काठमाडौँ । प्रधानमन्त्री पुष्पकमल दाहाल ‘प्रचण्ड’ले प्रमुख प्रतिपक्षी दल कांग्रेसका सभापति शेरबहादुर देउवासँग छलफल गरेका छन्।
प्रधानमन्त्री निवास बालुवाटारमा बिहीबार भएको भेटमा सङ्क्रमणकालीन न्याय, सङ्घीय संसद्लाई सहज रुपमा सञ्चालन गर्ने लगायतका विषयमा छलफल भएको प्रधानमन्त्रीका प्रेस विज्ञ मनोहरि तिमिल्सिनाले जानकारी दिए।
संसद्लाई प्रभावकारी बनाउने र राष्ट्रिय समस्या समाधानका लागि प्रमुख प्रतिपक्षी दलसँग प्रधानमन्त्रीले नियमित छलफल गरिरहेका छन्।
काठमाडौँ । प्रधानमन्त्री पुष्पकमल दाहाल प्रचण्डले संवैधानिक परिषद्को बैठक बोलाएका छन्। संवैधानिक निकायमा पदाधिकारी नियुक्तिका लागि सिफारिस गर्न बैठक आइतबार बिहान ९ बजेका लागि बोलाइएको हो ।
गत आइतबार नै बैठक बोलाइए पनि सभामुख देवराज घिमिरे जेनेभा भ्रमणमा गएकोले बैठक एक हप्ताका लागि सारिएको उपसभामुख इन्दिरा रानाले जानकारी दिइन् । संविधानको धारा २८३ अनुसार संवैधानिक निकायमा पदाधिकारी नियुक्तिका लागि सिफारिस गर्न बैठक बस्न लागेको हो।
प्रधानमन्त्री अध्यक्ष रहने परिषद्का सदस्यमा प्रधानन्यायाधीश, प्रतिनिधि सभाका सभामुख, राष्ट्रिय सभाका अध्यक्ष, प्रतिनिधि सभाका विपक्षी दलका नेता र प्रतिनिधि सभाको उपसभामुख रहन्छन् ।
बैठकमा राष्ट्रिय प्राकृतिक स्रोत तथा वित्त आयोग, महालेखा परीक्षकको कार्यालय र निर्वाचन आयोगमा रिक्त पदाधिकारी नियुक्तिका लागि सिफारिस गर्ने कार्यसूची छ । एमालेसहितको गठबन्धन बनेपछि पहिलो पटक परिषद्को बैठक बस्न लागेको हो ।
काठमाडौं । नेकपा एमाले वाग्मती प्रदेश कमिटीको पार्टी केन्द्रीय कार्यालयमा बुधबार सम्पन्न दाेस्राे पूर्ण बैठकले १४ बुँदे प्रस्ताव पारित गरेको छ । प्रदेश अध्यक्ष कैलाश ढुङ्गेलको अध्यक्षतामा बसेको बैठक १४ बुँदे प्रस्ताव पारित गर्दै सकिएको हो।
बैठकको उद्घाटन नेकपा एमालेका अध्यक्ष केपी शर्मा ओलीले गरेका थिए। बैठकमा महासचिव शङ्कर पोखरेलले बागमती प्रदेशमा अहिले पार्टी निर्माणको सन्दर्भमा गर्नुपर्ने कामको विषयमा प्रशिक्षण दिएका थिए।
‘जनतामा छाएको निराशालाई चिर्दै भरोसा जगाउने वर्तमान संयुक्त सरकारले लिएको जुन सङ्कल्प छ, त्यसलाई साकार पार्न बैठक जोडदार माग गर्दछ,’ बैठकबाट पारित प्रस्तावको पहिलो बुँदामा भनिएको छ।
संस्थागत भ्रष्टाचार, बेथिति अन्त्य गरी सुशासन कायम गर्न सरकारसँग बैठकले माग गरेको छ । रुस र युक्रेन बिचको युद्धले नेपाली युवाको ज्यान गइरहेकोले युद्धग्रस्त देशहरूमा नेपाली युवाहरूलाई जानबाट रोक लगाउन, गइसकेका युवालाई अविलम्ब फिर्ता गर्न, बेपत्ता युवाहरूको खोजी गर्न र युद्धमा ज्यान गुमाएकाको परिवारलाई क्षतिपूर्ति प्रदान गर्न बैठकले माग गरेको छ । युवा पलायन रोक्न देशमा गुणस्तरीय, व्यावसायिक, प्राविधिक र उत्पादनमुखी शिक्षा प्रदान गर्न बैठकले सरकारसँग माग गरेको छ ।
यस्तै बैठकले युवा पलायन रोक्न नेपाल सरकारले गुणस्तरीय, व्यावसायिक, प्राविधिक र उत्पादनमुखी शिक्षा प्रदान गर्न सरकारसँग जोडदार माग गरेको लामाले बताइन्।
बैठकले महँगी र कालोबजारी तत्काल नियन्त्रण गर्न, परम्परागत सीपलाई संरक्षण र स्वदेशी उत्पादनलाई प्रोत्साहन गर्दै उक्त उत्पादनको प्रयोगमा विशेष जोड दिन र गुणस्तरहीन वस्तुहरूको आयातमा रोक लगाउन सरकारसँग जोडदार माग पनि गरेको छ।
काठमाडौँ । नेपाल कम्युनिष्ट पार्टी (एमाले) का पूर्वसचिव टोपबहादुर रायमाझीलाई मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा चिकित्सकको निगरानीमा राखिएको छ ।
नेता रायमाझीको मुटुमा समस्या भएपछि बुधबार उनलाई उक्त सेन्टरमा भर्ना गरिएको थियो । नेता रायमाझीको स्वास्थ्य अवस्था स्थिर रहेको जानकारी दिँदै उनको उपचारमा संलग्न वरिष्ठ मुटुरोग विशेषज्ञ डा. चन्द्रमणि पौडेलले उनलाई मुटुको चालको निगरानी गर्न सेन्टरमा राखिएको बताए ।
‘उहाँलाई रिँगटा लागेर मुटुको चाल कम भएपछि भर्ना गरिएको हो’, डा. पौडेलले भने, ‘अहिले उहाँको मुटुको इसिजी गरेर चिकित्सकको निगरानीमा राखिएको छ ।’
मेष : गुमेको धन हात लाग्नेछ। विवादमा तपाईंको जित हुनेछ। रमाइलो यात्रामा निस्कने योग परेको छ। धार्मिक कार्यमा मन जानेछ। प्रेम सम्बन्धमा सफलता हात लाग्नेछ।
वृष : लामो समयदेखि रोकिएको काम बन्नेछ। वैदेशिक क्षेत्रको लगानीबाट फाइदा हुनेछ। परिवारको साथ र सहयोग राम्रो छ। लामो यात्राको योग छ।
मिथुन : मेहनतको फल प्राप्त नहुने जोखिम छ। वैदेशिक क्षेत्रमा लगानी नगर्नु राम्रो हुन्छ। मेहनतको आवश्यकता बढी नै देखिन्छ। परिवारसँगको सम्बन्ध सुमधुर बन्नेछ।
कर्कट : हिजोको साथी आज शत्रु बन्ने खतरा छ। सामान हराउने योग रहेकाले यात्रा गर्दा सचेत हुनु राम्रो हुन्छ। समाजबाट प्रशंसा मिल्नेछ। सोचेर बोल्नुपर्ने दिन छ। परिवारको साथ र सहयोग रहनेछ।
सिंह : परिवारको साथ मिल्नेछ। सहयोग गर्ने साथीहरु धेरै छन्। विदेशमा भन्दा स्वदेशमा गरेको लगानीमा फाइदा हुनेछ। थोरै बोल्नु नै हितकारी हुनेछ।
कन्या : नयाँ कामको सुरुवात हुनेछ। वैदेशिक क्षेत्रमा लगानी गरेको भए राम्रो हुनेछ। साथीको सहयोग प्राप्त हुनेछ। परिवारसँगको सम्बन्ध शक्तिशाली बन्नेछ।
तुला : जटिल काम सहजै बन्नेछ। बौद्धिकता प्रयोग गरेर सुरु गरेको काम सफल बन्नेछ। प्रतिस्पर्धी शान्त छन्। शिक्षाको लगानीबाट सोचेजस्तो फल मिल्नेछ।
वृश्चिक : दैनिकी सामान्य छ। न्यायपूर्वक गरेको लगानीबाट फाइदा हुनेछ। धन खर्च हुने योग परेको छ। मन धेरै शान्त नभइ दबाबमा हुनेछ। काम गर्दा सोचेर गर्नु राम्रो होला।
धनु : रोकिएको काम बन्नेछ। व्यापार र वैदेशिक क्षेत्रमा गरेको लगानीबाट लाभ हुनेछ। जग्गाको कारोबारबाट फाइदा हुनेछ। परिवारको साथ निरन्तर प्राप्त हुने योग छ। प्रेम सम्बन्ध सुमधुर बन्नेछ।
मकर : सोचेको काम बन्नेछ। धार्मिक कार्यमा मन जानेछ। परिश्रम गर्ने समय भएकाले सफलता हात लाग्ने योग छ। सामाजिक क्षेत्रमा सम्मान बढ्नेछ। परिवारको सहयोग राम्रो छ।
कुम्भ : रमाइलो दिन छ। मनोरञ्जनका साथ दिन बित्ने देखिन्छ। सामाजिक क्षेत्रमा सम्मान प्राप्त हुने योग छ। यात्रामा भने सचेत हुनु राम्रो हुन्छ। शिक्षामा प्रगति हुनेछ।
मीन : दुर्घटनाको जोखिम हुने भएकाले सचेत भएर यात्रा गर्नुपर्ने दिन छ। बोकेको सामान आफ्नै लापरवाहीले हराउने खतरा हुन्छ। लगानी गरेमा घाटा हुने छैन तर धन खर्च हुने योग छ। व्यवहार गर्दा सचेत हुनुपर्ने देखिन्छ।
विश्वभरका परिवारले सन् २०२२ मा प्रत्येक दिन एक अर्ब डलरको खाना खेर फालेका छन् । यसलाई संयुक्त राष्ट्रसङ्घले बुधबार खानाको नोक्सानीलाई ‘विश्वव्यापी त्रासदी’ भनेको छ ।
करिब ८० करोड मानिस भोकै बसेको यस्तो समयमा घर र व्यवसायहरूले १० खर्ब डलरभन्दा धेरै मूल्यको खाना थन्क्याएर राखेको राष्ट्रसङ्घको पछिल्लो फुड वेस्ट इन्डेक्स रिपोर्टमा उल्लेख छ । रिपोर्टअनुसार सन् २०२२ मा बजारमा उपलब्ध सबै उत्पादनहरूको करिब २० प्रतिशत अर्थात एक अर्ब टनभन्दा बढी खाना खेर गएको थियो । यसमा अधिकांश घरहरूबाट खेर गएका हुन् ।
राष्ट्रसङ्घीय पर्यावरण कार्यक्रम (युएनइपी) का कार्यकारी निर्देशक इन्गर एन्डरसनले विज्ञप्तिमा भन्नुभयो, “खानाको नोक्सानी विश्वव्यापी त्रासदी हो, विश्वभरमा खानाको नोक्सानीका कारण आज मानिसहरू भोकै बस्नेछन् ।” रिपोर्टमा यस्तो प्रकारको नोक्सानी नैतिकमात्र नभएर ‘पर्यावरणीय असफलता’ भएको उल्लेख छ ।
खानाको नोक्सानीले उड्डयन क्षेत्रको पृथ्वीको तापक्रम बढाउने उत्सर्जनको पाँच गुणा उत्पन्न गर्दछ र यस्ता कहिल्यै नखाइने बालीहरू उब्जाउनका लागि भूमिको विशाल भागलाई परिवर्तन गर्न आवश्यक छ । गैरनाफामूलक सङ्गठन डब्ल्युआरएपीसँग सहलेखन गरिएको उक्त रिपोर्ट राष्ट्रसङ्घले सङ्कलन गरेको विश्वव्यापी खाद्य नोक्सानीमाथि दोस्रो हो र यसले अहिलेसम्मको सबैभन्दा पूर्ण तस्बिर प्रदान गर्दछ । काठमाडाै । महाराजगन्जस्थित मनमोहन कार्डियोथोरासिक भास्कुलर तथा ट्रान्सप्लान्ट सेन्टरले कर्मचारी माग गरेको छ ।
विहीबार सेन्टरले एक सूचना जारी गर्दै क्लिनिकल रजिष्ट्रार २ जना र हाउस अफिसर ३ जना गरी ५ जना माग कर्मचारी माग गरेकाे हाे ।
याेग्यता पुगेका नागरिकले आवेदन दिन सक्नेछन् । दरखास्तका लागि चैत २९ गतेभित्र आवेदन दिन सकिने सूचनामा उल्लेख छ ।
काठमाडौं । निजामती कर्मचरीका सन्नतिलाई शैक्षिक प्रोत्साहन वृत्तिका लागि दरदास्त आह्वान गरिएको छ ।
संघीय मामिला तथा सामान्य प्रशासन मन्त्रालयअन्तर्गतको शैक्षिक प्रोत्साहन वृत्ति व्यवस्थापन समितिको सचिवालयले चालु आर्थिक वर्ष ०८०–८१ मा प्रदान गरिने शैक्षिक प्रोत्साहन वृत्तिका लागि आवेदन मागेको हो ।
शैक्षिक प्रोत्साहन वृत्ति व्यवस्थापन समितिको सचिवालयले योग्यता पूरा भएका निजामतीका सन्ततिलाई आगामी १५ दिनभित्र आवेदन आह्वान गरेको छ । आवेदन अनलाइनमार्फत दिने व्यवस्था मिलाइएको छ ।
आवेदन स्वदेशी विश्वविद्यालय वा त्यसको आंगिक वा सम्बन्धन प्राप्त शिक्षण संस्थामा स्नातक तह प्रथम वर्ष तथा पहिलो र दोस्रो समेस्टरमा अध्ययनरत निजामती कर्मचारीका सन्ततितले दिन सक्नेछन् ।
गलकोट (बागलुङ) । बागलुङमा माध्यामिक शिक्षा परीक्षा (एसइई) मा सामेल हुने विद्यार्थीको सङ्ख्या बर्सेनि घट्दै गएको पाइएको छ । यद्यपि यो वर्ष चार हजार तीन सय ९९ जना विद्यार्थी सहभागी हुँदैछन् ।
आजदेखि हुने एसइई परीक्षामा बागलुङबाट चार हजार तीन सय ९९ विद्यार्थी सहभागी हुँदैछन् । गत वर्षको तुलनामा यस वर्ष एसइईमा सहभागी हुने विद्यार्थीको सङ्ख्या चार सय ३७ ले घटेको छ ।
तीन वर्षयताको तथ्याङ्कलाई हेर्ने हो भने विद्यार्थीको सङ्ख्या बर्सेनि घटेको पाइएको छ । शिक्षा विकास तथा समन्वय इकाइ बागलुङका अनुसार २०७८ सालमा चार हजार आठ सय ९३ जना एसइई परीक्षामा सहभागी भएका थिए । विसं २०७९ मा चार हजार आठ सय ३६ विद्यार्थी सहभागी भएका थिए । बर्सेनि परीक्षार्थीको सङ्ख्या घट्दै गएको र आगामी वर्ष चार हजारबाट अझै ओरालो लाग्ने अवस्था देखिएको शिक्षा विकास तथा समन्वय इकाइ प्रमुख युक्तप्रसाद सुवेदीलेले बताए ।
घट्दो जनसङ्ख्या, वैदेशिक रोजगारी र परिवार नै विदेश बस्नाले बर्सेनि विद्यार्थीको सङ्ख्या घट्दै गएको बताए । “विद्यार्थीको सङ्ख्या घट्दो पाएका छौँ, आगामी वर्षको दर्ता फाराम विश्लेषण गर्दा विद्यार्थी घट्ने स्पष्ट भएको छ,”, उनले भने ।
बागलुङमा यस वर्ष एसइई परीक्षामा चार हजार तीन सय ९९ विद्यार्थी सहभागी हुँदैछन् भने सोमध्ये तीन जना दृष्टिविहीन, १० जना संस्कृत विद्यालयका र दुई सय २९ प्राविधिक विषय, ३४ खुलातर्फका विद्यार्थी रहेका शिक्षा विकास तथा समन्वय एकाइ बागलुङले जनाएको छ ।
जिल्लामा ३१ वटा परीक्षा केन्द्र कायम गरिएका छन् । परीक्षा सम्पन्न गर्न ३१ जना केन्द्राध्यक्ष चार सय ८९ सहायक केन्द्राध्यक्ष, निरीक्षक एक हजार नौ सय २८, परीक्षा सहायक पाँच सय २३, कार्यालय सहायक आठ सय ६७ जना र चार सय ६५ जना सुरक्षाकर्मी परिचालन हुनेछन् ।
काठमाडाै । उदयपुरको त्रियुगा नगरपालिका–१४ स्थित सुनकोसी नदीबाट बेपत्ता ३ जना बालबालिका मृत अवस्थामा फेला परेका छन् ।
हाेली खाेलेर खाेलामा नुहाउन जाँदा बेपत्ता भएका बालबालिका मृत अवस्थामा फेला परेकाे हाे।
चैत ११ मा होली खेलेर पौडी खेल्न गएका ९ वर्षीय रिदम मगर, १२ वर्षीया रेखा मगर र १२ वर्षीय लोकबहादुर मगर मृत अवस्थामा भेटिएका हुन् ।
काठमाडौं । आज नेपाल ए ले पहिलो टी-२० अभ्यास खेलमा आज आयरल्यान्ड ए सँग खेल्दैछ । खेल दिउँसो १ बजे टीयु क्रिकेट मैदानमा सुरु हुनेछ । नेपाल ए र आयरल्यान्ड ए बीच समान तीन टी२० र एक दिवसीय सिरिज हुनेछ ।
आयरल्यान्ड ए नेपालको सिनियर टोलीसँग दुवै खेलमा पराजित भएको थियो ।
नेपालको टी-२० टोली
विनोद भण्डारी (कप्तान), लोकेश बम, देव खनाल, पवन सर्राफ, किरण ठगुन्ना, आरिफ शेख, अर्जुन घर्ती, नारायण जोशी, बसिर अहमद, राशिद खान, सागर ढकाल, विपिन खत्री, कमल सिंह ऐरी, हेमन्त धामी र विकास आग्री ।
आयरल्यान्ड ए को टोली
निल रक (कप्तान), पिटर मुर, रस आदिर,केड कार्माइकल, ग्यारेथ डेलानी, स्टीफन डोहेनी, म्याथ्यु फस्टर, फिन हृयान्ड, गेभिन होई, म्याथ्यू हम्फ्रेज, थोसम मेयस, लियाम म्याककार्थी, जेम्श म्याकुलम, मोर्गन टोप्पिङ र बेन हृवाइट ।
काठमाडाै । प्रहरी प्रधान कार्यालय नक्सालले ९ जना प्रहरी नायव उपरीक्षक(डीएसपी) लाई प्रहरी उपरीक्षक(एसपी) मा बढुवा गरिएको छ ।
प्रहरी प्रधान कार्यालयमा बुधबार बसेको बढुवा समितिको बैठकले जनपद प्रहरी समूहतर्फ ८ र प्राविधिक प्रहरी समूह, स्वास्थ्य उप-समूह, नर्सिङतर्फ एक गरी नौ जना डिएसपीलाई एसपीमा बढुवाका लागि सिफारिस गरेको हो ।
गृह मन्त्रालयले प्रहरी नियमावली, २०७१ (संशोधन सहित) को नियम २७ को उप–नियम ४ को प्रावधान अनुसार उनीहरूको बढुवा सिफारिस गरेको हो ।
विगत नौ महिनादेखि एसपी पद रिक्त रहँदै आएको थियाे ।
काठमाडाै । नेपाल राष्ट्र बैंकले आजकाे लागि जारी गरेको विदेशी मुद्राको विनिमय दर सार्वजानिक गरेकाे छ । राष्ट्र बैकका अनुसार आजकाे लागि अमेरिकी डलर एकको खरिद दर अधिकतम १३3 रुपैया १० पैसा र बिक्री दर १३३ रुपैया ७० पैसा कायम भएकाे छ ।
युरोपियन यूरो एकको खरिद दर १४४ रुपैयाँ १9 पैसा र बिक्री दर १४४ रुपैयाँ ८४ पैसा छ । त्यस्तै यूके पाउन्ड स्टलिङ एकको खरिद दर १६८ रुपैयाँ १९ पैसा र बिक्री दर १६८ रुपैयाँ ९४ पैसा छ । स्वीस फ्रेङ्क एकको खरिद दर १४४ रुपैयाँ ९४ पैसा र बिक्री दर १४७ रुपैयाँ ६० पैसा रहेको राष्ट्र बैंकले जनाएको छ ।
अष्ट्रेलियन डलर एकको खरिद दर ८६ रुपैयाँ ८९ पैसा र बिक्री दर ८७ रुपैयाँ २८ पैसा छ । क्यानेडियन डलर एकको खरिद दर ९७ रुपैयाँ ९३ पैसा छ भने बिक्री दर ९८ रुपैयाँ ३७ पैसा छ ।
राष्ट्र बैंकले जनाए अनुसार आज जापानी येन १० को खरिद दर नेपाली ८ रुपैयाँ ८१ पैसा र बिक्री दर ८ रुपैयाँ ८५ पैसा छ भने चिनियाँ यूआन एकको खरिद दर १८ रुपैयाँ ४२ पैसा र बिक्री दर १८ रुपैयाँ ५० पैसा रहेको छ ।
काठमाडौ । यस वर्षको कक्षा १० को माध्यमिक शिक्षा परीक्षा (एसईई) आज (बिहीबार) देखि सुरु भएकाे छ ।
परीक्षा चैत २७ गतेसम्म सञ्चालन हुनेछ । एसईईको परीक्षा बिहान ८ बजेबाट सुरु हुँदैछ । परीक्षा नियन्त्रण कार्यालयका अनुसार पहिलो दिन आज अनिवार्य अंग्रेजी विषयको परीक्षा हो । एसईईमा देशभरबाट १० हजार ८ सय ६ विद्यालयबाट ५ लाख ४ हजार ४ सय १४ परीक्षार्थी सहभागी हुँदैछन् ।
दोस्रो दिन नेपाली, चौथो दिन गणित र छैटौं दिन विज्ञान विषयको परीक्षा सञ्चालन हुने कार्यालयले जनाएको छ ।यसपटक एसईईमा सहभागी हुने विद्यार्थीले नयाँ पाठ्यक्रमको आधारमा पठनपाठन गरिरहेका छन् । यसै वर्षदेखि नयाँ ग्रेडिङ प्रणाली लागू हुँदैछ । जसमा सैद्धान्तिकतर्फ कम्तीमा ३५ प्रतिशत अंक नल्याउने विद्यार्थी नन्ग्रेडिङ (एनजी) मा पर्नेछन् ।
दुई विषयसम्म एनजी आउने विद्यार्थीले ग्रेडिवृद्धि परीक्षा दिन पाउनेछन् । दुईभन्दा बढी एनजी आए अर्को वर्ष ती विषयको परीक्षा दिनुपर्नेछ । कक्षा १२ मा गत दुई वर्षदेखि नै उक्त प्रणालीअनुसार नतिजा सार्वजनिक हुँदै आएको छ ।
यसअघि सैद्धान्तिक र प्रयोगात्मकको अंक जोडेर विद्यार्थीलाई न्यूनतम ३५ प्रतिशत अंक नल्याए विद्यार्थीले ग्रेड प्राप्त गर्ने व्यवस्था थियो । २०७६ देखि विद्यालय तह कक्षा १–१२ मा नयाँ पाठ्यक्रम लागू भएसँगै मूल्यांकनमा पनि पाठ्यक्रम विकास केन्द्रले नयाँ ग्रेडिङ प्रणाली लागू गरेको हो ।
काठमाडाै । हाल नेपालमा पश्चिमी वायु तथा स्थानीय वायुको प्रभाव रहेको छ । जसको प्रभावले देशका पहाडी भू-भागमा आंशिकदेखि साधरणतया बदली रहेको जल तथा माैसम विज्ञान विभाग, माैमस पूर्वानुमान महाशाखाले जनाएकाे छ ।
महाशाखाका अनुसार विहीबार विहानैदेखि कोशी, बागमती र गण्डकी प्रदेशको पहाडी भू-भागको थोरै स्थानहरूमा हल्का वर्षा भइरहेको छ ।
आज दिउँसो देशका पहाडी भू-भागमा आंशिक देखि साधरणतया बदली रही बाँकी भू-भागमा आंशिक बदली रहने छ। कोशी, बागमती र गण्डकी प्रदेशका पहाडी भू-भागका थोरै स्थानहरूमा तथा बाँकी पहाडी भू-भागका एक–दुई स्थानमा चट्याङ्गसहित हल्का वर्षाको सम्भावना रहेको छ। कर्णाली र सुदूरपश्चिम प्रदेशका उच्च पहाडी तथा हिमाली भू-भागका एक-दुई स्थानमा हल्का हिमपातको सम्भावना रहेको छ।
