October 21, 2021
सुदूरपश्चिम प्रदेशमा बाढीपहिराका कारण मृत्यु हुनेको सङ्ख्या २८ पुगेको छ । सबैभन्दा बढी डोटीमा १४, बझाङमा सात, बैतडीमा चार, डडेल्धुरामा दुई र कैलालीमा एक जनाको मृत्यु भएको छ ।
यस्तै डडेल्धुरामा घरमाथिबाट आएको पहिरामा पुरिएर गन्यापधुरा गाउँपालिका–१ भात्काँडाका ३२ वर्षीय विष्णु अवस्थी र गन्यापधुरा गाउँपालिका–३ बस्ने अन्दाजी ६५ वर्षीय नर्मदादेवी शाहीको खोलाले बगाएर मृत्यु भएको छ ।
डोटीको सायल गाउँपालिकामा छ जना, जोरायल गाउँपालिकामा छ जना, बोगटान फुडसिल गाउँपालिका र शिखर नगरपालिकामा एक÷एक जनाको मृत्यु भएको जिल्ला प्रहरी कार्यालय डोटीले जानकारी दिएको छ ।
सायल गाउँपालिका–६ का १४ वर्षीय सागर कुञ्जेडा, ११ वर्षीय आशिष कुञ्जेडाको मृत्यु भएको छ । यस्तै सोही गाउँपालिका–१ का ७४ वर्षीय वीरे रोकायाको खोलाले बगाउँदा मृत्यु भएको छ ।
सायल गाउँपालिका–५ का ५८ वर्षीय लहरे लुहार, ५८ वर्षीय हिरुवा लुहार र ७५ वर्षीय देव डुम्रेलको पहिरामा परी मृत्यु भएको जिल्ला प्रहरी कार्यालय डोटीका प्रहरी निरीक्षक रवीन्द्र चन्दले जानकारी दिनुभयो ।
जोरायल गाउँपालिका–३ का ७३ वर्षीय जोगी सार्की, ६१ वर्षीया झुपरी सार्की, सोही गाउँपालिका–४ का शेरबहादुर विक, मोहन विक, पवित्रा विक र सोही गाउँपालिका–१ का सचिन विकको पनि पहिरामा पुरिएर मृत्यु भएको छ ।
शिखर नगरपालिका–११ की ३५ वर्षीया मन्धरा बलायरको पहिराको ढुङ्गा टाउकामा लागी मृत्यु भएको जिल्ला प्रहरी कार्यालय डोटीले जानकारी दिएको छ ।
यस्तै बोगटान फुड्सिल गाउँपालिका–५ का चन्द्रा नेपालीको मृत्यु भएको छ ।
उता बझाङमा बाढीपहिराले सात जनाको मृत्यु भएको छ । पहिरामा च्यापिएर खप्तडछान्ना गाउँपालिकामा पाँच जना र थलराका दुई जनाको मृत्यु भएको हो ।
खप्तड छान्ना गाउँपालिका–४ माझीगाउँका धर्मराज रोकाया, उनकी श्रीमती जयसरा रोकाया र वडा नं ५ कालुखेतीका विरु गिरी, उनकी श्रीमती चन्द्रा गिरी र खप्तड छान्ना गाउँपालिका– ५ का धनराज जोशीको पहिरामा पुरिएर मृत्यु भएको खप्तडछान्ना गाउँपालिकाका वीरेन्द्रबहादुर सिंहले बताउनुभयो ।
तर मृतकको सनाखत भने हुन सकेको छैन ।
गाउँपालिकाको वडा नं ४ डिक्लामा बेपत्ता भएका २३ जनाको खोजीका लागि उद्धार टोली नेपाली सेनाको हेलिकप्टरमार्फत डिख्ला पुगेको छ । पहिराले तल्लो डिक्ला र माथिल्लो डिक्लाका १४८ परिवार विस्थापित भएका छन् भने सात घर पुरिएका छन् ।
विस्थापित ७०० जना विद्यालयमा बसिरहेका छन् । नेपाली सेनाको हेलिकप्टरमाफर्त पहिरामा परेकाहरुको उद्धार र खोजीकार्यका लागि आवश्यक राहत र औषधिको व्यवस्था गरेर रेस्क्यु टोली घटनास्थल पुगिसकेको प्रमुख जिल्ला अधिकारी मोहन अधिकारीले बताउनुभयो ।
उता बैतडीको शिवनाथ गाउँपालिका–६ बसेडीका रामी पार्कीको घर पहिराले बगाउँदा उनका दुई बुहारी र एक नातिको मृत्यु भएको छ ।
शिवनाथ गाउँपालिकाका अध्यक्ष कर्ण साउँदका अनुसार मृत्यु हुनेमा १८ वर्षीया पवित्रा, २४ वर्षीया भानु र तीन वर्षीय सोम पार्की रहेका छन् । बैतडीकै सुर्नया गाउँपालिका– ५ रामकी बरायलमा घर भत्किँदा ७१ वर्षीया परुदेवी महराको पनि ज्यान गएको छ ।
यता कर्णाली नदीको बाढीका कारण कैलालीको टीकापुरमा एक जनाको ज्यान गएको छ । टीकापुर नगरपालिका–८ कालीमाटीका करवीरे ढोलीको ज्यान गएको हो । सुदूरपश्चिममा अझै २५ जना बेपत्ता भएका छन् ।
प्रकाशित मिति:October 21, 2021
November 24, 2024
