February 17, 2022
एमालेका केपी ओली पद्मा अर्याल सहित पाँच नेताविरुद्ध अख्तियारमा उजुरी
काठमाडौं-नेकपा (एकीकृत समाजवादी) निकट विद्यार्थी संगठन अनेरास्ववियुले नेकपा (एमाले)का अध्यक्ष केपी शर्मा ओलीसहित एमालेका पाँच नेताविरुद्ध अख्तियार दुरुपयोग अनुसन्धान आयोगमा उजुरी दर्ता गराएको छ ।
झापास्थित गिरीबन्धु टी स्टेटको नाममा बिर्तामोड र अर्जुनधारामा रहेको करिब ३०० बिघा सट्टापट्टा गर्न पाउने गरी ऐन संशोधन गरेको भन्दै बिहीबार अनेरास्ववियुले तत्कालीन प्रधानमन्त्री ओली र तत्कालीन भूमि व्यवस्थामन्त्री पद्मा अर्यालविरुद्ध उजुरी दर्ता गराएको हो ।
यस्तै, स्वास्थ्य सामग्री खरिद प्रक्रियामा अनियमितता भएको भन्दै सीसीएमसीका तत्कालीन संयोजक ईश्वर पोखरेल र तत्कालीन स्वास्थ्य तथा जनसंख्यामन्त्री भानुभक्त ढकालविरुद्ध पनि उजुरी दर्ता गराएको अनेरास्ववियुका अध्यक्ष सुदेश पराजुलीले जानकारी दिए ।
त्यस्तै, ‘भिजिट नेपाल २०२०’ मा विदेशीहरूलाई व्यापक रूपमा भित्र्याउने उद्देश्यले प्रचारप्रसारका लागि राज्यकोषको करोडौँ रकम हिनामिना भएको भन्दै तत्कालीन पर्यटनमन्त्री योगेश भट्टराईविरुद्ध पनि उजुरी दर्ता गराएको उनले बताए ।
अनेरास्ववियुका तर्फबाट वाग्मती प्रदेश कमिटीका संयोजक दीपक बुढाथोकीले उजुरी दर्ता गराएका हुन् ।
एमालेका केपी ओली पद्मा अर्याल सहित पाँच नेताविरुद्ध अख्तियारमा उजुरी
प्रकाशित मिति:February 17, 2022
November 24, 2024
