जाजरकोटमा फेरि ४ म्याग्निच्युडमाथिको भूकम्पको धक्का मापन गरिएको छ ।
शनिबार दिउँसो ३ बजेर ४० मिनेटमा जाजरकोटको रामीडाँडा आसपास केन्द्रविन्दु भएको ४.२ म्याग्निच्युडको धक्का मापन गरिएको राष्ट्रिय भूकम्प मापन तथा अनुसन्धान केन्द्रले जनाएको छ ।
केन्द्रका अनुसार यो धक्का शुक्रबार राति ११ बजेर ४७ मिनेटमा रामीडाँडा आसपास नै केन्द्रविन्दु भएर गएको ६.४ म्याग्निच्युडको भूकम्पको परकम्प हो । सो भूकम्पछि हालसम्म १७५ भन्दा धेरै परकम्प मापन भइसकेको केन्द्रले जनाएको छ ।
काठमाडौं । जाजरकोट भूकम्पमा परी मृत्यु हुनेको संख्या एक सय ५७ पुगेको छ । हालसम्म प्राप्त विवरणअनुसार भूकम्पमा परी ३७५ जना घाइते भएको गृहमन्त्रालयले जानकारी दिएको छ ।
गृह मन्त्रालका अनुसार शनिबार साँझसम्म प्राप्त विवरण अनुसार जाजरकोटमा १०५ जनाको मृत्यु भएको हो । ७२ महिला र ३३ पुरुषको मृत्यु भएको छ । यस्तै रुकुम पश्चिममा ५२ जनाको मृत्यु भएको छ । २७ महिला र २५ पुरुषको मृत्यु भएको जानकारी दिइएको छ ।
घाइतेहरुको विभिन्न अस्पतालमा उपचार भइरहेको छ । सुर्खेतस्थित प्रदेश अस्पताल, नेपालगन्जको भेरी अस्पताल र काठमाडौंको शिक्षण अस्पतालका साथै जिल्ला अस्पतालहरुमा घाइतेको उपचार भइरहेको हो ।
काठमाडौं । सरकारले भूकम्प प्रभावित क्षेत्रको सूचना तथा सञ्चार प्रणालीलाई व्यवस्थित बनाउन सञ्चार मन्त्रालयमा रहेको ‘इमरजेन्सी टेलिकम्युनिकेसन क्लस्टर’ (इटीसी)लाई सक्रिय बनाएको छ ।
सञ्चार तथा सूचना प्रविधिमन्त्री रेखा शर्माको आह्वानमा सञ्चार तथा सूचना प्रविधि मन्त्रालयमा बसेको बैठकले क्लस्टर सक्रिय बनाउने निर्णय गरेको हो।
बैठकले भूकम्प प्रभावित क्षेत्रहरूमा टेलिफोन तथा इन्टरनेट सेवा सुचारु गर्न सेवा प्रदायकलाई अनुरोध गर्ने र नेपाल दूरसञ्चार प्राधिकरणले सोको समन्वय, अनुगमन र आवश्कयताअनुसार स्रोत परिचालनको व्यवस्थापन गर्ने निर्णय गरेको छ।
त्यस्तै, सेवा प्रदायकहरूले सेवालाई प्रभावकारी बनाउन सम्पर्क विन्दु र सम्पर्क व्यक्ति तोक्ने तथा निन्तर सम्पर्कमा रहने पनि बैठकले निर्णय गरेको छ।
भूकम्प प्रभावित क्षेत्रहरूबाट सत्यतथ्य, विश्वसनीय र आधिकारिक समाचार सम्प्रेषण गर्न सबै सञ्चारमाध्यम र सामाजिक सञ्जाल प्रयोगकर्तालाई समेत अनुरोध गर्ने निर्णय गरेको सञ्चार तथा सूचना प्रविधिमन्त्रीका सञ्चारविज्ञ नरेन्द्र केसीले जानकारी दिए।
काठमाडौँ । बागमती प्रदेश सरकारले भूकम्पपीडितको तत्काल प्रभावकारी उद्धार, उपचार, राहत र पुनः स्थापनाका लागि रू एक करोड ५० लाख सहयोग उपलब्ध गराउने भएको छ ।
प्रदेशका आन्तरिक मामिला तथा कानुनमन्त्री गङ्गानारायण श्रेष्ठले आज विज्ञप्ति जारी गर्दै नागरिक समाज, विभिन्न गैरसरकारी संस्थालाई विपद्को घडीमा आवश्यक सहयोग गर्नसमेत आग्रह गर्नुभएको छ ।
विज्ञप्तिमा भनिएको छ, “यस विपद्को घडीमा बागमती प्रदेश सरकार कर्णाली प्रदेश सरकारसँगै रहनेछ ।” जाजरकोटको रामीडाँडा केन्द्रबिन्दु भई गएराति गएको भूकम्पले ठूलो मात्रामा जाजरकोट र रुकुम पश्चिम जिल्लामा जनधनको क्षति पुगेकामा बागमती प्रदेश सरकारले दुःख व्यक्त गरेको छ ।
विज्ञप्तिमा भनिएको छ, “उक्त भूकम्पबाट ज्यान गुमाएका सम्पूर्ण व्यक्तिप्रति श्रद्धाञ्जली अर्पण गर्दै शोकाकुल परिवार र आफन्तजनमा समवेदनाका साथै घाइतेको शीघ्र स्वास्थ्य लाभको कामना गर्दछौँ ।”
काठमाडौं । शुक्रबार राति गएको भूकम्पमा परेर जाजरकोटमा ९३ जना र रुकुममा ३६ को मृत्यु भएको छ । ५५ जना घाइते भएको नेपाल प्रहरीका केन्द्रीय प्रवक्ता डीआईजी कुवेर कडायतले सम्पतिन्युजलाई जानकारी दिए । उनका अनुसार काठमाडौंबाट थप उद्दार टोलि गएको र भग्नावसेसमा पुरिएकाहरुको थप उद्दार हुने बताए । भूकम्पका कारण ठूलो मानवीय क्षति भएको विवरण आएलगत्तै राति १ बजे चौरजहारी बेस क्याम्पबाट प्रहरी टोली खटिएको उनले बताए ।
प्रहरीका प्रवक्ताका अनुसार रुकुम पश्चिममा ३६ जना, त्यहाँ ८५ जना घाइते रहेको प्रवक्ता कडायतले बताए । योसँगै भूकम्पमा परेर मृत्यु हुनेको संख्या १२८ पुगेको छ, जम्मा १४० जना घाइते छन् । घाइतेहरुको स्थानीय अस्पतालमा उपचार भइरहेको छ । सुर्खेतबाट भूकम्प प्रभावित स्थानमा थप उद्दार टोलि पठाएको उनले बताए ।
उपचारका लागि अस्पताल आउनेमा अधिकांश महिला रहेका छन् । जसमा २१ वर्षदेखि २७ वर्ष उमेर समूहका महिलाको संख्या बढी छ । घाइतेको संख्या थपिँदै जाँदा औषधि र स्वास्थ्यकर्मीको अभाव हुन सक्ने भएकाले प्रदेश र संघका स्वास्थ्य निकायलाई सहयोगको लागि आग्रह गरेको छ ।
काठमाडौं । प्रधानमन्त्री पुष्पकमल दाहाल प्रचण्ड टोलीसहित भूकम्प प्रभावित क्षेत्र जाजरकोट प्रस्थान गरेका छन्।
नेपाली सेनाको १६ जनाको मेडिकल टिमसहित प्रधानमन्त्री प्रचण्ड जाजरकोट प्रस्थान गरेको उनका प्रेस सल्लाहकार गोविन्द आचार्यले जानकारी दिए ।
प्रधानमन्त्रीसहित पूर्वगृहमन्त्रीद्वय जनार्दन शर्मा र शक्तिबहादुर बस्नेत पनि गएका छन् । उनीहरू दुवै जना भूकम्प प्रभावित जिल्लाबाट निर्वाचित सांसद हुन् ।
जाजरकोटको रामीडाँडा केन्द्रबिन्दु भएर शुक्रबार राति ११ः४७ बजे शक्तिशाली भूकम्प गएको थियो।
काठमाडौँ । जाजरकोटलाई केन्द्र बनाएर हिजो मध्यराति गएको भूकम्पमा परी १ सय १९ जनाको मृत्यु भएको छ । यो तथ्याङ्क जाजरकोट र रुकुमको हो । १ सय ८ जना घाइते भएका छन् ।
भूकम्पले जाजरकोटमा बढी क्षति भएको कर्णाली प्रदेश प्रहरी कार्यालय सुर्खेतले जानकारी दिए । कर्णाली प्रदेश प्रहरी कार्यालय सुर्खेत अनुसार उद्धारका लागि सबैतिरबाट एकतृत गरी सुरक्षा फौज परिचालन गरिएको छ ।
यसैगरी घाइतेको उपचारका लागि सक्दो व्यवस्था मिलाइएको छ । उपचारका लागि हेलिकप्टरद्वारा स्वास्थ्यकर्मी घटना स्थलमा पुर्याइएको भट्टराईले जानकारी दिए । क्षतिको विवरण आउने क्रम जारी रहेको उनले बताए ।
काठमाडौँ । सशस्त्र प्रहरी अस्पतालको मेडिकल टिमलाई जाजरकोटमा पठाइएको छ । भूकम्पबाट घाइते भएकाहरूको उपचारका लागि डा रोशन पराजुलीको नेतृत्वमा मेडिकल टिम घटनास्थलमा पठाएको सशस्त्र प्रहरी बरिष्ठ उपरीक्षक तथा प्रवक्ता राजेन्द्र खड्काले इकर्मचारीलाई बताए ।डा. पराजुलीको नेतृत्वमा ९ जनाको मेडिकल टिम सेनाको स्काइ ट्रक मार्फत घटनास्थल तर्फ लागेका हुन् ।
खड्काका अनुसार, दाङ, बाके र सुर्खेतबाट विपद् उद्दारका लागि डीआरएस (डिजास्टर रेस्पोन्स सिस्टम) को कन्टेनर पश्चिम रुकुमतर्फ पठाइएको छ । ‘डीआरएस कन्टेनरमा खाद्यान्नबाहेक उद्दारका सबै सामग्रीहरु हुन्छ, अहिले कुरिनटार र सिनामंगलरमा पनि डिजास्टर म्यानेजमेन्टको तालिम लिएको टोली तैनाथ राखिएको छ’, उनले भने, ‘थप मेडिकल रेस्पोन्डरको टोली पनि पठाउन तैनाथ गरेका छौं ।’
एसएसपी खड्काका अनुसार, महेश्वरी बाहिनी सुर्खेतबाट खोज तथा उद्दारका लागि टोली खटिएको छ । उपत्यका गणबाट पनि टोली तैनाथ छ ।
त्यस्तै थप मद्दतको लागि ३२ नम्बर गण सुर्खेतबाट सप्रनि कविन्द्र खड्काको कमाण्डमा ३५ जना, ६ नम्बर बाहिनी सुर्खेतबाट डा. निश्चल घिमिरेको कमाण्डमा एम्बुलेन्स सहित ४ जनाको मेडिकल टोली, २९ नम्बर गण दाङबाट २१ जनाको टोली, ४२ नम्बर रिजर्भ गण बाँकेबाट २५ जनाको टोलीका साथै मेडिकल टिमलाई जाजरकोटमा पठाइएको प्रबक्ता खड्काले जानकारी दिए । साथै विभिन्न युनिटहरुबाट थप मद्दतको लागि तयारी हुँदै रहेको उनले बताए ।
जाजरकोटको रामेडाँडा केन्द्रबिन्दु भएर गएको भूकम्पमा परेर मृत्यु हुनेको जाजरकोटमा मात्र संख्या ९२ पुगेका छन ।
सशस्त्र प्रहरी बल नेपालको स्थापनाकाल देखि नै विभिन्न किसिमका प्रकोपहरू भुकम्प, सडक दुर्घटना, बाढीपहिरो, आगलागी जस्ता मानवीय तथा प्रकृतिक प्रकोपहरुमा उद्धार कार्य तथा जोखिम न्यूनीकरणका लागीे काम गर्दै आएको छ ।
काठमाडौँ- जनमत पार्टीका अध्यक्ष डा. चन्द्रकान्त राउतले शीर्ष तीन नेताहरूले मात्रै देश चलाउने कुरा तोड्न जनमत पार्टीको स्थापना भएको बताएका छन्।
शुक्रबार काठमाडौंमा आयोजित शुभकामना आदानप्रदान कार्यक्रमलाई सम्बोधन गर्दै उनले अहिले नाम मात्रैको लोकतन्त्र रहेको बताए। उनले संसदीय व्यवस्था भने पनि सांसदहरूले भनेका कुरा लागू नहुने गरेको बताए।
अध्यक्ष राउतले देश ३५ वर्ष यता तीन जना नेताहरूमै घुमिरहेकाले त्यसलाई चिर्न आफूहरू आएको बताए। उनले जनताका गास, बास र कपास, शिक्षा, स्वास्थ्य, रोजगारी, सामाजिक सुरक्षाका अपेक्षालाई पूरा गर्नुपर्ने जिम्मेवारी आफूहरूमा रहेको बताए।
अध्यक्ष राउतले जनताको भरोसालाई इमानदारिताका साथ पूरा गर्ने जिम्मेवारी आफ्नो पार्टीलाई आएको बताए। उनले पार्टीलाई राष्ट्रव्यापी रूपमा विस्तार गर्ने बताए। उनले आफू मन्त्री बन्नकै लागि पार्टी खोलेर राजनीतिमा नआएको बताए।
काठमाडौँ । सरकारले मन्त्रिपरिषद्का निर्णय सार्वजनिक गरेको छ । बिहीबार बसेको मन्त्रिपरिषद् बैठकका १८ निर्णय सार्वजनिक गरिएको हो ।
मन्त्रिपरिषद् बैठकका निर्णयहरू :-
काठमाडौं – नेपाल प्रहरीमा प्राविधिक प्रहरी सहायक निरीक्षकदेखि प्राविधिक प्रहरी निरीक्षकसम्मको पदमा जागिर खुलेको छ। प्रहरी प्रधान कार्यालयले सूचना प्रकाशन गर्दै १२८ जनाका लागि आवेदन खुल्ला गरेको हो।
प्रहरी प्रधान कार्यालयको मानवश्रोत विकास विभाग, वृत्ति विकास महाशाखा, भर्ना छनोट शाखाले आज एक सूचना जारी गर्दै १२८ जनाका लागि प्राविधिक प्रहरी समूहअन्तर्गत रिक्त रहेका विभिन्न पदमा खुला तथा समावेशी प्रावधान बमोजिम पदपूर्ति गर्न लागेको हो ।
योग्यता पुगेका नेपाली नागरिकले मंसिर ४ गतेदेखि पुस ८ गतेसम्म दरखास्त दिन सक्नेछन् । आवेदन अनलाइनमार्फत दिनु पर्नेछ ।
काठमाडौँ । यूएईलाई हराउँदै नेपाल आउँदो वर्ष अमेरिका र वेस्ट इन्डिजमा हुने टी–२० विश्वकपमा छनोट भएको छ । आज शुक्रवार मूलपानी क्रिकेट मैदानमा भएको सेमिफाइनल खेलमा नेपालले यूएईलाई ८ विकेटले हरायो ।
दश वर्षको पर्खाइपछि राष्ट्रिय क्रिकेट टोली विश्वकपमा पुगेको हो। अब नेपाल अर्को वर्ष अमेरिका र वेस्ट इन्डिजमा हुने टी-२० विश्वकपमा सहभागी हुनेछ।
यसअघि सन् २०१४ मा पारस खड्का नेतृत्वको नेपाली टोलीले पहिलो पटक बाङ्ग्लादेशमा विश्वकप खेलेको थियो।
शुक्रवारै भएको अर्को सेमिफाइनल खेलमा ओमानले बहराइनलाई १० विकेटले हराएर फाइनल पुगेको छ। अब फाइनलमा नेपाल र ओमानको पुनः भेट हुनेछ।
टस हारेको नेपालले पहिले फिल्डिङ गर्दै स्तरीय बलिङ प्रस्तुत गर्यो र विपक्षीलाई १३४ रनमा रोक्न सफल भयो।
मुलपानी मैदानमा ब्याटिङमा अभ्यस्त बन्न बाँकी यूएईका खेलाडीहरूलाई सोमपाल कामी, कुशल मल्ल र सन्दीप लामिछानेले ठूलो स्कोर बनाउनबाट रोकेका थिए।
जबाफमा नेपालले रनको लागि हतारो गरेन र निकै धैर्यपूर्ण ब्याटिङ गर्दे टोलीलाई जिततिर डोहोर्यायो।
नेपालले १७.१ ओभरमा दुई खेलाडी गुमाउँदै १३५ रन बनायो। त्यसका लागि आशिफ शेखको अर्शधतकीय पारी महत्त्वपूर्ण रह्यो।
पहिलो ओभरदेखि ब्याटिङ गर्न आएका ओपनर आशिफ शेखले नेपाललाई नजिताएसम्म मैदान छोडेनन्।
आफ्नो पार्टनर कुशल भुर्तेल तेस्रो ओभरमा ११ रन बनाएर आउट भएपछि आशिफ क्रिजमा निकै होसियार रहँदै खेलमा डटिरहे।
कुल ५० बल खेलेका उनी ६३ रनमा अविजित रहे, जसमा छ चौका र दुई छक्का छ।
विजयी दुई रन बटुलेपछि उनले मैदानमा घोप्टिएर प्रार्थना गरेका थिए।
गुलशन झा २२ रनमा आउट भएपछि कप्तान रोहित पौडेल आए।
रोहित र आशिफले अविजित रही खेल जिताए। रोहितले २१ बलमा ३५ रन बटुले।
नेपाली ब्याटरको विशेषता के रह्यो भने कुनै पनि खेलाडीहरूले खराब बल खेलेनन्, कुनै ठूलो शट खेल्ने जोखिम पनि उठाएनन्। अनि आरामसँग खेललाई जिततर्फ लगे।
आजको लागि टिममा समावेश गरिएका घाइते खेलाडी दीपेन्द्र सिंह ऐरीको पालो नै आएन।
काठमाडौं सर्बोच्चको रिगल फैसला नजिरले रेशम चौधरीको आममाफी प्रकरण बल्झिने र नागरिक उन्मुक्ति पार्टीका फाउन्डर रेशम चौधरी जेल जाने लगभग पक्का पक्की जस्तो छ।
नापी बिभागका महानिर्देशक प्रकाश जोशी पछिल्ला दिनहरूमा नागरिक उन्मुक्ति पार्टीका चौधरीको आडमा नापी बिभाग भित्र कमब्याक डिजि असुल्न बिजि बन्दा मातहतका कर्मचारी बीच खैल्लाबैला मच्चिएको छ।
हरेक दिन साझमा मन्त्री रन्जिता श्रेष्ठ र उनका श्रीमान चौधरी संग भेटेर के मा कसरी असुल्न सकिन्छ फर्मुल्ला प्रस्तुत गर्ने अभियानमा आफुलाइ मास्टर माइन्ड बताउने तिनै महानिर्देशक जोशी रिगल फैसला पछि एकाएक झस्केका छ्न्।
रेशम चौधरीलाई दिएको आममाफी बिरूद्धको पीडित पक्षको परिवारबाट दर्ता भएको रिट सर्बोच्चमा विचाराधीन केश यसै हप्ता कार्तिक २३ गते अन्तिम सुनुवाई हुदैछ। त्यसै दिन गडफादर मानेका चौधरी मामा घरमा जाने भएपछि एक्लिनु पर्ने उन पिडाले साहारा खोजिरहेको बताइन्छ ।
कानुनी व्यावसायी राधिका खतिवडा लगायतका दर्जनौं कानुन व्यावसायिहरु बिधिको शासन स्थापित गराउन निशुल्क भिडदै छ्न्।
अब यस्तो न्यायको चौतर्फी आवाज उठिरहेको बेला चौधरी पनि उम्कन नसक्ने खबर सुनेका नापी बिभागका महानिर्देशक तनाबमा हुनुलाई स्वभाबिक मानिएको छ।
प्रहरी एसएसपी लक्ष्मण न्यौपाने देखि बालक हत्याको आरोपित चौधरी जेल मुक्त हुँदा अबिर जात्रामा सहभागी भए बापत नातेदार जनकराज जोशी लाई पाँच महिना मै हटाएर महानिर्देशक पदमा फर्केका जोशीले पार्टी कै सदस्यता लिएर पार्टी बलियो बनाउन भुमिका खेले संगै उनको मन्त्रालयमा दबदबा बढेको बताइन्छ ।
सबैलाई आफनो त हक लाग्छ भनेर गफिने महानिर्देशक जोशी हिजो साझ बाट एकाएक तनाबग्रस्त अवस्था पुगेको उनको सचिवालयमा कार्यरत एक कर्मचारीले बताए।
पार्टी कार्यकर्ता सम्म भएका महानिर्देशक जोशीले यो बीचमा ९ सय जना नापीका कर्मचारीलाई लेनदेनमा सरुवा गरेको सन्दर्भ पेचिलो बनेको थियो ।
अब चौधरी बचाउका निम्ति कस्तो योजना बनाउछ्न् हेर्न बाकी छ।
हिजोका दिनमा जोशीका चौधरी बचाउको गफ सुन्नेहरु बताउछ्न्।
उनको यो बीचमा बडेको चुरिफुरी नियाल्नेहरु भन्छ्न आफनो नातेदार लाई हटाउन पार्टी प्रवेशको नाटक गर्नेको अभिनय अब धेरै टिक्ला जस्तो छैन।
अख्तियार दुरुपयोग अनुसन्धान आयोगले निगरानीमा राखेका महानिर्देशक जोशी आफनो भूगोलको नाता लाउदै आयुक्त जय बहादुर चन्द भैन्जेल मलाई कस्ले के गर्न सक्छ बेलाबेलामा भन्न सम्म भ्याएको ती शब्द सुन्नेहरु बताउछ्न्।
कतिपय कर्मचारीलाई मौसम अनुसारको भुमिका निर्वाह गर्नुपर्ने किन आइलाग्छ ? दुई दिन आउने मन्त्री र उनको पार्टीको मोहको नाटकले कतिपय स्वभिमानी कर्मचारीले शिर निहुराएर हिडनुपर्ने बाध्यता आइपरेको छ।
यस्ता प्रवृत्ति विरुद्धमा जनताको तहबाट कार्वाही हुनु भन्दा अख्तियर र अदालतले नै साइज तोक्नु पर्ने आवाज उठेको बताइन्छ ।
यो बीचमा भुमाफिया संगको उठबसले बिभागले बदनामी ब्यहोर्नु परेको समेत बताइएको छ।
काठमाडौँ- योगदानमा आधारित सामाजिक सुरक्षा योजनाअन्तर्गत ७ महिनामाको अविधिमा ३ लाख ९३ हजार ५०१ जना विदेशमा कार्यरत कामदार आवद्ध भएको कोषले जनाएको छ।
सरकारले चैत ८ देखि वैदेशिक रोजगारी र विदेशमा स्वरोजगार रहेका कामदारलाई कोषको कार्यक्रममा समेट्न थालेको थियो। वैदेशिक रोजगारी जाने तयारीमा रहेका र विदेशमा रहेका श्रमिकले श्रम स्वीकृति लिने बेला, श्रम स्वीकृती नवीकरण गर्ने बेलामा योजनामा समावेश भइरहेको सामाजिक सुरक्षा कोषले जानकारी दिए।
सरकारले वैदेशिक रोजगारीमा रहेका र जाने तयारीमा रहेका कामदारले श्रम स्वीकृति लिएपछि कोषमा योजनालाई अनिवार्य गरेको उनले बताए। ‘विदेशमा स्वरोजगार रहेका नेपालीको योगदानमा आधारित सामाजिक सुरक्षा योजनामा उत्साहजनक सहभागिता भइरहेका छन्।
नयाँ जाने कामदारको श्रम स्वीकृतिकै क्रममा योजनामा अनिवार्य आवद्ध हुने गरेका छन्। करिब ७६ करोड १६ लाख ८० हजार २२४ रुपैयाँ योगदान रकम जम्मा भएको छ’ उनले भने। वैदेशिक रोजगारी अन्त्य भएपछि एकमुष्टसमेत रकम लिने वा निवृत्तभरण योजना रोज्ने विकल्प हुने कोषले जनाएको छ।
सरकारले औपचारिक क्षेत्रका श्रमिक मात्रै योजनामा समावेश गर्दै आएकोमा चैत पहिलो साताबाट वैदेशिक रोजगारीमा रहेका सबै श्रमिकलाई योजनामा आबद्धता गराउन सुरु गरेको थियो। हालसम्म सुचीकरण भएकामध्ये अधिकांश वैदेशिक रोजगारीमा जान श्रम स्वीकृति लिन आवेदन दिएका श्रमिक रहेको कोषको तथ्यांकमा छ।
वैदेशिक रोजगारीमा रहेका वा जाने तयारीमा रहेकाले न्यूनतम २ हजार ३ सयदेखि अधिकतम २८ हजार रुपैयाँसम्म कोषमा योगदान गर्न सक्ने छन्। कोषमा हालसम्म औपचारिक, अनौपचारिक, वैदेशिक रोजगार र स्वरोजगार गरेर ८ लाख ४५ हजार १९३ श्रमिक आवद्ध भइसकेका छन्। कोषमा हालसम्म १८ हजार ३७६ रोजगारदाता सूचिकृत भएका छन्।
वैदेशिक रोजगारीमा रहेका श्रमिकले दुर्घटना तथा अशक्तता सुरक्षा योजना र आश्रित परिवार सुरक्षा योजनाका लागि २६ करोड ६२ लाख ७५ हजार ५९१ रुपैयाँ र बृद्ध अवस्था सुरक्षा योजनाका लागि ४९ करोड ५३ लाख ९४ हजार ६३१ रुपैयाँ योगदान गरेका छन्।
कोषमा कामदारको योगदानमार्फत ४२ अर्ब ९० करोड रुपैयाँ जम्मा गरिसकेका छन्। कोषमा जम्मा भएको रकममध्येबाट लाभग्राही १ लाख ५ हजार ९ सय ७९ दाबीका लागि ६ अर्ब १६ करोड रुपैयाँ भुक्तानी गरेको छ। योजनामा समावेश हुने श्रमिकले मासिक २ हजार ३ सय रुपैयाँ बुझाउनु पर्ने छ। रकम एकमुष्ट बुझाएमा जम्मा गरेको रकममा १० प्रतिशत छुट पाइने कोषले जनाएको छ।
काठमाडौँ । नेपाली बजारमा साताको कारोबारको अन्तिम दिन शुक्रबार सुनको मूल्य २ सय रुपैयाँले बढेको छ ।
नेपाल सुनचाँदी व्यवसायी महासङ्घका अनुसार आज शुक्रबार छापावाला सुन २ सय रुपैयाँले बढेर प्रतितोला १ लाख १५ हजार ९ सय रुपैयाँमा कारोबार भइरहेको छ ।
अघिल्लो दिन बिहीबार छापावाला सुन तोलामा १ लाख १५ हजार ७ सय रुपैयाँमा कारोबार भएको थियो । यस्तै, तेजाबी सुनको मूल्य समेत आज तोलामा ३ सय ५० रुपैयाँमा कारोबार भइरहेको छ ।
त्यसै गरी चाँदीको मूल्य भने २५ रुपैयाँले घटेको छ । चाँदी तोलामा १ हजार ३ सय ९० रुपैयाँमा कारोबार भइरहेको छ ।
