January 8, 2025
विराटनगर, सहकारी ठगी प्रकरणमा प्रहरीको फरार सूचीमा रहेकी एमाले सांसद ऋषिकेश पोखरेलकी श्रीमती अञ्जला कोइराला बुधबार अदालतमा उपस्थित भएकी छन्।
मोरङ जिल्ला अदालत स्रोतका अनुसार बुधबार अदालतमा हाजिर भएकी कोइरालाको थुनछेक बहस सुरु हुँदै छ।
मोरङ धनपालथान–४ मा रहेको उमागौरी कृषि सहकारीको रकम अपचलनमा कोइरालाको नाम जोडिएको थियो। पुस २ गते पक्राउ पुर्जी जारी भएपछि शिक्षिका कोइराला स्कुल बिदा लिएर फरार भएकी थिइन्।
उक्त सहकारीको सञ्चालक पदबाट कोइरालले ५ माघ २०७८ मा राजीनामा दिएकी थिइन्।
सहकारीका अध्यक्ष शम्भु रौनियार, अञ्जला, रंगेली(२ का वडाध्यक्ष सन्तलाल खवाससहित २६ जनाविरूद्ध अदालतले पक्राउ पुर्जी जारी गरेको थियो। वडाध्यक्ष खवास भने ५ लाख धरौटीमा रिहा भइसकेका छन्।
उनका सांसद श्रीमान पोखरेल प्रतिनिधिसभाको सार्वजनिक लेखा समितिका सभापति हुन्।
यता पोखरेलका स्वकीय सचिव अनिलकुमार पोखरेलविरुद्ध पनि ठगी आरोपमा अदालतले पक्राउ पुर्जी जारी गरेको छ।
प्रकाशित मिति:January 8, 2025
