लकडाउन अवधिभर बन प्रबेशमा रोक

श्याम श्रेष्ठ

रौतहट । डिभिजन वन कार्यालय,रौतहटले रौतहटको बनक्षेत्रमा हुने प्रबेश लाई आज देखि निषेध गरेको छ ।
लकडाउनकाे अवसर पारि बनमा प्रबेश गरेर सालको गोलिया काठ तस्करी गर्ने र बन्यजन्तुको शिकार गर्ने क्रम बढेपछि वन ऐन, २०७६ को दफा ९ बमोजिम रौतहटको वनमा अधिकृतरुपमा प्रवेश लाई निषेध गरिएको हाे ।

कोरोना भाईरस बाट जोगाउन सरकारले देशभरनै लकडाउन गरेपछि तस्करहरुले रौतहटको बनमा प्रबेश गरेर सालको गोलिया काठ तस्करी गर्ने र बन्यजन्तुको शिकार गर्ने क्रम बढदो रहेपछि डिभिजन बन कार्यालय रौतहटले बन प्रबेशमा रोक लगाएको हो ।

दुई हप्ता यताकाे विवरण अनुसार रौतहटको बन बाट हरिण, मृग, बदेलको ब्यापक मात्रामा चोरी शिकार भएको छ ।

चोरी शिकारीले दिउसै जङ्गलमा पासो धापेर दैनिक ५ वटा भन्दा बढि बन्यजन्तुको शिकार गर्दै आएको स्थानीयले समेत दाबि गरेका छन् ।

लकडाउनको मौका छोपी बन अपराधिहरुले अनधिकृत रुपमा वन क्षेत्रमा प्रवेश गरी वनमा डढेलो लगाउने, वन्यजन्तु चोरी शिकार एवम वन पैदावारको चोरी निकासी गर्ने जस्ता वन अपराधका गतिबिधिहरु गर्दै आएको जनगुनासोको आधारमा डिभिजन बन कार्यालय रौतहटले वन क्षेत्रमा प्रबेश निषेध गरेको हो ।

वन अधिकृत बिनोद सिंहका अनुसार लकडाउनको अबधिभर डिभिजन वन कार्यालयको कार्यक्षेत्र भित्र रहेका राष्ट्रिय वन, सामुदायिक वन, साझेदारी वन, धार्मिक वन, सरकारद्धारा व्यवस्थित वन क्षेत्रलाई सम्बद्ध सव—डिभिजन वन कार्यालय र समुहको समन्वयमा अत्यावश्यक कार्य तथा वन संरक्षणका गतिबिधि बाहेक अन्य क्रियाकलापहरु गर्न नपाउने गरी प्रवेश निषेध गरिएकाे छ ।

उनले भने `सूचनाको अवज्ञा गरी वन क्षेत्रमा आफुखुसी प्रवेश गरेको पाईएमा वन ऐन,२०७६ को दफा ५०(१)(ख) बमोजिम एक महिनासम्म कैद वा एक हजार रुपैंयासम्म जरिवाना वा दुबै सजाय हुने नीयम रहेको छ ।´

सम्बद्ध सबै सव—डिभिजन वन कार्यालय एवम समुहहरुले लकडाउनको अबधिमा वन संरक्षण विशेष कार्ययोजना बनाई समन्वय र सहकार्यमा कार्यान्वयन गर्नु गराउन निर्देशन गरिएको र बनक्षेत्रमा अन्य अत्यावश्यक कार्यको लागि बिना पास वन प्रवेश निषेधको व्यवस्था गरिएको छ ।अधिकृत सिहले बताए ।