स्थायी शिक्षकको पदपूर्तिका लागि विज्ञापन खोल्दै आयोग

काठमाडौँ ।  शिक्षक सेवा आयोगले चालु आर्थिक वर्ष २०७९/०८० को पदपूर्तिसम्बन्धी वार्षिक कार्यतालिका सार्वजनिक गरेको छ । सार्वजनिक कार्यतालिका अनुसार स्थायी शिक्षकको पदपूर्तिका लागि आगामी फागुनभित्रमा विज्ञापन गरिसक्नेछ । 

वैशाखभित्रमा प्रथम चरणको परीक्षा गरिसक्ने कार्ययोजना आयोगको छ । आयोगले माध्यमिक तृतीय तहको विज्ञापन पुसभित्रमा निकाल्नेछ । त्यस्तै निम्न माध्यमिक तहको विज्ञापनका लागि सूचना माघभित्रमा निकाल्नेछ । भने प्राथमिक तहका लागि फागुनभित्रमा विज्ञापन आह्वान गर्नेछ । 

माध्यमिक तहको सामान्य परीक्षा फागुनमा, निम्न माध्यमिक तहको चैतमा र प्राथमिक तहको परीक्षा वैशाखभित्रमा गरिसक्ने कार्यतालिका छ । सामान्य परीक्षा वैशाखभित्रमा गरिसक्ने भनेपनि त्यसको नतिजाका विषयमा भने आयोगले कार्यतालिकामा केही उल्लेख गरेको छैन । आयोगका सूचना अधिकारी सुदर्शन मरहट्ठाले चालु आर्थिक वर्षमा सामान्य परीक्षा मात्र लिन सकिने बताए । अघिल्लो आर्थिक वर्षमा लिइएको स्थायी शिक्षक विज्ञापनको नतिजा प्रकाशन गर्न सकिएको छैन । त्यसका लागि अझै केही समय लाग्ने आयोगले जनाएको छ । 

‘पुरानो नै सकिएको छैन । हामीले यो आर्थिक वर्षमा परीक्षा गर्न मात्र सक्छौँ । सिफारिस गर्न सकिँदैन । आर्थिक वर्ष २०८०/०८१ मा अन्तर्वार्ता लिने, सिफारिस गर्ने लगायतका काम हुन्छन् ।’ सूचना अधिकारी मरहट्ठाको भनाई छ । असारभित्रमा बाँकी काम गर्न नसकिने भएकाले वार्षिक कार्यतालिकामा थप कामहरू उल्लेख नगरिएको उनको भनाई छ । 

‘माध्यमिक तहको वैशाखसम्ममा सामान्य परीक्षा गर्न सकिनेछ । अरूको कसैको चैतमा, कसैको वैशाखमा हुनेछ । बाँकी परीक्षा र प्रक्रिया आगामी आर्थिक वर्षमा जानेछ,’ मरहट्ठाले भने । अध्यापन अनुमति पत्र (लाइसेन्स) का लागि चैत/वैशाखभित्रमा विज्ञापन आह्वान गर्नेछ । भने असारमा परीक्षा गर्ने कार्यतालिका बनाएको छ ।