मेगा बैंक ११ औं वर्षमा प्रवेश

काठमाडौं । मेगा बैंक संचालनको ११ औं बर्षमा प्रवेश गरेको छ । १० औं बार्षिकोत्सवको अवसरमा बैंकका अध्यक्ष भोजबहादुर शाहले ग्राहकहरु, संस्थापक, शेयरधनीहरु, संचालक समिति, नियामक निकाय, कर्मचारीवर्ग र अन्य सरोकारवालाहरुहरुको निरन्तर सहयोग र अटुट विश्वासका कारण मेगा बैंकले सफलता हासिल गरेको बताए।

शाहले पश्चिमाञ्चल विकास बैंक र टुरिजम डेभलपमेन्ट बैंकसँगको मर्जर गर्दै गण्डकी विकास बैंकलाई प्राप्ति गर्नु मेगा बैंकको महत्वपूर्ण उपलब्धी भएको बताए । मर्जर र प्राप्तिका लागि ढोका खुल्ला नै रहेको जानकारी दिँदै उनले मेगा बैंकलाई समृद्ध र विशाल बनाउने यात्रा जारी रहेको बताए।

बैंककी प्रमुख कार्यकारी अधिकृत अनुपमा खुञ्जेलीले दश बर्षको वित्तिय सूचकांकलाई हेर्दा एक दशकको छोटो समयमै देशकै अग्रणी बैंक बन्न सफल भएको बताइन्।

बैंकले आफ्नो सञ्चालन खर्च तथा कोषको लागतलाई न्यूनतम राखी आधारदरलाई ८ दशमलव३२ प्रतिशतमा कायम राख्न सफल भएको जनाएको छ। जसले गर्दा कोभिड १९ को महामारी र बन्दाबन्दीको मारमा परेका कर्जा ग्राहकवर्ग र नयाँ व्यावसाय बिस्तार गर्ने तयारीमा रहेका ग्राहकहरुलाई मेगा बैंकले सस्तो ब्याजदरमै बिभिन्न किसिमका कर्जा उपलब्ध गराउने जनाएको छ।

‘बार्षिकोत्सवको अवसर पारेर बैंकले ‘मेगा टीक बैंकिङ’ तथा ‘मेगा बजार’ जस्ता डिजिटल बैंकिङ सेवा आरम्भ गर्ने घोषणा गरेको छ।

बैंक चुक्ता पुँजीका हिसाबले छैटौं स्थानमा, व्यावसाय (निक्षेप तथा कर्जा) का आधारमा १२ औं स्थानमा रहेको जनाएको छ। २०७७ आषाढ मसान्तसम्ममा बैंकको कुल निक्षेप करिब १ खर्ब ३२ अर्ब र कुल कर्जा करिब १ खर्ब १४ अर्ब रहेको छ। बैंकले १८ सय भन्दा बढी कर्मचारीबाट देशभरका ५८ जिल्लामा २ सय ६ शाखा सञ्जालमार्फत ११ लाख भन्दा बढी ग्राहकहरुलाई सेवा प्रदान गरिरहेको जनाएको छ।