बुधबार थप २ सय १० जनामा कोरोना पुष्टि

काठमाडौँ । नेपालमा पछिल्लो २४ घण्टामा थप २ सय १० जना कोरोना भाइरस संक्रमण पुष्टि भएको छ।

स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रायका प्रवक्ता डा. जागेश्वर गौतमले २ सय १० जनामा कोरोना भएको जानकारी गराएका हुन्।

डा. गौतमले पछिल्लो २४ घण्टामा कोरोना निको हुनेको संख्या १ सय ४६ रहेको जानकारी दिए। गौतमका अनुसार योसँगै कुल संक्रमितको संख्या १९ हजार २ सय ७३ पुगेको छ।

उनका अनुसार हालसम्म १४ हजार २१ जना कोरोना निको भएका छन्। कुल कोरोना निको हुने संख्या ७२ दशमलव ७ प्रतिशत रहेको उनले जानकारी दिए ।

पछिल्लो २४ घण्टामा छ हजार ३७ जनाको आरटी पीसीआर परीक्षण गरिएको मन्त्रालयले जनाएको छ । क्वारेन्टिनमा १४ हजार ४७१ जना रहेका छन् । हाल सक्रिय संक्रमितको संख्या ५ हजार २ सय ३ रहेको छ।