July 31, 2020
जनकपुरधाम। प्रदेश २ का न्यायाधीशमा कोरोना संक्रमण पुष्टि भएको छ। बिहीबार उच्च अदालत जनकपुरधामका एकजना न्यायाधीशमा कोरोना संक्रमण पुष्टि भएको हो। न्यायाधीश ५० वर्षीय रहेको अदालत स्रोतले जनाएको छ।
यही साउन १३ गते उच्च अदालतका न्यायाधीशसहित २२ जनाको स्वाब संकलन गरी जाँच गरेकोमा न्यायाधीसको स्वाबमा कोरोना पोजेटिभ आएको हो।
न्यायाधीशमा पनि कोरोना संक्रमण पुष्टि भएपछि लकडाउनको अवधीमा गरिँदै आएका निश्चित कामकारवाहीबाहेक अन्य काम साउन १६ गतेदेखि ३१ गतेसम्म स्थगित गर्ने निर्णय उच्च अदालतले गरेको छ।
उच्च अदालत जनकपुर, जिल्ला अदालत धनुषा, जिल्ला सरकारी वकिल कार्यालय र नेपाल बार एशोसिएसनसँग छलफल गरी यस्तो निर्णय गरिएको उच्च अदालतले जनाएको छ।
प्रदेश २ मा न्यायाधीशमा कोरोना संक्रमण पुष्टि भएको यो दोस्रो केस हो । यसअघि उच्च अदालत जनकपुरधामको राजविराज इजलासका ५८ वर्षीय न्यायाधीशमा कोरोना संक्रमण पुष्टि भएको थियो।
प्रकाशित मिति:July 31, 2020
