नेपालमा ओमिक्रोनको नयाँ भेरियण्ट ‘बीए फाइभ’ फेला

काठमाडौँ । नेपालमा कोरोना भाइरस (कोभिड–१९) को ओमिक्रोन भेरियण्टअन्तर्गत नयाँ उपप्रजाति ‘बीए फाइभ’ देखा परेको छ । धुलिखेल अस्पतालले गरेको अनुवांशिक परीक्षण (जिन सिक्वेन्सिङ) मा ओमिक्रोनको उपप्रजाति ‘बीए फाइभ’ पुष्टि भएको हो ।

अस्पतालका प्रयोगशाला तथा संक्रामक रोग अनुसन्धान प्रमुख प्रा. डा. राजीव श्रेष्ठका अनुसार अन्य प्रयोगशालाबाट संकलन गरिएको सिक्वेन्सिङमार्फत ‘बीए फाइभ’ उपप्रजाति भेटिएको हो ।

अन्य प्रयोगशालाबाट संकलित नमुना भएकाले थप जानकारी उपलब्ध नभएको अस्पतालले जानकारी दिएको छ । अहिले ओमिक्रोन भेरियण्डका दुई नयाँ उपप्रजातिले संक्रमण दर विश्वका केही देशमा पुनः बढिरहेको छ ।

दक्षिण अफ्रिकामा उत्पत्ति भएको बीए फोर र बीए फाइभ उपप्रजातिले युरोप, अमेरिका, जर्मनी हुँदै नेपालसम्म फैलिएको हो । अन्य भेरियन्टभन्दा ओमिक्रोनको उपप्रजाति ‘बीए फाइभ’ छिटो फैलिएको पाइएको शुक्रराज ट्रपिकल तथा सरुवा रोग अस्पतालले जनाएको छ ।

यसअघि कोरोना भाइरसका अल्फा र डेल्टाजस्ता प्रमुख भेरियण्ट फैलिएको थियो । नयाँ लहर आउँदा कत्तिको घातक हुन्छ भन्ने कुरा विभिन्न तत्वले प्रभाव अस्पतालले जनाएको छ ।

नयाँ उपप्रजातिले पनि वृद्धवृद्धालाई वा अरु स्वास्थ्य समस्या रहेका मानिसलाई गम्भीर बिरामी बनाउन सक्ने अनुमान गरिएको छ । ओमिक्रोनले स्वरुपमा निरन्तर परिवर्तन भइरहेको र फैलनका लागि सहज वातावरण बनाउँदै गएकाले कस्तो अवस्था ल्याउँछ भन्न नसकिने भएको छ ।

पछिल्लो समय नेपालमा कोरोना भाइरसको संक्रमण तीव्र गतिमा वृद्धि हुँदै आएको छ ।