दुर्गा मूर्ति बिसर्जन गर्दा बेपत्ता युवकको शव फेला

लुम्बिनी । दुर्गा मूर्ति बिसर्जनका क्रममा नदीमा डुबेर बेपत्ता भएका युवकको शव फेला परेको छ । रुपन्देहीको मर्चवारमा गत मङ्गलबार दुर्गा मूर्ति बिसर्जन गर्न गएका तीनमध्ये दुई जनाको ज्यान गएको थियो भने एकजना बेपत्ता भएका थिए ।

रूपन्देहीको कोटहीमाई गाउँपालिका वडा नम्बर १ र ५ को सिमानामा रहेको तिनाउ र दानव नदी सीमाको मुहानमा डुबेर कोटहीमाई– १ का २० वर्षीय युवा सन्तकुमार राजभर बेपत्ता भएका थिए।

राजभरको शव बिहीबार भेटिएको हो। सो दुर्घटनामा परेर स्थानीय २४ वर्षीय अजयकुमार नाउँ र १८ वर्षीय अजय राजभरको मृत्यु भएको थियो। सो स्थानका स्थानीयले स्थापना गरेको दुर्गा मूर्ति विसर्जन गर्न बडादसैंका दिन ती युवा नदी किनारमा पुगेका थिए।

खोजीका क्रममा बिहीबार अपराह्न घटनास्थलबाट केही तल तैरिएको अवस्था शव फेला परेको जिल्ला प्रहरी कार्यालय रूपन्देहीले जानकारी दिए।