Month: February 2022

काठमाडौं । नेपाल स्टक एक्सचेञ्ज (नेप्से)मा साताको कारोबारको तेस्रो दिन आज मंगलबार झिनो अंकले घटेर बन्द भएको छ । अघिल्ला ४ कारोबार दिनदेखि घटिरहेको नेप्सेले यस दिन पनि सोही क्रमलाई निरन्तरता दिएको हो। आज नेप्से ०.४० अंकले घटेर दुई हजार ९८ दशमलव २९ विन्दुमा बन्द भएको हो ।                                       

आज नेप्से परिसूचकसंगै कारोबार रकममा पनि गिरावट आएको छ । नेप्सेमा ४ अर्ब २९ करोड ४५ लाख ६६ हजार रुपैयाँ बराबरको कारोबार भएको छ । सोमबार ६ अर्ब ३६ करोड ६० लाख ७० हजार रुपैयाँ बराबरको कारोबार भएको थियो । 

आज कारोबार भएका कम्पनीमध्ये १०३ वटाको बढेको छ भने १३७ वटा कम्पनीको शेयरमूल्य घटेको छ । बाँकी ८ कम्पनीको शेयरमूल्य स्थिर रहेको छ । यी कम्पनीहरुमध्ये चार कम्पनीको शेयरमूल्यमा उच्च वृद्धि भएको छ । 

त्यस्तै, मिडसोलु हाइड्रोपावर लिमिटेडका लगानीकर्ताहरुले सर्वाधिक गुमाएका छन् । यस कम्पनीको शेयरमूल्य आज ६.२० प्रतिशतले घटेको छ । सबैभन्दा बढी कारोबार हिमालयन रि–इन्स्योरेन्स लिमिटेडको भएको छ । आज यस कम्पनीको ५५ करोड ९ लाख रुपैयाँ बराबरको कारोबार भएको छ ।    

१३ उपसमूहमध्ये यस दिन ६ उपसमूहको परिसूचक बढेको छ भने ७ उपसमूहको परिसूचक घटेको छ। यस दिन होटल तथा पर्यटन उपसमूहको परिसूचक सर्वाधिक ४.७४ प्रतिशत बढेको छ। त्यस्तै, यस दिन विकास बैंक, वित्त, लगानी, निर्जीवन बीमा र अन्य उपसमूहको परिसूचक सामान्य बढेको छ।

काठमाडौं : नेकपा एमालेले ‘झुलाघाट-चिवाभन्ज्याङ समृद्धिका लागि संकल्प यात्रा’मा देखेका समस्यालाई प्रधानमन्त्री पुष्पकमल दाहाल ‘प्रचण्ड’समक्ष पेश गरेको छ। मंगलबार बिहान अध्यक्ष केपी शर्मा ओलीको नेतृत्वमा एमालेको टोली बालुवाटारमा पुगेर समृद्धिका लागि संकल्प यात्रामा मध्यपहाडका  स्थानीय बासिन्दाले राखेका समस्यालाई लिखित रुपमा प्रधानमन्त्री प्रचण्डलाई जानकारी गराएको हो।  

 नेकपा एमालेले मध्यपहाडका समस्या र समाधानका उपायबारे सरकारलाई लिखित रूपमा जानकारी गराएको छ । 

पार्टीका स्थानीय कमिटी, विभिन्न राजनीतिक दल, उद्योगी–व्यवसायी, पालिकाहरू, स्थानीयवासी र सरोकारवालाले पेस गरेको पर्यटन, पूर्वाधार, शिक्षा, स्वास्थ्य, सामाजिक तथा आर्थिक विकासका विविध पक्ष समेटेर एमालेले प्रधानमन्त्रीलाई जनताको नासोका रूपमा कार्यान्वयन गर्न लिखित जानकारी गराएको हो । जसको कार्यान्वयनका लागि पार्टी उपाध्यक्ष विष्णु पौडेललाई तोकिएको छ । 

एमालेले मङ्सिर १४ बाट पुस १ गतेसम्म बैतडीको झुलाघाटबाट पाँचथरको चिवाभञ्ज्याङ्गसम्म विज्ञ समूहसहित पदयात्रा गरेको थियो । पदयात्राका क्रममा आएका माग, देखिएका समस्यालाई वर्गीकरण गरेर सरकारलाई बुझाएको हो । जसमा ७५१ वटा माग रहेका छन् । सडक, कृषि, उद्योग भवन निर्माण, खेलकुद, खानेपानी लगायतका विषय समेटिएका छन् । 

एमालेले मध्यपहाडमा विकास पूर्वाधार, पर्यटन, फलफूल खेतीलगायतका सम्भावना देखेको छ भने बसाइसराइ चुनौतीका रूपमा उल्लेख गरेको छ । त्यस्तै एमालेले विकास निर्माण ठप्प भएको, व्यवसायहरू बन्द हुँदै गएको, बजेट विनियोजनमा पूर्वाग्रह राखेको, एमालेले सुरु गरेका योजनाहरू असफल पार्न लागेको, भूकम्पपछिको पुनर्निर्माणमा सरकार असक्षम भएको लगायतका विषयमा प्रधानमन्त्रीको ध्यानाकर्षण गराएको पनि एमाले नेता ज्ञवालीले जानकारी गराए । आफूहरूले प्रधानमन्त्रीलाई बुझाएका माग एमालेको मात्र नभएर सबै जनताको भएकाले कार्यान्वयन गर्न आग्रह गरेको छ । जवाफमा प्रधानमन्त्रीले माग अधिकतम कार्यान्वयन गर्ने वचन दिएका छन् ।

पर्सा । ‘नक्कली’ बाबु बनेर झुटो विवरण पेस गर्दै एक किशोरीलाई वंशजको नागरिकता दिलाएको विषयमा वीरगन्ज महानगरपालिकाका मेयर राजेशमान सिंहविरुद्ध उजुरी परेको छ ।  मेयर सिंहविरुद्ध कारबाहीको माग गर्दै सात वटा निकायमा जाहेरी तथा उजुरी परेको छ ।

फर्जी विवरणको आधारमा रुविना श्रेष्ठलाई छोरी बनाएर नागरिकता दिलाएको भन्दै उहाँविरुद्ध कारबाहीको माग गर्दै उजुरी दिइएको हो । मेयर सिंहविरुद्ध कारबाहीको माग गर्दै प्रधानमन्त्रीको कार्यालय सिंहदरवारदेखि लिएर गृह मन्त्रालयसम्म तथा पर्सा जिल्ला प्रशासन कार्यालय, पर्सा प्रहरी, अख्तियार दुरुपयोग अनुसन्धान आयोग, सीआइबी तथा राष्ट्रिय सतर्कता केन्द्रसम्म उजुरी परेको हो ।

अरुको छोरीलाई आफ्नो छोरी बनाइ नागरिकता दिलाएको भन्दै पर्साका स्थानीय तथा कांग्रेस समर्थकहरुले पहिलोपटक पुस २४ मा जिल्ला प्रशासन कार्यालयमा उजुरी दर्ता गरियो । दर्ता नम्बर– १३२५ रहेको यो उजुरी नै मेयर सिंहविरुद्धको पहिलो उजुरी छ । योसँगै मेयर सिंहविरुद्ध जिल्ला प्रशासन कार्यालयमा दर्जनभन्दा बढी उजुरी परेको जिल्ला प्रशासन कार्यालय, पर्साले जनाएको छ । त्यसपछि यही विषयमा छानबिनको माग गर्दै पर्सा प्रहरीमा अर्को जाहेरी प¥यो ।

मेयर सिंहसहित रुविना श्रेष्ठमाथि कारबाहीको माग गर्दै कांग्रेस पर्सा–२ का क्षेत्रीय सभापति महम्मद सहाबुदिनले पर्सा प्रहरी कार्यालयमा जाहेरी दिएको प्रहरीले जनाएको छ । पर्सा प्रहरी प्रमुख कोमल शाहले मेयर सिंहसहित २ जनाविरुद्ध फौजदारी अपराध अन्तर्गत जाहेरी परेको जनाउँदै त्यसमाथि छानबिन भइरहेको बताए । उनले भने, ‘नागरिकता प्रकरणमा केही विषयमा छानबिन भइरहेको छ, त्यो सकिएपछि दर्ता गरेर बाँकी प्रक्रिया अगाडि बढाइन्छ ।’

यसैगरी नागरिकता प्रकरणबारे यही साताभित्रै सत्यतथ्य छानबिनको माग गर्दै गृह मन्त्रालय तथा प्रधानमन्त्रीको कार्यालयमा समेत उजुरी दिइएको छ । गृहमन्त्री नारायणकाजी श्रेष्ठलाई पर्साका नेताहरुले भेटघाट गर्दै सत्यतथ्य छानबिनको माग गर्दै उजुरी दिएको गृह मन्त्रालय स्रोतले जनाएको छ ।

पर्साका नेताहरुसँगको भेटमा गृहमन्त्री श्रेष्ठले दोषी देखिए कारबाही हुने प्रतिबद्धता जनाएको भेटमा सहभागी स्रोतले जनाएको छ । गृह मन्त्रालयका प्रवक्ता नारायण भट्टराईले समेत मन्त्रालयमा उजुरी परेको र त्यसमाथि सत्यतथ्य बुझ्ने काम भइरहेको जनाएका छन् ।

योसँगै प्रधानमन्त्रीको कार्यालयमा समेत उजुरी दिइएको कांग्रेस क्षेत्रीय सभापति महम्मद सहाबुदिनले जनाए । उनका अनुसार प्रधानमन्त्रीको कार्यालयसँगै अख्तियार दुरुपयोग अनुसन्धान आयोग, सीआइबी तथा सतर्कता केन्द्रसहित थुप्रै निकायमा उजुरी तथा जाहेरी दिइएको छ । नागरिकता प्रकरणबारे सञ्चार माध्यममा समाचारहरु आउन थालेपछि पर्साको प्रमुख जिल्ला अधिकारी दिनेश सागर भुसाल सुरु गरेको खोजबिनमा अनुसूची फर्म नै गायव बनाएको पाइएको जनाए ।

यसरी सीडीओबाटै अनुसूची फर्म गायब भएपछि यो विषय झन् शंकास्पद रहेको भन्दै प्रजिअ भुसालले सहायक सीडीओ शिव लम्सालको नेतृत्वमा छानबिन समितिसमेत गठन गरिसकेका छन्, जसलाई अनुसूची फर्म खोजेर अनुसन्धान गर्ने जिम्मेवारी दिइएको छ । तर छानबिन समिति गठन भएको दुई साता पुग्न लाग्दा पनि अहिलेसम्म अनुसूची फर्म नै फेला पार्न नसकेको जिल्ला प्रशासन कार्यालय पर्साले जनाएको छ । रुविना श्रेष्ठको नागरिकतामा बुबाको नाममा राजेशमान सिंह उल्लेख छ । तर नागरिकता लिँदाको अनुसूची फर्म भने अहिले गायब पारिएको छ ।

काठमाडौँ । नक्कली लाइसेन्स वितरण गरिएको अबधिमा बिभाग र मातहत कार्यालयका कर्मचारी र आफन्तहरुको खाता अनुसन्धान गर्ने क्रममा करोडौं जम्मा गरिएको फेला पर्न थालेको समाचार छ।
राष्ट्रसेवक कर्मचारी जसले कडा मेहनत गरि लोकसेवा पास गरेर धेरै ज्ञान् मात्रै हासिल गरेका हुदैनन् उनीहरु जनताको सेवामा सेवाभाबलेअहोरात्र जुटिरहेका हुन्छन् भन्ने मनोभाबका कारण नै जनस्तरले दिएको श्रद्धा पछिल्ला दिनमा आआफ्नो कर्मले घटाउदै लगेका छन्।

कतिपय कर्मचारीका बारेमा सेवा प्रवेशको छोटो अवधीमै करोडौंको घरजग्गा अनि महङ्गो स्कुलमा छोराछोरीको पढाई लेखाइ सरकारले तोकेको मासिक सेवासुबिधाले सम्भब छ यसकाे जवाफ सहितको ब्यबस्थापन बेलैमा नखोजेका कारण आज कर्मचारीको करोडौं बैक ब्यालेन्सको समाचारले चर्चा पाउन थालेको हो। प्रत्यक्ष अप्रत्यक्ष राजनैतिक दलको फेरो समाएर बसेका अधिकांस कर्मचारी छोटो अबधि मै करोड पति बन्ने लालचले सेवा प्रवाह गर्दा आफनो औकात देखाउने गरेको सेवाग्राहीको आरोपलाई पुष्टि गराउदै लगेको छ।
संविधानले प्रत्याभूत गरेकाअधिकार सहितको सेवा लिन जादा दुख दिएर रकम असुलका सिकार भएका सर्वसाधारणले नक्कली लाइसेन्स जारी गरेर समेत रकम खाएको सुन्नु पर्दा कर्मचारी प्रतिको आक्रोश अझै बढेर गएको छ।

यसैबीच यातायात कार्यालय बाट परीक्षा पास नगरेकालाई बिचौलियाको माध्यमबाट सवारीचालक अनुमतिपत्र (स्मार्ट लाइसेन्स) वितरण गरिएको अवधिमा यातायात व्यवस्था विभागका कर्मचारीको खातामा अस्वाभाविक रकम देखिएको भन्दै सम्पत्ति शुद्धीकरण अनुसन्धान विभागले अनुसन्धान थाल्ने क्रमलाइ तिब्रता दिएको छ।

बिभागले थालेको यो कदम पुनः कमाउने अभियान नबनोस भनेर नागरिक समाजले आक्रोश सहित चासोसमेत व्यक्त गरेको छ । समाचार श्रोतका अनुसार सयौंको संख्यामा करोडौं खाने र जम्मा गर्ने कर्मचारी छन् तर एकादुई लाई मात्रै अनुसन्धानको दायरामा ल्याएर हुदैन ढिलाे नगरीअनुसन्धान दायरा अझै फराकिलो बनाउनु पर्ने माग आमजनसमुदायमा बढेर गएको छ। प्रारम्भमा गरेको अनुसन्धान बाट उपसचिव केशव अर्यालको खातामा कम्प्युटर अपरेटर लक्ष्मण पाण्डेले जम्मा गरेको अढाई करोड रुपैयाँको स्रोतबारे विभागले अनुसन्धान सुरु गरेको हो ।

‘बुटवल यातायात कार्यालयका कम्प्युटर अपरेटर लक्ष्मण पाण्डेले उपसचिव केशव अर्यालको खातामा अढाई करोड रुपैयाँ जम्मा गरेको देखिन्छ । त्यस विषयमा अनुसन्धान थालिएको बताइएको छ’, सम्पत्ति शुद्धीकरण अनुसन्धान विभाग सम्बद्ध स्रोतले भन्यो । अनियमित तरिकाले लाइसेन्स वितरण गरिएको विषयमा यातायात व्यवस्था विभागमा स्वयंले छानबिन गरी अख्तियार दुरुपयोग अनुसन्धान आयोगलाई थप छानबिनका लागि प्रतिवेदनसहितका विवरण बुझाइसकेको अवस्थामा सम्पत्ति शुद्धीकरण विभागले पनि यसमा चासो राखेर अनुसन्धान थालेको हो ।

यो अनुसन्धानको दायर कतिपय कर्मचारीको कमाउने र रमाउने अभियान नबनोस भबिस्यमा गलत काम गर्नेहरू निरुत्साहित बन्ने गरि खास भ्रष्ट कर्मचारीलाई निसाना बनाउनु पर्ने सुझाव समेत आउन थालेको बताइन्छ ।

काठमाडाैं । नेप्से परिसूचक निरन्तर ४ करोबार दिन घटेर पुनः २१०० विन्दुभन्दा तल झरेको छ। पछिल्ला ५ कारोबार दिनदेखि २१०० विन्दुभन्दा माथि बन्द भइरहेको नेप्से, यस दिन सो विन्दुभन्दा तल बन्द भएको हो। साताको दोस्रो कारोबार दिन नेप्से परिसूचक ३१.४९ अंक घटेर २०९८.६९ विन्दुमा बन्द भएको छ। त्यसैगरी, यस दिन सेन्सेटिभ इण्डेक्स ४.८४ अंक घटेको छ भने फ्लोट इण्डेक्स २.२० अंक र सेन्सेटिभ फ्लोट इण्डेक्स १.७४ अंक घटेको छ।

आज नेप्से परिसूचकसंगै कारोबार रकममा पनि गिरावट आएको छ । नेप्सेमा ६ अर्ब ३६ करोड ६० लाख ७० हजार रुपैयाँ बराबरको कारोबार भएको छ । आइतबार ७ अर्ब ६७ करोड ७७ लाख ४० हजार रुपैयाँ बराबरको कारोबार भएको थियो । 

आज कारोबार भएका कम्पनीमध्ये ३६ वटाको बढेको छ भने २०९ वटा कम्पनीको शेयरमूल्य घटेको छ । बाँकी २ कम्पनीको शेयरमूल्य स्थिर रहेको छ । यी कम्पनीहरुमध्ये दुई कम्पनीको शेयरमूल्यमा उच्च वृद्धि भएको छ । जसमा अप्पर स्याङ्गे हाइड्रोपावर र मिडसोलु हाइड्रोपावर कम्पनी लिमिटेड रहेका छन् । यी कम्पनीको शेयरमूल्य आज ९ प्रतिशतले बढेको छ ।  

त्यस्तै, दोर्दीखोला जलविद्युत कम्पनी लिमिटेडका लगानीकर्ताहरुले सर्वाधिक गुमाएका छन् । यस कम्पनीको शेयरमूल्य आज ८.३३ प्रतिशतले घटेको छ । सबैभन्दा बढी कारोबार हिमालयन रि–इन्स्योरेन्स लिमिटेडको भएको छ । आज यस कम्पनीको ७८ करोड ६३ लाख रुपैयाँ बराबरको कारोबार भएको छ । 

१३ उपसमूहमध्ये यस दिन व्यापार उपसमूहको परिसूचक बाहेक अरु सबै उपसमूहको परिसूचक घटेको छ। यस दिन सो उपसमूहको परिसूचक ०.३५ प्रतिशत बढेको हो। कारोबारमा आएको जलविद्युत उपसमूहको परिसूचक यस दिन सर्वाधिक २.२४ प्रतिशत घटेको छ। यस दिन बैंकिङ्ग, विकास बैंक, वित्त, लगानी, उत्पादन तथा प्रशोधन, लघुवित्त, निर्जीवन बीमा र अन्य उपसमूहको परिसूचक १ प्रतिशतभन्दा बढी घटेको छ।

राजविराज । मधेस कृषि विश्वविद्यालयको भवन शिलान्यास कार्यक्रम चलिरहेका बेला प्रहरी र जनमत पार्टीका नेता कार्यकर्ताबीच झडप भएको छ । कार्यक्रममा जनता समाजवादी पार्टीका अध्यक्ष उपेन्द्र यादवलाई प्रमुख अतिथि बनाइएको भन्दै जनमत पार्टीका नेता कार्यकर्ताले विरोध गरेका हुन् । 

यादव मञ्चमा पुगेर कार्यक्रम सुरु भएपछि जनमतबाट निर्वाचित भएर प्रदेश सरकारको शिक्षामन्त्री रहेका महेशप्रसाद यादवको नेतृत्वमा जनमतका कार्यकर्ताले नाराबाजी गर्दै होहल्ला गरेका थिए ।

त्यही क्रममा प्रहरी र जनमतका कार्यकर्ताबीच झडप भएको हो । झडपका क्रममा प्रहरीले लाठीचार्ज गरेको छ भने प्रहरीको लाठी प्रहारमा प्रदेश सरकारका शिक्षामन्त्री यादवसमेत परेका छन् ।

मञ्चबाट प्रहरीले तितरबितर पारेपछि मन्त्री यादवसहित जनमत कार्यकर्ताले मञ्चनजिकै धर्ना र नाराबाजी गरिरहेका छन् । जसपा अध्यक्ष यादवलाई सुरक्षा घेरामा मञ्चमा पुर्‍याइएको छ भने मुख्यमन्त्री सरोजकुमार यादवसहितको उपस्थितिमा सुरक्षा घेराबीच औपचारिक कार्यक्रम सुरु भएको छ ।

मधेस कृषि विश्वविद्यालयको भवन शिलान्याश कार्यक्रमलाई लिएर केही दिनदेखि जनता समाजवादी पार्टी र जनमत पार्टीबिच द्वन्द्व चलिरहेको थियो । शिलान्यास कार्यक्रममा विश्वविद्यालयले जसपाका अध्यक्ष उपेन्द्र यादवलाई प्रमुख अतिथि बनाउने भएपछि जनमतले आपत्ति जनाउँदै आएको थियो ।

काठमाडौँ । उपप्रधानमन्त्री एवं गृहमन्त्री नारायणकाजी श्रेष्ठले वित्तीय अपराधलाई नियन्त्रणमा लिन कानुनी र संस्थागत प्रबन्ध गर्नु आवश्यक रहेको बताएका छन् ।

महाराजगन्जस्थित राष्ट्रिय प्रहरी प्रशिक्षण प्रतिष्ठानमा आज आयोजित अपराध अनुसन्धान समीक्षा गोष्ठीलाई सम्बोधन गर्दै उनले पछिल्लो समय वित्तीय अपराधको अनुसन्धानका निम्ति आवश्यक कानुनी र संस्थागत व्यवस्थाको प्रबन्ध गर्ने, प्रविधि र दक्ष जनशक्तिको विकास गरेर कारबाहीको दायरामा ल्याइने बताए ।

“खर्बौंको ‘डिलिङ’ क्रिप्टोमार्फत भइरहेको सूचना छ, सरकारले त्यसलाई अवैध मानेको छ, हुण्डी र विदेशी मुद्राको कारोबार नयाँ ढङ्गले भइरहेको छ, प्रतीतपत्र (एलसी) खोल्नेमा नयाँ प्रवृत्ति देखिएको छ”, उपप्रधानमन्त्री श्रेष्ठले भन्नुभयो, “यसले अर्थतन्त्रमा नयाँ समस्या पैदा गरेको छ, ठूल्ठूला अपराधकर्ममा क्रिप्टोकरेन्सीको प्रयोग भइरहेको छ, हालैको सुन काण्डमा पनि क्रिप्टोको प्रयोग भएको देखिएको छ, यसलाई कुनै हालतमा नियन्त्रण गर्नुपर्छ ।”

क्रिप्टोकरेन्सीको अनुसन्धान गर्न दक्ष जनशक्ति तयार गर्नुपर्ने आवश्यकता रहेको उल्लेख गर्दै उहाँले यसका लागि कानुनी प्रावधानको कमी सरकारले महसुस गरेको बताउनुभयो ।
उपप्रधानमन्त्री श्रेष्ठले सहकारी आफ्नो मूल मर्मबाट विचलित भएर वित्तीय संस्थाका रुपमा परिणत हुनुले समाजमा वित्तीय अपराध र ठगी बढ्दै गएको बताउनुभयो । सहकारी ठगीलाई नियन्त्रण गर्न सरकारले कानुन निर्माण गर्ने तयारी गरेको उहाँको भनाइ छ ।

“कानुन संशोधन गरेर सहरकारीलाई पुनःपरिभाषित गर्ने र त्यस आधारमा सहकारी सञ्चालन गर्नुपर्छ, सहकारीलाई बैंक जस्ता संस्थाका रुपमा गतिविधि गर्न पाइँदैन”, श्रेष्ठले भन्नुभयो, “गठनआदेशद्वारा नियामक निकाय गठन, बचत तथा कर्जा सुरक्षण कोष स्थापना गर्ने तथा समस्याग्रस्त सहकारी व्यवस्थापन समितिलाई प्रभावकारी बनाउने सरकारको निर्णय छ ।”

सहकारीका सञ्चालकले मनपरी गरेर बचतकर्तालाई ठगी गरेको प्रारम्भिक अनुसन्धानबाट देखिएको उल्लेख गर्दै उहाँले त्यस्ता सहकारीका कारोबारका बारेमा चाँडै अनुसन्धान थालिने बताउनुभयो । श्रेष्ठले अपराध कर्म तथा ठगीमा संलग्न सहकारी सञ्चालकलाई कारबाही तथा बचतकर्तालाई न्याय दिने प्रक्रिया अघि बढेको बताउनुभयो । “सरकारले बचतकर्तालाई न्याय दिनेछ, सहकारीलाई अर्थतन्त्रको मेरुदण्डका रुपमा अघि बढाइनेछ”।

महान्यायाधिवक्ता डा. दीनमणि पोखरेलले पछिल्ला दिनमा आर्थिक अपराधका शृङ्खला बढेको अवस्थामा यससम्बन्धी अपराधको अनुसन्धान गर्न विशिष्टकृत संरचना बनाउनुपर्ने बताउनुभयो । उहाँले वैज्ञानिक, वस्तुनिष्ठ र विश्वसनीय प्रमाणका आधारमा अनुसन्धान, अभियोजन र न्याय निरुपण हुने प्रणालीलाई थप बलियो बनाउनुपर्नेमा जोड दिनुभयो ।

प्रहरी महानिरीक्षक वसन्तबहादुर कुँवरले प्रहरीले आर्थिक अपराधको अनुसन्धान गर्न विशिष्टकृत ब्युरो स्थापनाका लागि गृहकार्य थालेको बताउनुभयो । अपराध अनुसन्धानप्रति प्रहरी गम्भीर रहेको उल्लेख गर्दै उहाँले प्रविधिमैत्री अनुसन्धानलाई अगाडि बढाउन प्रहरी सङ्गठन प्रतिबद्ध रहेको बताउनुभयो ।

काठमाडौँ महानगरपालिकाका उपप्रमुख सुनिता डङ्गोलले विद्युतीय अपराधले सिर्जना गरेका चुनौती समाना गर्न नेपाल प्रहरीको क्षमता अभिवृद्धि गरिनुपर्ने बताए । साइबर सुरक्षासम्बन्धी दक्ष जनशक्तिको विकास गर्नुपर्छ भनेर कामपाले छात्रवृत्तिमा तालिम दिन लागेको उनले जानकारी दिए ।

काठमाडौं । राष्ट्रिय सभा सदस्य निर्वाचन प्रयोजनका लागि आज राति १२ बजेदेखि निर्वाचनको मौन अवधि सुरु हुने भएको छ ।  निर्वाचन आयोगले सोमबार एक विज्ञप्ति जारी गर्दै मध्यरातीदेखि चुनाव प्रसार/ प्रसार गर्न र मतदातालाई प्रभावित पार्ने कुनै पनि गतिविधि गर्न नपाइने जनाएको छ।

मतदान माघ ११ गते बिहान ९ बजेदेखि अपरान्ह ३ बजेसम्म हुनेछ। राष्ट्रियसभाका रिक्त हुने १९ सदस्यका लागि मतदान हुन लागेको हो।

मौन अवधि मतदान कार्य समाप्त नहुन्जेलसम्म लागू हुनेछ। निर्वाचन प्रचार प्रसार गर्न र मत माग्न पाइँदैन भने मतदान केन्द्रको ३०० मिटर वरिपरी राखिएका आ–आफ्ना निर्वाचन चिन्ह तथा प्रचार प्रसारका सामग्री हटाएको हुनुपर्ने छ । सो अवधिमा राजनीतिक दलका पदाधिकारी, उम्मेदवार, दलको भातृ सङ्गठन तथा आचारसंहिता पालना गर्नुपर्ने अन्य व्यक्ति, संस्था वा निकायले निर्वाचन प्रचारप्रसार लगायत कुनै पनि प्रकारका छलफल,अन्तरक्रिया, सभा सम्मेलन,कार्यशाला गोष्ठी आदि गर्न पाउने छैनन्। 

कुनै पनि विधि,प्रक्रिया वा माध्यमबाट मत माग्न र निर्वाचन प्रचारप्रसार गर्न नहुने, सामाजिक सञ्जाल,अनलाइन,छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश,सूचना वा प्रचारप्रसारका सामग्री पोष्ट वा शेयर गर्न वा गराउन नपाउने आयोगले जनाएको छ।

निर्वाचनमा प्रदेश सभाका सदस्यहरुका लागि सेतो रङको कागजमा हरियो रङको मसीको विवरण तथा निर्वाचन चिह्न रहेको मतपत्र र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखहरुका लागि सेतो रङको कागजमा रातो रङको मसीको विवरण तथा निर्वाचन चिह्न रहेको मतपत्रहरुको व्यवस्था गरिएको छ ।

राष्ट्रिय सभा सदस्य निर्वाचनमा प्रदेश सभाका सदस्य र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख रहेको निर्वाचक मण्डलका सबै मतदाताहरु गोप्य मतदानव्दारा आफूले रोजेको र चाहेको उम्मेदवारलाई मतदान गर्न पाउनेछन्।

निर्वाचनलाई स्वच्छ,स्वतन्त्र,निष्पक्ष र भयरिहत वातावरणमा सम्पन्न गर्न गराउन सम्बन्धित सबैमा निर्वाचन आयोगले अनुरोध गरेको छ। मतदान माघ ११ गते बिहान ९ बजेदेखि अपरान्ह ३ बजेसम्म हुनेछ। राष्ट्रियसभाका रिक्त हुने १९ सदस्यका लागि मतदान हुन लागेको हो।