बैंकहरुको नयाँ ब्याजदर सार्वजनिक : ९ बैंकले घटाए, कसको कति ?

काठमाडौं । बैंकहरुले आगामी असोज महिनाका लागि नयाँ ब्याजदर सार्वजनिक गरेका छन् । वाणिज्य बैंकहरुले अाज असोज १ गतेदेखि लागू हुने गरि नयाँ ब्याजदर प्रकाशन गरेका हुन् ।

वाणिज्य बैंकहरुको औसतमा असोज महिनाको लागि मुद्दति निक्षेपको ब्याजदर घटेको छ । औसतमा व्यक्तिगत तर्फ मुद्दति निक्षेपको ब्याजदर अब असोज महिनाका लागि ६.३८ प्रतिशत कायम भएको छ । भदौमा औसत ब्याजदर ६.५३ प्रतिशत थियो । औसतलाई आधारमान्दा वाणिज्य बैंकहरुको ब्याजदर असोजका लागि ०.१५ विन्दुले घटेको छ ।

ती वाणिज्य बैंकहरुमध्ये ९ ओटा वाणिज्य बैंकहरुले असोज महिनाका लागि ब्याजदर घटाएका छन् आठ वटा बैंकहरुले भदौ महिनाकै ब्याजदरलाई असोजमा पनि निरन्तरता दिएका छन् भने दुई बैंकले ब्याजदर बढाएका छन् । नेपाल र कृषि विकास बैंकले असोज महिनाका लागि ब्याजदर बढाएका हुन् ।

प्रकाशित सूचना अनुसार भदौ महिनाको तुलनामा एनएमबि बैंक, कुमारी बैंक, प्राइम कमर्सियल बैंक, सानिमा बैंक, नेपाल एसबिआई बैंक, नबिल बैंक, एनआईसी एशिया बैंक, एभरेष्ट बैंक र राष्ट्रिय वाणिज्य बैंकले व्यक्तिगत मुद्दति निक्षेपमा अधिकतम ब्याजदर घटाएका छन्।  बाँकी आठ ओटा बैंकहरुले भने भदौ महिनाकै ब्याजदरलाई निरन्तरता दिएका छन्।

असोजमा ब्याजदर स्थिर राख्ने कम्पनीमा प्रभु, ग्लोबल आइएमई, माछापुच्छ्रे, नेपाल इन्भेस्टमेन्ट मेगा र सिद्धार्थ बैंक छन्।