आयोगले नियमावली र कार्यविधि संशोधन गरेर ‘स्टिङ अप्रेसन’ को निरन्तरता पाउने

काठमाडौँ । अख्तियार दुरुपयोग अनुसन्धान आयोगले कर्मचारीलाई घुससहित रंगेहात पक्राउ गर्ने ‘स्टिङ अप्रेसन’ को लागि निरन्तरता पाउने भएको छ । आयोगले नियमावली र कार्यविधि संशोधन गरेर यसलाई परिमार्जन गरी निरन्तरता दिन लागेको हो ।

बैशाख ९ गते सर्वाेच्चले सेवाग्राहीमार्फत आफै घुस दिन लगाएर पक्राउ गर्ने शैलीलाई संविधानविपरीत ठहर गरेको थियो ।

सर्वोच्चले ‘स्टिङ अप्रेसन’ मा आफै घुस दिन नपाउने मात्र फैसला गरेकाले यससम्बन्धी कार्यविधिलाई संशोधन गरेर कायम राख्न लागिएको आयोगले जनाएको छ । अब आयोगले सेवाग्राहीको आफ्नै पैसा घुस दिन लगाएर ‘स्टिङ अप्रेसन’ गर्नेछ । ‘अदालतको फैसलापछि अब हामीले आफ्नै पैसा स्टिङ अप्रेसनमा प्रयोग गर्दैनौं,’ आयोगका प्रवक्ता नारायणप्रसाद रिसालले भने, ‘अब सम्बन्धित सेवाग्राहीकै पैसा प्रयोग हुन्छ । आयोगलाई घुससहित पक्राउ गर्ने संवैधानिक अधिकार छ, त्यो काम परिमार्जनसहित निरन्तर हुन्छ ।’