मेयर बालेन्द्र शाहद्वारा चुनावी खर्च विवरण सार्वजनिक, कुन शीर्षकमा कति ?

काठमाडौं । काठमाडौं महानगरपालिकाका मेयर बालेन्द्र शाह (बालेन) ले चुनावी खर्च विवरण सार्वजनिक गरेका छन् । हिजो सार्वजनिक विवरणअनुसार शाहको चुनावी अभियानमा कूल खर्च तीन लाख ९४ हजार ४८९ उल्लेख गरिएको छ ।

उनले आज सामाजिक सञ्जालमा सार्वजनिक गरेको विवरण अनुसार उनले काठमाडौंको मेयरमा निर्वाचित हुन करिब ४ लाख मात्रै खर्च गरेको देखिन्छ ।

आफ्नो चुनावी अभियानमा ३ लाख ९४ हजार चार सय ८९ रुपैयाँ खर्च भएको बालेनले जानकारी दिएका छन् ।

यसमध्ये मतगणनाका क्रममा मात्रै एक लाख रुपैयाँभन्दा बढी खर्च भएको हाे । मतगणनामा ढिलाइ हुँदा निर्वाचन प्रक्रिया लामो र बोझिलो बनेको मात्र नभई उम्मेदवारका लागि पनि महँगो भएको बालेनले गुनासो गरेका छन् ।

खर्च विवरण सार्वजनिक गर्न ढिलाइ भएकोमा समेत उनले माफी मागेका छन् ।

बालेनका अनुसार सबैभन्दा बढी खर्च गोष्ठी र कार्यकर्ता परिचालनमा भएको छ । १५ दिन १८५ र २४५ जनालाई खाजा र खानामा १ लाख १३ हजार ५०० रुपैयाँ खर्च भएको उनले बताए ।