हाजिर भएको एक घन्टामै प्रमुख प्रशासकीय अधिकृतको सरुवा

सर्लाहीको हरिपुर्वा नगरपालिकाका प्रमुख  प्रशासकीय अधिकृत शम्भुप्रसाद यादव हाजिर भएको एक घन्टामै सरुवामा परेका छन् । मधेस प्रदेश मुख्यमन्त्री तथा मन्त्रिपरिषद् कार्यालयका शाखा अधिकृत यादवलाई संघीय मामिला तथा सामान्य प्रशासन मन्त्रालयले गत शुक्रबार हरिपुर्वा नगरपालिकाको प्रमुख प्रशासकीय अधिकृतमा खटाएकोमा आइतबार बिहान ११ बजे पदभार ग्रहण र हाजिर गरेका थिए । तर, एक घन्टामै दिउँसो १२ बजे सामान्य प्रशासन मन्त्रालयले यादवलाई मुख्यमन्त्री कार्यालयमै यथावत् राख्न पत्र पठाएपछि उनी फर्किएका हुन् । 

मेयर विनोदकुमार साहले प्रमुख प्रशासकीय अधिकृतको स्वागत गर्न नपाउँदै सरुवा भएपछि अचम्ममा परेको बताए । ‘नगरपालिकामा एक महिनादेखि प्रशासकीय छैनन्, बल्ल पठाएको थियो, तर फेरि सरुवा गरिदियो,’ उनले भने । हरिपुर्वामा यसअघि पनि प्रशासकीय अधिकृतको एक सातामै सरुवा भएको थियो ।