नेपाल पत्रकार महासंघको निर्वाचन आज

काठमाण्डू, नेपाल पत्रकार महासंघको २७औं महाधिवेशन आज हुँदै छ। महासंघको तीनै तहको निर्वाचनको सम्पूर्ण तयारी पूरा भएको केन्द्रीय निर्वाचन समितिले जनाएको छ।

केन्द्रीय समिति, १० प्रदेश समिति र ७७ जिल्ला शाखा तथा ४१ प्रतिष्ठान शाखामा नयाँ नेतृत्व चयनका लागि आज मतदान हुन लागेको हो।

निर्वाचनका लागि केन्द्र, प्रदेश र शाखाहरूमा उम्मेदवार मनोनयनको प्रक्रिया सम्पन्न भएको केन्द्रीय निर्वाचन समितिका संयोजक प्रा।.चिरञ्जीवी खनालले जानकारी दिए ।

महासंघको आगामी अध्यक्षका लागि देवीप्रसाद सापकोटा, निर्मला शर्मा, रमेश विष्ट र लालसिंह लामाले उम्मेदवारी दिएका छन्।

वरिष्ठ उपाध्यक्ष पदका लागि गोविन्दप्रसाद चौलागाईं, दीपक आचार्य र रोशन पुरीले उम्मेदवारी दिएका छन्।

त्यस्तै, उपाध्यक्ष महिलामा नितु पण्डित र गंगा पौडेलको उम्मेदवारी परेको छ ।

समावेशी उपाध्यक्षमा उमिदप्रसाद बागचन्द, मोहनकुमार सिंह र सुभाषप्रसाद साहले उम्मेदवारी दिएका छन्।

त्यस्तै, महासचिवमा जन्मदेव जैशी, प्रकाश थापा, रामप्रसाद दाहाल र लेखनाथ न्यौपानेले उम्मेदवारी दिएका छन्।

नेपाल प्रेस युनियन र प्रेस चौतारी नेपालबीच गठबन्धन बनाएर प्यानल घोषणा गरेको हो।

उक्त समूहको नेतृत्व प्रेस चौतारीको तर्फबाट निर्मला शर्माले गर्नुभएको छ ।

वरिष्ठ उपाध्यक्ष, महासचिव, उपाध्यक्ष, सचिवमा प्रेस युनियनका तर्फबाट दीपक आचार्य, रामप्रसाद दाहाल, उमिद बागचन्द, सोनी शर्मा, रमेश खतिवडा, प्रकाश धौलाकोटीसहितको टिम चुनावी मैदानमा छ।

महिला उपाध्यक्ष र कोषाध्यक्षमा चौतारीका नितु पण्डित र रामकृष्ण ज्ञवाली छन् ।

अर्को समूहमा प्रेस सेन्टरले निवर्तमान वरिष्ठ उपाध्यक्ष रमेश विष्टलाई अघि सारेको छ।

वरिष्ठ उपाध्यक्षमा रोशन पुरी र महासचिवमा लेखनाथ न्यौपानसहितको समूह चुनावी मैदानमा छन्।

केन्द्रीय समितिका पदाधिकारी तथा सदस्य र लेखा समितिका लागि केन्द्रीय निर्वाचन समितिले मतपत्र छापेर प्रदेश निर्वाचन समितिमार्फत शाखाहरूमा पुर्‍याइसकेको छ।

यसपटकको निर्वाचनमा केन्द्रीय समितिका लागि ३ वटा मतपत्र रहेको छ।

केन्द्रीय पदाधिकारीका लागि हल्का निलो, प्रदेशबाट निर्वाचित हुने केन्द्रीय सदस्यका लागि सेतो र अन्य केन्द्रीय सदस्य तथा लेखा समितिका लागि हल्का गुलावी रङको मतपत्र रहेको छ।

प्रदेश कार्यसमिति र शाखा कार्यसमितिले मतपत्रको ढाँचा र रङ आफैं छनोट गर्नेछन्। मतदाताले गोप्य मतदानबाट ३ तहको नेतृत्व छनोटका लागि मताधिकार प्रयोग गर्नेछन्।

मतदान स्थलमा जाँदा आफ्नो परिचय खुल्ने म्याद भएको महासंघद्वारा जारी परिचयपत्र वा सूचना तथा प्रसारण विभागद्वारा जारी परिचयपत्र वा नागरिकताको प्रमाणपत्र वा राष्ट्रिय परिचयपत्र वा नेपाल सरकारद्वारा जारी गरिएको परिचय खुल्ने तस्विरसहितको परिचय पत्रका साथ उपस्थित भई मतदान गर्नुपर्नेछ।

देशभरका पत्रकार केही दिनयता चुनावी अभियानमा व्यस्त छन्।