निमावि शिक्षकको दरखास्त आह्वान
काठमाडौँ-शिक्षक सेवा आयोगले निम्न माध्यमिक तह, तृतीय श्रेणीका लागि २ हजार ५ सय ९८ शिक्षकको दरखास्त आह्वान गरेको छ ।
उम्मेद्वारहरुले माघको ६ गतेसम्म तोकिएको दस्तुरमा र माघ ७ देखि १३ गतेसम्म दोब्बर दस्तुर तिरेर आवेदन दिन सक्नेछन् ।
आयोगले सबै ईच्छुक उम्मेद्वारहरुलाई अनलाईन https://online.tsc.gov.np/ मार्फत दरखास्त दिन आह्वान गरेको छ ।
प्रतिनिधिसभामा आजपनि एमालेको विरोध
काठमाडौँ-सङ्घीय संसद्को दशौँ अधिवेशनअन्तर्गत प्रतिनिधिसभाको आजको बैठक पनि प्रमुख प्रतिपक्षी दल नेकपा (एमाले) ले अवरुद्ध गरेको छ ।
बैठक सुरु भएलगत्तै एमालेका सांसदले वेल घेराउ र नाराबाजी गरेपछि सभामुख अग्निप्रसाद सापकोटाले जनताको आवाज मुखरित हुने संसद्मा जनताका प्रतिनिधिको आवाज थुन्ने अवस्था आएको भन्दै यसले जनतामा निराशा उत्पन्न हुने बताए ।
उनले आफ्ना कुरा सुन्ने र अरुका कुरा पनि सुन्ने प्रक्रियामा सहयोग गर्न एमालेका सांसदलाई पटकपटक आग्रह गरेका थिए ।
उनले संसदीय व्यवस्था सिद्धान्तमात्र नभएर समन्वयात्मक अभ्यास पनि भएकाले परिस्थिति र अवस्था सधैँ नहुने हुँदा सरकारलाई काम गर्न दिन र संसद् सञ्चालनमा सघाउन सांसदलाई पुनःध्यानाकर्षण गराए ।
जनप्रतिनिधिको सर्वोच्च निकाय संसद् एवं सदस्यले स्वीकृत विधि र नियम पालनामा सांसद सचेत हुनुपर्ने भएकाले प्रक्रियाभित्र रहेर असहमति राख्न उनले आग्रह गरेका थिए ।
सभामुखले बैठक सञ्चालनका लागि प्रतिनिधिसभा नियमावली, २०७५ को नियम ६ को उपनियम २ बमोजिम पटकपटक आग्रह गर्दै सर्वोच्च अदालतमा विचाराधीन विषयमा संसद्मा छलफल गर्न नपाइएको संवैधानिक व्यवस्थाबारे पनि ध्यानाकर्षण गराए ।
गत साउन १ गते एमालेका तत्कालीन नेता माधवकुमार नेपालसहित १४ सांसदलाई कारबाहीका लागि सिफारिश गरिएकामा त्यसको सुनुवाइ नगरेर पार्टी विभाजन गराउने कार्यमा सभामुखबाट सहयोग गरिएको आरोप एमालेले लगाउँदै आएको छ ।
प्रतिनिधिसभामा आजपनि एमालेको विरोध
मेची–महाकाली एकता यात्रा गर्दै विवेकशील साझा
विवेकशील साझा पार्टीले महाकाली–मेची राष्ट्रिय एकता यात्रा गर्ने भएको छ ।
आगामी पुष २७ गते पृथ्वी जयन्ती तथा राष्ट्रिय एकता दिवसको अवसरमा सो पार्टीले महाकाली मेची राष्ट्रिय एकता यात्रा गर्ने भएको हो ।
सो पार्टीको मंगलबार बसेको केन्द्रीय कार्य सम्पादन समितिको बैठकले सो निर्णय गरेको हो ।
यात्रा पुष २७ गते कञ्चनपुरबाट सुरु भई माघ १६ गते झापा पुगेर अन्त्य हुने विवेकशील साझा पार्टीद्वारा बुधबार जारी विज्ञप्तिमा जनाइएको छ ।
महाकाली मेची यात्राको विस्तृत विवरण पछि प्रकाशित गरिने विज्ञप्तिमा जनाइएको छ ।
जारी विज्ञप्तिमा भनिएको छ स् ‘नागरिकहरूका आ९आफ्ना वैचारिक दृष्टिकोण भए पनि “विचारभन्दा माथि देश” नै हो भन्ने भावना प्रवर्द्धन गर्नु, राष्ट्रिय एकता तथा देशको स्वाधीनता, शान्ति, स्थिरता, विकास र दूरगामी हितलाई सुनिश्चित गर्ने विवेकशील साझा पार्टीका एजेण्डा आम सर्वसाधारणसम्म पुर्याउनु, पार्टीको आम नागरिकसँगको सम्बन्धलाई अझ मजबुत बनाउनु र जातीय, क्षेत्रीय तथा धार्मिक रूपमा बढ्दै गएको मनोवैज्ञानिक दूरी कम गर्न सघाउनु राष्ट्रिय एकता यात्राको मूल उद्देश्य हुनेछ।’
सो पार्टीले आफ्ना सम्पूर्ण नेता, सदस्य र शुभेच्छुकहरुलाई पार्टीको यो विशेष यात्रामा साथ दिन अनुरोध समेत गरेको छ ।
मेची–महाकाली एकता यात्रा गर्दै विवेकशील साझा
नजिकिँदै सभामुख, टाढिँदै प्रतिपक्ष
काठमाडौँ-प्रतिनिधिसभा पुनःस्थापित भएसँगै प्रमुख प्रतिपक्षी दल नेकपा (एमाले) को निरन्तरको अवरोधले संसद्ले गति लिन सकेको छैन् ।
जनप्रतिनिधिमुलक सर्वोच्च संस्था सदनमा सांसद्ले जनजीविकाका विषय उठान गर्न पाएका छैनन् भने सरकारले पनि विधेयक प्रस्तुत गर्न सकिरहेको छैन ।
यसले जनताका सवाल ओझेलमा परेका छन् ।
जनसंघर्षबाट प्राप्त गणतन्त्र, संघीयता, धर्मनिरपेक्षता, समानुपातिक समावेशी प्रणालीलगायत महत्वपूर्ण उपलब्धिलाई संस्थागत गर्ने विधेयकले संसद्बाट पूर्णता पाउन नसकेको बताइएको छ ।
संघीय संसद्को नवौँ अधिवेशन पनि एमालेको अवरोधका कारण नियमित कामकारबाही प्रभावित रह्यो ।
यद्यपि, प्रतिपक्षीको अवरोधका बीच संसदले केही महत्वपूर्ण निर्णय लिएको छ ।
संघीय संसद्को दशौँ अधिवशेन गत मंसिर २८ गतेदेखि शुरु भएको छ ।
विधेयक अधिवेशनका रुपमा रहेको चालु अधिवेशन निर्वाध रुपमा चल्ने संकेत देखिएको छैन ।
चालु अधिवेशनको दुई बैठकमा पनि एमालेको अवरोध कायम रह्यो ।
अबरोधका बीच पनि संसद् कार्यसूचीमा प्रवेश गरेको छ ।
संसद्मा देखिएको अवरोध हटाउन सरकार र सभामुखले पहलकदमी लिएपनि त्यसले सार्थक रुप लिन सकेको छैन ।
संसद्को सबैभन्दा ठूलो दल एमालेले संसद्लाई प्रभावकारी बनाउन सभामुख तथा सरकारले बोलाएको सर्वदलीय बहिस्कार गरिरहेको छ ।
एमालेले आफूले कारबाही गरेको १४ सांसद पदमुक्त भएको सूचना समामुखले टाँस नगरेको जनाउँदै संसद् बैठक अवरुद्धदेखि सर्वदलीय बैठक बहिस्कार गर्दै आएको छ ।
एमालेले उठाउँदै आएको ती सांसद्माथि कारबाहीको विषय अदालतमा विचराधीन छ ।
प्रतिनिधिसभा नियमावलीले अदालतमा विचराधीन विषयमा संसद्मा छलफल गर्न नसकिने व्यवस्था गरेको छ ।
यसबीचमा सभामुख अग्निप्रसाद सापकोटाले सदनलाई सुचारु गराउन पटकपटक प्रतिपक्षसँग आग्रह गर्नुभएको छ ।
प्रत्येक संसद् बैठकमा उहाँले जनताको सर्वोच्च संस्थाको कामकारबाहीमा अवरोध नगर्न अनुरोध गर्दै आउनुभएको छ ।
प्रतिनिधिसभाको कार्यव्यवस्था पारमर्श समितिको मंगलबारको बैठकमा समेत उहाँले प्रमुख प्रतिपक्षी दललाई जिम्मेवार भएर प्रस्तुत हुन आग्रह गर्नुभएको थियो ।
बैठकमा सभामुख सापकोटाले अदालतमा विचाराधीन विषयलाई छाडेर संसदलाई सूचारु गर्न जोड दिनुभएको थियो ।
उहाँले एमालेले उठाउँदै आएका विषयलाई संसद्मार्फत जनतामा राख्न पनि आग्रह गर्नुभएको थियो ।
जनप्रतिनिधिको सर्वोच्च संस्थाका रुपमा रहेको संसद्मा जनताको जनजीविकालगायत विषयमा विभन्न पक्षबाट उठ्नुपर्ने आवाज मुखरित हुनबाट नरोक्न सभामुखले बारम्बार आग्रह गर्नुभएको थियो ।
परामर्शको बैठकमा उहाँले नागरिकता विधेयक, संघीय निजामतीलगायत महत्वपूर्ण विधेयक संसद्बाट पास नहुँदा जनताले भोग्नु परेका समस्याका बारेमा पनि प्रतिपक्षी दलको ध्यानाकर्षण गराउनुभएको थियो ।
सार्वजनिक महत्व बोकेका विधेयक प्रक्रियामा जान नसक्दा आम नागरिक मौलिक हकबाट प्रभावित बनेका छन् ।
नेकपा (माओवादी केन्द्र)का प्रमुख सचेतक देवप्रसाद गुरुङ संघीय संसद्को सबैभन्दा ठूलो दल एमालेले आफूलाई जिम्मेवारीका साथ प्रस्तुत गर्नुपर्ने अवस्थामा संसद्लाई बन्धक बनाउँदा अहिलेको प्रणालीमाथि एमालेको दृष्टिकोण के हो भन्ने प्रश्न उठेको बताउनुहुन्छ ।
उहाँले एमालेले संसद् अवरुद्ध गर्दै लगातार उठाएको विषय सर्वोच्च अदालतमा विचाराधीन रहेको र सो विषयलाई उठाएर टुंगोमा पुग्न नसकिने अवस्था हुँदाहुँदै पनि बैठक अवरोध गरेको टिप्पणी गर्नुभयो ।
उहाँले भन्नुभयो, “सदन सञ्चालन गर्ने सत्ता पक्ष र प्रतिपक्षी दुवै मिलेर हो । सदन अवरुद्ध गर्दै जाँदा यो प्रणाली नै धरापमा पर्छ । यो प्रणालीप्रति एमालेको दृष्टिकोण के हो भन्ने प्रश्न उठेको छ ।”
अघिल्ला अधिवशेनमा सभामुखले कार्यव्यवस्था परामर्श समितिको बैठक नराखेको जनाउँदै आलोचना गर्ने एमालेले पछिल्ला दिनमा बैठकमा सक्रिय सहभागिता जनाउन छाडेको छ ।
कार्यव्यवस्थाको पछिल्ला दुई दिनको बैठकमा एमालेका प्रतिनिधि आफ्ना विषय राखेर निस्केका थिए ।
एमालेका प्रमुख सचेतक विशाल भट्टराईले सदन नियमित चलेका बेला सभामुखले कार्यव्यवस्था बैठक नराखेको र अहिलेको बैठकमा आफूहरु आफ्ना कुरा राखेर बाहिरिएको बताउनुभयो ।
गत मंसिर २८ गते पनि सभामुखले कार्यव्यवस्था परामर्श समितिको बैठक बोलाउनुएको थियो ।
सो बैठकमा पनि एमालेका प्रतिनिधिले आफ्ना कुरा राखेर बाहिरिएका थिए ।
मंगलबार पनि सभामुखले बिहान ११ः३० बजे नयाँ बानेश्वरमा परमर्श समितिको बैठक राख्नुभएको थियो ।
सो बैठकमा पनि एमाले प्रतिनिधिले आफ्ना कुरा राखेर बाहिरिए ।
“जुन बेला कार्यव्यवस्थाको बैठक बस्न पथ्र्यो, चाहिन्थ्यो, हामी बैठकमा जान्थ्यौँ, त्यो बेला बैठक राख्नुभएन, अहिले जुनबेला एमालेसँग विवाद भएपछि बैठक राख्नुभएको छ, कार्यव्यवस्थामा हामीले आफ्ना कुरा राख्दै हिँड्दै गरेको हौँ,” सचेतक भट्टराईले भन्नुभयो ।
कार्यव्यवस्थामा प्रमुख प्रतिपक्षी दलका प्रतिनिधिको बेवास्ता हुँदै आएपछि मंगलबारको बैठकमा भने सभामुखले शुरुमै आफ्नो धारणा राख्नुभएको थियो ।
सुरुआती मन्तव्यमा सभामुखले बैठकमा सक्रियताका साथ सहभागी हुन र संसद्मा सहभागी अन्य राजनीतिक दलका प्रमुख सचेतकका कुरा सुन्न आग्रह गर्नुएको थियो ।
मंगलबारको बैठकमा नेपाली कांग्रेस, नेकपा (माओवादी केन्द्र)लगायत अन्य दलका प्रमुख सचेतकले एमालेलाई प्रजातन्त्रिक मूल्य मान्यता र आदर्श देखाउन आग्रह गरेका थिए ।
प्रमुख सचेतक भट्टराई संसद्मा जारी गत्यावरोध हटाउन सभामुख र सत्तारुढ दलले एमालेको शीर्ष नेतृत्वसँग छलफल गरेर समाधान खोज्न प्रयास गर्नुपर्ने बताउनुहुन्छ ।
सभामुखले एमालेले गरेको १४ सांसद पदमुक्त भएको सूचना टाँस गरे सदनको अवरोध खुल्ने उहाँले बताउनुभयो ।
संसद्को कामकारबाहीलाई प्रभावित बनाउन सभामुख सापकोटाले आज बिहान ११ः३० बजे पनि कार्यव्यवस्था परामर्शको बैठक बोलाउनुभएको छ ।
आजको बैठकमा संसद्को गत्यारोध अन्यलगायत विभिन्न समितिका सदस्यको नाम हेरफेरको विषयमा छलफल हुने बताइएको छ ।
संसद् बैठक आज अपारह्न १ बजे बस्दैछ ।
नजिकिँदै सभामुख, टाढिँदै प्रतिपक्ष
किबीका बिरुवा भूटान निर्यात
झापा-पूर्वीनाका काँकडभिट्टाबाट किबीको बिरुवा भूटान निर्यात हुन थालेको छ ।
इलाममा उत्पादित किबीको बिरुवा भूटान निर्यात गरिएको हो ।
भूटानले किबीखेतीमा किसानलाई प्रोत्साहन गरेपछि यसको बिरुवाको माग भएको झापास्थित प्लान्ट क्वारेन्टिन कार्यालयका प्रमुख देविन्द्र साहुले बताउनुभयो ।
रु एक लाख १५ हजार बराबरको एक हजार २०० वटा किबीको बिरुवा भूटान निकासी भएको छ ।
“चालु आवमा पहिलोपटक किबीको बिरुवा पूर्वीनाका हुँदै निर्यात भएको हो”, उनले भने ।
किबी फलको आयात भारतबाट भइरहेका बेला इलामका किसानले उत्पादन गरेको सोही फलको बिरुवा निर्यात हुनु सुखद कुरा भएको साहुले बताए ।
उनले भने, “यसबाट किसानमा उत्साह थपिन्छ ।” यसअघि आव २०७४/७५ मा १०० र आव २०७५/७६ मा किबीका २०० वटा बिरुवा भारत निर्यात भएको कार्यालयको तथ्याङ्कमा उल्लेख छ ।
इलाममा एक दशकअघि किबीखेती सुरु गरिएकामा हाल उक्त खेती २० हजार रोपनीमा विस्तार भएको छ ।
विगत लामो समयदेखि किबीको नर्सरी सञ्चालन गर्दै आएको हिस्ट्री किबी प्रालिले बङ्गालादेश र भारतका विभिन्न ठाउँमा किबीको बिरुवा निर्यात गर्दै आएको सञ्चालक पार्वती खतिवडाले बताईन ।
पाँच वर्ष अघिदेखि किबीको बिरुवा भूटान निर्यात गर्दै आएको उहाँको दाबी छ ।
समुद्र सतहको ८०० मिटरदेखि दुई हजार ९०० मिटरको उचाइसम्म किबीखेती हुने गरेको छ ।
“यस वर्ष १० हजारभन्दा बढी बिरुवा बिक्री भइसकेको छ”, खतिवडाले भनिन् ।
किबीका बिरुवा भूटान निर्यात
प्रतिनिधिसभाको बैठक आज बस्दै
काठमाडौँ-प्रतिनिधिसभाको बैठक आज बुधबार बस्दैछ।
आज दिउँसो १ बजे बस्ने बैठकमा चार वटा अध्यादेश पेस गरिने सम्भावित कार्यसूची छ ।
ती अध्यादेश अस्वीकृत गरियोस् भन्ने प्रस्ताव पनि पेस गरिने सम्भावित कार्यसूचीमा समावेश छ ।
एमाले सांसदको विरोध र नाराबाजी चलिरहँदा चालु १०औँ अधिवेशनको पहिलो बैठकमा पेस भएका ६ वटा र दोस्रो बैठकमा पेस भएका दुई अध्यादेशलाई बहुमतले स्वीकृत गरेको थियो ।
संघीय संसद सचिवालयले मंगलबार सार्वजनिक गरेको आजको बैठकको सम्भावित कार्यसूची
बागमती प्रदेशसभाको नवौँ अधिवेशन बैठक आज बस्दै छ ।
उक्त बैठक दिउँसो १ बजेका लागि तय भएको छ ।
प्रदेशसभाका सचिव कृष्णहरि खड्काका अनुसार प्रदेशसभाको बैठकअघि साढे एघार बजे कार्यव्यवस्था परामर्श समितिको बैठक बस्ने भएको छ ।
संसद् सञ्चालनका लागि आवश्यक छलफल गर्न सभामुख सानुकुमार श्रेष्ठले कार्यव्यवस्था परामर्श समितिको बैठक बोलाउनुभएको हो ।
सोही बैठकबाट प्रदेशसभा बैठकको कार्यसूची तय हुने जनाइएको छ ।
मुख्यमन्त्री राजेन्द्रप्रसाद पाण्डेले विश्वासको मत पाएपछि प्रदेशसभाको बैठक बसेको छैन ।
बागमती प्रदेशसभामा प्रमुख प्रतिपक्षी दल नेकपा (एमाले)का ४३, नेकपा (माओवादी केन्द्र)का २३, नेपाली कांग्रेसका २२, नेकपा (एकीकृत समाजवादी)का १३, जसपाका एक, नेमकिपाका दुई, राप्रपाका दुई, विवेकशील साझाका तीन गरी कूल १०९ सांसद रहनुभएको छ ।
बागमती प्रदेशसभाको बैठक बस्दै
गौर बस्ने दुई देशको नागरिकता बोक्नेको अबैध धन्दा
सुसन भट्टराई,रौतहट,गौर–एउटा ब्यक्ति सँग दुई देशको नागरिकता छ भन्दा सुन्ने र पढ्नेलाई अपत्यारिलो लाग्न सक्छ तर यो सत्य हो भन्ने कुरा गौर निवासी दुई दाजुभाइले पुष्टि गरेका छ्न।
समाचार श्रोतका अनुसार नेपाल र भारत दुबै देशको दोहोरो नागरिकता वोकेको दुई दाजु भाईले रौतहटको गौरवाट सुनचाँदीको अवैध कारोवारसमेत गर्ने गरेको समाचार छ ।
भारतिय नागरिक ति दुवै दाजु भाई केहि वर्ष अगाडि गौरमा कोठा भाडा लिएर बस्दै आएका थिए ।
सोही अबस्थामा ब्यापार पनि सुरु गरेका उनिहरुले केहि बर्षमै नेपालको बंशजको नागरिकता प्राप्त गरी गौरको मुख्य सडकमा ठुलो महल खडा गरि आफ्नो धन्धा संचालन गरिरहेको बुझिन आएको छ।
यो बिचमा यिनिहरुको यि सबै काला कर्तुतको खुलासा भने त्यसबेला भयो जब धिरेन्द्र शाह भारतको बिहार राज्य सितामढी जिल्लाको रिगरखण्डको रेवासी पकरी ग्राम पञ्चायत चुनावमा प्रत्यासी भए ।
विरेन्द्र साह सोनार र धिरेन्द्र साह सोनार रौतहटको परोहा नगरपालिका अन्तर्गत भेडियाहि नगर सविकको वशन्तपट्टी गाविस वडा नम्वर ८ वाट नेपाली नागरिकता लिएका हुन् ।
माँ जानकी एण्ड कृष्णा ज्वेर्लस र सन्नी ज्वेलर्स सञ्चालन गर्दै आएका दाजुभाई वार्षिक एक अर्बभन्दा बढीको सुन नेपालबाट भारततर्फ अवैध रुपमा निर्यात गर्दै आएको राजस्व कार्यालयबाट बुझ्न सकिन्छ ।
पटक पटक नेपाल प्रहरी र सशस्त्र प्रहरीले पक्राउ गरेपनि शक्तिकेन्द्रको आड तथा उच्च ओहदाका कर्मचारी (राजश्व अनुसन्धान) लाई आर्थिक चलखेलमार्फत आफुलाई चोखो सावित गर्दै आएका छन् ।
यी अबैध कारोवारी विदेशी नागरिकको कृयाकलापले गौरको समग्र बजार भेगमा नराम्रो असर परेको इमानदार ब्यापारीहरुले बताएका छन् ।
नेपाल सरकारको बिभिन्न नियमनकारी निकायले दुवै दाजुभाई उपर कारवाही नगरेको भने होईन ।
तर पटक पटकको कारवाहीमा समेत यिनले आफ्ना गलत कारोवारलाई अबैध रकम लेनदेनको भरमा टुङ्गयाउदै आएको कुरा सबुत प्रमाणले नै छर्लङ्ग गरेको छ ।
अबैध कारोवार ब्यवसाय तथा थोरै समयमा आर्जन गरेको अथाह कालोधनको बारेका जिकिर भएपनि डवल नागरिकताको सवालमा अहिले सम्म कसैले प्रश्न उठाएको थिएन ।
सबुत प्रमाणको पुष्टि हेर्ने हो भने यि दुवै दाजुभाईले आर्जन गरेको सम्पती नेपाल सरकारले जफत गरी दुबै जनाले किर्ते प्रमाणका आधारमा लिएको नेपाली नागरिकताहरु समेत बदर गरेर सजाय गर्नुपर्ने व्यावसायिहरुकै राय छ।
यस्तालाई कारवाही नगरे मधेशमा रातारात नेपाली नागरिकता लिदै अबैध सम्पति आर्जन गर्नेहरुकै वोलवाला चल्न समय लाग्दैन भन्ने भनाई मधेसका आम नागरिकको रहेको छ ।
अवैध नागरिकतालाई कानुन वमोजिम सरकारले नियन्त्रणमा नलिने हो भने यिनीहरुले भनसुन र लेनदेनको आधारमा मधेसलाई तस्करी क्षेत्रकै रामराज्य खडा हुनेमा शंका छैन ।
भनसुन र लेनदेनकै आधारमा अबैध नागरिकताधारीलाई राज्यले संरक्षण दिदै जाने हो भने बस्तविक देशका नागरिक अल्पमतमा पर्ने र ठुलो दुर्घटना निम्तने दावी स्थानियले गर्दै आएका छन् ।
यसै सन्दर्भमा राजस्व अनुसन्धान बिभागका महानिर्देशक प्रकाश पौडेल सग सम्पर्क गर्दा यो बिषयमा कुरा राख्दा उहाँ भन्नुहुन्छ अब हाम्रो ध्यानाकर्षण भएको छ ।
राज्यले यस्ता स्थानियको आरोप चिर्दै मधेसमा शान्ति, सुब्यवस्था र विधिको शासन प्रत्याभुती गराउन समेत दुबै जनामाथी प्रचलित कानुन बमोजिम कारवाही गर्न जरुरी रहेको स्थानियको माग रहेको देखिन्छ ।
गौर बस्ने दुई देशको नागरिकता बोक्नेको अबैध धन्दा
सभामुखको साथमा छौँ: अध्यक्ष नेपाल
नेपाल कम्युनिष्ट पार्टी (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले प्रतिनिधिसभाका सभामुख अग्निप्रसाद सापकोटाको साथमा आफ्नो पार्टी रहेको बताउनुभएको छ ।
पार्टीको गण्डकी प्रदेश कमिटीले आज पोखरामा आयोजना गरेको प्रदेशस्तरीय कार्यकर्ता प्रशिक्षणमा उहाँले कानुनको शासनपालना गर्ने र संविधानको सर्वोच्चताको स्वीकार गर्नेहरुले सर्वोच्च अदालतको फैसला स्वीकार गर्नुपर्ने उल्लेख गर्नुभयो ।
उहाँले भन्नुभयो,“ सभामुखज्यू तपाई एक्लो हुनुहुन्न, तपाईको साथमा हामी पनि छौँ । दृढताका साथ अगाडि बढनुहोस् ।”
तत्कालीन एमाले पार्टीबाट विद्रोह गरेर कम्युनिष्ट आन्दोलन जोगाउन र बचाउन कानूनको आधारमा साहसिक कदम चालिएको उहाँले स्पष्ट पार्नुभयो ।
अध्यक्ष नेपालले नेपालको राजनीतिमा कम्युनिष्ट पार्टीलाई स्थापित गर्दै माक्र्सवाद र लेनिनवादप्रति पूर्ण प्रतिबद्ध रहेर कम्युनिष्ट मूल्य, मान्यता र सिद्धान्तलाई आत्मसात् गरी बेतिथि, गरिबीलाई समाप्त गरेर सुन्दर समाजको निर्माणमा आफ्नो पार्टी लाग्ने बताउनुभयो ।
उहाँले भन्नुभयो, “भिन्न चरित्रको पार्टी बनाउने, क्रान्तिकारी चरित्र, सुसंस्कार बोकेको, आदर्शप्रति प्रतिबद्ध, निष्ठाको राजनीति गर्ने जनताको सेवाको भावनाबाट उत्प्रेरित पार्टी बनाउनका लागिनै आफैले यसअघि बनाएको पार्टीबाट विद्रोह गर्नुपरेको हो ।”
श्रम, रोजगार तथा सामाजिक सुरक्षामन्त्री किसान श्रेष्ठले गण्डकी प्रदेशमा आगामी दिनमा एकीकृत समाजवादीलाई पहिलो पार्टीका रुपमा स्थापित गरिने बताउनुभयो ।
अहिलेका मन्त्रिपरिषद्का सदस्यले जनमुखी काम गरेको उहाँले उल्लेख गर्नुभयो ।
प्रदेशस्तरीय प्रशिक्षणमा पार्टीका अन्य नेताले विभिन्न विषयमा प्रशिक्षण दिने कार्यक्रम रहेको छ ।
सभामुखको साथमा छौँ: अध्यक्ष नेपाल
नेप्से परिसूचक ५६ अंकले बढ्यो
काठमाडौँ-आज मंगलबार नेपाल स्टक एक्सचेञ्ज (नेप्से) परिसूचक ५६ अंकले बढेको छ ।
पछिल्लो समय निरन्तर घट्दै आएको सेयर बजारमा आज वृद्धि देखिएको हो ।
आज २३ सय ६० अंकबाट सुरु भएको परिसूचक उक्त अंकको वृद्धिसँगै २४ सय १५ अंकमा पुगेर रोकिएको छ ।
यसक्रममा आज २ अर्ब ३८ करोड रुपैयाँ बराबरको ४९ लाख ७४ कित्ता सेयर किनबेच भएको छ ।
बजारमा उच्च अंकको वृद्धि आएको दिन जीवन बीमा समूहमा सबैभन्दा बढी २०६ अंकको सुधार आएको छ ।
यस्तै, निर्जीवन बीमा समूहमा २०४ अंकको सुधार आएको छ ।
यस्तै, उत्पादनमूलक समूहमा १७० अंक, विकास बैंक समूहमा १३७ अंक, जलविद्युत समूहमा ९४ अंक र लघुवित्त समूहमा ९० अंकको सुधार आएको छ ।
यीबाहेक आज कारोबारमा आएका सबै समूहमा सुधार आएको छ ।
आज ग्रीन डेभलपमेन्ट बैंकको सेयर मूल्यमा सकरात्मक सर्किट लागेको छ ।
कम्पनीको सेयर मूल्य आज एकै दिन ३१ रुपैयाँले बढ्दै प्रतिकित्ता मूल्य ३१० रुपैयाँ पुगेको छ ।
यस्तै, ज्योती फाइनान्सको सेयर मूल्य ९ प्रतिशत र रसुवागढी हाइड्रोपावरको सेयर मूल्यमा पनि ९ प्रतिशतको सुधार आएको छ ।
नेप्से परिसूचक ५६ अंकले बढ्यो
अमेरिकामा पहिलो ओमिक्रोन सङ्क्रमितको मृत्यु
ह्यारिस काउन्टी, टेक्सासमा बसोबास गर्ने एक खोप नलिएका व्यक्ति संयुक्त राज्य अमेरिकामा कोभिड-१९ को ओमिक्रोन भेरियन्टबाट मृत्यु हुनेमा पहिलो व्यक्ति भएको विश्वास गरिएको छ ।
करिब ५० वर्षीय व्यक्ति जसलाई खोप लगाइएको थिएन ह्यारिस काउन्टीको पूर्वी भागमा उनको सङ्क्रमणबाट मृत्यु भएको,” ह्यारिस काउन्टी न्यायाधीश लीना हिडाल्गोले ट्विट गर्नुभएको छ ।
यो संयुक्त राज्यमा ओमिक्रोन-सम्बन्धित मृत्युको पहिलो रेकर्ड भएको एबीसी न्यूज र फक्स न्यूजका रिपोर्टहरूले उल्लेख गरेका छन् ।
एबीसी न्यूज र फक्स न्यूजका रिपोर्टहरूले यो संयुक्त राज्यमा ओमिक्रोन-सम्बन्धित मृत्युको पहिलो रेकर्ड भएको मानेका छन्।
डिसेम्बर १८ सम्ममा देशभरका नयाँ संक्रमित केसहरूमा ७३.३ प्रतिशत ओमिक्रोनले ओगटेको रोग नियन्त्रण र रोकथामका लागि अमेरिकी केन्द्रहरूले सोमबार जनाएका छन्।
अमेरिकामा पहिलो ओमिक्रोन सङ्क्रमितको मृत्यु
मिलन पाण्डे विवेकशील साझा पार्टीबाट निष्काशित
काठमाडौं-विवेकशील साझा पार्टीले संयोजक मिलन पाण्डेलाई पार्टीबाट निष्काशन गरेको छ ।
विवेकशील साझा पार्टीका केन्द्रीय अध्यक्ष रवीन्द्र मिश्रले पार्टी संयोजक मिलन पाण्डेलाई पार्टीबाट निकालेका हुन्।
मिश्रले पाण्डेयलाई साधारण सदस्यसमेत नरहने गरी आज कारबाही गरेका हुन् ।
यसअघि मिश्रले पाण्डेलाई स्पष्टीकरण सोधेका थिए । पाण्डेले पनि स्पष्टीकरणको जवाफ दिएका थिए।
उक्त जवाफ चित्तबुझ्दो नभएकोले कारबाही गरिएको मिश्रले विज्ञप्ति जारी गरी जनाएका छन्।
पाण्डेले भने आजै अलग्गै केन्द्रीय समिति घोषणा गरेका छन्।
मिलन पाण्डे विवेकशील साझा पार्टीबाट निष्काशित
नेकपा एमाले केपी ओलीको प्राइभेट कम्पनी: माधव नेपाल
पोखरा-नेकपा एकीकृत समाजवादीका अध्यक्ष माधवकुमार नेपालले नेकपा एमाले केपी ओलीको प्राइभेट कम्पनीका रुपमा रुपान्तरण भएको बताएका छन् ।
गण्डकी प्रदेशस्तरीय बृहत् प्रशिक्षण भेलालाई सम्बोधन गर्ने क्रममा उनले एमाले केपी ओलीको प्राइभेट कम्पनीमा रुपान्तरण भएको बताएका हुन् ।
नेता नेपालले आफूहरुको ठूलो सत्रु र प्रतिद्वन्द्वीका रुपमा एमाले रहेको कार्यकर्तालाई सुनाए ।
उनले भने ‘हामीले भर्खरै विद्रोह गरेको, केपी ओलीको प्राइभेट कम्पनीका रुपमा रुपान्तरण भएको कथित् एमाले‘ त्यो हाम्रो पहिलो प्रतिद्वन्द्वी हुन पुगेको छ । सत्रुका रुपमा छ,’।
उनले नेकपा एमाले अहिले चरम व्यक्तिवादमा फसेको र त्योभन्दा फरक आफूहरु हुनुपर्ने कार्यकर्तालाई सुझाए ।
मंसिर अन्तिम साता काठमाडौंमा भएको नेपाली कांग्रेसको १४औं महाधिवेशन उद्घाटन सत्रलाई सम्झिदै उनले भने, ‘एकले अर्कासँग नबोलेको भएपनि ओलीले आफूलाई हेर्दै जाँदा रमाइलो लागेको नेता नेपालले सुनाए ।
‘हाम्रो अनुहार पनि हेर्दिन भन्याथे, तर कस्तो संजोग १ कांगेसको कार्यक्रममा अनुहार हेर्दै जानुपर्यो । रमाइलो भयो,’ उनले भने ।
माओवादी केन्द्रका अध्यक्ष पुष्पकमल दाहाल प्रचण्डले तत्कालीन समयमा ओलीलाई सुधार्न पार्टी एकता गरेको तर, सुधार्न नसकेपछि आँखा खुलेको नेपालको भनाइ छ ।
ओली सरकार दलाल र चाकडीतन्त्रमा लिप्त रहेको र संविधान विपरीत काम गरेकाले उनलाई सत्ताच्यूत गर्न गठबन्धन गर्नुपरेको उनले सुनाए ।
संसदमा आफ्नो उपस्थितिले नेकपा एमालेका अध्यक्ष केपी शर्मा ओलीको सातो गएको टिप्पणी समेत नेता नेपालले गरेका छन् ।
आफूले प्रशिक्षण भेलालाई पनि समय दिनुपर्ने, संसद बैठकमा पनि जानुपर्ने दबाव रहेको भन्दै उनले भने, ‘म नभा’को मौका पारेर केपी ओली छिर्न बेर छैन त्यहाँ ।
कमसेकम मेरो उपस्थितिले केपी ओलीको संसदमा सातो गइराछ नि ! सातो जाओस्, केही मतलब छैन । नेपाली जनताको सातो कायम हुनुपर्छ ।’
मंगलबार प्रतिनिधिसभाको बैठकमा जानुपर्ने कारण देखाउँदै कार्यक्रमको सुरुमै उनलाई वक्ताका रुपमा उभ्याइएको थियो ।
अध्यक्ष नेपालले एमालेले संसदमा संसदीय मर्यादाविरुद्ध काम गरिरहेको आरोप समेत लगाएका छन ।
संसद नआउने र आएपनि नाराबाजी गर्दै अवरुद्ध गरिरहेको भन्दै उनले भने, ‘संसदीय मर्यादा पालना गर् भनेर नारा लगाएका छन् । केपी ओली गुटले पालना गर्या छ ? संविधानका सम्मान गर् रे, सम्मान गर्या’छन् ?’
भेलालाई अध्यक्ष नेपालसहित वरिष्ठ नेता झलनाथ खनाल,उपाध्यक्ष प्रमेश हमाल,महासचिव वेदुराम भुसाललगायतले प्रशिक्षण दिनेछन् ।
नेकपा एमाले केपी ओलीको प्राइभेट कम्पनी: माधव नेपाल
एमसिसीविरुद्ध ८ राजनीतिक दलको प्रदर्शन
काठमाडौं-मंगलबार एमसिसीविरुद्ध ८ राजनीतिक दलले विरोध प्रदर्शन गरेका छन्।
माइतीघर मण्डलाबाट सुरु भएको विरोध प्रदर्शन बानेश्वरसम्म जारी रहेको छ।
एमसिसी संसद्मा दर्ता गर्ने विषयमा सरकारले छलफल बढाएपछि विरोधको स्वर बढ्न थालेको छ ।
एमसिसीबारे व्यापक विरोध भइरहेको छ । सरकारले सुरक्षाकर्मी व्यापक परिचालन गरेको छ।
एमसिसीविरुद्ध ८ राजनीतिक दलको प्रदर्शन
सिभिल बैंकको लाभांश ५%
काठमाडौँ-गत आर्थिक वर्ष ०७७/७८ को नाफाबाट सिभिल बैंक लिमिटेडले लगानीकर्तालाई वितरण गर्ने लाभांश घोषणा गरेको छ ।
हाल कायम चुक्ता पूँजीको ५ प्रतिशत बोनस सेयर र सोको कर प्रयोजनार्थ शून्य दशमलव २६ प्रतिशत नगद लाभांश वितरण गर्ने बैंकको ५ पुसमा बसेको बैंकको सञ्चालक समितिको बैठकले घोषणा गरेको हो ।
उक्त प्रस्तावित लाभांश नेपाल राष्ट्र बैंकबाट स्वीकृत भई आगामी वार्षिक साधारणसभाले अनुमोदन गरेपछि मात्रै लगानीकर्ताले प्राप्त गर्ने छन् ।
सिभिल बैंकको लाभांश ५%
