Month: February 2022

काठमाडौं । हिजो समितिका सभापतिको उम्मेदवारी प्रस्ताव दर्ता भएपछि । प्रतिनिधि सभा अन्तर्गतका १० वटा विषयगत समितिले चुनाव सम्पन्न भएको नौ महिना पछि आज पूर्णता पाउने भएका छन् ।

आज सम्बन्धित समितिमा ती प्रस्ताव निर्णयार्थ प्रस्तुत गरिनेछन् ।

सङ्घीय संसद् सचिवालयका अनुसार नौ वटा विषयगत समितिमा एकल उम्मेदवारी र एउटा समितिमा दुई जनाको उम्मेदवारी प्रस्ताव दर्ता भएको छ ।

एकल उम्मेदवारी प्रस्ताव आएका समितिमा स्वतः सभापति घोषणा हुने र दुई जनाको उम्मेदवारी रहेको उद्योग तथा वाणिज्य र श्रम तथा उपभोक्ता हित समितिको सभापतिका लागि चुनाव हुनेछ ।

सङ्घीय संसद् सचिवालयका प्रवक्ता एकराम गिरीका अनुसार आज सभापति घोषणासँगै सपथ ग्रहणको काम पनि हुनेछ ।

एक मात्र प्रस्ताव दर्ता भएका समितिमा समर्थक सदस्यले बोलिसकेपछि सभापतित्व गर्ने सदस्यले प्रस्तावित सदस्य सभापति पदमा निर्विरोध निर्वाचित भएको घोषणा गर्नेछन् ।

दुई वटा प्रस्ताव दर्ता भएको उद्योग तथा वाणिज्य र श्रम तथा उपभोक्ता हित समितिको सभापतिका लागि दर्ता क्रमअनुसार समर्थक सदस्यले बोलिसकेपछि दुई वटै प्रस्तावमाथि छलफल हुनेछ ।

त्यसपछि तत्काल सभापतित्व गर्ने सदस्यले प्रस्तावलाई क्रमशः निर्णयार्थ प्रस्तुत गर्नेछन् ।

उद्योग तथा वाणिज्य र श्रम तथा उपभोक्ता हित समितिको सभापतिमा जनमतका अब्दुल खान र रास्वपाका गणेश पराजुलीको उम्मेदवारी परेको छ ।

यस्तै अर्थ समितिको सभापतिमा नेपाली कांग्रेसका सन्तोष चालिसे, अन्तर्राष्ट्रिय सम्बन्ध र पर्यटन समितिको सभापतिमा जसपाका राजकिशोर यादवको उम्मेदवारी परेको छ ।

कानुन, न्याय तथा मानवअधिकार समितिको सभापतिमा माओवादी केन्द्रका विमला सुवेदी, कृषि सहकारी तथा प्राकृतिक स्रोत समितिको सभापतिमा कांग्रेसका आरजु राणा देउवा, महिला तथा सामाजिक मामिला समितिको सभापतिमा किरणकुमार साह र राज्य व्यवस्था तथा सुशासन समितिमा रामहरि खतिवडाको उम्मेदवारी परेको छ ।

त्यसैगरी, पूर्वाधार विकास समितिको सभापतिमा राप्रपाका दीपकबहादुर सिंह, शिक्षा, स्वास्थ्य तथा सूचना प्रविधि समितिको सभापतिमा एकीकृत समाजवादीका भानुभक्त जोशी र सार्वजनिक लेखा समितिको सभापतिमा एमालेका ऋषिकेश पोखरेलको उम्मेदवारी दर्ता भएको सचिवालयले जनाएको छ ।

प्रतिनिधिसभाको चुनाव भएको नौ महिनापछि संसदीय समितिले पूर्णता पाउन लागेको हो ।

काठमाडौं । कोशी प्रदेश आजदेखि बजेट शून्यतामा गएको छ । बजेट शून्यतामा गएपछि प्रदेशभर कर उठाउन समस्या भएको छ । तत्कालीन मुख्यमन्त्री हिक्मत कार्कीले अध्यादेशबाट ल्याएको बजेट कार्यान्वयनमा नआएपछि शून्यतामा गएको हो । बजेट कार्यान्वयन गर्नुपर्ने अवधि हिजो सकिएको छ ।
हिजोसम्म प्रदेश सभाबाट पारित भइ त्यो अध्यादेश प्रमाणीकरणका लागि प्रदेश प्रमुखसमक्ष पठाइनुपर्ने थियो । तर वर्तमान प्रदेश सरकारले बजेट अधिवेशन अन्त्य गरिसकेको छ ।

सर्वोच्चले ‘दीर्घकालीन महत्व राख्ने निर्णय नगर्न’ पुनः आदेश दिएपछि अध्यादेशमार्फत नै बजेट ल्याउने तयारीमा रहेको सरकार निर्णयविहीन भएको छ ।

संविधानमा बजेटविहीनताको अवस्था परिकल्पना नगरिए पनि कोशी प्रदेशको राजनीतिक परिस्थितिका कारण यस्तो स्थिति उत्पन्न भएको हो ।

गएको जेठ ३२ गते तत्कालीन मुख्यमन्त्री हिक्मतकुमार कार्कीले अध्यादेश मार्फत बजेट ल्याएका थिए ।

प्रतिस्थापन विधेयक ल्याएर सदनबाट बजेट पारित गर्ने सरकारको योजना थियो ।

तर, मुख्यमन्त्री उद्धव थापाले प्रदेशसभाको सभाध्यक्ष गरेका कांग्रेस सांसद इसराइल मन्सुरी समेतको मत जोडेर भदौ ४ गते विश्वासको मत लिएपछि कार्की रिट लिएर सर्वोच्च अदालत पुगे।

सर्वोच्चले ‘दीर्घकालीन महत्व राख्ने निर्णय नगर्न’ पुनः आदेश दिएपछि अध्यादेशमार्फत नै बजेट ल्याउने तयारीमा रहेको सरकार निर्णयविहीन भएको छ ।

अब, कसरी अघि बढ्ने भन्ने विषयमा अलमलमा परेपछि सरकारले सर्वोच्चलाई सोध्ने तयारी गरेको छ ।

काठमाडौँ। नेकपा एकीकृत समाजवादीका नेता समेत रहेका सांसद प्रतिनिधिसभाको शिक्षा स्वास्थ्य तथा सूचना प्रविधि समितिको सभापतिमा माननिय भानुभक्त जोशीको मात्र उम्मेदवारी परेपछी निर्वाचित हुने निश्चित भएको छ।

सोमबार ३ बजे हुने समितिको सभापति चयन गर्ने निर्वाचनका आज आव्हान गरिएको उम्मेद्धारी दर्ता कार्यक्रममा जोशीको मात्रै उम्मेद्धारी परेपछि उनले शिक्षा स्वास्थ्य तथा सूचना प्रविधि समितिको सभापति भन्ने निश्चित भएको हो ।

सांसद जोशी गत मंसिरमा सम्पन्न संघीय संसदको निर्वाचनमा बझाङ क्षेत्र नं. १ बाट बाम लोकतान्त्रिक गठबन्धनका साझा उम्मेद्धार बनि विजयी भएका थिए ।

भोली हुने विभिन्न १० समितिको सभापतिहरुको निर्वाचनमा ९ वटा समितिमा एकल उम्मेद्धारी परेको छ भने एउटा समितिमा भने दुई जनाको उम्मेद्धारी परेको छ।

नेपाली कांग्रेसको तर्फबाट राज्य व्यवस्था समितिमा रामहरि खतिवडा, कृषि सहकारी तथा वातावरणमा डा. आरजु राणा देउवा र अर्थ समितिमा सन्तोष चालिसेको एकल उम्मेद्धारी परेको छ।

त्यसैगरी एमालेबाट महिला समिति किरण साह र लेखा समितिमा ऋषिकेश पोखरेल, माओवादीबाट कानून न्याय तथा मानव अधिकार समितिको सभापतिमा विमला सुवेदी, राप्रपाका दीपकबहादुर सिंहले पूर्वाधार विकास समितिको सभापतिमा उम्मेदवारी दिएका छन्।

जसपाका राजकिशोर यादवलाई अन्तर्राष्ट्रिय सम्बन्ध समितिको सभापति बन्न एकल उम्मेद्धारी परेको छ। यता जनमतका अब्दुल खानले उद्योग, वाणिज्य तथा श्रम उपभोक्ता हित समितिको सभापतिमा उम्मेदवारी दिएका छन्। सोही समितिको सभापतिको लागि राष्ट्रिय स्वतन्त्र पार्टीका गणेश पराजुलीको पनि उम्मेदवारी परेको छ।

काठमाडौं । नेकपा (एकीकृत समाजवादी) निकट समाजवादी प्रेस संगठन, नेपालले दोस्रो स्थापना दिवसको अवसरमा नेकपा एकीकृत समाजवादी पार्टीका अध्यक्ष तथा पूर्वप्रधानमन्त्री माधव कुमार नेपाल पत्रकारलाई सुशासनको पक्षमा कलम चलाउन आग्रह गरेका छन् । समाजवादी प्रेस संगठन नेपालको दोस्रो स्थापना दिवसको अवसरमा आयोजित कार्यक्रमलाई सम्बोधन गर्दै अध्यक्ष नेपाल र एकीकृत समाजवादीका सम्मानित नेता झलनाथ खनालले सुशासनको प्रत्याभूति नभएसम्म अग्रगमनको पक्षमा सोचेजस्तो काम नहुने बताए ।

अध्यक्ष नेपालले युवालाई शिक्षा मात्र नभइ सीप सिकाउन जरुरी रहेको बताए । कृषि, जल, जमिन तथा खनिजमा आधारित उद्योगको नेपालमा प्रचुर सम्भावना रहेको उनले बताए । अध्यक्ष नेपालले नेकपा एसलाई आम जनतामा आधारित पार्टी बनाउन लागिपरेको दाबी गरे ।

साथै एकीकृत समाजवादीका सम्मानित नेता झलनाथ खनालले देशमा दक्षिणपन्थी चलखेलका कारण अस्थिरता बढेको बताए । दक्षिणपन्थीको भण्डाफोर गर्दै जानुपर्ने बताए । पार्टी पत्रकारिताको वकालत गर्दै नेता खनालले वर्गीय समाजमा वर्गभन्दा माथि कोही नहुने बताए । दक्षिणपन्थी भड्काउबाट खण्डन आलोचना गर्दै कम्युनिष्टरुको पराधिन हुँदै गएको बताउँदै उनले यथार्थ कुरा उठाउन समाजवादी पत्रकार आगाडि आउनुपर्ने बताए । व्यवस्थाको एक मात्र विकल्प समाजवाद भएको उनको भनाइ थियो ।

समाजवादी प्रेस संगठनका केन्द्रीय अध्यक्ष विश्वमणि सुवेदीको अध्यक्षतामा भएको कार्यक्रममा समाजवादी प्रेस संगठन नेपालका संस्थापक अध्यक्ष शम्भु श्रेष्ठ, नेकपा एसका केन्द्रीय सदस्य प्रेमल कुमार खनाल, राष्ट्रपतिका प्रेस सल्लाहकार किरन पोखरेल, नेपाल पत्रकार महासंघका महासचिव रोशन पुरी, नेपाल प्रेस युनियनका अध्यक्ष शिव लम्साल, वरिष्ठ पत्रकार दिनेस डीसी, नेपाल पत्रकार महासंघका सचिव गोविन्द प्रसाद चौलागाईं, क्रान्तिकारी पत्रकार महासंघका अध्यक्ष नारायण पंगेनी, जनसंगठन पत्रकार संघ नेपालका अध्यक्ष शेरबहादुर बिश्वकर्मा, प्रेस सेन्टर नेपालका उपाध्यक्ष दिपेन्द्र राउत, श्रमजीवी पत्रकार संघका अध्यक्ष जन्मदेव जेसी, सञ्चारिका समूहका अध्यक्ष तुमखेवा लगायतले आ–आफ्नो भनाइ राखेका थिए ।

समाजवादी प्रेस संगठन नेपालले आफनो स्थापना दिवसको अवसरमा २०८० सालदेखि वितरण हुने विभिन्न पुरस्कार स्थापना गरेको छ । जसमा साहना प्रधान महिला सश्क्तिकरण पत्रकारिता पुरस्कार रु. ५१ हजार, हृदय चन्द्रसिंह प्रधान स्मृति पत्रकारिता पुरस्कार रु.५१ हजार, अग्नि शिखा स्मृति पत्रकारिता पुरस्कार रु. ५१ हजार, वीरेन्द्र साह कृयाशपल स्मृति पत्रकारिता पुरस्कार रु. ४१ हजार, डेकेन्द्र थापा साहसिक पत्रकारिता पुरस्कार रु. ४१ हजार, चन्द्र न्योपाने स्मृति पत्रकारित पुरस्कार रु. ३१ हजार, विके पाल्पाली साहित्य पत्रकारिता पुरस्कार रु. २१ हजार, उत्कृष्ट संगठन पुरस्कार रु. २१ हजार, एलवि बिश्वकर्मा स्मृति पत्रकारिता पुरस्कार रु.२१ हजार र २५ लाख राशिको स्वास्थ्य उपचार कोषको स्थापना गरिएको समाजवादी प्रेस संगठन नेपालका महासचिव राम कुमार एलनले जानकारी दिए ।

काठमाडौँ । प्रधानन्यायाधीश विश्वम्भरप्रसाद श्रेष्ठले न्यायका उपभोक्तालाई छिटो र सहजरुपमा न्याय दिने उद्देश्य सोमबारदेखि पेशी तारिखका लागि स्वचालित (अटोमेसन) प्रणाली लागू गर्ने भएका छन् ।

संवैधानिक तथा न्यायिक पत्रकार मञ्चद्वारा नवनियुक्त प्रधानन्यायाधीश श्रेष्ठलाई बधाई तथा शुभकामना दिन आइतबार आयोजित कार्यक्रममा उनले (सोमबार)देखि उक्त प्रणाली लागू गर्न लागिएको जानकारी दिए ।

‘पहिला सर्वोच्च अदालतमा परीक्षणका रुपमा मुद्दाको पेशी तारिख अटोमेसन प्रणालीबाट सुरु गरिन्छ, परीक्षण सफल भए काठमाडौँ जिल्ला अदालत र धेरै मुद्दा भएका अदालतमा प्रयोगमा ल्याइनेछ’, प्रधानन्यायाधीश श्रेष्ठले भने । यो प्रविधि सर्वोच्च अदालतको सूचना प्रविधि शाखाले बनाएको भन्दै उहाँले यसको प्रयोग सफल भए न्यायसम्पादनमा सबैलाई फाइदा पुग्ने बताए ।

उनले न्यायाधीश नियुक्ति प्रक्रिया जतिसक्दो छिटो गर्नका लागि आफू लागिरहेको र सक्षम न्यायाधीश नियुक्ति गरेर न्यायलयप्रति जनआस्था वृद्धिका लागि काम गर्ने प्रतिबद्धता व्यक्त गरे । ‘न्यायाधीश नियुक्ति प्रक्रिया अघि बढिसकेको छ, न्यायाधीशको सङ्ख्या कम हुँदा न्याय सम्पादनमा कठिनाइ भइरहेको छ’, प्रधानन्यायाधीश श्रेष्ठले थपे, ‘सक्षम न्यायाधीश नियुक्ति हुनेमा विश्वास दिलाउँछु ।’

नेपालको ३१ औँ प्रधानन्यायाधीशका रुपमा श्रेष्ठ यही भदौ ४ गते नियुक्त थिए । उनले भदौ ५ गते पद तथा गोपनियताको शपथ लिएर पदबहाली गरी कार्यभार सुरु गर्नुभएको हो । मञ्चले लामो समयदेखि न्यायालय र कानुनको क्षेत्रमा कलम चलाउने पत्रकारबीच पुलको भूमिका निर्वाह गर्दै आएको छ ।