February 11, 2022
जनमत एमसीसीको विरुद्धमा छ : समर्थन गर्न सकिँदैन-माधव नेपाल
काठमाडौं-नेकपा एकीकृत समाजवादी पार्टीका अध्यक्ष माधव कुमार नेपालले जनमत एमसीसीको विरुद्धमा रहेको बताउनु भएको छ ।
वीरगञ्जमा समाजवादी प्रेस संगठन पर्साले आयोजना गरेको पत्रकार सम्मेलनमा बोल्दै नेता नेपालले उक्त कुरा बताउनु भएको हो ।
एमसीसीबारे जनतालाई स्पष्ट पार्नुपर्ने चुनौति रहेको नेता नेपालले बताएका हुन् ।
उनले यथास्थितिमा एमसीसीलाई समर्थन गर्न नसकिने बताएका छन् ।
पूर्वप्रधानमन्त्री समेत रहेका सत्ता गठबन्धनका नेता नेपालले यथास्थितिमा एमसीसीलाई आँखा चिम्लेर समर्थन गर्न नसकिने बताएका हुन् ।
कार्यक्रममा उनले भने, ‘एमसीसीको बारेमा नेपाली जनता र राजनीतिक दल विभाजित छन् ।
त्यसैले एमसीसीमा क्लयरिफिकेसन चाहिन्छ, कतिपय कुरा मिलाउनुपर्ने छ ।
तर जनमत एमसीसीको विरुद्धमा छ । जनमतलाई पनि कसरी आश्वस्त बनाउन सकिन्छ । यो पनि एउटा ठूलो चुनौति छ ।’
सम्झौता मिति पर सार्दा उत्तम हुने उनको भनाई छ । ‘सम्झौता मिति पर सारे राम्रो हुन्थ्यो, छलफल गर्न समय मिल्थ्यो । गहिरोसँग अध्ययन गर्न पाइन्थ्यो । भए नभएको प्रचार भइरहेको छ ।
कतिपय कुरालाई सुधार गर्न मौका मिल्छ,’ उनले भने, ‘यसको अध्ययन गरिरहेका छौं । अन्तिम निष्कर्षमा पुग्न बाँकी छ ।’
सत्ता गठबन्धनका नेता तथा प्रधानमन्त्री शेरबहादुर देउवा भने एमसीसी पारित गराउन दौडधुपमा लागेका छन् ।
जनमत एमसीसीको विरुद्धमा छ : समर्थन गर्न सकिँदैन-माधव नेपाल
प्रकाशित मिति:February 11, 2022
November 24, 2024
