रौतहट १९ माघ । रौतहटमा सुन चाँदी ब्यवसायीहरुले माउ संस्था नेपाल सुन चाँदी ब्यवसायी संघको विकल्पमा नेपाल सुन चांन्दी रत्न आभुषन ब्यवसायी संघ रौतहट गठन गरेका छन्।
माउ संघले साना व्यवसायिहरुको कहिलै वास्ता नगरेको तथा केन्द्र बाट पाईने सुविधाबाट वञ्चित गरेको कारण रौतहटमा सुन चाँदीका साना ब्यवसायीहरुले बिकल्प खोजेका हुन्।
यहाँका व्यवसायीहरु जिल्ला प्रसाशन कार्यालय रौतहटमा नेपाल सुन चांन्दी रत्न आभुषन ब्यवसायी संघ विधिवत रूपमा दर्ता गरी जिल्लाको मध्यभाग गरुडामा पहिलो सधारणसभा तथा अधिवेशन सम्पन गरेका छन्। बुधवार सम्पन्न पहिलो सधारण सभा तथा अधिवेशन बाट उमेश प्रसाद साहको अध्यक्षतामा १३ सदस्यिय नेपाल सुन चाँदी रत्न तथा आभुषण व्यवसायी संघ रौतहट चयन गरिएको छ।
संघको प्रथम बरिष्ठ उपाध्यक्षमा सन्नी कुमार सर्राफ, द्धितिय उपाध्यक्षमा शिवम कुमार सोनी, महासचिवमा रामवरण कुमार सोनी, सचिव तथा प्रवक्तामा चन्दन सागर, कोषाध्यक्षमा श्रीमति मिना देवी सल्लाहाकारमा कृष्ण कुमार साह, गान्धि साह सर्वसहमतिमा चयन भएका हुन् । यस्तै सदस्यहरुमा सचिन्द्र साह सोनार, श्रीमति शान्ती देवी, उमेश साह सोनार, शिवशंकर साह, श्रीमति अनिता कुमारी, श्री दिपक कुमार साह निर्वाचित भएका छन । दुईजना सदस्य भने समितिको अर्को बैठकले मनोनित गर्ने जनाईएको छ ।
संघका अध्यक्ष उमेश प्रसाद साहका अनुसार रौतहटमा सुन चाँदी व्यवसायीको माउ संस्था गठन भएदेखिनै गर्दैआएको बेमानस्ता पूर्ण व्यवहारको कारण आर्जित भएर एकदशक पछि अर्को संघ गठन गर्न बाध्य भएको हो। जिल्लामा २०७० सालमा पहिलोपटक संघ दर्ता हुँदा आफू सचिव रहेको थिए। विधानमा तीनवर्षे कार्यकाल अनुसार पटकपटक जिल्लाको नेतृत्व घुमिफिरी एउटै बृतमा अड्केर व्यवहारमा भने कुनै परिवर्तन देखिएन।
सुन चाँदी ब्यवसायी संघ दर्ता भएको जिल्लामा केन्द्र अर्थात महासंघले ९सहुलियत० राष्ट्र बैँकले तोकेको दरभाउमा मांग तथा आयातको आधारमा मासिक १ देखि ५ किलोग्राम सम्म सुन दिनेगर्दछ। बजार भाउ भन्दा ३ देखि ५ हजार प्रतितोला सस्तो हुने उक्त सुन संघमा दर्ता भएका सबै व्यापारीलाई कारोबारको मूल्याङ्कन गर्दै दामासाही अनुसार बितरण गर्नुपर्ने माहासंघले ब्यवस्था गरेको छ। उक्त व्यवस्था अनुसार जिल्लाको संघले कहिलै सुन बितरण गरेन।
पछिल्लो १० बर्ष देखि बहालवाला अध्यक्षकै हालीमुहालीका दुईचार जना व्यापारीले उक्त सुबिधा लिँदैआएको बैकल्पिक नवगठित संघका अध्यक्ष उमेश प्रसाद साहले गुनासो गरेका छन्। त्यतिमात्र नभई नेपाल सुन चाँदी ब्यवसायी संघ रौतहटमा तीन तीनजना बरिष्ठ उपाध्यक्षलाई पाखा लगाउँदै पावर पहुँचको भरमा साधारण सदस्य समेत नरहेका व्यक्तिलाई अध्यक्ष बनाएको कारण अर्को संघ गठन गर्न बाध्य भएको उनले दुखेसो पोखेका छन्।
सदरमुकाम गौर, गरुडा, चन्द्रपुर , कटहरिया लगायत जिल्लाभरिका झण्डै १५० मध्ये १२५ ब्यवसायी आफूहरुको साथ रहेको नवगठित नेपाल सुन चांन्दी रत्न आभुषन ब्यवसायी संघ रौतहटका महासचिव रामबरण साह सोनारले बताएका छन्। नेपाल सुन चाँदी ब्यवसायी संघका पूर्वअध्यक्ष प्रकाश गहतराजले आरोपहरुको खण्डन गर्दै प्रजातान्त्रीक अभ्यास अनुसार अर्को संघ दर्ता गर्ने ब्यापारीको अधिकार भएको प्रतिक्रिया दिएका छन्।
