Month: February 2022

काठमाडौँ। नेपालमा पछिल्लो २४ घन्टामा थप ४ जनाको कोभिड–१९ सङ्क्रमणबाट मृत्यु भएको छ। मृत्यु हुनेमा २ महिला र २ पुरुष छन्। बाँकेको कोहलपुर नगरपालिका–२ का ७० वर्षीया महिलाको नेपालगञ्ज मेडिकल कलेज कोहलपुरमा उपचारका क्रममा आइतबार मृत्यु भएको हो।

पर्साको देवयानी गाउँपालिका १५ का ४५ वर्षीय महिलाको पनि कोभिड सङ्क्रमणका कारण आइतबार नै नारायणी अस्थायी कोभिड अस्पतालमा मृत्यु भएको स्वास्थ्य तथा जनसङ्ख्या मन्त्रालयका प्रवक्ता प्राडा जागेश्वर गौतमले जानकारी दिए। यसैगरी काठमाडौँ महानगरपालिका–१० मध्यबानेश्वर बस्ने ७६ वर्षीय पुरुषको आज मेडिकेयर अस्पतालमा र कीर्तिपुर नगरपालिका ट्याङ्लाफाँट बस्ने ६४ वर्षीय पुरुषको पनि कोरोना भाइरसका कारण मृत्यु भएको मन्त्रालयले जनाएको छ । यससँगै नेपालमा कोरोना भाइरसका कारण मृत्यु हुनेको सङ्ख्या ७९ पुगेको छ ।
त्यस्तै मुलुकका विभिन्न प्रयोगशालामा गरिएको आठ हजार ४ सय ३४ नमूना परीक्षणमा आज कुल ३ सय ३८ नयाँ सङ्क्रमित थपिएको मन्त्रालयले जनाएको छ। आज सबैभन्दा बढी बाँकेमा ६३ जना नयाँ सङ्क्रमित थपिएका छन्।

रौतहटमा ३१, मकवानपुरमा २३, पर्सामा २२, सर्लाहीमा २१, दैलेखमा १७, मोरङ र प्युठानमा १५÷१५, धनुषामा १३, कपिलवस्तुमा ११, कैलाली र सल्यानमा सात÷सात, सिन्धुलीमा छ, दाङमा पाँच, नुवाकोटमा चार, महोत्तरी, बारा र गोरखामा तीन÷तीन, खोटाङ, तनहुँ, बर्दिया र नवलपरासी पूर्वमा दुई÷दुई तथा झापा, सिन्धुपाल्चोक, अछाम, अर्घाखाँची, बागलुङ, चितवन, पाल्पा, रामेछाप, स्याङ्जा, रुपन्देही, रोल्पा, सुर्खेत, बैतडी र बझाङमा एक÷एक सङ्क्रमित थपिएका मन्त्रालयले जनाएको छ ।

पछिल्लो २४ घन्टामा १४० जना कोरोना जितेर डिस्चार्ज भएका छन्। यससँगै हालसम्म कोरोना सङ्क्रमणमुक्त हुनेको सङ्ख्या १६ हजार ४९३ पुगेको छ । जुन ७०.७ प्रतिशत हो । धनकुटा, सङ्खुवासभा, मनाङ, मुस्ताङ, डोल्पा र हुम्लामा कोरोनाका सक्रिय सङ्क्रमित छैनन् ।

देशभर सक्रिय सङ्क्रमितको सङ्ख्या ६ हजार ७ सय ३८ रहेको छ। पर्सा, रौटहट, महोत्तरी र काठमाडौँमा ५०० बढी सक्रिय सङ्क्रमित उपचाररत छन् । क्वारेन्टिमा रहनेको सङ्ख्या १० हजार ७५९ छ । विश्वभर आजसम्म २ करोड २६ लाख ४ सय ३४ जनामा कोरोना सङ्क्रमण देखिएको छ। यस्तै ७ लाख ३४ हजार २८ जनाले कोरोनाका कारण ज्यान गुमाएका छन्। कोरोनालाई जितेर निको हुनेको सङ्ख्या एक करोड २९ हजार ७८ रहेको छ।

काठमडौँ। गत २४ घण्टामा काठमाडौँ उपत्यकामा ४३ जनामा कोरोना संक्रमित भेटिएका छन्। स्वास्थ्य तथा जनस‌ंख्याका अनुसार संक्रमितहरूमा काठमाडौँका ३६, ललितपुरका ४ र भक्तपुरका ३ जना रहेका छन्।

त्यस्तै सोमबार देशभरमा भने ३ सय ३८ जनामा कोरोना संक्रमण पुष्टि भएको छ।

काठमाडौँ । राष्ट्रिय आविष्कार केन्द्रका संस्थापक महावीर पुनले विद्युतबाट चल्ने मोटरसाइलको उद्घाटन गरेका छन्। योमा मि मोटर्स प्रालिमार्फत विद्युतीय मोटरसाइकल बजारमा ल्याएका हुन्।

उनले अहिले चीनमा निर्माण हुँदै आएको जेनियस् मोटरसाइकल जस्तै बाइक नेपालमा निर्माण भएको बताए। उद्घाटन समारोहमा बोल्दै पुनले भने, ‘बाइक मात्र नभएर आगामी दिनमा विद्युतीय गाडीहरु समेत नेपालमा बनाउने तयारी भइरहेको छ ।’

कार्यक्रममा नेपाल बिद्युत प्राधिकरणका कार्यकारी प्रमुख कुलमान घिसिंगको पनि उपस्थिती रहेको थियो । नेपालले आफ्नो व्यापार घाटा घटाउन र तेलमाथिको परनिर्भरता घटाउन विद्युतीय गाडीलाई प्राथमिकता नदिई नहुने उनीहरुले बताएका थिए ।

वीरगञ्ज। कोरोना संक्रमणबाट थप एक जनाको मृत्यु भएको छ। वीरगञ्ज महानगरपालिका–१५ भेडियाही बस्ने ४५ वर्षीया महिलाको मृत्यु भएको हो।
मृत्युपछि नारायणी अस्पतालको पीसीआर प्रयोगशालामा गरिएको परीक्षणका क्रममा उनको रिपोर्ट पोजेटिभ आएको हो।

उनको शनिबार राति नारायणी कोरोना विशेष अस्पताल गण्डकमा उपचारको क्रममा ४५ वर्षीया मृत्यु भएको थियो। आइतबार उनको स्वाब निकालेर पीसीआर परीक्षण गर्दा रिपोर्ट पोजेटिभ आएको कोभिड अस्पतालका संयोजक डाक्टर उदय नारायण सिंहले जानकारी दिए। उनलाई पहिलेदेखि नै उच्च रक्तचाप र थाइराइडको विरामी उनलाई श्वास प्रश्वासमा समस्या भएपछि उपचारका लागि अस्पताल ल्याइएको थियो । उनको अवस्था अस्पताल ल्याउँदै गम्भिर रहेको डा. सिंह बताउँछन्।

तौलिहवा। कपिलवस्तु जिल्ला अस्पतालका अत्यावस्यक सेवा बाहेक सबै पूर्ण रुपमा बन्द गरिएको छ। सदरमुकाम तौलिहवास्थित कपिलवस्तु जिल्ला अस्पतालका स्वास्थ्यकर्मीमा कोरोना संक्रमण भएपछि अत्यावश्यकबाहेकका सम्पूर्ण सेवा बन्द गरिएको हो।

अस्तपालका मे. स किशोर बन्जाडेका अनुसार अस्पतालका विभिन्न फाँटमा कार्यरत कर्मचारीमा कोरोना पुष्टि भएपछि अत्यावश्यकबाहेकका सेवा बन्द गर्ने निर्णय भएको हो ।

अस्पतालको आन्तरिक बैठकले गरेको निर्णयअनुसार संक्रमणको सम्भावित जोखिममा रहेकाहरुको स्वाब परीक्षण रिपोर्ट नआएसम्म अति आवश्यक इमरजेन्सीबाहेका सम्पूर्ण सेवा बन्द रहने छन्।

आइतबार अस्पतालका एक नर्सिङ कर्मचारी, एक ल्याबका कर्मचारी, एक्सरे र ओपीडीमा काम गर्ने कर्मचारीहरुमा कोरोना संक्रमण पुष्टि भएको थियो।

हालसम्म कपिलवस्तु जिल्ला अस्पतालमा कार्यरत ६ जना स्वास्थ्यकर्मीमा कोरोना पुष्टि भएको छ । अस्पतालमा कार्यरत एक महिला कर्मचारीमा दुई महिनाअघि संक्रमण देखिएको थियो ।
त्यस्तै अस्पतालमा स्वाब संकलन गर्दै आएका ल्याब असिस्टेण्ट पनि संक्रमित भएका छन्। उनी अहिले आइसोलेसनमा छन्।

काठमाडौँ । आगामी (भदौ) १ गतेदेखि सञ्चालन हुने भनेका सबै सेवाहरु अझै नखोल्ने निर्णय भएको छ। कोरोनाको संक्रमण र मृतकको संख्या बढ्न थालेकाले भदौ १ गतेदेखि सञ्चालन गर्ने भनिएका सेवा सरकारले तत्काल नखोल्ने भएको हो।

भदौ १ बाट लामो दूरीको यातायात सेवा, हवाई सेवा र विद्यालय भर्ना खोल्नेलगायतका निर्णय सरकारले गरेको थियो । तर,कोरोना संक्रमण दर झन् बढ्दो भएकाले आइतबार बसेको सीसीएमसी निर्देशक समितिको बैठकमा मन्त्रीहरूबीच सरकारले भदौ १ गतेदेखि सञ्चालन गर्ने भनिएका सेवा नखोल्ने निष्कर्ष निस्किएको एक मन्त्रीले बताए। यसबारे निर्णय भने अब बस्ने मन्त्रिपरिषद् बैठकले गर्नेछ।

मन्त्रिपरिषद्को नियमित बैठक सोमबार बस्छ । ‘सीसीएमसीमा मन्त्रीहरू सदस्य भएका कारण उनीहरूले मन्त्रिपरिषद्मा कुरा गर्ने र त्यसपछि मन्त्रिपरिषद्ले नै निर्णय परिमार्जन वा संशोधन गर्न सक्नेछ,’ सीसीएमसी सचिवालयका संयोजक महेन्द्रप्रसाद गुरागाईंले भने।

साउन ६ गतेबाट लकडाउन पूर्ण रूपमा हटेपछि सरकारले भदौ १ बाट आन्तरिक तथा अन्तर्राष्ट्रिय व्यावसायिक र अन्य उडान, अन्तर्राष्ट्रिय खेलकुदका प्रशिक्षण तथा प्रारम्भिक चरणका खेल र विद्यार्थी भर्ना, शैक्षिक र अन्य परीक्षा सञ्चालन गर्ने तथा लामो दूरीको यातायात सञ्चालन गर्ने निर्णय गरेको थियो ।

काठमाडौँ। पछिल्लो २४ घण्टामा नेपालमा ३ सय ८० जनामा कोरोन संक्रमण पुष्टि भएको छ भने २ जनाको मृत्यु भएको छ। त्यस्तै स्वास्थ्य तथा जनसङ्ख्या मन्त्रालयका अनुसार अहिलेसम्म कोरोनाबाट मृत्यु हुनेको संख्या ७५ पुगेको छ भने सङ्क्रमित व्यक्तिहरूको सङ्ख्या २२,९७२ पुगेको छ।

मन्त्रालयका प्रवक्ता डा. जागेश्वर गौतमले अहिले ६,५४४ जनामा सक्रिय सङ्क्रमण छ भने १६,३५३ जना भाइरसमुक्त भएको बताए।