रविलाई गृहमन्त्रीमा पूनः बहाली गर्न दबाब

काठमाडौं, १५ माघ । नेकपा (एमाले) का अध्यक्ष केपी शर्मा ओली र प्रधानमन्त्री पुष्पकमल दाहालबीच भेटवार्ता भैरहेको छ। प्रधानमन्त्री दाहाललाई भेट्न ओली अहिले बालुवाटार पुगेका हुन् । ओलीले गृहमन्त्रीमा रवि लामिछानेलाई पूनः बहाली गर्न दबाब दिएको चर्चा छ । तर, ओलीको दबाब प्रचण्डले नमानेको चर्चा छ ।

प्रधानमन्त्री पुष्पकल दाहालले गृहमन्त्रालय राष्ट्रिय स्वतन्त्र पार्टीलाइृ नदिने मनशाय बनाएका छन् । यसअघि सरकार गठनमा भागबण्डा मिलाउँदा गृह मन्त्रालय राष्ट्रिय स्वतन्त्र पार्टीलाई परेको थियो । सोही सहमतिअनुसार गृहमन्त्रालयसहित रास्वपा सरकारमा सहभागी भएको थियो । तर, सो पार्टीका सभापति रवि लामिछाने नागरिकता विवादमा मुछिएको र सर्वोच्च अदालतले शुक्रबार उनी सांसद र मन्त्री हुन अयोग्य भनेपछि अहिले गृहमन्त्रालयको जिम्मेवारी पनि प्रधानमन्त्रीको काँधमा छ ।

रविले आजै जिल्ला प्रशासन कार्यालय, काठमाडौंमा पुगेर नागरिकता पूनः प्राप्ति गरेका छन् । अहिले उनको दलको बैठक छ । सम्भवतः आजै उनी पार्टीको सभापतिमा नियुक्त हुनेछन् । सत्ता गठबन्धनमा अहिले गृहमन्त्रालयबारे के गर्ने भन्नेबारे निर्णय भएको छैन् । तर, विशेष सूत्रका अनुसार प्रधानमन्त्री दाहाल अब गृहमन्त्रालय आफ्नै दलको भागमा राख्न छन् ।

उनले आफ्नो दलबाट गृहमन्त्री कसलाई बनाउने भन्नेबारे छलफल थालेको बताईएको छ । तर, रास्वपाका नेताहरुले भने गृहमन्त्रालय आफ्नो दलको भागमा परेको भन्दै गृहमन्त्रालय नपाए सरकारमा नबस्ने चेतावनी दिएका छन् ।