कांग्रेसको कोशी प्रदेश सम्मेलन आजदेखि, डा. शेखरले बहिष्कार गर्ने

काठमाण्डू, नेपाली कांग्रेस कोशी प्रदेशको सम्मेलन आजदेखि सुरु हुँदैछ ।

सम्मेलनको सभापति शेरबहादुर देउवाले उद्घाटन गर्ने तय भएको छ । उनी शुक्रबार नै विराटनगर पुगिसकेका छन् ।

सम्मेलनमा उपसभापति पूर्णबहादुर खड्का, महामन्त्रीहरू गगनकुमार थापा, विश्वप्रकाश शर्मालगायतका नेताहरू पनि सम्मेलनमा सहभागी हुनेछन् ।

सम्मेलनमा प्रदेश कार्यसमितिको वार्षिक कार्य प्रगतिको समीक्षाका साथै आगामी रणनीतिबारे छलफल गरी निर्णय गरिनेछ । कोशीमा संघीयतापछि पहिलोपटक सम्मेलन हुन लागेको हो ।

संस्थापनइतर पक्षका नेता डा. शेखर कोइरालाले भने आफ्नै प्रदेशको सम्मेलन पनि बहिष्कार गर्ने भएका छन् ।

नेपाली कांग्रेसका नेता डा. कोइरालाले आफ्नै प्रदेशको सम्मेलन बहिष्कार गर्ने भएका छन् ।

स्रोतका अनुसार, वरीयता विवाद भएपछि डा. शेखर विराटनगरमा हुने सम्मेलनमा सहभागी नहुने भएका हुन् ।

उनले सभापति देउवापछिको वरीयतामा दाबी गरिरहेका छन् । तर, दोस्रो वरीयतामा उपसभापति खड्का छन् ।

अरु सबै शीर्ष नेता विराटनगर पुगिसक्दा कोइराला भने आज चितवनमा हुने दुईवटा शोकसभामा सहभागी हनु लागेको उनको सचिवालयले जनाएको छ ।