शेखर-गगन समूहलाई ३०% भाग दिन

काठमाडौँ । नेपाली काँग्रेसभित्र देखिएको विवाद समाधानका लागि सभापति शेरबहादुर देउवा लचक भएका छन् । सम्मानजनक भागबण्डाको माग गर्दै शेखर र गगन समूहले लगातार दबाब बढाउँदै लगेपछि चुनावमा सम्भावित जोखिम टार्न सभापति एवं प्रधानमन्त्री देउवा मिलाएर लैजाने मनस्थितिमा पुगेको बालुवाटार स्रोतले बताएका छन् ।

यसका लागि समानुपातिक तथा प्रत्यक्षतर्फको टिकट बाँडफाँटमा शेखर र गगन समूहलाई कम्तीमा ३० प्रतिशत हिस्सा दिन देउवा तयार भएका छन् । इतर समूहले ४० प्रतिशतलाई टाइमलाइन बनाएका थिए ।

पार्टीभित्र सङ्घर्ष, त्याग तथा लोकतान्त्रिक आन्दोलनमा पुर्‍याएको योगदानका आधारमा कसैलाई अन्याय हुन नदिनेमा प्रधानमन्त्री प्रतिबद्ध रहेको सचिवालयका एक सदस्यले बताए ।

असोज ३ गते काँग्रेसले निर्वाचन आयोगमा पेस गरेको बन्दसूची एकपक्षीय भएको भन्दै शेखर(गगन समूहले खबरदारीका कार्यक्रमहरू गरिरहेको छ । यो समूहका नेता(कार्यकर्ताले हिजो पार्टी केन्द्रीय कार्यालयमा धर्नासमेत दिएको थियो ।

यसैक्रममा मंगलबार बसेको पार्टी पदाधिकारी बैठकमा देउवाले समानुपातिक सूची सच्याउने प्रतिबद्धता जनाएका थिए । शेखर समूहले उक्त बन्दसूची सच्याउन आजसम्मको अल्टिमेटम दिएको थियो । सत्तारुढ गठबन्धनबीचमा भइरहेको सीट बाँडफाँटमा पनि आफ्नो समूहका नेताको सम्भावना रहेको ठाउँमा अन्यलाई नै दिने तयारी भएको इतर समूहको आशङ्का थिए । उनीहरू देशभर उम्मेदवार दिने तयारीका साथ छुट्टै सूचीको गृहकार्यमा समेत जुटेका थिए ।

अहिले सभापति देउवाले शेखर कोइरालासहित सो समूहका शीर्ष नेता र पार्टी पदाधिकारीलाई बालुवाटार डाकेर छलफल गरिरहेका छन् । बन्दसूची संशोधन गर्ने सम्बन्धमा छलफल भइरहेको स्रोतले बताएको छ।