Month: February 2022

रौतहट २३  मंसीर। डिविजन बन कार्यलय रौतहटले सैयौं क्युबिफिट सालको अबैध काठ बरामद गर्नुका साथै दर्जनबढी तस्कर पक्राउ गरेका छन्। बन गस्ती टोलीले सक्रियता बढाए संगै तस्करहरुले पनि नयाँ नयाँ युक्ती निकालेर साल जातको काठ अवैध रूपमा कटानी गरेर तस्करी गर्ने गरेको पाइएको छ। हेर्दा पत्यारै नलाग्ने किसिमको चार पाँच फिट सम्म मोटाई भएको सालको गुलिया काठ तस्करहरुले साईकलमै ढुवानी गर्ने गरेको देखिएको छ। दुई दिन अघिमात्र सशस्त्र वन सुरक्षा गस्ती टोलीले रौतहट स्थित बलेरी खोर जंगल बाट त्यस्तै किसिमले तस्करहरुले ढुवानी गर्न लागेको दुर्इवटा साईकल जोडेर लोड गरिएको विशाल सालको गुलिया काठ बरामद गरेको छ। राष्ट्रीय बनमा तस्कर समूह प्रवेश गरेको बिशेष सूचनाको आधारमा गएको सुरक्षा टोलीले नया प्रविधी बाट चोर्दै गरेको उक्त साईकल सहितको गुलिया काठ बरामद गरिएको डिवीजन बन कार्यालय रौतहटका प्रमुख शैलेन्द्र कुमार मिश्रले बताएका छन्।

 डिविजन प्रमुख मिश्रको सक्रियतामा डिवीजन बन कार्यलय चन्द्रनिगाहपुर तथा मातहतको सब डिवीजन कार्यालयहरु बाट खटिगएको गस्ती टोलीले सो संगै सैयौं क्यूफिट सालको काठ बरामद गर्नुका साथै  दर्जन बढी तस्करलाई पक्राउ गरेको हो।

रौतहट स्थित राष्ट्रीय तथा बिभिन्न साझेदारी बन बाट अबैध रुपमा ल्याउँदै गरेको अवस्थामा सशस्त्र बन सुरक्षा टोलीले गत साउन १५ यता ३९७ क्यूफीट सालको काठ बरामद गरेको छ।

सो अवधिमा काठ तस्करी र अबैध सिकारमा संलग्न १५ जना तस्कर लाई पक्राउ गर्नुका साथै काठ तस्करीमा प्रयोग गरीएको पिकअप भ्यान १ थान, ट्याक्टर १ थान, टायर गाडा २ थान, मोटरसाइकल १ थान र साईकल १४ थान बरामद भएको डिवीजन प्रमुख मिश्रले जानकारी दिएका छन्।

त्यसैगरी पक्राउ परेका तस्करलाई कानुनी कारवाही गरी जरिबाना स्वरूप ६ लाख,१३ हजार १२० रुपैया राजश्व संकलन गरिएको डिवीजन बन कार्यालय रौतहटका सहायक अधिकृत राजेश साहले बताएका छन्।

गत असोज १ गते डिवीजन बन कार्यलय रौतहटको प्रमुखको रुपमा कार्यभार सम्हाले देखि जिल्लामा तुलनात्मक रुपमा काठको चोरी तस्करीमा कामी आएको स्थानीयहरुले बताएका छन्। सञ्जय मिश्रा

रौतहट २३ मंसीर। रौतहटको उत्तरीभेग गुजरा नगरपालिका ३ जंगलसहिया स्थित पशुपति मन्दिरमा बाला चतुर्दशीको अवसरमा शुरु भएको मेलाको उदघाटन गरीएको छ।
पशुपती मन्दिर अगाडी आयोजित बिशेष समारोहका प्रमुख अतिथि गुजराकी उपमेयर रतना लामाले गएराती विधिवत रुपमा मेलाको उदघाटन गरेका हुन् । मेला समितिको पहलमा बाला चतुर्दशीको अवसर पारेर पशुपती मन्दिरमा सुक्रबारदेखि चारदिने मेला सुरु भएको हो ।
लामो समय देखि हरेक बर्ष लाग्दै आइरहेको मेला यस वर्ष पनि भव्यताका साथ लागि रहेकाले पशुपती मन्दिरमा लाखबत्ती बाल्न आउन भक्ताजनहरुलाई आउन आयोजकले आग्रह गरेको छ ।
भक्तजन तथा मेला भर्न आउनेहरुको मनोरञ्जनको लागि पशुपति मन्दिर परिसरमा सरसफाइ पश्चात् स्टेज निर्माण गरि शुक्रवार बेलुकी देखि सांस्कृतिक कार्यक्रम सुरुभएको आयोजक समितिका अध्यक्ष उमेश कुमार शाहीले जानकारी दिएका छन।
मेलामा आउनेहरुको लागि खानेपानी, शौचालय,विद्युत तथा सुरक्षाको समेत व्यवस्थापन गरिएको मेला आयोजकले जनाएको छ ।
यसै वर्ष दिवंगत अथवा निधन भएका पित्री तथा आफन्तको परिवारका मानिसहरु रौतहट, बारा, सर्लाही, पर्सा, सिन्धुली लगायत टाढा टाढाबाट जंगलसहिया पशुपति मन्दिरमा आएर लाखबत्ती बालेर सतबिज छर्ने गर्दछन् ।
जंगलसहिया स्थित उक्त पशुपति मन्दिरमा लाखबत्ती बालेर सतबिज छर्नाले दिवंगत आत्माले शान्ति पाउने जनविश्वास रहिआएको छ ।
कोरोना कालमा असुरक्षाको कारण लगातार दुईबर्ष पशुपती स्थानमा मेला लाग्न सकेको थिएन। अवस्था सहज भएसँगै गतबर्ष देखि बाला चतुर्दशीको अवसरमा भव्यरुपमा मेलाको आयोजना हुँदै आएको स्थानीयहरूले जानकारी दिएका छन्। सञ्जय मिश्रा

रौतहट २१ मंसीर। रौतहट संग जोडिएको साना नाकाहरुमा तैनाथ भारतीय सुरक्षाकर्मी एसएसबिको ज्यादतीको कारण दुई देशबीच सदियौं देखि चलेको बेटी रोटीको सम्बन्ध प्रभावित भईरहेको छ।
एसएसबीले सदियौं देखि चलिआएको व्यवहारको वास्ता नगरी बिभिन्न बहानामा सीमाक्षेत्रमा आवतजावत गर्ने नेपाली लाई अनावश्यक दुःख दिने गरेको कारण बेटी रोटीको सम्बन्ध प्रभावित बनेको हो।
पछिल्लो समय भारतीय सुरक्षाकर्मीले सीमाक्षेत्रमा आवतजावत गर्ने नेपालीलाई रोकेर पहिचान खुल्ने कागज देखाउन भन्दै दुःख दिरहेका छन भने नेपाली नम्बरको मोटरसाइकलमा समेत कडाई गरेको छ। भनसुन गरेपछि ढीलो गरी मोटरसाइकल जेनतेन जान दिएपनि गौर बैरगनिया नाका बाहेक ससाना नाका बाट चारचक्के गाडी आउजाउमा पूर्णरूपमा रोक लगाउँदा सीमाक्षेत्रमा बसोबास गर्ने हजारौँ नेपालीलाई शास्ती खेप्नु परेको छ।
भारतीय सीमामा संग जोडिएको नेपाली गाउँका मानिसहरूको सम्पूर्ण ब्यवहार भारत संग जोडिएको हुन्छ। उनीहरूको प्रायः सम्पूर्ण नातागोता आफन्त, भारतमै रहेका छन भने अधिकांशले छोरा छोरीको बिहेवारी पनि भारतमै गर्नेगरेको पाईन्छ।
सीमावर्ती ईशनाथ नगरपालिका ६ घिउरा गाउँका रामाज्ञा ठाकुर लोहारको एकाछोरा र दुइछोरीको बिहे सीमापारी भारतीय गाउँमै गरेका छन। त्यस्तै उनकै टोलका चन्द्रिका दुबेले पनि पाँच छोरा छोरी मध्ये तीन चारजनाको बिहेवारी भारतीय गाउँमै गरेका छन।
ई दुईजना उदाहरण मात्र हुन्। रौतहटको सीमावर्ती बौधिमाई, ईशनाथ, राजपुर, परोहा, गौर, राजदेवी नगरपालिकाको हजारौँ परिवारको छोरा छोरीको वारिपारी बिहेवारी भएको छ।
नेकपा माओवादी ईशनाथ नगर कमिटी सदस्य रामाज्ञा ठाकुरका अनुसार रौतहट स्थित २८ किलोमिटर लामो भारतीय सिमाना संग जोडिएको नेपाली गाउँका प्रायः सबै मानिस भारतीय बजार माथिनै निर्भर रहेका छन।
घरको लागि दैनिक उपभोग्य वस्तु, कपडा, देखि खेती किसानको लागि चाहिने बीउ, मलखाद लागायतका सामग्री भारतीय बजार बाट नै ल्याउने गर्दछन्। जिल्ला सदरमुकाम गौर २०!३० किलोमिटर टाढा र सीमापारी भारतीय बजार कुण्डवा चैनपुर, घोडासहन ५ किलोमिटर भित्रै परेकाले पनि यहाँका मानिसको घर परिवारमा कसैलाई कुनै बिरामी हुँदा समेत उपचारको लागि भारतीय डाक्टर माथि निर्भर रहेको समाजसेवी ठाकुरले बताएका छन। वारिपारी बिच हजारौँ परिवारको सम्बन्ध भएकाले दैनिकजसो दर्जनौं छोरी बुहारी वारिपारी गर्नुपर्ने चलन रहर र बाध्यता रहेको छ।
सीमावर्ती नेपाली हजारौं परिवारको यो दैनिकी चलिनै आएको थियो।
यस्तो चलन र दैनिकी रौतहटको मात्र नभई
नेपालको तराई मधेश र भारतको बिहार उत्तरप्रदेश बीच सदियौं देखि रोटीबेटीको सम्बन्ध रहेको छ।
कोरोना महामारी पछि सधैंको जस्तो गाडी मोटरसाइकल तथा अन्य सवारीसाधन आवतावतमा कुनै समस्या थिएन, सीमाक्षेत्रका मानिस सहजरुपमा वारुपारी आउने गरेका थिए। तर झण्डै पछिल्लो समय भारतीय सिमानामा खटिएका एसएसबीले चारपांग्रे सवारीसाधन आउजाउमा रोक लगाएका छन।
माथिको आदेश भन्दै उनीहरुले रौतहटको सदरमुकाम गौर हुँदै भारतीय बजार बरागिनिया अथवा वीरगंज हुँदै रक्सौल भएर मात्र आउनजान दिएका छन।
तकहिले काहीँ नेपाल-भारत सीमा क्षेत्रबाट आवतआवत गर्दा भारतीय सुरक्षाकर्मीहरुले परिचय खुल्ने कागजात माग्न थालेका छन् ।
यसरी भारतीय सुरक्षाकर्मीले गाडी आउजाउमा रोक लगाएपछि मात्र ५ किलोमिटर पारीको गाउँ पुग्न ४०!५९ किलोमिटर टाढाको घुमाउरो बाटो जानुपर्ने हजारौं परिवारको बाध्यता भएको पत्रकार उपाध्यायले गुनासो गरेका छन।
केही महिना अघि एकजना पाकिस्तानी महिला सीमा हैदर महोत्तरीको भिठामोड नाका हुँदै भारत उत्तरप्रदेशको नोयडा पुगेपछि सीमामा तैनाथ भारतीय सशस्त्र सीमा सुरक्षा बल -एसएसबी)ले नाकामा कडाइ गरेको हो ।
मधेश प्रदेशसँग सीमा जोडिएका सबै नाकाहरुमा भारतीय एसएसबीले सीमा क्षेत्रमा आवतजावत गर्ने नेपालीसँग नागरिकता र भारतीयसँग आधारकार्ड खोज्न थालेका छन् । पहिचान खुल्ने कागजात नदेखाउँदा उनीहरुले सीमा क्षेत्रमा आवतजावत गर्न रोक लगाउने गरेको स्थानीय बताउँछन् । यसअघि नेपाल-भारत सीमा क्षेत्रबाट अर्को देशमा प्रवेश गर्दा यात्रुले कागजात प्रमाण देखाउने व्यवस्था थिएन ।
अहिले भारतीय बजार जाँदा सिमानामा रहेका एसएसबीले परिचय खुल्ने प्रमाण मागिरहेका छन्, स्थानीय पत्रकार आदर्श उपाध्यायले भने, ‘यसअघि कहिले पनि यसरी नागरिकता वा परिचय खुल्ने प्रमाणपत्र चेकजाँच गरिएको थिएन । अहिले निकै कडाइ गरिएको छ ।भारतका मिडिया रिपोर्ट अनुसार पाकिस्तानी नागरिक सीमा र भारतीय नागरिक सचिन १० मार्चदेखि १७ मार्चसम्म काठमाडौंमा थिए । त्यसपछि उनी स्थलमार्ग हुँदै नोयडा पुगेका थिए।
पाकिस्तानी नागरिक सीमा मधेश प्रदेश भएरै गएपछि नेपाल बाट जाने चार पाङ्ग्रे सवारी साधन आउजाउमा भारतीय सुरक्षाकर्मीले कडाई गरेको छ।
रौतहटका सिडियो धर्मेन्द्र कुमार मिश्र संग प्रतिक्रिया लिँदा उक्त समस्या बारे आजमात्र थाहा भएकाले अब बस्ने भारतीय सुरक्षाकर्मी संगको संयुक्त बैठकमा छलफलको माध्यमले समस्या समाधानको पहल गर्ने विश्वास दिलाएका छन्।
झण्डै ९ महिना देखि सीमाक्षेत्रका मानिसको समस्या बारे कुनै जनप्रतिनिधि, तथा कुनै पनि दलका नेताले राज्यस्तर सम्म आवाज उठाउन नसकेको कारण भारत सरकारको ध्यनाकर्षण हुनसकेको छैन। सञ्जय मिश्रा

काठमाडौँ । काठमाडौँ महानगरपालिकाले नगरभित्र सञ्चालनमा रहेका धेरै औषधि पसल मापदण्ड विपरीत रञ्चालमा रहेको जनाउँदै ती पसललाई मापदण्डमा आउन १० दिनको समय दिएको छ । कामपा स्वास्थ्य विभागले आज सार्वजनिक सूचना जारी गर्दै सो समय दिएको हो ।

महानगर क्षेत्रभित्र सञ्चालित औषधि पसलहरुमा अनधिकृत व्यक्तिहरुबाट औषधि बिक्री वितरण भइरहेको, औषधि व्यवस्था विभागमा दर्ता नभएका औषधिसमेत बिक्री वितरण भइरहेको, चिकित्सकको प्रेस्किप्सन बिना औषधि बिक्री वितरण भइरहेको गुनासो आइरहेको बालेनले उल्लेख गरेका छन्।

यस्तै, नार्कोटिक औषधिहरूको प्रचलित ऐन कानुनअनुसार बिक्री वितरण नगरिएको र उक्त औषधीहरूको आवश्यक अभिलेख राख्ने नगरिएको, गुड फार्मेसी प्राक्टिस (जीपीपी)अनुसार औषधि पसल व्यवस्थापन नगरिएको भन्ने गुनासो आएको पनि बालेनको भनाइ छ। 

नागरिकको गुनासोपछि अनुगमन गर्दा औषधि बिक्री वितरणमा धेरै कमजोरीहरु देखिएको बालेनले उल्लेख गरेका छन्। कमजोरीहरु सुधार गरी, प्रचलित कानुन तथा नियमहरुको पालना गरी औषधि बिक्री वितरण गर्न मंसिर २९ गतेसम्मको अल्टिमेटमा दिइएको पनि बालेनले जनाएका छन्। 

सामाजिक सञ्जालमा एक सन्देश लेख्दै बालेनले औषधी पसलहरूले सुधारात्मक कार्यहरू गरेको नपाइएमा त्यस्ता औषधि पसलहरु बन्द गर्ने सम्मको कारबाही गरिने चेतावनी दिएका छन्।  

बालेनले सामाजिक सञ्जालमा लेखेको सन्देश: 
हामी काठमाडौं महानगरपालिकामा बसोबास गर्ने आम मानिसको स्वास्थ्यको लागि निकै संवेदनशील छौँ। यस महानगरपालिकाले नागरिकहरूलाई गुणस्तरीय स्वास्थ्य सेवा उपलब्ध गराउन विभिन्न सुधारात्मक कार्यहरू गर्दै आइरहेको तपाईंहरूलाई थाहा नै छ। तर आम मानिसको जनस्वास्थ्यमा लापरबाही भएको पाइएको छ। 

काठमाडौं महानगरपालिका भित्र सञ्चालनमा रहेका औषधि पसलहरूमा अनधिकृत व्यक्तिहरूबाट औषधि बिक्री वितरण भइरहेको, औषधि व्यवस्था विभागमा दर्ता नभएका औषधि समेत बिक्री वितरण भइरहेको, चिकित्सकको प्रेस्किप्सन बिना औषधि बिक्री वितरण भइरहेको महानगरमा गुनासो आइरहेको छ। 

यसका साथै नार्कोटिक औषधिहरूको प्रचलित ऐन कानुनअनुसार बिक्री वितरण नगरिएको र उक्त औषधिहरूको आवश्यक अभिलेख नराख्ने गरिएको, Good Pharmacy Practice (GPP) अनुसार औषधि पसल व्यवस्थापन नगरिएको, काठमाडौं महानगरपालिका स्वास्थ्य विभागबाट इजाजत पत्र नलिइ सञ्चालनमा रहेको विभिन्न गुनासाहरू आम उपभोक्ताहरूबाट आइरहेको छ। काठमाडौं महानगरपालिकाको स्वास्थ्य विभागबाट अनुगमन गर्दा समेत उल्लेख भए अनुसार भएको पाइएको छ, यसमा हामी गम्भीर छौँ। त्यसैले हामीले यही महिना (मंसिर)को २९ गते भित्र माथि उल्लेखित सम्पूर्ण कार्यहरू कानुन बमोजिम गर्न यसै सूचनाद्वारा जानकारी गराउन चाहन्छौँ।

अतः माथि उल्लेख भए अनुसारको समयभित्र काठमाडौं महानगरपालिका क्षेत्र भित्र सञ्चालित औषधि पसलहरूले सुधारात्मक कार्यहरू गरेको नपाइएमा स्थानीय सरकार सञ्चालन ऐन २०७४ को दफा ११ (क) ९ तथा काठमाडौं महानगरपालिका जन–स्वास्थ्य ऐन २०८० को दफा २६ (घ) अनुसार स्वास्थ्य विभागबाट अनुगमन भइ काठमाडौं महानगरपालिका जन–स्वास्थ्य ऐन २०८० को दफा ५३ अनुसार औषधि पसल बन्द गर्ने सम्मको कारबाही गरिने बेहोरा सम्बन्धित सबैको जानकारी गराउन चाहन्छौँ। 

यदि यस्तो भए गरेको पाइएमा काठमाडौं महानगरपालिकाको स्वास्थ्य विभागमा उजुरी गर्न वा महानगरपालिकाको गुनासो व्यवस्थापन तथा सोधपुछ केन्द्र (कल सेन्टर) को  निःशुल्क टोल फ्री नम्बर १६६००१०५५११ वा ११८० मा सम्पर्कमार्फत् महानगरपालिकालाई जानकारी दिन समेत अनुरोध गर्न चाहन्छौँ।

काठमाडौँ । १५ जना उपसचिवहरूलाई सहसचिव पदमा बढुवाका लागि सिफारिस गरिएको छ । बढुवा सिफारिस समितिले ज्येष्ठता र कार्यसम्पादन मूल्याङ्कनका आधारमा नेपाल प्रशासन सेवाका उपसचिवहरूलाई राजपत्राङ्कित प्रथम श्रेणी(सहसचिव)मा बढुवाका लागि सिफारिस गरेको हो ।

काठमाडौँ । राजधानीको न्यूरोडबाट करिब ५ किलो अवैध सुन बरामद भएको छ । काठमाडौँ उपत्यका अपराध अनुसन्धान कार्यालयको टोलीले कैलाली घर भई नागार्जुन बस्ने पदम पाण्डेलाई पक्राउ गरेको छ ।

प्रहरीले न्युरोडस्थित ‘ओमपाल गोल्ड शप प्रालि’ सँगैको कारखानामा छापा मार्दा अवैध सुनसहित पाण्डेलाई पक्राउ गरेको कार्यालयका प्रवक्ता, प्रहरी उपरीक्षक रवीन्द्र रेग्मीले जानकारी दिए । उनका अनुसार पाण्डेसँग बरामद भएको सुन अहिले जोख्ने काम भइरहेको छ। 

रौतहट २० मंसीर। नेपाल विद्युत प्राधिकरण मौलापुर शाखाको सक्रियतामा विद्युतको पोल र अव्यवस्थित तारहरु ब्यवस्थित गर्न सुरु गरिएको छ। केही समय अघि कटहरिया २ जमुनियाका समाजसेवी मनोज कुमार साह, वडा अध्यक्ष हरेन्द्र साह लगायत जनप्रतिनिधि तथा राजनीतिक दलका प्रतिनिधिमंडलले विद्युत पोल तार ब्यवस्थित गर्नुपर्ने माग गर्दै मौलापुर शाखामा ३ बुंदे सुझावपत्र बुझाएको थियो। लगत्तै नेपाल विद्युत प्राधिकरण मौलापुर शाखाका प्रमुख दिनेश यादवको सक्रियतामा अव्यवस्थित विद्युत पोल र तारहरु ब्यवस्थित गर्न सुरू गरिएको छ।
कटहरिया २ जमुनिया टोल मुल बाटोको ठाउँ ठाँउमा बाङ्गिएको पोल झुन्डिएर रहेको ,तार विधुत प्राधिकरण मौलपुरको अग्रसरतामा व्यवस्थापन गरिएको छ । अब दिन्हु ठुला गाडीहरू आवतजावतमा हुनेगरेको समस्या समाधान हुनुका साथै नागरिक लाई करेन्ट लागेर ज्यान गुमाउने जोखिम हटेको छ।
विद्युत प्राधिकरण मौलापुरले क्रमश भसेढवा, हथियाही, बिर्ती, कटहरिया, पोखरिया, बगही, फतेपुर र डुमरियामा ठाउँ ठाउँमा झुन्डिएको पोलतार व्यवस्थापन गराउन सुरु गरेको देखिएको छ।
आउँदा दिनमा विद्युत महशुल तिर्न सबैको पाएक पर्ने कटहरिया बजारमा महशुल काउन्टर स्थापना तथा व्यवस्थापन गर्न सबैले आआफ्नो ठाउ बाट पहल गर्नुपर्ने माग भइरहेको समाजसेवी मनाेजले बताएका छन्। सञ्जय मिश्रा

रौतहट २० मंसीर। रौतहटको उतरिभेग चन्द्रपुर स्थित विभिन्न पार्टी परित्याग गरि दर्जनौ नेता कार्यकर्ताहरु आम जनता पार्टीमा प्रवेश गरेकाछन् । चन्द्रपुर ५ स्थित मंगलवार आयोजित भेट्घाट कार्यक्रमको अवसरमा जनमत पार्टीको वडा अध्यक्ष प्रत्यासी वालकुमारी चौधरी, जसपा वडा अध्यक्ष प्रत्यासी बद्री प्रसाद यादव, राम प्रसाद साह तथा नेपाली काँग्रेसका नेवालाल साह, वुनिलाल वैठा लगायतका दर्जनौ नेता कार्यकर्ताहरु आमजनता पार्टीका प्रवेश गरेका हुन । नवप्रवेशीहरुलाई पार्टी अध्यक्ष पूर्व मन्त्री प्रभु साह टिका र माला लगाई स्वागत गरेका थिए।
यसैबीच आम जनता पार्टीले बिभिन्न माग गर्दै २० आज मधेस प्रदेशको जनकपुरधाममा प्रदर्शन गर्दैछ। नेपालमा बैंकहरुले लिने गरेको मनोमानी ब्याज फिर्ता गर्नुपर्ने, लघुबित र सहकारीहरुको सम्पूर्ण ऋण मिनाहा गर्नुपर्ने तथा किसानहरुलाई सहुलियत कर्जा दिनुपर्ने माग गर्दै प्रदर्शन गर्न लागेको हो । मधेसमा भईरहेको सरकारी योजना र बजेटको खरीद बिक्री जस्ता भ्रष्टाचारजन्य कार्य रोक्न भ्रष्टाचारीलाई जनकारवाही गर्ने अभियान समेत चलाउने पार्टीले निर्णय गरेकोछ ।
मधेस प्रदेश सरकारमा सहभागि मन्त्री, सांसदहरुले सरकारी योजना र बजेटको खरिद बिक्री गर्दै भ्रष्टाचारलाई बढावा दिइरहेको प्रवक्ता साहको आरोप छ। त्यसैले त्यस्ता भ्रष्टाचारीलाई जनकारवाही गर्नुपर्ने निर्णय समेत बैठकले गरेको पार्टी प्रवक्ता चन्द्रभूषण साहले बताए ।सञ्जय मिश्रा

काठमाडौं । सत्तारुढ दल नेकपा एकीकृत समाजवादीको महाधिवेशन सरेको छ । मंगलबार पार्टी कार्यालय आलोकनगरमा बसेको सचिवालय बैठकले पार्टीको महाधिवेशन अर्को वर्ष ३ देखि ७ जेठसम्म काठमाडौंमा गर्ने निर्णय गरेको उपमहासचिव तथा प्रवक्ता जगन्नाथ खतिवडाले जानकारी दिए ।

नेकपा एसले यसअघि नेकपा एसले आउँदो १४ देखि १८ माघसम्म महाधिवेशन गर्ने निर्णय गरेको थियो । प्रवक्ता खतिवडाका अनुसार सचिवालयको बैठकले १४ र १५ माघमा राष्ट्रिय सम्मेलन गर्नेछ ।

बैठकले २८ र २९ मंसिरमा सचिवालय बैठक बोलाउने निर्णय पनि गरेको छ । प्रवक्ता खतिवडाका अनुसार ९ पुसमा स्थायी कमिटी र १० पुसमा पोलिट्ब्युरो बैठक बोलाउने निर्णय पनि बैठकले गरेको छ । ११-१२ पुसमा केन्द्रीय कमिटी बैठक बोलाउने बैठकले निर्णय गरेको प्रवक्ता खतिवडाले जानकारी दिए ।