December 26, 2024
काठमाण्डू, नेकपा एमालेको साधारण सदस्यबाट समेत निष्कासित भएका भीम रावलले नयाँ पार्टी खोल्ने तयारी थालेका छन्।
आफूमाथि केपी शर्मा ओली नेतृत्वको एमालेले कारबाही गरेपछि उनले नयाँ पार्टी बनाउने विषयमा आफू निकटका नेताहरूसँग छलफल सुरु गरेका हुन्।
नयाँ पार्टी खोल्ने र एमालेले आफूमाथि गरेको कारबाहीको विषयमा रावलले छिट्टै पत्रकार सम्मेलन आयोजना गर्ने तयारी पनि गरेका छन्।
तर, नयाँ दलको घोषणा गर्नअघि उनले देशका केही स्थानमा कार्यकर्तालाई भेट्न जाने योजना बनाएका छन्।
‘पत्रकार सम्मेलनमा केपी ओलीले गरेको निर्णयबारे आफ्नो कुरा राख्नु हुन्छ। त्यसपछि देशव्यापी अभियानमा निस्कने योजना छ,’ स्रोतले भन्यो।
रावल निकट स्रोतका अनुसार माधव नेपालको नेकपा एकीकृत समाजवादीले पनि रावललाई पार्टीमा आउन आग्रह गरिरहेको छ। तर, त्यो विषयमा रावलले उति चासो देखाएका छैनन्।
दशौं महाधिवेशनयता लगातार पार्टी निर्णयविपरीत गतिविधि गरेको आरोप लगाएर एमालेले बुधबारको सचिवालय बैठकबाट रावललाई निस्कासन गरेको छ।
दसौँ महाधिवेशनमा रावलले ओलीविरुद्ध उम्मेदवारी दिएका थिए। तर उनी ओलीसँग पराजित बनेका थिए।
एमालेबाट आफूलाई निष्कासन गर्ने निर्णयको विरोधमा उत्रन भीम रावलले आफू पक्षका कार्यकर्तालाई अपिल गरेका छन्।
सामाजिक सञ्जाल एक्समार्फत् रावलले आफूलाई निष्कासन गर्ने एमाले सचिवालय बैठकको निर्णयको विरोधमा समर्थन खोजेका हुन्।
‘सबै देशभक्त, न्यायप्रेमी, सुशासन, सुनिश्चित प्रणाली तथा जनताको समृद्धि र उज्यालो भविष्यप्रति प्रतिबद्ध इमान्दार पार्टी कार्यकर्ता र जनसमुदायले केपी ओलीको अन्यायपूर्ण निर्णयको विरोध गर्नेमा म विश्वस्त छु,’ रावलले एक्समा लेखेका छन् ।
रावलले पार्टी सदस्यबाट आफूलाई हटाउने निर्णयलाई ओलीको सत्ताउन्माद, निरकुंश, स्वेच्छाचारी र तानाशाही निर्णय भन्दै आएका छन्।
प्रकाशित मिति:December 26, 2024
