अदालतमा प्रतिकूल बकपत्र गरेपछि सरकारी साक्षीविरुद्ध भ्रष्टाचार मुद्दा दायर

काठमाडौँ । अख्तियार दुरुपयोग अनुसन्धान आयोगले विशेष अदालतमा चलिरहेको भ्रष्टाचार मुद्दामा सरकारी साक्षीका रूपमा पेस गरिएका तीन जना विरुद्ध आज आरोपपत्र दायर गरेको छ। 

अदालतमा उपस्थित भई बयान फेरेको पुष्टि भएपछि आयोगले उनीहरू विरुद्ध मुद्दा दायर गरेको हो। आरोपपत्र दायर गरिएकाहरूमा विप्लव पोख्रेल, प्रल्हाद गौतम र राजेश श्रेष्ठ रहेका छन्।

आयोगका सहायक प्रवक्ता गणेशबहादुर अधिकारीका अनुसार विशेष अदालतमा दर्ता भएको प्रतिवादी ढुण्डिराज दाहाल रहेको भ्रष्टाचार मुद्दामा ती तीन जनालाई अनुसन्धानमा सहयोग गरेको आधारमा प्रतिवादी नबनाई सरकारी साक्षीका रूपमा प्रस्तुत गरिएको थियो ।

तर, उनीहरूले गत वैशाख २५ गते विशेष अदालतमा उपस्थित भएर अनुसन्धान अधिकृतसमक्ष दिएको बयानविपरीत बकपत्र गरेको पुष्टि भएपछि पुनः अनुसन्धान गरी उनीहरूविरुद्ध मुद्दा दायर गरिएको आयोगले जनाएको छ । भुक्तानी प्रक्रिया सहज बनाउन विप्लव पोख्रेलले आरएसभी मेटलको तर्फबाट २७ हजार ३५० रूपैयाँ र अभियान्ता नेपालको तर्फबाट २९ हजार रूपैयाँ गरी कूल ५६ हजार ३५० रूपैयाँ घुस दिएको पुष्टि भएको छ ।

त्यस्तै, प्रल्हाद गौतमले शुभश्री टेक्नोलोजिज लगायतको तर्फबाट ३७ हजार ५०० रूपैयाँ तथा राजेश श्रेष्ठले विप्लव पोख्रेलमार्फत २७ हजार ३५० रूपैयाँ घुस दिएको अख्तियारको दाबी छ । तीन जनाले दिएको कूल घुस रकम ९३ हजार ८५० रूपैयाँ रहेको आयोगले जनाएको छ ।

अख्तियारले उनीहरूको उक्त कार्य भ्रष्टाचार निवारण ऐन, २०५९ को दफा ३(३) अनुसारको कसुर भएको उल्लेख गर्दै बिगो बराबरको सजाय मागदाबीसहित विशेष अदालत काठमाडौंमा आरोपपत्र दायर गरेको जनाएको छ ।