November 16, 2021
बर्थ–डे पार्टीमा फाइट हुदा एक जनाको मृत्यु-दुई घाइते
विराटनगर-बूढीगंगा गाउँपालिका–६ कोयलपुरमा ‘बर्थ–डे’ (जन्मदिन)मा आयोजित पार्टीमा‘ग्याङ फाइट’हुँदा एक जनाको मृत्यु भएको छ ।
स्थानीय नानु लिम्बूको घरमा आयोजित उनकी भतिजी इछिङको बर्ड–डे पार्टीमा आइतबार राति दुई पक्षबीचको विवाद बढेर झगडा भएको प्रहरीले जनाएको छ ।
मोरङ प्रहरीका प्रवक्ता डीएसपी दीपक श्रेष्ठले ‘ग्याङ फाइट’मा धनकुटाको पाख्रीबास घर भएका २६ वर्षीय रिजन दाहालको मृत्यु भएको जानकारी दिए ।
उनका अनुसार घटनामा धनकुटा देव्रेबासका २२ वर्षीय कमल थापा र घरधनी नानु लिम्बू पनि घाइते भएका छन् ।
हत्या गरिएका दाहाल र घाइते थापा सुनसरीको इटहरी उपमहानगरपालिका–१३ खनारमा डेरा गरेर बस्दै आएको प्रहरीको प्रारम्भिक अनुसन्धानबाट खुलेको छ ।
दुवै जना खनारस्थित रिलायन्स धागो उद्योगमा कार्यरत रहेको प्रहरीले जनाएको छ।
बूढीगंगा–६ का २३ वर्षीय धने भनिने धनबहादुर तामाङ, २४ वर्षीय ईश्वर भनिने लिखमान लिम्बू र सुनसरीको इटहरी–११ का २२ वर्षीय राजु तामाङ लगायत छरसात जनाको समूहले दाहाल र थापामाथि खुकुरी प्रहार गरेको प्रहरीको भनाइ छ।
खुकुरी प्रहारबाट गम्भीर घाइते भएका दाहालको उपचारका लागि लैजाँदै गर्दा राति ९ बजेतिर बाटैमा मृत्यु भएको डीएसपी श्रेष्ठले बताए। दाहालको टाउकोमा खुकुरी प्रहार गरिएको चोट थियो।
प्रहरीका अनुसार दाहालमाथि खुकुरी प्रहार हुन थालेपछि थापा र घरधनी लिम्बू छुट्याउन गएका थिए ।
छुट्याउने क्रममा उनीहरुमाथि पनि खुकुरी हानिएको प्रहरीको भनाइ छ ।
थापा र लिम्बूको हातमा खुकुरीले काटेको चोट छ ।
प्रहरीको प्रारम्भिक अनुसन्धानबाट आक्रमणमा संलग्नहरु लागुऔषधका दुर्व्यसनी भएको खुलेको छ।
डीएसपी श्रेष्ठका अनुसार दुई पक्षबीच भएको विवादको कारण खुल्न सकिरहेको छैन ।
घटनामा संलग्न भएको आशंकामा प्रहरीले दुई युवालाई नियन्त्रणमा लिएको छ ।
घटना अनुसन्धानका क्रममा रहेको भन्दै नियन्त्रणमा लिइएका युवाहरुको नाम प्रहरीले खुलाएको छैन ।
घटनाका बारेमा थप बुझ्ने काम भइरहेको बताउँदै डीएसपी श्रेष्ठले घटनाको अनुसन्धान थालिएको जानकारी दिए ।
उनका अनुसार घटनापछि फरार रहेकाहरुको पनि खोजी तीव्र पारिएको छ।
वडाध्यक्ष दिलिप चौधरीले पार्टीमा मदिरा सेवन गरेका युवाहरुबीच विवाद बढेपछि ‘ग्याङ फाइट’ भएको बताए ।
मदिराको नसामा रहेका युवाहरुको झगडाले ज्यानै जाने घटना भएको उनको भनाइ छ ।
बर्थ–डे पार्टीमा फाइट हुदा एक जनाको मृत्यु-दुई घाइते
प्रकाशित मिति:November 16, 2021
