बाजुराको जगन्नाथ गाउँपालिका केन्द्र भएर ५.२ म्याग्निच्यूडको भूकम्प, केही घरमा क्षति

धनगढी, सुदूरपश्चिम प्रदेशको विकट जिल्ला बाजुरामा आज बिहान ५.२ रेक्टर स्केलको भूकम्प गएको छ ।

जगन्नाथ गाउँपालिका ५ को गोत्री केन्द्रबिन्दू बनाएर बिहान ४: १४ बजे भूकम्प गएको प्रदेश आपत्कालीन कार्यसंचालन केन्द्र धनगढीले जानकारी दिएको छ ।

वडाध्यक्ष गौरी सार्कीका अनुसार, भौतिक क्षतिका विवरण सङ्कलन भइरहेको छ । “केही घरमा क्षति भएको हुन सक्छ, तर अहिलेसम्म मानवीय क्षतिबारे कुनै सूचना प्राप्त भएको छैन,” उनले बताए ।

जिल्ला प्रशासन कार्यालयका प्रमुख जिल्ला अधिकारी मेघनाथ पाध्याले पनि मानवीय क्षति नभएको पुष्टि गरेका छन् । “धेरै ठाउँमा भूकम्पको धक्का महसुस भए पनि कुनै गम्भीर क्षतिको सूचना छैन,” उनले भने।

केन्द्रका अनुसार भूकम्पबाट भएको क्षतिको विवरण आउन बाकी रहेको छ । प्रदेश अस्थायी राजधानी धनगढीसहित भारतसम्म भूकम्पको महसुस गरिएको छ ।