जसपाका अध्यक्ष उपेन्द्र यादवले प्रश्न गर्दै “कर्मचारीले बनाइदिएको नीति–कार्यक्रम पढेर समाजवाद आउँछ”

काठमाडौँ । जसपा नेपालका अध्यक्ष उपेन्द्र यादवले कर्मचारीले बनाएको नीति तथा कार्यक्रम पढेर समाजवाद नआउने बताएका छन् । आइतबार काठमाडौँमा समाजवादी मोर्चाले आयोजना गरेको कार्यक्रममा उनले कर्मचारीले नै बनाएको नीति तथा कार्यक्रम, बजेट र कानुन ल्याइने गरिएको बताएका हुन् । “पार्टीहरू बाहिर लामालामा भाषण गर्छौँ, कार्यकर्तालाई पनि खुब उत्तेजित पार्छौँ । सरकारमा गएपछि त्यहाँको कर्मचारीले लेखिदिन्छ, नीति तथा कार्यक्रम, त्यो पढेर देश बनाउन खोज्छौँ, त्यो कहिल्यै हुँदैन,” उनले भने, “कर्मचारीले बनाइदिएको नीतिकार्यक्रम पढेर समाजवाद आउँछ ? कर्मचारीले सरकारको नीति बनाउँछ, बजेट बनाउँछ, कर्मचारीले कानुन ल्याइदिन्छ, हामी संसद्मा थपडी बजाउँछौँ र पास गर्दिन्छौँ, देश जतासुकै जाओस् ।”