Month: February 2022

रौतहट ९ मंसिर। रौतहटको फतुवा बिजयपुर नगरपालिकाको मूल गेटको ताला फुटाएर हाजिर भएको दोस्रो दिननै प्रमुख प्रशासकिय अधिकृत उपसचिव सुरेन्द्र प्रधानले सबै वडाका सेवाग्राहीको सामाजिक सुरक्षा भत्ता बैंक दाखिला गरेका छन्।
गत बुधबार कार्यालयमा हाजिर भएका उपसचिव प्रधानले आज शुक्रवार फतुवा विजयपुरको सम्पूर्ण ११ वटै वडाका छौहजार पाँचसय ७६ जना सेवाग्राहीको सामाजिक सुरक्षा भत्ता बैंक दाखिला गर्न सफल भएका छन्।
उक्त सेवाग्राहीको सामाजिक सुरक्षा भत्ता बापतको कुल रकम तीन करोड ४१ लाख ५२ हजार ३७० रुपैयाँ उनीहरूको बैंक खातामा दाखिला गरेको फतुवा विजयपुर नगरपालिकाका प्रमुख प्रशासकीय अधिकृत उपसचिव सुरेन्द्र प्रधानले जानकारी दिएका छन्।
उपसचिव प्रधानले हाजिर भएको दिन मैले भने अनुसार सामाजिक सुरक्षा भत्ता बैंक दाखिला गरेको छु, अब नगरसभाको लागि पनि कुरा भइरहेको बताए।
मेयर अम्बेया खातुन लगायत केही जनप्रतिनिधिहरु संग कार्यपालिका बोर्डको बैठक यसै हप्ता राखेर बोर्डको निर्णय अनुसार चाँडै हुनेगरी नगरसभाको दिन तोकिने सहमती भएको उपसचिव प्रधानले जानकारी दिएका छन्।
नेपाली कांग्रस बाहेक सर्वदलीय समितिको प्रयास तथा
कार्यवाहक मेयर अम्बेया खातुनको पहलमा गत बुधबार स्थानिय प्रहरी प्रशासन तथा जनप्रतिनिधिको रोहवरमा नगरपालिकाको कार्यालयको मूल गेटमा लगाईएको ताला फुटाएर उपसचिव प्रधान लाई हाजिर गराईएको थियो।सो अवसरमा प्रमुख प्रशासकिय अधिकृत प्रधानले भोलि देखिनै सम्बन्धितहरुको बैंक खातामा सामाजिक सुरक्षा भत्ता पठाउन सुरुगर्ने र १ महिना भित्र नगरको सम्पूर्ण समस्या समाधान गर्ने प्रतिबद्धता जनाएका थिए।
संघीय मामिला तथा सामान्य प्रशासन मन्त्रालयले गत असोज २६ गतेनै फतुवा बिजयपुर नगरपालिकाको प्रमुख प्रशासकिय अधिकृतमा उपसचिव सुरेन्द्र प्रधानलाई जिम्मेवारी दिएर पठाएको थियो।
मन्त्रालयको चिठी सहित हाजिर हुन गएका प्रधान नेपाली कांग्रेस बाट निर्वाचित वडा अध्यक्षहरुको बिरोधको कारण हाजिर हुनसकेका थिएनन्। प्रधान माथि उनीहरूले बिभिन्न आरोप लगाउँदै कार्यवाहक प्रमुख प्रशासकिय अधिकृत शम्भु यादवनै हुनुपर्ने माग गरेका थिए।
तर कार्यवाहक मेयर अम्बेया खातुनले प्रमुख प्रशासकीय अधिकृतमा उपसचिव सुरेन्द्र प्रधान आएपछि भ्रष्टाचार गर्न कठिन हुने र यादव हुँदा सहज हुने भएकाले मात्र उनीहरूले त्यस्तो आरोप लगाएको बताउँदै आएकी छन्।
मेयर खातुन र केही वडा अध्यक्ष बीच प्रमुख प्रशासकीय अधिकृतकै बिषय लिएर तनाव बढेपछि वडा अध्यक्षहरुले केही कर्मचारी लाई अगाडी सारेर दशैं अगाडिनै नगरपालिकाको कार्यलयमा तालाबन्दी गराएको वडा ६ का अध्यक्ष सञ्जय यादवले बताएका छन्।
मेयर अम्बेया खातुन र केही वडा अध्यक्षहरु बिच तालमेल नमिलेको कारण असार १० गतेभित्र हुनुपर्ने नगरसभा झण्डै ६ महिना बित्नलाग्दा सम्म हुनसकेको छैन। नगरसभा नभएको कारण नगरपालिकाको सम्पूर्ण आर्थिक कारोवार ठप्प भएर झण्डै तीनसय ५० जना शिक्षक कर्मचारीले गत साउन देखि तलब पाउन सकेका छैनन् भने हिन्दूहरूको महान पर्व दशैं तिहार दीपावली छठमा पनि सामाजिक सुरक्षा भत्ता पाउने सकेका थिएनन्।
लालबकैया नदीको टेन्डरमा नेपाली कांग्रेस बाट निर्वाचित तत्कालीन मेयर गोपाल राय यादव दोषी ठहर भएपछि अख्तियार दुरुपयोग अनुसन्धान आयोगले उनलाई गत आर्थिक वर्षमा नै निलम्बित गरेपछि कांग्रेसकै उपमेयर अम्बेया खातुन कार्यवाहक बनेकी छन्।
अख्तियार दूरुपयोग अनुसन्धान आयोग टंगालको सिफारिसमा बिशेष अदालतले फतुवा बिजयपुरका तत्कालीन मेयर गोपाल राय यादव लाई लालबकैया नदिको टेण्डरमा दोषी ठहर गर्दै तीनवर्ष कैद र १५ लाख रुपैयाँ जरिवानाको निर्णय गरेको थियो। लगातार दुई महिना सम्म नगरपालिका बन्द हुँदा नगरपालिका नियमित सञ्चालन गराउन एमालेको पहलमा सर्वदलीय बैठक संघर्ष समिति गठन गरी आन्दोलनको कार्यक्रम घोषणा गरेको थियो। संघर्ष समितिका अध्यक्ष नेकपा एमालेका प्रतिनिधि शिवपुजन यादवको नेतृत्वमा गएको सर्वदलीय टोलीले जिल्ला प्रशासन कार्यालय गौरमा ज्ञापनपत्र समेत बुझाएको एमाले नगर कमिटी सचिव संतोष कुमार साहले बताएका छन्।
मेयर अम्बेया खातुनका श्रीमान तथा कांग्रेसका नेता महमद सेराजले
कांग्रेस पार्टीकै नेता तथा जनप्रतिनिधिले पटकपटक बिभिन्न बखेडा झिकेर नगर सञ्चालनमा अवरोध गर्दै आएको बताएका छन्। अन्य दलका जनप्रतिनिधि तथा नेताहरुले सहयोग गरिरहेको सेराजले जानकारी दिएका छन्। नेताहरुको जुँगाको लडाईमा फतुवा विजयपुरको कर्मचारी र सर्वसाधरण नागरीकले शास्ती खेप्नु परिरहेकाले अनावश्यक रूपमा नगर सञ्चालनमा बाधा अड्चन नगर्न जानकारहरुले आग्रह गरेका छन्।

रौतहट । रौतहट स्थित एकजना अपरिचित युवकको शंकास्पद मृत्यु भएको छ। जिल्ला सदरमुकाम गौर गंगापिपरा सडकखण्ड अन्तर्गत झाँझ खोलाको निर्माणाधिन पुलको पूर्वी पिलरको रिंगमा बेवारिसे अवस्थामा शुक्रवार उक्त अपरिचित युवकको शव बरामद भएको हो।
यमुनामाई ४ र दुर्गा भगवती गाउँपालिका ५ को सीमानामा पर्ने उक्त नदीको पुलको पिलरको रिंग भित्र अन्दाजी २४–२५ बर्षको युवकको शव विहान स्थानीयहरुले देखेर प्रहरीलाई खवर गरेका थिए ।
स्थानिय प्रत्यक्षदर्शीले युवकको कुटपिट पछि कसैले हत्या गरेर दुई दिन अघि उक्त रिंगमा फालेको हुनसक्ने आशंका गरेका छन्।
जिल्ला प्रहरी कार्यालय गौरबाट घटनास्थल पुगेका अनुसन्धान अधिकृत इन्सपेक्टर उमाशंकर गुप्ताले घटना प्रकृति र शवको अवस्था अनुसार युवकको कसैले हत्या गरेको होईन आफैले पानीमा हामफालेर आत्महत्या गरेको हुनसक्छ। शवको छाला आफै खुईलि रहेकाले कम्तीमा छौ सातदिन अघि मृत्यु भएको हुनसक्ने इन्स्पेक्टर गुप्ताको अनुमान छ। औपचारिक रूपमा अहिले सम्म शवको सनाखत हुन सकेको छैन। तर केहीदिन अघि दुर्गा भगवती गाउँपालिका ५ का २५ बर्षीय अरबिन्द सहनी घर बाट बेपता भएको थियो। शव बरामद भएपछि उसको आमालाई बोलाएर सनाखत गराउने प्रयास गरियो तर शव हेरेर सहनीको आमा अचेत भएकाले ठम्याउन नकाइएको इन्स्पेक्टर गुप्ताले जानकारी दिएका छन।सहनीको आमाले बताएको अन्य निसान तथा चिन्ह हरु मृतक संग मेल खाएको छ। इन्सपेक्टर गुप्ताले भने केही निसान मिलिरहेको छ, मृतकको पाकिटमा मोबाईल र भने अनुसारको नम्बरको सिम समेत बरामद भएकाले उक्त शव सहनीको नै हुनुपर्ने प्रहरीको अनुमान छ। शव पष्टमार्टमका लागि प्रादेशिक अस्पताल गौरमा पठाईएको तथा थप अनुसन्धान भइरहेको जिल्ला प्रहरी कार्यालय रौतहटले जनाएको छ ।

काठमाडौं- सरकारले प्राविधिक शिक्षाका लागि स्वीजरल्याण्ड सरकारले प्रदान गरेको अनुदान स्वीकृत गर्ने निर्णय गरेको छ।

बिहीबार बिहान बसेको मन्त्रिपरिषद्को बैठकले स्वीजरल्याण्ड सरकारले प्राविधिक शिक्षाका लागि दिएको अनुदान स्वीकृत गर्ने निर्णय गरेको हो।

मन्त्रिपरिषद बैठकले प्राविधिक शिक्षाका लागि स्वीजरल्याण्ड सरकारले प्रदान गर्ने स्वीस फ्रेंक ४.४६५ मिलियन (करिव ६५ करोड) अनुदान स्वीकृत गरेको छ। नेपालको शिक्षाका लागि विभिन्न दातृ निकाय, नियोग, मित्र राष्ट्रहरुले सहयोग गर्दै आएका छन्।

आजको मन्त्रिपरिषद बैठकले विद्युतीय सुशासन आयोगको सदस्यमा कञ्चनपुर निवासी पूर्णबहादुर कुँवरलाई नियुक्त गर्ने, सुनको अवैध तस्करी नियन्त्रणसम्बन्धी गठन भएको जाँचबुझ आयोगमा चार जना जनशक्ति थप गर्ने निर्णय गरेको छ।

त्यसैगरी, नेपाली सेनाका उपरथि ताराध्वज पाण्डेले व्यक्तिगत कारण दर्शाइ आफ्नो पदबाट दिएको राजीनामा असोज २४ गतेबाट लागु हुने गरी स्वीकृत गर्ने र  उर्जा सचिव दिनेशकुमार घिमिरेको राजिनामा स्वीकृत गर्ने निर्णय गरेको छ।

काठमाडौं । अख्तियार दुरुपयोग अनुसन्धान आयोगले दुई जनाविरुद्ध मुद्दा दायर गरेको छ । आयोगले रामेछापको मन्थली नगरपालिका वडा नं. ३ का तत्कालीन वडा सचिव शिव कुमार महतोसहित दुई जनाविरुद्ध मुद्दा दायर गरेको हो । 

अख्तियारका अनुसार मन्थली नगरपालिका वडा नं. ३ मा आफू जीवितै हुँदै आफ्नो मृत्यु दर्ताको प्रमाणपत्र बनाएर आफ्नो श्रीमतीलाई एकल महिला भत्ता खुवाएको भन्ने उजुरी आयोगमा परेको थियो । 

तत्कालीन वडा सचिव शिवकुमार महतोले निर्मला खत्रीसँगको मिलेमतोमा निर्मला खत्रीको जीवित श्रीमानको मृत्यु भएको भनी निर्मला खत्रीबाट सूचना लिई सामाजिक सुरक्षा भत्ता (एकल महिला) परिचय पत्र बनाएका थिए । जीवित व्यक्तिलाई मृत्यु भएको भनी दर्ता अभिलेख तयार गरी (एकल महिला) परिचय पत्र बनाएर ४५ हजार २२० रुपैयाँ भत्ता निकासा गरेको पाइएको छ । 

उनीहरूले सरकारलाई हानिनोक्सानी गरी गराई भ्रष्टाचार गरेको पाइएको आयोगले जनाएको छ । उनीहरूसँग सोही रकम बराबरको बिगो कायम गरि कैद सजायको माग गर्दै मुद्दा दायर गरिएको छ ।   

काठमाडौं । दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाऊ महाअभियान’लाई तीनकुने क्षेत्रमा कार्यक्रम गर्न अनुमति नरहेको काठमाडौँ जिल्ला प्रशासन कार्यालयले चेतावनी दिएको छ।

प्रसाईको नेतृत्वको यो अभियानले हिजो बल्खुमा कार्यक्रमको आयोजना गरेको थियो तर आज तीनकुने केन्द्रित आन्दोलन गर्ने तयारी गरिरहेको छ । सोही पछि जिल्ला प्रशासन कार्याय काठमाडौें उक्त क्षेत्रमा कार्यक्रम गर्न अनुमति नरहेको बताएको छ।

सिडियो कार्यालयले उक्त क्षेत्रमा कार्यक्रम गर्न निषेध गरिएको र जबर्जस्ती गरे कानुनबमोजिम कारबाही गर्ने चेतावनी दिएको छ । साहायक प्रमुख जिल्ला अधिकारी रविन्द्र प्रसाद आचार्यले एक विज्ञप्ती जारी गर्दै भनिएको छ,राष्ट्र, राष्ट्रियता, धर्म, संस्कृति र नागरिक बचाऊ महाअभियान, नेपालले कार्यक्रम समापनका क्रममा र पत्रकार सम्मेलनमार्फत उत्तेजक, अराजक, हिंसात्मक, ध्वंसात्मक गतिविधि गर्न उक्साउने र व्यक्ति–केन्द्रित भई घृणाजन्य अभिव्यक्ति दिँदै स्थानीय प्रशासनसँग कुनै समन्वय नगरी शुक्रबादेखि काठमाडौँको तीनकुने क्षेत्रमा भेला जम्मा भई निषेधित क्षेत्रतर्फ प्रवेश गर्ने, सार्वजनिक सम्पत्तिमा क्षति पुर्‍याउने र शान्ति सुरक्षा तथा अमनचयन बिथोल्ने मनसायले कार्यक्रम सार्वजनिक गरेकोमा यस कार्यालयको गम्भीर ध्यानार्कषण भएको छ। यसरी गलत मनसायका साथ कार्यक्रम गर्नका लागि स्थानीय प्रशासनबाट उक्त स्थल प्रयोग गर्ने अनुमति प्रदान गरिएको छैन’,

शान्ति सुरक्षामा गम्भीर असर पार्नेगरी प्रचलित कानुनविपरीतका गतिविधि गरेमा कानुनबमोजिम कारबाही गरिने हुँदा कुनै पनि प्रकारका गैरकानुनी गतिविधिहरूमा सहभागिता नजनाउनु हुन सम्बन्धित सबैलाई जानकारी गराइएको छ।’

नेपाल सुन–चाँदी व्यवसायी महासंघका अनुसार शुक्रबार छापावाल सुन प्रतितोला २०० रुपैयाँले घटेर १ लाख १६ हजार ३०० रुपैयाँ कायम भएको छ । यसैगरी, तेजावी सुनको मूल्य तोलाको १ लाख १५ हजार ७५० रुपैयाँ निर्धारण भएको छ । 

यसअघि बिहीबार छापावाल सुन तोलाको १ लाख १६ हजार ५०० रुपैयाँमा कारोबार भएको थियो । यसैगरी, तेजावी सुनको भाउ तोलाको १ लाख १५ हजार ९५० रुपैयाँ निर्धारण भएको थियो । आज चाँदीको भाउ भने प्रतितोला ५ रुपैयाँले बढेर १४ सय ५० रुपैयाँ कायम भएको छ । बिहीबार चाँदीको भाउ प्रतितोला १४ सय ४५ रुपैयाँ कायम रहेको थियो । 

काठमाडौं : सार्वजनिक वित्त व्यवस्थापन र सेवा प्रवाह सुदृढीकरण कार्यक्रम कार्यान्वयनका लागि नेपाल सरकार र एसियाली विकास बैंक एडिबीबीच रु १३ अर्ब ३३ करोड अमेरिकी डलर १० करोड बराबर सहुलियतपूर्ण ऋण सम्झौता भएको छ।

आज अर्थ मन्त्रालयमा  आयोजित कार्यक्रमा अर्थसचिव कृष्णहरि पुष्कर र एसियाली विकास बैंकको नेपालका लागि देशीय निर्देशक अर्नौड काओसिसबीच सम्झौतापत्रमा हस्ताक्षर भयो।

“सार्वजनिक वित्त व्यवस्थापन र सुदृढ सेवा प्रवाहको विषय सरकारको मुख्य प्राथमिकतामा छ । सार्वजनिक वित्तको पुनः संरचनासँगै वित्तीय सङ्घीयता कार्यान्वयनका लागि यो कार्यक्रमबाट मद्दत पुग्नेछ”, सम्झौतापत्रमा हस्ताक्षरपछि अर्थसचिव पुष्करले भन्नुभयो, “चालु आर्थिक वर्षको बजेटबाट पनि सरकारले सुधारका विभिन्न कार्यक्रमहरूमार्फत सार्वजनिक वित्त व्यवस्थापन र सेवा प्रवाहलाई मजबुत बनाउन खोजेको छ ।”

एडिबीका देशीय निर्देशक काओसिसले नेपालको वित्त प्रणालीलाई दिगो बनाउन र सरकारका आवधिक योजनालाई बढी प्रभावकारी बनाउन यो कार्यक्रमले सघाउने बताए । “सन् २०३० सम्ममा नेपाललाई  मध्यम आय भएको मुलुक बनाउन तय गरिने मध्यमकालीन र दीर्घकालीन राष्ट्रिय योजनासँग यो कार्यक्रम जोडिएको छ”, उनले भने । 

नेपालले बजेटरी सहायताका लागि यो सहुलियतपूर्ण ऋण लिएको हो । सार्वजनिक वित्त व्यवस्थापन र सेवा प्रवाह सुदृढीकरण कार्यक्रमको पहिलो चरण कार्यान्वयन भइसकेको छ । यो ऋण रकम दोस्रो चरणअन्तर्गतका कार्यक्रम कार्यान्वयनका लागि लिइएको  अर्थमन्त्रालयले जनाएको छ । तीनवटै तहका सरकारको सार्वजनिक खर्च व्यवस्थापन तथा विकास बजेट प्रभावकारी कार्यान्वयनका लागि यो कार्यक्रमले मद्दत पुर्याउने ठानिएको छ । त्यस्तै, केन्द्र सरकारको सार्वजनिक ऋण व्यवस्थापनका लागि पनि प्रभावकारी भूमिका निर्वाह गर्ने जनाइएको छ ।  

काठमाडौं : उन्नति सहकार्य लघुवित्तको एफपीओ शुक्रबार (मंसिर ८ गते) बाँडफाँट भएको छ । यसमा कुल १७ हजार ८४५ जना सर्वसाधारण आवेदकहरुले गालाप्रथामार्फत सेयर हात पारेका छन् । जसमध्ये १ जनाले ११ कित्ता र अर्को १ जनाले १०.१८ कित्ता सेयर पाएका छन् भने बाँकीले १० कित्ताका दरले सेयर पाएका छन् ।

यस एफपीओमा कुल १० लाख ७२ हजार ७६८ जनाले आवेदन दिएकामा ३२५ जनाको आवेदन रद्द भएको बिक्री प्रबन्धक सिद्धार्थ क्यापिटलले जानकारी गराएको छ । योग्य १० लाख ७२ हजार ४४३ जना आवेदकलाई गोलाप्रथामा सहभागी गराइएको थियो । 

कम्पनीले गत कात्तिक २१ देखि २४ गतेसम्म एफपीओ निष्कासन गरेको थियो । कम्पनीले प्रतिकित्ता १०० रुपैयाँको दरले १ लाख ७८ हजार ४५१ दशमलव १८ कित्ता एफपीओ निष्कासन गरेको हो ।  

साविकको उन्नति लघुवित्त र सहकार्य लघुवित्त गाभिएपश्चात बनेको उन्नति सहकार्य लघुवित्तको पूँजी संरचना संस्थापक समूहको ७५.४५ प्रतिशत र सर्वसाधारणको २४.५५ प्रतिशत छ । उक्त पूँजी संरचनालाई विद्यमान ऐन अनुसार सर्वसाधारणतर्फ ३० प्रतिशत कायम गर्न कम्पनीले एफपीओ निष्कासन गरेको हो ।  

काठमाडौं । मुक्तिनाथ कृषि कम्पनीले आज मंसिर ८ गतेदेखि आईपीओ निष्काशन तथा बिक्री खुला गनरेको छ ।

कम्पनीले जारी पुँजी ७० करोड रुपैयाँको २० प्रतिशत सेयर सर्वसाधारण समूहमा निष्कासन गर्न लागेको हो । कर्मचारी, वैदेशिक रोजगारमा गएका नेपाली नागरिक तथा सामूहिक लगानी कोषका लागि छुट्टाएपछि सर्वसाधारणका लागि कुल ११ लाख ४८ हजार कित्ता सेयर जारी हुन लागेको हो ।

कार्यालय समय १० बजेपछि मात्रै सर्वसाधारणले कम्पनीको आईपीओमा आवेदन दिन सक्नेछन् । आईपीओमा मंसिर १२ गते ५ बजेसम्म आवेदन दिन सकिनेछ ।

अंकित मूल्य १०० का दरले कम्पनीको आईपीओमा सर्वसाधारणले अनलाइन प्रणाली मेरो सेयरमार्फत आवेदन दिन सक्नेछन् । बिक्री प्रबन्धक कम्पनीका अनुसार न्यूनतम १० र अधिकतम १ हजार कित्ताका लागि यसमा आवेदन दिन सकिने बिक्री प्रबन्धक कम्पनीले जनाएको छ ।

काठमाडौं । निर्वाचन आयोगले आगामी माघ ११ गते राष्ट्रियसभा सदस्यको निर्वाचन गर्न सरकारलाई सुझाव दिएको छ । आगामी फागुन २० गते समाप्त हुने राष्ट्रियसभा सदस्यको निर्वाचन आगामी माघ ११ गते बिहीबार गर्ने गरी मिति तोक्न सरकारलाई परामर्श दिएको आयोगका सहायक प्रवक्ता सुर्य प्रसाद अर्यालले जानकारी दिए ।

प्रधानमन्त्री पुष्पकमल दाहाल ‘प्रचण्ड’लाई आयोगका पदधिकारीले भेटेर उक्त परामर्श दिएको बताए । आयोगको पदाधिकारीसंगको भेटमा प्रधानमन्त्री प्रचण्डले आयोगको सुझावअनुसार नै निर्वाचनको मिति तोक्ने संकेत गरेको अर्यालले जानकारी दिए ।

नेपालको संविधानमा राष्ट्रियसभाका एक तिहाई सदस्यको पदावधि २०८० फागुन २० गते समाप्त हुन लागेको र राष्ट्रियसभा सदस्य निर्वाचन ऐन, २०७५ बमोजिम पद रिक्त हुनुभन्दा ३५ दिन पहिले निर्वाचन गरिसक्नुपर्ने कानूनी व्यवस्था रहेको छ । आगामी फागुन २० गते निर्वाचित १९ र सरकारबाट मनोनित एक गरी २० सदस्यको पद रिक्त हुँदैछ ।

राष्ट्रिय सभामा प्रत्येक दुई वर्षमा रिक्त हुने एक तिहाइ सदस्य पदको निर्वाचन हुँदै आएको छ । राष्ट्रिय जनगणना २०७८ को नतिजा बमोजिम राष्ट्रियसभा सदस्यको अब रिक्त हुने पदको निर्वाचनका लागि मतदाता रहेका प्रदेशसभा सदस्यको ५३ र गाउँपालिकाका अध्यक्ष तथा उपाध्यक्ष र नगरपालिकाका प्रमुख तथा उपप्रमुखको १९ मतभारका दरले गणना हुने गरी निर्वाचन आयोगबाट निर्णय भएको भइसकेको छ ।