Month: February 2022

काठमाडाै‌ । प्रतिनिधिसभाका ज्येष्ठ सदस्य पशुपतिशमशेर राणाले नवनिर्वाचित सांसदहरूलाई पद तथा गोपनीयताको शपथ गराएका छन्। नयाँ बानेश्वरस्थित संघीय संसद् भवनमा बिहीबार आयोजित विशेष समारोहमा ज्येष्ठ सदस्यको हैसियतमा उनले सांसदहरूलाई शपथ गराएका हुन्।

शपथ लिन नवनिर्वाचित सांसदहरू राष्ट्रिय पोसाक तथा आ–आफ्नो सांस्कृतिक पहिचान झल्कने पोसाकमा सजिएर संसद् भवन पुगेका थिए। संसद् सचिवालयका अनुसार २६ सांसदले विभिन्न १४ मातृभाषामा शपथ लिएका छन्।

प्रतिनिधिसभाका ज्येष्ठ सदस्य राणाले बुधबार राष्ट्रपति विद्यादेवी भण्डारीबाट शपथ लिएका थिए। नेपालको संविधानको धारा ८८ बमोजिम संघीय संसद्को प्रत्येक सदनका सदस्यले सदन वा त्यसको कुनै समितिको बैठकमा पहिलोपटक भाग लिनुअघि संघीय कानुनबमोजिम शपथ लिनुपर्ने व्यवस्था छ।

शपथअघि ज्येष्ठ सदस्य राणाले नयाँ बानेश्वरस्थित संघीय संसद् भवनमा बोलाएका बैठकमा संघीय संसद् सचिवालयका महासचिव डा. भरतराज गौतमले शपथग्रहणको प्रक्रियाबारे जानकारी गराएका थिए।

प्रतिनिधिसभामा प्रत्यक्ष निर्वाचित एक सय ६५ र समानुपातिक प्रणालीबाट निर्वाचित एक सय १० गरी कुल दुई सय ७५ सांसद छन्। शपथ समारोहको अगाडि संसद् सचिवालयका महासचिव डा. गौतमले नवनिर्वाचित सबै सांसदलाई स्वागत, बधाई एवं शुभकामना व्यक्त गरेका थिए।

काठमाडौँ । राष्ट्रिय स्वतन्त्र पार्टीका रवि लामिछानेको नागरिकता सम्बन्धी विवाद निरूपण भई नसकेको भन्दै प्रतिनिधिसभा सदस्यका रूपमा उनको शपथ रोक्न मागसहित संसद सचिवालयमा निवेदन दर्ता भएको छ ।

समाजवादी केन्द्र नेपालका नेता युवराज सफलले बिहीबार रवि लामिछानेलाई प्रतिनिधिसभा सदस्य पदको शपथ नगराउन मागसहित निवेदन दिएका हुन् ।

लामिछाने चितवन क्षेत्र नम्बर २ बाट प्रतिनिधिसभा सदस्यमा निर्वाचित भएका हुन् । निवेदक सफलले रवि लामिछाने उम्मेदवार बन्दा नै निजले अमेरिकी नागरिकता त्यागेको तर नेपाली नागरिकता पुनर्प्राप्ति नगरी पुरानै नागरिकता पेस गरी उम्मेदवार बनेको भन्दै निर्वाचन आयोगमा नवराज पाण्डे लगायतले उजुरी दर्ता गरेकोमा आयोगले सो उपर कुनै छानबिन नगरी निर्वाचन लड्न दिएको जिकिर गरेका छन् ।

गृह मन्त्रालयमा रवि लामिछानेले पुरानो नागरिकता पुनर्प्राप्ति नगरी प्रयोग गरेको, अमेरिकी नागरिक कायम भएकै बखत झुटो विवरण पेस गरी नेपाली राहदानी लिएको लगायत विषय समेटी उजुरी दर्ता गरी नेपाल प्रहरीले फौजदारी कसुर अन्तर्गत अनुसन्धान गरिरहेको अवस्था रहेको पनि उनले निवेदनमा उल्लेख गरेका छन् ।

‘निर्वाचन आयोगमा समेत म युवराज सफलले निजको पार्टी सदस्य र पार्टी सभापति पद समेत खारेज गर्न प्रमाण सहित उजुरी दर्ता गरेको छु,’ निवेदनमा उनले भनेका छन्, ‘यस्तै सर्वोच्च अदालतमा मिति २०७९ मंसिर २८ गते निजको सांसद पद, पार्टीको सभापति पद समेत खारेज गर्न माग गरी म युवराज पौडेल सफलले एकल र अधिवक्ताद्वय रविराज बसौला र नानीबाबु खत्रीले संयुक्त रूपमा रिट निवेदन दर्ता गरी मिति २०७९ पौष ०६ गतेका दिन प्रारम्भिक सुनुवाइ भई दुवै पक्षलाई छलफलमा झिकाइने आदेश समेत भइसकेकोले निज रवि लामिछानेलाई शपथ नगर्न नगराउन प्रतिनिधिसभा नेपालका ज्येष्ठ सदस्य सम्माननीय पशुपति शमशेर ९जबरा० र संसद महासचिव श्रीमान् भरतराज गौतमज्यू समक्ष यो निवेदन पेस गर्दछु ।

काठमाडौं । काठमाडौं महानगरपालिकाले खोलाको मापदण्ड मिचेर बनाइएका संरचना खाली गर्न कामपाले पटकपटक दिएको चेतावनीलाई अटेर गरेपछि कामपाले बुधबार डोजर चलाएको हो ।

कामपा प्रहरीले यसअघिको घटनाबाट सिक्दै प्रहरीमाथि हुनसक्ने आक्रमण रोक्न सबै प्रहरीलाई सुरक्षा कवच व्यवस्था गरिएको थियो । यसअघि थापाथलीस्थित सुकुम्बासी बस्तीमा डोजर चलाउन गएका कामपा प्रहरीमाथि सांघातिक आक्रमण भएको थियो ।अवैध संरचना हटाउन कामपा नक्सा विभागले गरेको सिफारिसलाई कामपा प्रमुख बालेन्द्र साहले स्वीकृत गरेपछि संरचना भत्काइएको हो ।

कामपा प्रहरी प्रमुख प्रहरी उपरीक्षक राजुनाथ पाण्डेले पहिलो चरणमा ५० मिटर लामो क्षेत्रका संरचना हटाइएको जानकारी दिँदै नेपाल समाचारपत्रसँग भन्नुभयो– ‘५ वटा सटर, ६ वटा गेट र त्यतिकै संख्यामा घर कम्पाउन्ड भत्काइएको छ । घरका सामान निकाल्न केही दिन समय दिएका छौं, त्यसपछि फेरि घरभित्रै डोजर चलाउनेछौं ।’ कामपा प्रमुख साहले निर्णय गरेपछि थप संरचना भत्काइने जानकारी दिँदै उहाँले भन्नुभयो– ‘अहिले भत्काएका संरचना खाली नगरे फेरि डोजर लिएर तत्काल भत्काइने छ ।’ कामपाले धोबीखोलाबाहेक मनोहरा, विष्णुमती, इच्छुमती, वागमती खोला किनारामा बनाइएका सबै अवैध संरचना हटाउने गरी योजना तयार गरेको छ ।

काठमाडौं महानगरपालिका वडा नं १० का वडा अध्यक्ष रामकुमार केसी, प्रहरी प्रमुख पाण्डे, नगर प्रहरी उपरीक्षक दिनेश अर्याल, वडाका इन्जिनियर, कामपा नापी अधिकृत उत्तम भट्टराईसहितको टोली फिल्डमा पुगेको थियो । संरचना भत्काउँदा नापी विभागको टोलीको उपस्थिति रहेको थियो । कामपाले महानगरको क्षेत्रभित्र पर्ने धोबी खोलाका सबै अवैध संरचना हटाउन थालेको प्रहरीको भनाइ छ । प्रहरी उपरीक्षक दिनेश अर्यालका अनुसार नेपाल प्रहरीको समेत सहयोग लिएर संरचना हटाउन थालिएको हो । उहाँले भन्नुभयो– ‘सबै प्रमाणसहित अवैध संरचना हटाउन थालेका हांै । हामी यो भन्न चाहन्छौं कि खोला किनारमा बनाइएका सबै संरचना तत्काल हटाउनुहोला ।’

महानगरले साउन १ गते सूचना जारी गर्दै सबै अवैध संरचना हटाउन आग्रह गरेको थियो । साउन १ गतेदेखि सूचना जारी गर्दा अटेर गरेपछि नापी विभाग, काठमाडौं उपत्यका विकास प्राधिकरण, वडा कार्यालय र स्थानीयको सहयोगमा संरचना हटाइएको महानगरको भनाइ छ ।
महानगरले अवैध संरचनाहरूको सबै विवरण संकलन गरी ती संरचना हटाउन शुरू गरेको जनाएको छ । मापदण्डअनुसार खोला किनाराको दायाँबायाँ २५ मिटर छाड्नुपर्ने व्यवस्था छ ।

सरकारी मापदण्ड उल्लंघन गर्दै भनसुनको आधारमा केहीले मापदण्ड मिचेर संरचना निर्माण गरेका थिए । यसअघि शहरी विकासमन्त्री मेटमणि चौधरीले खोला किनारामा बनेको अवैध संरचना हटाउन सरोकारवाला निकायलाई निर्देशन दिनुभएको थियो । मन्त्रालयको निर्देशन र नापी विभागका मापदण्डको आधारमा अवैध संरचना हटाइएको कामपाको भनाइ छ । मापदण्डअनुसार धोबीखोलाको दायाँबायाँ ९ मिटर क्षेत्र छाड्नुपर्ने व्यवस्था छ ।
यसैबीच काठमाडौं महानगरपालिकाका प्रवक्ता नविन मानन्धरले काठमाडौं महानगरपालिकाभित्र बग्ने सबै खोला किनाराका अवैध संरचना हटाउन शुरू गरेको बताउनुभएको छ ।

बुधबारबाट धोबीखोला करिडोरको अवैध संरचना हटाउन थालेको महानगरले सबै खोला किनाराको अवैध संरचना हटाउने स्पष्ट पारेको छ । प्रवक्ता मानन्धरले कामपाले पटकपटक सूचना जारी गर्दा पनि अटेर गरेपछि हिजोबाट अवैध संरचना हटाउन शुरु गरिएको जानकारी दिँदै भन्नुभयो– ‘अब कहिलेसम्म भत्काउने ? भन्ने प्रश्नै छैन, हामी महानगरभित्र बग्ने खोला किनाराको अवैध संरचना नहटाएसम्म निरन्तर काम गर्नेछौं ।’ उहाँका अनुसार धोबीखोला, विष्णुमती, वागमती, मनोहरा, इच्छुमतीलगायत सबै खोला किनाराका अवैध संरचना हटाएरै छाड्ने बताउनुभयो ।

कामपाका पाँच उच्च अधिकारीको सरुवा
काठमाडौंं महानगरपालिकाले पाँच उच्च अधिकारीको सरुवा गरेको छ । मेयर बालेन्द्र साहको सल्लाहमा प्रमुख प्रशासकीय अधिकृतले पाँच निर्देशकलाई सरुवा गर्नुभएको हो । सरुवा हुनेमा प्रशासन विभागका प्रमुख महेश काफ्ले, गोपाल पोखरेल, यादव घिमिरे, नूरनिधि न्यौपाने र दीपक अधिकारी रहनुभएको छ ।

काफ्लेलाई प्रशासन विभागबाट सार्वजनिक निजी साझेदारी कार्यक्रम(पीपीपी), अधिकारीलाई प्रशासन विभाग, गोपाल पोखरेलाई सामाजिक विकास विभाग, घिमिरेलाई आन्तरिक लेखा परीक्षण र न्यौपानेलाई मेयर सचिवालयमा सरुवा गरिएको छ । प्रमुख प्रशासकीय अधिकृत वसन्त अधिकारी भारत भ्रमण जानुअघि मंगलबार ती उच्च कर्मचारीलाई सरुवा गरिएको हो ।

काठमाडौँ । संघीय संसद सचिवालयका प्रवक्ता रोजनाथ पाण्डेका अनुसार आज दिउँसो १ बजे सपथ ग्रहण गराइनेछ ।

नवनिर्वाचित २७५ सांसदमध्ये ज्येष्ठ सदस्य पशुपति शमशेर राणाले आज सांसदहरुलाई पद तथा गोपनीयताको शपथ गराउने छन् । राणालाई राष्ट्रपति विद्यादेवी भण्डारीले हिजो शपथ गराएकी थिइन् ।

शपथ अघि आज ज्येष्ठ सदस्य पशुपति शमशेर राणाको अध्यक्षतामा सर्वदलीय बैठक बस्ने भएको छ । मध्यान्ह १२ बजे नयाँ बानेश्वरस्थित अन्तर्राष्ट्रिय सम्मेलन केन्द्रको ल्होत्से हलमा सर्वदलीय बैठक बस्ने भएको हो ।

बैठकमा संसदमा प्रतिनिधित्व गर्ने १२ वटा राजनीतिक दलबाट एक एक जना प्रतिनिधि र ५ स्वतन्त्र सांसदहरु सहभागी हुनेछन् । सर्वदलीय बैठकमा दलका प्रतिनिधि, सभाका अध्यक्ष राणा, संसद सचिवालयमा महासचिव डा। भरतराज गौतम लगायत सहभागी हुनेछन् ।

काठमाडौँ । मंसिर ४ गते सम्पन्न भएको प्रतिनिधिसभा तथा प्रदेशसभा निर्वाचनमा विभिन्न कारणहरू देखाउँदै पुनः मतदान माग गरिएको आठ रिटमा कारण देखाऊ आदेश जारी भएको छ।

कायममुकायम प्रधानन्यायाधीश हरिकृष्ण कार्कीको नेतृत्वमा, न्यायाधीशहरू ईश्वरप्रसाद खतिवडा, डा. आनन्दमोहन भट्टराई, अनिल कुमार सिन्हा र प्रकाशमान सिंह राउतको संवैधानिक इजलासले बुधबार प्रारम्भिक सुनुवाइपछि निर्वाचन आयोग लगायत अन्य विपक्षीहरूको नाममा कारण देखाऊ आदेश जारी गरेको हो।

दोहोर्‍याई मतगणना माग गर्नेमा रविदत्त मिश्र, उमाशङ्कर अरगरिया, गणेश पौडेल, विदेश्वर यादव, सुकेश्वर यादव, कालीप्रसाद शाक्य, सुरेन्द्रप्रसाद चौधरी र महेन्द्र यादवलगायत छन् । पुन: निर्वाचनको माग गर्नेमा झलनाथ खनाल बलदेव रेग्मी कर्णबहादुर थापा र लालबहादुर थापालगायत छन् ।

काठमाडौं । नेपाल स्टक एक्सचेन्ज (नेप्से) साताको कारोबारको चौथो  दिन आज बुधबार आज नेप्से ५.८९ अङ्कले घटेर एक हजार ८ सय ६७ दशमलव २२ विन्दुमा बन्द भएको हो ।   मंगलबार नेप्से १४.२२ अङ्कले बढेर एक हजार ८ सय ७३ दशमलव ११ विन्दुमा बन्द भएको थियो  । 

त्यस्तै, आज नेप्सेमा सुधार भएपनि कारोबार रकम भने एक अर्ब रुपैयाँ पनि पुगेन । आज ८६ करोड ३८ लाख रुपैयाँ बराबरको मात्रै कारोबार भएको छ ।  कारोबार भएका कम्पनीमध्ये ६३ वटा कम्पनीको शेयर मूल्य बढेको छ भने १४० वटा कम्पनीको शेयर मूल्य घटेको छ । ९ वटा कम्पनीको शेयर मूल्य स्थिर रहेको छ ।       

नेप्सेका अनुसार आज पाँच कम्पनीको सेयर मूल्यमा उच्च वृद्धि भएको छ । आज बधुबारको कारोबारबाट आँधिखोला लघुवित्त वित्तीय संस्थाको शेयर मूल्य १० प्रतिशतले बढेर प्रतिकित्ता १६५७ रुपैयाँ पुगेको छ भने सृजनशील लघुवित्त वित्तीय संस्थाको शेयर मूल्य पनि ९.९९ प्रतिशतले बढेर प्रतिकित्ता १०९६.२० रुपैयाँ पुगेको छ । त्यस्तै, इस्र्टन पावरको ९.९९ प्रतिशतले वृद्धि भएर २९७.९० मा पुगेको छ भने घलेम्दी पावरको ९.१४ प्रतिशतले वृद्धि भएर २०३ रुपैयाँ पुगेको छ । त्यस्तै धौलागिरी लघुवित्तको शेयरमूल्य ८ प्रतिशतभन्दा बढीले बढेर ६४९.५० रुपैयाँ पुगेको छ ।   

आजको कारोबारमा पञ्चकन्या पावरको मुल्यमा सर्वाधिक गिरावट आएको छ । त्यसै गरी, एनआइसी एसिया बैंकको सर्वाधिक शेयर कारोबार भएको छ ।  यसको आज ११ करोड ८२ लाखभन्दा बढीको कारोबार भएको छ ।

काठमाडौँ । काठमाडौँ महानगरपालिका-१० रुद्रमती किनारस्थित देवीनगरमा सार्वजनिक जग्गा मिचेर बनाइएका घर र टहरा हटाउन थालिएको छ । 

महानगरपालिका नगर प्रहरीले आजदेखि अतिक्रमित संरचना हटाउन थालेको वडा नं १० का वडा सदस्य नरोज अर्यालले जानकारी दिए । रुद्रमती किनारमा रहेको करिब १६ रोपनी सार्वजनिक जग्गा सुकुम्वासीका नाममा अतिक्रमण भएको छ ।

अतिक्रमणकारीले यस क्षेत्रमा करिब पाँच दर्जन संरचना निर्माण गरेका छन् । राजधानीको सभ्यताको स्रोतका रूपमा रहेका नदी किनारका सार्वजनिक जग्गा अतिक्रमण गरी अवैध संरचना निर्माण गर्दा प्रदूषण बढ्ने गरेको छ । 

अधिकार सम्पन्न वाग्मती सभ्यता एकीकृत विकास समितिले पनि काठमाडौँ उपत्यकाका नदी किनारमा अतिक्रमण भएको सार्वजनिक जग्गा खाली नभएसम्म नदी सफाइमा काम गर्न असहज हुने बताउँदै आएको छ ।

महानगरपालिकाले यसअघि वाग्मती नदी किनारलगायत अवैध संरचना पनि हटाउन सुरु गरिसकेको छ । नक्सापास नभई बनेका अन्य संरचना पनि महानगरपालिकाले हटाएको प्रवक्ता नवीन मानन्धरले जानकारी दिए । 

पुस ६ गते, बुधबार, नेपाली बजारमा सुन र चाँदी दुबैको मूल्य बढेका छन्।

अाज छापावाल सुन प्रतितोला ८०० रुपैयाँ बढेको छ। अघिल्लो दिन १ लाख ४०० रुपैयाँमा कारोबार भएको छापावाल सुन, यस दिन बढेर १ लाख १ हजार २०० रुपैयाँमा कारोबार भएको छ।

त्यसैगरी, यस दिन तेजाबी सुन १ लाख ७०० रुपैयाँमा कारोबार भइरहेको छ।

नेपाल सुनचाँदी व्यवसायी संघका अनुसार यस दिन चाँदीको मूल्य पनि बढेको छ। यस दिन चाँदीको मूल्य प्रतितोला २५ रुपैयाँ बढेर १ हजार ४०० रुपैयाँमा कारोबार भइरहेको छ। अघिल्लो दिन चाँदी १ हजार ३७५ रुपैयाँमा कारोबार भएको थियो।