निजी जीवन बारे सामग्री प्रसारण गरी महिलाको चरित्रहत्या गरेको आरोपमा चार युट्युबर पक्राउ
१४ आश्विन २०७८, बिहीबार
काठमाडौँ-प्रहरीले महिलाको चरित्रहत्या गरेको आरोपमा चार युट्युबरलाई पक्राउ गरेको छ ।
युट्युब च्यानल सञ्चालन गरी निजी जीवन बारे सामग्री प्रसारण गरी महिलाको चरित्रहत्या गरेको आरोपमा चार युट्युबर पक्राउ परेका हुन् ।
प्रहरीले तस्बिरसहितको सामग्री (भिडियो अन्तरवार्तासमेत) प्रसारण गरी महिलाको चरित्रहत्या गरेको आरोपमा प्रहरीले चार युट्युबरलाई पक्राउ गरेको छ ।
महिलाको इज्जत प्रतिष्ठामा आँच पुर्याइ घृणा फैलाउने सामग्री प्रसारण गरेर विद्युतीय कारोबार ऐन २०६३ अन्तर्गतको कसुर गरेकाले उनीहरुलाई पक्राउ गरिएको प्रहरीको साइबर ब्युुरोले जनाएको छ ।
ब्युरोका प्रवक्ता प्रहरी वरिष्ठ उपरीक्षक नविन्द्र अर्यालका अनुसार पक्राउ परेका उनीहरुमाथि बुधबार नै काठमाडौँ जिल्ला अदालतबाट म्याद थप गरी अनुसन्धान थालिएको छ । ब्युरोमा परेको उजुरीका आधारमा उनीहरुलाई पक्राउ गरिएको हो ।
पछिल्लो समयमा युट्युब च्यालनका सामग्रीमाथि धेरै प्रश्न उठ्ने गरेको छ । कतिपय यस्ता च्यानलले प्रसारण गर्ने सामग्रीमा स्रोतको उल्लेख नहुने गरेको, सत्यतथ्यमा आधारित नरहेको तथा मानिसको चरित्रहत्या गर्ने र व्यक्तिगत विषयसमेत सञ्चारमाध्यामबाट सार्वजनिक गर्ने गरेको प्रहरीले जनाएको छ ।
