सप्तरीमा २ जनामा काेराेना संक्रमण

काठमाडौँ । सप्तरीमा दुईजनाकाे र्‍यापिड डाइगनोस्टिक टेस्ट पाेजेटिभ देखिएकाे छ ।

कोरोना फैलाउन भूमिका खेलेको आरोप लागेको दिल्लीको निजामुद्दीनस्थित तबलिगी जमातमा सहभागी भएर फर्केका ८ मध्ये दुई जनाको आरडीटी परीक्षण रिपोर्ट पोजिटिभ आएको छ ।

मंगलबार गरिएको ७ जनाको र्‍यापिड डाइगनोस्टिक टेस्ट (आरडीटी) मा दुई जनाको रिपोर्ट पोजिटिभ देखिएको र ५ जनाको रिर्पोट नेगेटिभ आएको गजेन्द्रनारायण सिंह अस्पताल राजविराजका मेडिकल सुपरिटेन्डेन्ट डा. चुमनलाल दासले बताए । एक जना भने सम्पर्कमा नआएकाे र खोजी भइरहेको उनले बताए ।

रिपोर्ट पोजेटिभ देखिएकामध्ये एकजना तिलाठी कोईलाडी गाउँपालिकाका र अर्का खडग नगरपालिकाका रहेको बताइएको छ ।

पोजिटिभ देखिएकाहरूलाई गजेन्द्रनारायण सिंह अस्पताल राजविराजको आइसोलेसनमा राखिएको छ भने बाँकी ५ जनालाई खडग नगरपालिकाको क्वारेन्टाइनमा पठाउने तयारि गरिएकाे छ ।

पोजिटिभ र नेगेटिभ रिपोर्ट आएकाहरूको पीसीआर परीक्षणका लागि स्वाब संकलन गरिएको छ ।

दिल्लीको निजामुद्धिनमा भएको तबलिकी जमातमा सहभागी भई आफ्नै घरमा बसिरहेका ७ जनालाई स्थानीय जनप्रतिनिधि र जिल्लास्थित उच्च संयन्त्रले सूचना पाएपछि घरबाटै परीक्षणका लागि गजेन्द्रनारायण सिंह अस्पताल राजविराज ल्याइएको थियो ।