December 29, 2021
नेपाल प्रेस युनियनको कार्यवाहक महासचिवमा ओझा
नेपाल प्रेस युनियनको कार्यवाहक महासचिवको जिम्मेवारी उपमहासचिव भीष्मराज ओझाले सम्हाल्नुभएको छ ।
युनियनको मङ्गलबार बसेको केन्द्रीय सचिवालयकोे बैठकले तत्कालीन महासचिव अजयबाबु शिवाकोटी नेपाली कांग्रेसको १४औँ महाधिवेशनमा केन्द्रीय सदस्य पदमा निर्वाचित भएपछि रिक्त रहेको सो पदको जिम्मेवारी उपमहासचिव ओझालाई सुम्पिएको हो ।
कांग्रेसको विधानअनुसार पार्टीको पदाधिकारी एवं सदस्यमा निर्वाचित भएपछि अर्को पद स्वतः खारेज हुने व्यवस्था छ ।
बैठकले शिवाकोटीलाई हालसम्म महासचिव पदमा रहेर गरेको योगदानका लागि धन्यवाद दिँदै उहाँलाई बधाई तथा शुभकामना प्रदान गर्ने निर्णयसमेत गरेको छ ।
बैठकपछि युनियनको कार्यालयमा आयोजित कार्यक्रममा महासचिव शिवाकोटीले उपमहासचिव ओझालाई माइन्यूटसमेत हस्तान्तरण गर्नुभयो ।
दुई दशकभन्दा बढी समयदेखि निरन्तर पत्रकारितामा रहनुभएका ओझाले पत्रकारितामा स्नातकोत्तर गर्नुभएको छ ।
साथै उहाँसँग तीन कार्यकालदेखि प्रेस युनियनको पदाधिकारीमा रहेर काम गरेको अनुभव छ ।
नेपाल प्रेस युनियनको कार्यवाहक महासचिवमा ओझा
प्रकाशित मिति:December 29, 2021
November 23, 2024
