साइबर अपराधको आरोपमा एक महिला पक्राउ

काठमाडौं । प्रहरी प्रधान कार्यालय, साइबर ब्यूरो भोटाहिटीले अश्लील फोटोहरू सामाजिक सञ्जालमा फैलाएर प्रचार गर्ने एक महिलालाई पक्राउ गरेको छ ।
महानगरीय प्रहरी वृत्त बौद्धको टोलीले सोलुखुम्बु जिल्ला, नेचा–सल्यान गाउँपालिका वडा नं. १ स्थायी घर भई कपन बस्ने वर्ष ३६ वर्षीय इन्दिरा निरौलालाई बुधार विहान पक्राउ गरी साइबर ब्यूरो भोटाहिटीलाई बुझाएको हो ।

एक पीडित महिलाको चरित्रहत्या गर्ने उदेश्यले व्यक्तिगत तस्बिरहरु साथै आपत्तिजनक म्यासेजलाई विभिन्न व्यक्तिको भाइबर, फेसबुक म्यासेन्जर लगायतका सामाजिक सञ्जालमा पठाई साइबर अपराध गरेको भनी प्रहरी कार्यालयमा उजुरी परको थियो ।

नेपाली कांग्रेस सिन्धुली जिल्ला कार्यसमिति सदस्य एवं विभिन्न संघसस्थामा संलग्न समेत रहेकी निरौला उजुरी पश्चात फरार रहेकी थिइन् । प्रहरीको खोजी सूचिमा रहेकी निजलाई ठाँउ बदल्दै भागी हिड्ने क्रममा प्रहरीले कपनबाट पक्राउ गरेको हो ।

निज निरौलालाई विद्युतीय कारोबार ऐन, २०६३ अनुसार आजै काठमाडौं जिल्ला अदालतबाट चार दिनको म्याद थप गरी विस्तृत अनुसन्धान अघि बढाइएको साइबार ब्यूरो भोटाहिटीले जानकारी दिएको छ।