पेट्रोल छर्की आगो लगाउँदा २ वर्षीय छोराको मृत्यु

नेपालगञ्ज- कोहलपुरका एक पुरुषले आफ्नी श्रीमती र छोरालाई आगो लगाउँदा छोराको मृत्यु भएको छ। कोहलपुरका भानुभक्त विकले श्रीमती र छोरालाई आगो लगाउँदा दुई वर्षीय छोराको मृत्यु भएको प्रहरीले जनाएको छ।

कोहलपुर नगरपालिका–२ शक्तिनगर बस्ने ३० वर्षीय भानुभक्त बिकले घरायसी झगडा परेपछि आमा र छोराको शरीरमा पेट्रोल छर्केर आगो लगाएका थिए । आगोमा जलेर भानुभक्तकी आफ्नै श्रीमती ३० वर्षीया गंगा बिक गम्भीर घाइते भएकी छन् ।

उनकै छोरा २ वर्षीय प्रिन्स बिकको मृत्यु भएको छ । आगो लगाउने भानुभक्त बिकलाई जमुनाहा नाकाबाट आज (सोमबार) बिहान प्रहरीले नियन्त्रणमा लिएको छ ।

आगो लगाउँदा जलेर गम्भीर घाइते भएका गंगा बिक र प्रिन्स बिकको मेडिकल कलेज कोहलपुरमा सामान्य उपचार पश्चात् थप उपचारको लागि भेरी अस्पताल नेपालगञ्ज पठाइएकोमा उपचारको क्रममा प्रिन्स बिकको सोमबार बिहान मृत्यु भएको हो ।

यस घटनाको सम्बन्धमा प्रहरीले थप अनुसन्धान गरिरहेको जनाएको छ ।