो । सम्झौतानुसार मिसनका लागि खटिने नेपाली सेनालाई आगामी आसार २४ गते अर्थात् जुलाई ८ तारिखमा वाइडबडी जहाजमार्फत अफ्रिकन रिपब्लिक र माली लगिनेछ ।
निगमको वाइडबडी जहाज काठमाण्डौबाट कतारको दोहामा प्राविधिक उडान गर्दै त्यहाँबाट सेन्ट्रल अफ्रिकन रिपब्लक पुग्ने जनाइएको छ । त्यही जहाजबाट शान्ति मिसनमा रहेका ती देशबाट सैनिक स्वदेश फर्काइनेछ । नयाँ गन्तव्यको चार्टर्ड उडानलाई कम्पनीले चुनौती र अवसर दुवैरुपमा लिएको अपरेशन प्रमुख ज्युहार्चन बताउनुभयो ।
निगमले जुन १२ तारिख र त्यसपछि हुने दक्षिणी सुडानलगायत गन्तव्यको उडान तालिका छिट्टै निर्धारण हुने उल्लेख गरेको छ ।
काठमाडौँ, । सम्पत्ति शुद्धिकरणका महाप्रवन्धकमा उद्योग विभागका सहसचिव शेभाकान्त पौडेललाई बनाउने निर्णय भएको छ । सम्पत्ति शुद्धिकरणको छानविनको दायारमा आएका व्यापारी, उद्योगी तथा कमिशन एजेन्टहरुको ओम्नी ग्रुप र दीपक मलहोत्राको संयोजनमा बसेको बैठकले सहसचिव पौडेललाई महाप्रवन्धक बनाउँने निर्णय गरेको हो । बैठकमा अग्नि खरेलका दाजु भिम खरेल, शिवम् सिमेन्टका रघु मरु, सिभिल ग्रुपका इच्छाबहादुर तामाङ, व्यापारी सुहृद घिमिरे, म्यानपावर व्यवसायी रघु पुरी, कमिशन एजेन्ट दीपक भट्ट लगायतको उपस्थिती रहेको थियो ।
शुद्धिकरण विभागले दर्जनौं उद्योगी व्यापारी तथा कमिसन एजेन्टहरुको सम्पत्ति छानविन गरिरहेको थियो। तीमध्ये धेरैलाई शुद्धिकरणले मुद्दा समेत दायर गरिसकेको थियो।
सिभिल ग्रुपका इच्छाबहादुर र उनकी श्रीमती सिर्जना शाक्यको सम्पत्ति शुद्धिकरण विभागले अवैध भन्दै रोक्का गरेपछि नेकपाभित्र हलचल मच्चिएको थियो।
अग्नि खरेलका दाजु भिम खरेल चाहिँ भाटभटेनी डिपार्टमेन्टल स्टोरका मालिक मिनबहादुर गुरुङको तर्फबाट यस्ता बैठकमा सहभागी हुने गरेको बुझिएको छ। उनी भाटभटेनीका वकील हुन्।
शुद्धिकरण विभागले अवैध सम्पत्ति छानविनलाई अगाडि बढाएपछि अर्थमन्त्री युवराज खतिवडाले बाधा दिएका थिए। मन्त्री खतिवडाले बिराटनगरको एक कार्यक्रममा गएर शुद्धिकरण विभागसँग नडराउनु भनी सार्वजनिक भाषण नै दिएका थिए।
त्यसपछि मन्त्री खतिवडाले शुद्धिकरणको दायरामा परेकाहरुको अर्थ मन्त्रालयमा गएको डेलिगेशनलाई शुद्धिकरण विभागका सबैको सरुवा गरिदिन्छु, त्यो ठाउँमा कसलाई ल्याउने तपाईंहरु नै सिफारिस गर्नुस् भनेको स्रोतको दावी छ। त्यसपछि शुद्धिकरणको छानविनको दायरामा परेकाहरुले उद्योग मन्त्रालयका शोभाकान्तलाई शुद्धिकरण विभागको महानिर्देशक बनाउन सिफारिस गरेका छन्।
शोभाकान्तको नाममा मुख्य सचिव लोकदर्शन रेग्मी र प्रधानमन्त्रीका सल्लाहकार विष्णु रिमालले सहमति जनाइसकेका छन् । शुद्धिकरण विभागले व्यवसायीहरुको सम्पत्ति छानविन गर्न थालेपछि नेपालको अर्थतन्त्र नै शिथिलतामा गएको मानिन थालेको थियो।
‘नेपालमा अवैध सम्पत्ति नहुने उद्योगी व्यापारी कोही पनि छैनन्, सबैले कर छलेका छन्। ती सबैको सम्पत्ति छानविन गरेर कारवाही गर्न खोज्नु भनेको अर्थतन्त्र तहसनहस पार्नु हो। शुद्धिकरण विभागले अर्थतन्त्र भत्काएर भयावह अवस्था ल्याउने प्रयास गरेको थियो। अब त्यो रोकिन्छ।’ एक व्यापारीले भने ।
शुद्धिकरणले केही दिन अघि योगेन्द्र श्रेष्ठको करिब दुई अर्ब रुपैयाँको अवैध सम्पत्ति भेटिएको भन्दै मुद्दा दायर गरेको छ। यसमा पनि व्यवसायीहरुको विमति रहेको छ । इच्छाबहादुरको सम्पत्ति छानविन गर्दा पत्नी सिर्जनाको नाममा पचासौं करोड रुपैयाँ अवैध सम्पत्ति भेटिएको थियो। इच्छाबहादुर र सिर्जनाको सम्पत्ति छानविन गरेर कारबाही गर्दा सिभिल सहकारी र सिभिल होम्समा गरिएको सर्वसाधारणको लगानी डुब्ने भएकाले व्यवसायीहरुले विरोध गरेको बुझिन्छ।
‘‘नेपालमा अवैध सम्पत्ति छानविन गर्ने बेलै भएको छैन, कर प्रशासनमा कडाई गरेर १० वर्षपछि मात्र छानविन गर्नु उपयुक्त हुने हाम्रो सुझाव छ।’ केही व्यापारीहरुले भने । व्यवसायीहरुले रोजेका शोभाकान्त पौडेल मातृका यादव र उद्योगी बिनोद चौधरीका निकट मानिन्छन्। सम्भवत उनैलाई अब सम्पत्ति शुद्धिकरण विभागको जिम्मा दिइने छ।
काठमाडौँ । नेपालमा कोरोना संक्रमणबाट थप १ जनाको मृत्यु भएको छ । त्रिवि शिक्षण अस्पतालमा उपचार गराइ रहेका कोरोना संक्रमित डेढ महिनाको शिशुको उपचारका क्रममा मृत्यु भएको हो ।
त्रिवि शिक्षण अस्पतालका अनुसार घाँटीमा समस्या देखिएपछि उपचारका लागि शिशुलाई शिक्षण अस्पताल भर्ना गरिएको शल्यक्रियाअघि परीक्षण गर्दा मंगलबार कोरोना संक्रमण पुष्टि भएको थियो । नेपालमा यसअघि कोरोनाबाट ३० जनाको मृत्यु भइसकेको छ ।
काठमाडौं । अद्यावधिक विवरणअनुसार बिहीबार थप ४ सय ७३ जनामा कोरोना संक्रमण पुष्टि भएको छ । संक्रमितहरूमध्ये २८ जना काठमाडौँ जिल्लाका रहेका स्वास्थ्य तथा जनसंख्या मन्त्रालयले जानकारी दिएको छ ।
योसँगै नेपालमा कोरोना संक्रमितको कुल संख्या १४ हजार ५ सयद१९ पुगेको छ । बिहीबार नै भक्तपुर र ललितपुरमा पनि २/२ जना संक्रमित भेटिएका छन् ।
त्यस्तै कोरोना संक्रमण निको भएर ५ हजार ३ सय २० जना घर फर्किएका छन् ।
काठमाडौं । गोरखामा टिप्परले नेपाली सेनाको गाडीलाई ठक्कर दिँदा चार जना सैनिक घाइते भएका छन्।
गोरखा नगरपालिका–११ पन्ध्रकिलो मोड नजिकै लु १ प ३८४६ नम्वरको टिप्परले बा १ झ ५८०० नम्बरको सेनाको गाडीलाई ठक्कर दिएको हो ।
ठक्करबाट चार सैनिक घाइते भएको प्रहरीले जनाएको छ। जिल्ला प्रहरीका प्रवक्ता डिएसपी बासुदेव खतिवडाले घाइतेमध्ये दुई जनाको अवस्था गम्भीर रहेको जानकारी दिए।
गम्भीर घाइतेलाई चितवन पठाउने तयारी भैरहेको र बाँकीको स्थानीय अस्पतालमा उपचार भैरहेको खतिवडाले बताए।
काठमाडौं । नेपालमा पछिल्लो २४ घण्टामा १ हजार ४ सय ६२ जना कोरोना संक्रमित निको भएर अस्पतालबाट डिस्चार्ज भएका छन् ।
कोरोना संक्रमणबाट मुक्त हुनेको यो संख्या अहिलेसम्मकै उच्च हो । यो सँगै कोरोना संक्रमणमुक्त हुनेको संख्या ४ हजार ६ सय ५६ पुगेको छ ।
स्वास्थ्य तथा जनसंख्या मन्त्रालयको नियमित प्रेस ब्रिफिङमा दिइएको जानकारी अनुसार बुधबार ४ सय ८२ जना नयाँ संक्रमित थपिएका छन् ।
अहिलेसम्म देशभर कूल संक्रमितको संख्या १४ हजार ४६ पुगेको छ । बुधबार १ सय १७ महिला र ३ सय ६५ पुरुषमा संक्रमण पुष्टि भएको छ । कुल संक्रमितमध्ये महिला १ हजार ७ सय ७४ र पुरुष १२ हजार २ सय ७२ जना रहेका छन् ।
कोरोनाबाट बुधबार थप एक जनाको मृत्यु भएको पुष्टि भएको छ । अछामको बयलवाटा अस्पतालमा उपचारका क्रममा मृत्यु भएका एक पुरुषको कोरोना रिपोर्ट पोजेटिभ आएको हो ।
यो सँगै देशभर कोरोना भाइरसबाट मृत्यु हुनेको संख्या ३० पुगेको छ ।
